Luka 21
21
Nhosa ya mgane ihuma ziyagwe
1Yesu viyenule meso gake kawona wene mhiya wogela nhosa zao muna dibuhulu da isiga. 2Kamona pinga imonga mgane yogela mumuja vigebe vibili. 3Kalonga, “Ihoko nomulongelani, ino mgane mkiwa kagela nghani kubanza wose. 4Kwa mzoko wano wose wagela nhosa muna gamali gabanzile, komu ino muna uukiwa wake kavigela vyose vyayali navo.”
Magweka ga ikidugalo; migaduko
5Na wanhu wayagwe vuwakalile wolongelela mbuli za idihekalu kamba vidihambigwe nghani kwa mabwe ganogile na nhosa za wanhu, kalonga, 6“Gano gomulolesa, mazuwa gokwiza yogamba honda disigale dibwe uchana ha dibwe, dileke kubomoligwa.”
7Wamuuza walonga, “Mkulufunzi, magweka ago gokuwa zuwaki?”
8Kalonga, “Teganyeni sukumwize kwagizwa, kilumbo bwando wonda weze wotambula tagwa jangu, kuno wolonga, Hiyo nene, avo kiwango chammabehi! awo sukumuwakole. 9Na mweye kwiza muhahulika magweka ga nghondo na udelenyi sukumdumbe, kwa mzoko ago haichanduso hagaleka kulawilila, komu kija ikidugalo hakiza chambwisa.”
10Ilawa baho kawalongela, “Lukolo lokwinula nghondo na lukolo luyagwe, na watawala osonga nghondo na watawala wayao, 11Kolawilila na kingudemo kikulu muisi, na nzala na kihindu-hindu na magweka ga kudumbiza na vinzonza vikulu kulawa kuulanga. 12Komu tanhu ago gose haganalawilila, womgogani na kuwagelani lusango; womgalani muna gamakanisa na kuwagela kolokoloni, womgalani kwa watawala na wandewa kwa kilumbo cha tagwa jangu. 13Na ago gokuwa uwo msindimulo kumwenu. 14Avo mvitange mmoyo mmwenu sukumgelegeze-gelegeze mbuli zonda mwihonye! 15Kilumbo niye nowenghani mulomo na fiyuko, yogamba wandumu wenu wose honda wadahe kuikuga hebu kubamila.
16Mweye womuhimbilani iwo wavyele wenu na ndugu zenu, kilagwa chenu na mbwiga zenu, nawo owakoma wayagwe wenu. 17Na mweye mokwihilwa na wanhu wose kilumbo cha tagwa jangu. 18Komu honda lupotele hata luvili lwenu lumwe lwa mpala. 19Na mweye kwa kwazaganya kumuli nako, mozihonya loho zenu.
Ubananzi wa Yerusalemu, na ubwelo wa Kristo
20Komu aho vonda mwone wambo da Yerusalemu dizungulukwa na madale, avo mvitange kamba ubananzi wake wammabehi. 21Avo awaja wali Uyuda nawakimbilile mvigongo, na waja wa hagatigati na wakimbilile kunze, na wali mmigunda sukuwengile! 22Kwa mzoko mazuwa higo gago ga kulihila mgaduko, giladi gaiduganye gose gandikigwe. 23Komu wonda wone vihile iwo waja wene ziinda na waja wokongheza siku hizo, kilumbo kokuwa na mgaduko bwando muna iisi, na lusango lwa Mulungu muna ulukolo luno. 24Wogwa kwa ukali wa mizele; wayagwe wokumbigwa mateka na kupwililiswa muna zingholo zose, na Yerusalemu wobojagwa na wanhu yungwa, hata kikomo cha makabila vonda kiiduganye.
25Avo yolawilila vinzonza kuna dizuwa na kuna umwezi na izinhondo, na muli iisi mgaduko wa makabila gose, wokanganya kwa mzoko bahali vonda ihume na nyukwanyukwa jake. 26Wanhu wogwa kingwaya mmoyo, kuno wolola wobetaga gaja gonda galawilile mulumwengu; kilumbo mhiko za kuulanga zotigisika. 27Aho baho hondawamone Mwana wa Munhu yokwiza mmabingu hamonga na mhiko na yenzi nghulu. 28Avo mbuli hizo zihasonga kulawilila, samhukeni, inuleni matwi genu, kwa mzoko nghombolwa yenu yamma-behi.”
29Kawalongela hala, “Uloleni mkuyu na mibiki iyagwe yose! 30Avija viimalaga kuzuka, mokona kuno movimanya wenyego kamba kiwango cha ukuhuna chammabehi. 31Na mweye vivo muhazona mbuli hizo zisonga kulawilila, mvimanye kamba undewa wa Mulungu wahabehi.
32Ihoko nomulongelani, mulelo uno hondaubite, viyemela gano galeke kuvikizwa gose. 33Ulanga na isi kwiza zobita, komu ulonzi wangu hondaubite ngʼwene.
34Avo iteganyeni, miyoyo yenu sikuilemelwe na kuja chaka na ngholwa na mgaduko wa ugima, kileka siku ija ya inyidukila yowavika kamba mtego vunamasaga. 35Avo vivo vondaiwavike wanhu wose wakalile hachana ha ikihanga cha ulumwengu mgima. 36Goneleleni mweye vipigiti vyose kuno mpula, giladi mgangamale kuhonyokwa muna ago gose vonda galawilile, na kwima hakihanga cha Mwana wa Munhu.” 37Avo imisi kakala yolanguliza muli dihekalu, na ikilo kagendaga kuwasa kukigongo kikemigwa Mizeituni. 38Na wanhu wose wakala wolamka imitondo wogenda muna dihekalu, giladi wamtegeleze.
Currently Selected:
Luka 21: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.