Mphattuwelo 1
1
Upattusiya wo citthu cothene
1Wupaceroni Nluku hopattusa irimu ni itthaya. 2Ilapo yaari yoohi nnanna ni yoohi itthu. Ipiphi yahokhuneela ipahari ni Nnepa wa Nluku wanaweettakaca waculu maasi. 3Ni Nluku aheera: Ukhale waarya, ni uhokhala waarya. 4Nluku ahoona wiira waarya uri woorera, phimaana ahokawaniha waarya ni ipiphi. 5Nluku aheehana waarya nwe uthana, ni ipiphi ile aheehana uhiyu. Waheela n'usa; nno naari nihuku noopacera.
6Wahoolo Nluku aheera tho: Iriyari yo maasi nikhale nlaka ninhala ukawaniha maasi wawaya wawaya. 7Vano Nluku ahopanka nlaka ni ahokawanihaca maasi yaari vathi ni ale yaari ucuulu. Ni commo waheerannyaa. 8Nlaka nno Nluku aheehana irimu. Waheela n'usa; nno naari nihuku nonayeeli.
9Vaavale Nluku aheera: Maasi ari vathi waya irimu, athukumane nipuro nimoca, ikhale itthaya yowuuma. Ni commo waheerannyaa. 10Mphantte wo wuuma Nluku aheehana itthaya, ni nthukumano wo maasi aheehana ipahari. Ni Nluku ahoona wiira waari woorera. 11Vano Nluku aheera: Itthaya yothene ikhuneeliye ni itakhwa, maphumpulu ni miri cimmaha mihokorokho ni ipyo co khula nnanna. Ni commo waheerannyaa. 12Itthaya yahomela itakhwa yaarina maphumpulu o khula nnanna. Ni miri cowiima caavaha inuku co khula nnanna. Nluku ahoona wiira waari woorera. 13Waheela n'usa; nno naari nihuku noneeraru.
14Nluku aheera: Cikhale imwaleelo wirimu wiira cikawanihe uthana ni uhiyu, wiira cikhale cennyo nthoonyero wo'kati, mahuku ni myakha, 15ni cikhale comwaleela wirimu ni vathi. Ni commo waheerannyaa. 16Nluku ahopanka imwaleelo piili cuulupale; imwaleelo yuulupale iyo wiira ilamulele uthana ni yankani iyo wiira ilamulele uhiyu. Ciicammo ahopanka itthoottwa cinci. 17Nluku aheesa cennyo wanlakani no wirimu wiira cimwaleele itthaya, 18cilamulele uthana ni uhiyu, ni cikawanihe waarya ni ipiphi ni Nluku ahoona wiira waari woorera. 19Wahovira ucoocilo ni wicisu; nno naari nihuku noneecese.
20Ciicammo Nluku aheera: Mmaasini mmo akhale makhoto o'nama coomumula, ni iriyariru irimu ni itthaya avaave asaanuni. 21Commo Nluku ahopattusa inama cuulupale co mpahari ni inama cikhwawe coomumula cinkhala mpharyaa co khula nnanna, ni asaanuni othene o khula nnanna. Ni Nluku ahoona wiira waari woorera. 22Vano Nluku ahoreriha eeraka: Ntotholane ni muncereranyee! Ncare mmaasini o mpahari! Ni inuni citotholane vathi va! 23Waheela n'usa; nno naari nihuku noneethanu.
24Ni vaavale Nluku aheera: Watthayani cikhale inama cikumi co khula nnanna; nhuwo ni inama contakhwani ni masene o mwiilaponi, o khula nnanna. Ni commo waheerannyaa. 25Nluku ahopanka masene o khula nnanna, nhuwo wo khula nnanna, ni inama cineepurula co mwiilaponi co khula nnanna. Ni Nluku ahoona wiira waari woorera.
26Vano Nluku aheera: Nimpanke ntthu oolattana ni hi ni ookhala toko hi. Uyo alamulele ihopa cothene co mpahari, inuni cothene co wirimu ni inama cothene cuulupale co mwiilaponi, ni inama cothene cikani cineepurula vathi. 27Nluku ahompattusa ntthu oonlattana nawe, oolattana ni Nluku ahompattusa; nlopwana ni nthiyana phaapattusilyawe.
28Nluku ahaarerihaca, ni aheerelaca: Ntotholane ni muncereranyee! Ncare ni mmwaryeele ilapo yothene! Nlamulele ihopa cothene co mpahari, inuni cothene co wirimu ni inama cothene cineetta vathi. 29Nluku aheera tho: Kinawuvaha miri cothene cowiima cimenle ilapo yothene ni cinvaha ipyo, ni miri cothene cinvaha mihokorokho ni inuku. Cennyo cinkokhala coolya cinyu. 30Ni kinawuvahani matakhuru othene wiira akhale iyolya enyu mpaka ciicammo inama cothene cirina ukumi: inama cothene cuulupale co mwiilaponi, ni inuni cothene co wirimu ni inama cothene cineettakaca ilapo yo vathi. Ni commo waheerannyaa.
31Phimaana Nluku hoona wiira citthu cothene cipankilyawe, ciri coorera venci cinene. Waheela n'usa; nno naari nihuku nonasiita.
Currently Selected:
Mphattuwelo 1: NNI
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.