Yohane 3
3
Nikodemo kɔ Yesu berɛ
1 #
Luk 23.13
Né Farasiiniɛ bie wɔ berɛ bɔ bɛfrɛ ye Nikodemo, bɔ ɔte Yudafoɛ mbanyi ne bie ɔ. 2#Mat 23.7; Aso 2.22 Sɔ biaa ne wale Yesu berɛ kɔngɔen oosele ye kyɛ, “Rabi, yɛse kyɛ ɛte kyerɛkyerɛniɛ bɔ efi Nyameɛ berɛ ɔ; ofikyɛ ebiala ngɔhora ngɔyɔ nzɛngyerɛnneɛ hemɔ bɔ ɛyɔ ye, sana Nyameɛ boka ye so.” 3#Mat 3.2 Na Yesu buale ye kyɛ, “Nahorɛ nu paa, mekã mekyire wɔ kyɛ: Ebiala ngɔhora ngonwu Nyameɛ ahennie ne, sana bawo ye foforɛ.” 4Nikodemo buale ye kyɛ, “Ɔkɔyɛ sɛɛ né sona bɔ wanyi wayie ne, bahora bawo ye? Ɔkɔhora koowura ye maame kunu bieku maa bɛkɔwɔ ye anaa?” 5#Aso 22.16; Tit 3.5 Yesu buale kyɛ, “Nahorɛ nu paa, mekã mekyire wɔ kyɛ: Ebiala ngɔhora ngɔhɔ Nyameɛ ahennie ne anu, sana bafi nzue nu ne Sunzum nu bawo ye. 6#1 Kor 15.50 Bɔ bɛwole ye fi anwoɔnaen nu ne, ɔte anwoɔnaen; yeɛ bɔ bɛwole ye fi Sunzum nu ne, ɔte sunzum. 7Yiti nnɛmaa ɔyɛ wɔ nwanwa kyɛ nga ngyirele wɔ kyɛ, ‘Ɔsɛ kyɛ bɛwo wɔ foforɛ ɔ.’ 8#1 Kor 2.14-16 Mvrama bɔ kɔ nekaa bɔ okuro ɔ, na ɛte ye nga; nakoso ɛnze nekaa bɔ ofi ba ɔ, anaa nekaa bɔ ɔkɔ ɔ. Sɔ ala yeɛ ebiala bɔ bawo ye Sunzum nu ne ɔte ɔ.” 9#Yoh 6.52, 60 Na Nikodemo sele ye kyɛ, “Ɔkɔyɛ sɛɛ né ɛhemɔ bahora bawa nu sɔ?” 10#Luk 2.46 Yesu buale ye kyɛ, “Ɛte kyerɛkyerɛniɛ wɔ Yisrael, yeɛ koso ɛnde ɛhemɔ bo ɔ? 11Nahorɛ nu paa, mekã mekyire wɔ kyɛ: Bɔ yɛse yeɛ yɛkã ɔ, na bɔ yanwu ye yeɛ yɛdi ye nwo adanzeɛ ɔ; nakoso ɛmɔnne yɛ adanzeɛ ne benni. 12Sɛ mahã aseɛ so dwirɛ mahyire ɛmɔ, ná ɛmɔnne benni a, ɔkɔyɛ sɛɛ yeɛ sɛ mekã nyameɛso dwirɛ mekyire ɛmɔ a, ɛmɔkole koli ɔ? 13#Any 30.4; Aso 2.34; Ɛfe 4.8-10; Heb 4.14 Ebiala nne berɛ bɔ wafo wahɔ nyameɛso ɔ, sana bɔ ofi nyameɛso odwu wale ne, Sona Awa ne [bɔ ɔwɔ nyameɛso ne.] 14#Num 21.8-9 Na kyɛbɔ Mose mane ewoo ne aso wɔ ɛserɛ so nen, sɔ ala yeɛ odi kyɛ bɛma Sona Awa ne aso ɔ, 15#Gye 15.6; Aso 13.39; Rom 3.22 amaa ɔnate so ebiala bɔ okole ye koli ne wanya daa ngoa. 16#Rom 5.8; Ɛfe 2.4; Yes 9.6 Na kyɛbɔ Nyameɛ si hurole wiase dwirɛ nen, yiti yeɛ ɔmaa ɔfale Ɔwa komapɛ [bɔ ɔwole ye] ne mane ɔ, amaa ɔnate so ebiala bɔ okole ye koli ne wammini, na mmom wanya daa ngoa.
17 #
Yes 53.11; Rom 11.14; Luk 2.11 “Ofikyɛ, Nyameɛ anzoma Ɔwa ne maa wamma wiase kyɛ oobua wiase ndɛen, na mmom kyɛ ɔkɔfa ye so kole wiase ɔ. 18Ebiala bɔ ode ye di ne, bemmua ye foɛ; nakoso bɔ onne nni ne de, babua ye foɛ dada, ofikyɛ onne Nyameɛ Awa komapɛ ne dumaa nni. 19Na ɛhe yeɛ ɔte ndɛenbualɛ ɔ, kyɛ kanea ne awa wiase, nakoso mmenia hurole awosii trale kanea ne; ofikyɛ bɛ yɔleɛ te bɔne. 20Ɔnate kyɛ, ebiala bɔ ɔyɔ bɔne ne, okyi kanea ne, na ɔmma kanea ne nwo, kyɛbɔ ɔkɔyɛ bɔ ye yɔleɛ ngɔla ali ɔ. 21Nakoso ebiala bɔ ɔyɔ bɔ ɔte nahorɛ ne de, ɔba kanea ne anwo, kyɛbɔ ɔkɔyɛ bɔ ye yɔleɛ kɔla ali pefee kyɛ wayɛ sotie wama Nyameɛ ɔ.”
Asubɔlɛniɛ Yohane adanzeɛ foforɛ
22Na ɛhemɔ asi ne, Yesu ne ye asuafoɛ nemɔ bɛhɔle Yudea aseɛ so; ɔne bɛ tenane berɛ, na ɔbɔle asu. 23#Mat 3.1 Né Yohane koso ɔbɔ asu wɔ Yinon bɔ opingye Salim, ofikyɛ né nzue pee wɔ berɛ; na mmenia wale berɛ maa ɔbɔle bɛ asu. 24#Mat 4.12; 14.3 Ofikyɛ, né bennya bɛffale Yohane bɛttole kuku nu. 25Na bɛ nwo petenɛ nwo aporowaasulɛ wale Yohane asuafoɛ nemɔ ne Yudafoɛ b’afia. 26#Mat 23.7 Na bɛwale Yohane berɛ beesele ye kyɛ, “Rabi, biaa bɔ né ɛne ye bɛwɔ asue Yɔɔdan si dɔ, bɔ elili ye nwo adanzeɛ nen, tie, ye koso ɔ́bɔ asu, na mmenia mukoraa bébiri bɛ́kɔ ye berɛ.” 27Na Yohane buale kyɛ, “Sona biala ngɔhora ngonya nikyee biala, sana bɛfa befi nyameɛso bɛma ye. 28Ɛmɔ bɔbɔ bedi me adanzeɛ kyɛ ngane kyɛ, ‘Nna me ole Kristo ne, na mmom basoma me maa mali ye nyunu moa.’ 29#Mat 9.15 Bɔ atɔmvorɛ braa ne ɔte ye deɛ ne, ye ole atɔmvorɛ biaa ne. Na atɔmvorɛ biaa n’adamvo bɔ ogyina berɛ, ná otie ye ne de, ɔma ye nye gye paa wɔ atɔmvorɛ biaa ne komvi nwo; yiti afei de, m’anigye ne wali mu. 30Ye de, ɔsɛ kyɛ ɔkɔ ye nyunu tra me, ná me de, medi nziɛ ɔ.”
31 #
Yoh 8.23; 1 Yoh 4.5 Bɔ ofi nyameɛso ba ne, odi mu tra mmenia mukoraa. Bɔ ofi aseɛ so ne, ɔte aseɛ so deɛ, na aseɛ so dwirɛ yeɛ ɔkã ɔ; na bɔ ofi nyameɛso ba ne, odi mu tra mmenia mukoraa. 32Odi bɔ wanwu ye ɔ ɔne bɔ wate ɔ nwo adanzeɛ, nakoso ebiala nne ye adanzeɛ ne ndo nu. 33Ebiala bɔ ode ye adanzeɛ ne to nu ne, osi ye pi kyɛ Nyameɛ te nahorɛniɛ. 34#Yes 42.1; Aso 10.38; Luk 4.18 Na bɔ Nyameɛ asoma ye ne, ɔkã Nyameɛ dwirɛ, ofikyɛ Nyameɛ fa Sunzum ne ɔma mmorosoɛ. 35#Mat 28.18 Baba ne kuro Baa ne dwirɛ, na wafa nningyein mukoraa wawura ye sa. 36Na ebiala bɔ ode Baa ne di ne, ole daa ngoa; yeɛ bɔ ɔnyɛ sotie mma Baa nen, ongonya ngoa, na Nyameɛ ahonehulɛ ba ye so.
Currently Selected:
Yohane 3: EBP
Highlight
Share
Copy
Want to have your highlights saved across all your devices? Sign up or sign in
Esahie Bible © Bible Society of Ghana, 2018.