Lukas Tumoro ung kitap kenu
Tumoro ung kitap kenu
Ung kitap kenu ém pinantik ni Lukas. Ni sia én dokter wo zéi'kan tou Yahudi. Ni sia éng kakaria ni Paulus i mahwoka' u Nuwu' Lé'os tumoro si Yesus (Kol. 4:14). Si Lukas éng kimaria si Paulus i ni séra limampang ing kazua nimangé witi Makedonia (Kis. 16:9-10). U sirita tumoro si Yesus én totoz pinahtata'ula ni Lukas wia sé tou sé nimilek in esa péléng am pinahwanguna ni Yesus, a niitu ipantiknala mengiit a nimamuali rengané ing kataré makaz ing kamurian (Luk. 1:1-3). Si Lukas nimantik u Nuwu' Lé'os kenu in iwéhé wia péléng sé tou, sé ipahpuu-puuna é sé tou Yunani (kaapa sé tou zéi'kan Yahudi). Si Lukas nimantik ung kitap kenu wo toro uli-ulit kata'uala sa si Yesus éng Kristus si Kolano méitaaz ni Opo Empung i milot péléng sé tou im witu un ukuman wana a singkéla' néra. Niitu é masuat karia u méipantik witu ung kitap Lukas 19:10, im witu é méipantik i si Oki' ni Tou é mémenéro sé tou méikalulu wo milot ni séra im witu un ukuman wana a singkéla'.
Witu ung kitap kenu, si Lukas simirita tumoro si Maria, si ina' ni Yesus makaz ni sia in timoumé si Yesus. Si Lukas kangkasii é simirita tumoro ung katou-touan ni Yesus ing koki'pé' wo tumoro si Yohanes Menanarani i ni sia simarani si Yesus. Si Lukas kangkasii simirita tumoro un zuana pulu' makakompo'en u liné'osé ni Yesus wo un zuana pulu' wo telu aandéan méikua-Na. Si Lukas simirita tumoro a nimamuali witi Yerusalem makaz si Yesus in tinionan, niukum, nimaté witu u salip makaz ni Sia i méitoumé sumaup a mangé witi kasendukan. Ung kitap kenu ém pahkuan Nuwu' Lé'os tumoro si Yesus, pahpaan séi uman si ma'éman si Yesus Kristus si milot sé tou im witu un ukuman wana a singkéla' néra én ampungan wo makailek ung katou-touan makaz ing kauré-uré.
Currently Selected:
Lukas Tumoro ung kitap kenu: LAITOM
Highlight
Share
Copy
Want to have your highlights saved across all your devices? Sign up or sign in