Luka 10
10
Yesu soma asuafoɛ aburasoo
1Na ɛhemɔ asi ne, Awurade yele mmenia aburasoo#10.1: Tete Ahyerɛlɛ ne bie kã kyɛ: aburasoo ne nyɔ. bieku, na ɔsomane bɛ nyɔ nyɔ maa belili ye nyunu moa bɛhɔle nguro biala ne nekaa biala bɔ ye bɔbɔ ɔbaahɔ berɛ ɔ so. 2#Mat 9.37-38 Na osele bɛ kyɛ, “Nnɔbaeɛtelɛ adwuma ne te piri, nakoso adwumayɔlɛfoɛ nemɔ bɛte kãa; yiti ɛ́mɔsrɛ nnɔbaeɛtelɛ ye Mene ne, ná ɔsoma adwumayɔlɛfoɛ ma bɛbra ye nnɔbaeɛtelɛ adwuma ne anu.” 3#Mat 10.16 Ɛmɔhɔ! Ɛ́mɔtie, mésoma ɛmɔ kyɛ mmoaen mmaa ma ɛmɔkɔ mbataku nu. 4#Mat 10.7-14; Mak 6.8-11; Luk 9.3-5 Nnɛma ɛmɔfa sikaabɔtɔ anaa bɔtɔ, anaa mbaboa; yeɛ nnɛma ɛmɔbisa ebiala ahye wɔ atunu! 5Na awuro biala bɔ ɛmɔkɔhɔ nu ne, ɛ́mɔli moa bɛhã kyɛ, ‘Asomdwee bra awuro wa oo!’ 6Sɛ asomdwee sona wɔ berɛ a, ɛmɔ asomdwee ne kɔwa ye so; nakoso sɛ ebie nne berɛ de a, okosa kɔwa ɛmɔ so. 7#1 Kor 9.14; 1 Tim 5.18 Na awuro ne anu ala yeɛ odi kyɛ ɛmɔtena ɔ; na ɛ́mɔli ná ɛmɔno bɔ bɛkɔfa bɛkɔma ɛmɔ ɔ, ɔnate kyɛ adwumayɔlɛniɛ fata kyɛ ye sa kã ye akatuaa. Nnɛma ɛmɔdi awuro nu tutena. 8Na sɛ ɛmɔkɔ kuro bie aso, ná bede ɛmɔ nyemene so a, ɛ́mɔli bɔ bɛkɔfa bekosie ɛmɔ nyunu biala; 9ɛ́mɔsa nu ayarefoɛ anwonyerɛ, ná ɛmɔhã behyire berɛ ama kyɛ, ‘Nyameɛ ahennie ne apingye ɛmɔ.’ 10Nakoso sɛ ɛmɔkɔ kuro bie aso, ná banne ɛmɔ a, ɛmɔfite bɛhɔ ye dwaa nemɔ aso, ná ɛmɔhã kyɛ, 11‘Ɛmɔ kuro wa mvuture po bɔ wahã yɛ gya bo ne, yɛporoporo yɛgua ɛmɔ ti so; na yɛ́ma ɛmɔnwu ye kyɛ, Nyameɛ ahennie ne wapingye ɛmɔ.’ 12#Gye 19.24-28; Mat 11.24; 10.15 Na mekã mekyire ɛmɔ kyɛ, sɔ kyẽa ne, amaneɛ bɔ ɔkɔto Sodom ne, ongodwu bɔ ɔkɔto sɔ kuro ne.
Korasin, Betesaeda ne Kapanɔm
(Mateo 11.20-24)
13 #
Hes 26.1—28.26; Yow 3.4-8; Sak 9.2-4 “Wɔ, Korasin, wɔ yaakɔ! Wɔ, Betesaeda, wɔ yaakɔ! Ofikyɛ, nnwumaa mbiri mbiri bɔ bɛyɔle ye wɔ ɛmɔ nu ne, sɛ bɛyɔle bɛ wɔ Tiro ne Sidon a, ahaa bahera ɛsɛen tena batena nzoen nu basakyera b’adwene dada. 14Na ndɛenbualɛ ne anu, amaneɛ bɔ ɔkɔto Tiro ne Sidon nen, ongodwu bɔ ɔkɔto ɛmɔ ne. 15#Yes 14.13-15 Na wɔ, Kapanɔm, bɛkɔma wɔ so bɛkɔhɔ nyameɛso anaa? Daabi. Bekogyi wɔ bɛkɔto abɔnzam see nu.
16 #
Mat 10.40; Mak 9.37; Luk 9.48; Yoh 13.20 “Ebiala bɔ otie ɛmɔ dwirɛ nen, watie me; yeɛ bɔ ɔpo ɛmɔ nen, wapo me; na bɔ ɔpo me nen, wapo bɔ ɔsomane me ne.”
Asomafoɛ nemɔ sa wale
17Asomafoɛ aburasoo [ne nyɔ] ne besa bɛwale anigye so bɛɛbɔle amaneɛ kyɛ, “Awurade, wɔ dumaa nu, sunzummɔne mɔ po bɛbrɛle bɛ nwo ase bɛmane yɛ!” 18Na osele bɛ kyɛ, “Nwuni Satan kyɛ ofi nyameɛso waatɔ ase kyɛ agralaa ɔ. 19#Edw 91.13 Ɛ́mɔtie, mama ɛmɔ tumi kyɛ ɛ́mɔtiatia ewoo mɔ ne anyanyangyeleɛ mɔ so, ɔne pɔfoɛ ne tumi amukoraa so; bɔ nikyee fee ngɔhora ngɔyɛ ɛmɔ ɔ. 20Nakoso nnɛma ɛmɔdi ahurusi wɔ ɛhe anwo, kyɛ sunzum mɔ bɛbrɛ bɛ nwo ase bɛma ɛmɔ ɔ; na mmom ɛmɔli ahurusi kyɛ bahyerɛ ɛmɔ dumaa wɔ nyameɛso ɔ!”
Yesu asennaa mbaeɛ
(Mateo 11.25-27; 13.16-17)
21Sɔ mmerɛ ne ala nu, olili ahurusi wɔ Sunzum nu, na ɔhane kyɛ, “Baba, anwuro ne aseɛ Mene, meda wɔ ase kyɛ afa edwirɛ hemɔ afea nworɛfoɛ ne nimdeɛfoɛ, ná aye ahyire ngokwaammaa ɔ. Yoo, Baba, sɔ yeɛ ɔte nikyee bɔ ɔyɛ nyemene wɔ wɔ nyunu ɔ.
22 #
Yoh 3.35; 10.15 “Me Baba afa nningyein amukoraa awura me sa; na ebiala nze kyɛbɔ Baa ne te ɔ, sana Baba ne. Yeɛ ebiala nze kyɛbɔ Baba ne te ɔ, sana Baa ne ne ebiala bɔ Baa ne kuro kyɛ ɔda ye adi kyire ye ɔ.”
23Na ɔpɛle ye nye neane asuafoɛ nemɔ hã hyirele bɛ ngome kyɛ, “Anyeɛ bɔ benwu bɔ ɛmɔnwu ye ne, banya saleɛ! 24Na mekã mekyire ɛmɔ kyɛ, ngɔmhyɛlɛfoɛ ne ahemvo pee behurole kyɛ ahaa bekonwu bɔ ɛmɔnwu ye ye, nakoso bannwu ye; ɔne kyɛ bɛkɔte bɔ ɛmɔte ye, nakoso bande.”
Samarianiɛ atianu fufue ne
25 #
Mak 12.28-34
Na yieee, mmeraa nwo nimdeɛniɛ bie dwɔso gyinane berɛ sole Yesu neane kyɛ, “Kyerɛkyerɛniɛ, nzu yeɛ nyɔ ná manya daa ngoa ɔ?” 26Na Yesu bisale ye kyɛ, “Nzikyɛ yeɛ bahyerɛ ye wɔ mmeraa ne anu ɔ? Sɛɛ yeɛ ɔyɛ a ɛkenga ye ɔ?” 27#Lew 19.18; Deut 6.5 Yeɛ obuale kyɛ, “Fa w’ahone amukoraa ne wɔ kra amukoraa ne w’anwoserɛ amukoraa ne w’adwene amukoraa kuro Awurade wɔ Nyameɛ dwirɛ; ná kuro ebiɛngo dwirɛ kyɛ wɔ bɔbɔ wɔ nwo.”
28 #
Lew 18.5 Na Yesu sele ye kyɛ, “Ama mmuayɛɛ yé; yɔ sɔ, na ekonya ngoa.” 29Nakoso ye de, né ɔpena kyɛ obua ye nwo be ne ati, obisale Yesu kyɛ, “Na nwa yeɛ ɔte mmiɛngo ɔ?”
30Yeɛ Yesu buale kyɛ, “Biaa bie fili Yerusalem kyɛ ɔ́torotoro kɔ Yeriko, na oolili amia wɔ awerɔm awuefoɛ bɛ sa nu. Na bepuropurole ye nwo ndaadeɛ, bepurapurale ye, na bɛyakyili ye berɛ bɛhɔle bɔ né ɔpena wu ɔ. 31Na ɔwale kyɛ, ɔsɔfo bie ɔɔfale atee ne aso; na onwuni ye nen, ɔfale atee ne bue dɔ hɔle. 32Sɔ ala yeɛ Lewiniɛ bie oofitele ye so ɔ; na onwuni ye nen, ɔfale atee ne bue dɔ hɔle. 33#2 Abe 28.15 Nakoso Samarianiɛ bie, bɔ né otu atee ɔ oofitele nekaa bɔ ɔwɔ ne, na onwuni ye ne, ɔyɛle ye anwumvo. 34Na ɔhɔle ye nwo berɛ, ɔfale ngoo ne nzaa#10.34: NGOO NE NZAA: Anaakyɛ: ayire. guaguale ye apirakuro ne anu, na ɔkyekyele so. Afei ɔfale ye siele ye bɔbɔ ye kaka ne aso, na ɔfale ye hɔle ɛwɔfoɛ sua nu ɔɔneane ye. 35Na aleɛ hyene ne, ɔyele denare nyɔ mane sona bɔ ɔnea ɛwɔfoɛ sua ne aso ne, na osele ye kyɛ, ‘Nea ye, na kerɛ biala bɔ ɛkɔbɔ wɔ ye nwo bieku ne, mesa meba a ngotua wɔ kerɛ.’ 36Yiti mmenia nza ye, bɛ nu nwa yeɛ ɛdwene kyɛ ɔyɛle biaa bɔ olili amia wɔ awerɔm awuefoɛ mɔ bɛ sa nu ne obiɛngo ɔ?” 37Na obuale kyɛ, “Ye de, ko bɔ onwuni ye anwumvoin ne ɔ.” Yeɛ Yesu sele ye kyɛ, “Kɔ, na wɔ koso, kɔyɔ sɔ ala!”
Yesu kɔ Maata ne Maria awuro
38Na ɔwale kyɛ bɛ́kɔ nen, oodwuli akuraa bie anu; na braa bie bɔ bɛfrɛ ye Maata ɔ ɔfale ye oosikyele ye wɔ ye awuro. 39Né Maata le aliɛma brasua bie bɔ bɛfrɛ ye Maria ɔ, na ɔɔtenane Yesu gya bo berɛ otiele ye ngyerɛkyerɛ. 40Nakoso Maata de, ɔmane ɛwɔfoɛsolɛ nwo adwuma hiane ye paa; yiti ɔwale Yesu nwo berɛ oosele kyɛ, “Awurade, aso ennwu kyɛ nniɛma ye wayakyi ɛsolɛ adwuma ne wato me ngome me so ye? Kã kyire ye maa ɔɔsɔ me nu.” 41Na Awurade buale ye kyɛ, “Maata, Maata, ɛdwenedwene, na ɛha wɔ nwo wɔ nningyein pee nwo; 42nikyee komapɛ yeɛ ohia ɔ: Na Maria de, bɔ ɔte paa ne yeɛ waneanea nu waye ɔ, na ɛhe de, bengole bengofi ye sa nu.”
Currently Selected:
Luka 10: EBP
Highlight
Share
Copy
Want to have your highlights saved across all your devices? Sign up or sign in
Esahie Bible © Bible Society of Ghana, 2018.