OMOCHANKO 1
1
Omogano bw’Ogotongwa
1Agwo Omochakano Nyasae nigo atongete igoro na ense. 2Na ense nigo yarenge bosa, tiyarenge na kieni kende, nigo yaare nomosunte otubete endiba; na Omoika o Nyasae nigo orenge goetanana igoro y’amache.
3Nyasae agateba, “Tiga oborabu bobeo”, na oborabu bokabao. 4Nyasae akarora oborabu obwo ng’a nobuya, agaatanana oborabu korwa ase omosunte. 5Nyasae akaroka oborabu boria omobaso, na omosunte akayoroka obotuko. Erio agwo rikaba mogoroba, naende bokaba mambia, rituko rie ritang’ani.
6Nyasae agateba, “Tiga eaanga ebe egati‐gati y’amache, yaatanane amache korwa ase amache ande.” 7Igo Nyasae agakora eaanga eria, agaatanana amache ayare inse y’eaanga korwa ase amache ayare igoro y’eaanga; akaba boigo. 8Nyasae akaroka eaanga eria igoro. Erio agwo rikaba mogoroba, naende bokaba mambia, rituko ria kabere.
9Erio Nyasae agateba, “Tiga amache ayare inse ya igoro asangererekane aase aamo, ense enyomo erorekane”; akaba boigo. 10Nyasae akaroka eria enyomo ense, na amache aria asangererekanete amo akayaroka chinyancha. Nyasae akarora ayio ng’a namaya. 11Naende Nyasae agateba, “Tiga ense emere ebinto bigokina, buna ebimeri bikorua chimbusuro, na emete ekwama amatunda are ne chimbusuro chire imeo, kera oyomo ase egesaku kiaye ekenyene”; akaba boigo. 12Na ense ekamera bionsi ebigokina: ebimeri bikorua chimbusuro chiabo chinyene, na emete ekwama amatunda are ne chimbusuro chire imeo, kera oyomo ase egesaku kiaye ekenyene. Nyasae akarora ayio ng’a namaya. 13Erio agwo rikaba mogoroba, naende bokaba mambia, rituko ria gatato.
14Erio Nyasae agateba, “Tiga emebaso ebe ase eaanga aaria igoro, yaatanane omobaso korwa ase obotuko; ero ebe ebimanyererio bikworokia Amatuko Amanene, na amatuko, na emiaka, 15ebe emebaso ase eaanga aaria igoro, eyee ense omobaso na oborabu,” akaba boigo. 16Nyasae agakora emebaso emenene ebere. Omobaso oria omonene ase eyio ebere ogambere ekero kia mobaso, na oria omoke ekero kia botuko; agakora ne ching’enang’eni boigo. 17Erio Nyasae akayebeka ase eaanga aaria igoro, eyee ense omobaso na oborabu, 18egambere omobaso na obotuko, na gwatanana oborabu korwa ase omosunte. Nyasae akarora ayio ng’a namaya. 19Erio agwo rikaba mogoroba, naende bokaba mambia, rituko ria kane.
20Nyasae agateba, “Tiga amache atware obonge bw’ebitongwa bire moyo, ne chinyoni chikoiruruka igoro ase ense, chigoetanana inse y’eaanga ya igoro.” 21Naende Nyasae agatonga ebitongwa ebinene bire ase amache ime, amo nebitongwa binde bionsi bire moyo, ebio bigoetanana ase obonge imeo; agatonga kera egesaku nengencho yaye. Agatonga ne chinyoni chibwate chimbaba, kera egesaku nengencho yaye. Nyasae akarora ayio ng’a namaya. 22Erio agwo Nyasae akabisesenia, agateba, “Ibora, momenteke, moichore ime ase chinyancha, ne chinyoni chibuche ase ense.” 23Erio agwo rikaba mogoroba, naende bokaba mambia, rituko ria gatano.
24Naende Nyasae agateba, “Tiga ense etware ebitongwa bire moyo, kera egesaku nengencho yaye: ching’iti chigotugwa, na echikwagura, ne ching’iti chi’orosana, kera egesaku nengencho yaye”; akaba boigo. 25Nyasae agakora ching’iti chi’orosana, kera egesaku nengencho yaye, ne ching’iti chigotugwa, kera egesaku nengencho yaye, ne ching’iti chikwagura, kera egesaku nengencho yaye. Nyasae akarora ayio ng’a namaya.
26Erio Nyasae agateba, “Tiga tokore omonto ase omogwekano oito, otogwekaine, agambere chinswe chia nyancha, ne chinyoni chikoiruruka igoro, ne ching’iti chigotugwa, ne ching’iti chionsi chi’orosana, na ense yonsi, ne ching’iti chionsi chikwagura igoro ase ense.” 27Nabo Nyasae agatonga mwanyabanto ase omogwekano oye omonyene; ase omogwekano o Nyasae ere akamotonga. Agatonga omosacha na omokungu. 28Nyasae akabasesenia, akabatebia, “Moibore, momenteke, moichore ase ense, na moyegambere. Mogambere ne chinswe chia nyancha, ne chinyoni chikoiruruka, na kera egetongwa kere moyo kegotaara igoro ase ense,” 29Naende Nyasae agateba, “Rora, nabaeire kera ekemeri gekwama chimbusuro ase ense engima, na kera omote okwama amatunda are ne chimbusuro chire imeo; nabio birabe endagera yaino. 30Na ebimeri ebibese bionsi nabirure bibe endagera ye ching’iti chionsi chire moyo ase ense”; akaba boigo. 31Nyasae akarigereria ebinto ebio bionsi akorete, na birobio nigo biarenge ebiya mono. Erio agwo rikaba mogoroba, naende bokaba mambia, rituko ria gatano na rimo.
Currently Selected:
OMOCHANKO 1: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020