Yohana 1
1
Longa da Mulungu digalamka lukuli; Usindi wa Yohana Msingula wanhu
1Aiho ha ikilongozi kukala Longa, na Heyo Longa kakala hamonga na Mulungu, na Heyo Longa kakala Mulungu. 2Heyo ha ikilongozi kakala hamonga na Mulungu. 3Vyose vitendeka kwa Heyo, maza bila ya Heyo chochose cha vija viumbigwe hisambi kitendigwe. 4Na mgati mmwake mumo muukalile uugima, na uja uugima ugalamka mulangaza wa iwanhu. 5Nawo mulangaza wongʼaza mdiziza, najo ziza hadiudahile.
6Halawilila munhu, katumigwa na Mulungu, na tagwa jake Yohana. 7Heyo keza kwa usindi giladi yausindile uja mulangaza, wose watogole kwa usindi wake. 8Heyo si uja umulangaza, komu keza kuusindila umulangaza. 9Kukala mulangaza wa ihoko womgela mulangaza kila munhu, uheza muiisi.
10Kakala baha muiisi, kabili iisi ikala iumbigwe kwa Heyo, bali ulumwengu haumtambule. 11Keza kumwake, na hewo waja iwake hawambokele. 12Bali wose wambokele kawagwelela mboto wagalamuke wawe wana wa Mulungu, awo wene kutogola tagwa jake. 13Waleligwe si kwa mulopa, si kwa lukuli, si kwa ugesaji wa imunhu, komu waleligwe kiMulungu. 14Najo Longa digalamka lukuli, disimika hema kumwetu, na tweye tuyona iyenzi yake kamba iyenzi ya Mwana Nyadimwe yalawile kwa Tata, kamema uholo na ihoko.
15Yohana kamsindila kaguta nyangi yolonga, “Yuno yuyo nongile magweka gake, Yonda yeze hachugu changu kakala kuulongozi wangu, chanduso kakala wa ikilongozi kumwangu.”
16Kilumbo muna gamavikilizo gake tweye chose tubokela, unozi kulawa muunozi. 17Kilumbo Nzuma zilavigwa na Mose; uholo na ihoko ziza na Yesu Kristo. 18Haduhu munhu yamonile Mulungu milongo yose; Mulungu Mwana Nyadimwe yali muna imhambaga ya Tata yuno yuyo iyatugubulile.
Yohana kapetela Wayuda ulaguzi wake
19Na hiwo uwo usindi wake Yohana, Wayuda vuwatumile kumwake Wakulu wa Nhambiko na wasanghani Walawi kulawa Yerusalemu giladi wamuuze, “Gweye kwa nani?” 20Na heyo kavumila; habelile bule, bali katongola, “Niye si nene Kristo.” 21Wamuuza, “Kwa choni basi: kwa Eliya gweye?” Kalonga, “Niye si nene.” Gweye kwa Mlaguzi yuja (yokwiza)? Kedika, “Aka.” 22Wamulongela, “Kumbe kwa nani? Twidike mina na tweye mkawalongele waja wamgalile. Kokipetaze mzingelegeza zako?” 23Kalonga, “Niye nene dizwi ja munhu yodehelela kuluwala, Igoloseni nzila ya Bwana, kamba vija viyalongile Mlaguzi Yesaya.”
24Waja watumigwe wakala walawile kwa Mafariseo. 25Wamuuza wolonga, “Habali kosingula wanhu uhawa gweye si Kristo, huli Eliya bule huli Mlaguzi yuja?” 26Yohana kedika kalonga, “Niye nobatiza na mazi; hagatigati yenu kema wima Heyo imulekile kumtanga mweye; 27Iyo yokwiza hachugu changu, kileka sidaha kumdoholela nzabi za vilatu vyake.”
28Higo gatendeka hiko Betania umwambu wa Yordani, kuyakalile Yohana yobatiza.
Lola imwana nghondolo wa Mulungu iyo ino
29Na siku jekabili jake Yohana kamona Yesu yokwiza kumwake, kalonga, “Lola Imwana Nghondolo wa Mulungu yokidikwa matozo ga ulumwengu! 30Yuno yuyo nongile magweka gake, Kokwiza munhu hachugu changu, vilema kakala kuulongozi wangu, chanduso yuyo kakala wa ikilongozi kumwangu. 31Na niye simjuwile, bali giladi yabwililiswe kwa Waisraeli, ndicho kimu cha kwiza niye kusingula wanhu.” 32Kabili Yohana kasindilila yolonga, “Nimona Loho viyohulumuka kamba huwa yolawa kuulanga, kamkalila muiti. 33Vilema niye simmanyile, ila Heyo yangalile kugela wanhu mmazi, kakala yandagize, Ayo yonda umone Loho yomuhulumukila na kumkalila muiti, Heyo yuyo yonda yabatize na Loho Ingʼalile. 34Na niye nivyona, kabili nimsindila kamba yuno yuyo Mwanage Mulungu.”
Wanahina wasongile: Andrea, Yohana, Petro, Yakobo
35Na hivo siku jekabili jake Yohana kakala yemile hamonga na iwabili muna iwanahina wake. 36Kamulola Yesu viyotembela kalonga, “Lola Mwana Nghondolo wa Mulungu!” 37Waja iwanahina wabili wamuhulika viyolonga, wamkoleleza Yesu. 38Na Yesu kahinduka, kawona vuwomkoleleza kawalongela, “Mozahila choni?” Wamulongela, “Rabi” (kihindukizo chake, “Mwalimu”), “kokala kwahi?” 39Kawalongela, “Izoni mlole!” Wachola wahona hoyokala, wakala kumwake siku dija; ikala behi na saa kumi.
40Andrea, ndugu yake Simoni Petro, kakala imonga wa waja iwabili wamuhulike Yohana na kumkoleleza Yesu. 41Heyo kandusa kumona Simoni, mkulu wake mwenyecho, kamulongela, “Tumona Mwitigwa Mavuta ga Undewa, yuyo Mesiya Kristo.” 42Kamgala kwa Yesu. Na Yesu kamulola kalonga, “Gweye Simoni mwanage Yohana, na gweye kokemigwa Kefa;” kihindukizo chake Petro hebu dibwe.
Filipo viyamkwegile Natanaeli
43Siku jekabili jake Yesu kalonda kuchola Galilea, kamona Filipo kamulongela, “Ngholeleza!” 44Na heyo Filipo kakala munhu wa Betisaida, mwenekaye wa kiwambo kiwokala Andrea na Petro. 45Filipo kamona Natanaeli kamulongela, “Tumona ija yandikigwe na Mose muna Inzuma na Walaguzi, Yesu mwanage Yosefu, yuyo munhu wa Nazareti.” 46Natanaeli kamulongela, “Chodaha kinhu kinogile kulawa Nazareti?” Filipo kamulongela, “Izo ulole!”
47Yesu kamona Natanaeli yokwiza kumwake, kazilonga nongezi zake, “Lola Mwisraeli senhambo, kabule uvwizi mmoyo mmwake.” 48Natanaeli kamuuza, “Kunyonahi kileka unhangile?” Yesu kedika kamulongela, “Nyandusa Filipo hanakukema, vukalile hasi ha umkuyu, niye nikona.” 49Natanaeli kamwidika, “Rabi (Mkulufunzi), gweye kwa Mwana Mulungu, gwegwe Mndewa wa Israeli.” 50Yesu kedika kamulongela, “Kilumbo vinikulongele, nikona hasi ya umkuyu, kileka utogola? 51Kwiza kokona vinzonza vikulu kubita vino.” Kamulongela, “Kingongongo nomulongelani, mowona ulanga vonda ugubuke, malaika wa Mulungu wokwela wohulumuka ohingila Mwana wa Munhu.”
Currently Selected:
Yohana 1: ZAM75
Highlight
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.