OBUCHACHILO 4
4
Kaini yeera Abeli
1Mana Adamu naba nende Hawa omukhasiwe ne Hawa nahela inda niyebula Kaini. Ne naboola ari, “Enyoolile omwana omusiani okhubirira mubunyali obwa OMWAMI Nyasaye.” 2Mana khandi niyebula Abeli, omusiani wabwe Kaini, omutiitii. Abeli yali omuruchi wamakondi naye Kaini yali omulimi weliloba. 3Olunyuma lwetsinyanga tsindiiti, Kaini yareerera OMWAMI Nyasaye eshihaanwa okhurula khubiamo biomumukunda, 4#Abaheb. 11:4naye Abeli nareera inyama yamasinya okhurula khu ebiayobie ebikulanda. Mana OMWAMI Nyasaye nafuchilila eshihaanwa shia Abeli. 5Nebutswa shiyafuchilila eshihaanwa shia Kaini tawe. Kho Kaini nasinyikha muno, ne nakhuunia obwenibwe. 6Kho OMWAMI Nyasaye nareeba Kaini ari, “Mbushiina nosinyikha? Ne mbushiina nokhuunia obwenibwo? 7Noba nokhola amalayi, shiofuchililwa? Ne noba nolakhola amalayi ta, obwonooni bukhukonesheele hamuliango, bukhwikombanga iwe, nebutswa okhuula obuhule.”
8 #
Obuch. 10:3; Mat. 23:35; Luka 11:51; 1 Yoh. 3:12 Kho Kaini nabooleela Abeli omusiani wabwe ari, “Chenda kutsie mumukunda.” Ne olwa bali nibali mumukunda, Kaini yakalukhana khumusiani wabwe ne namwira. 9Mana OMWAMI Nyasaye nareeba Kaini ari, “Omusiani wenywe Abeli ali heena?” Kaini namukalusia ari, “Isie shiemanyile ta. Nasi endi omulindi womusiani wefwe?” 10#Abaheb. 12:24OMWAMI Nyasaye namureeba ari, “Nishiina eshiokholile shino? Omwoyo kwamabanga komusiani wenywe kuhaabanga okhurula mwiloba. 11Ne bulaano onyoolile eshilaamo shiobubi okhurula khwiloba, eliasame omunwa kwalio okhunywa amabanga komusiani wenywe, aka oraatsiye. 12Olwa oba nolima khwiloba shililakhwamilia ebiamo bialio ta, olaba omusuusuumi butswa khandi omuchendachendi khushialo.” 13Kaini naboolela OMWAMI Nyasaye ari, “Eshinyasio shianje neshikhongo muno, eshiandalanyala okhwifwila tawe. 14Lola inyanga yino unondile okhurula mumukunda kuno. Khandi unondile okhurula ewa oli. Nditsa okhuba omusuusuumi khandi omuchendachendi khushialo, ne omundu yesi yesi ounyoola alanzira.” 15Mana OMWAMI Nyasaye namubooleela ari, “Shikali kario ta, omundu yesi yesi naba nakhwira, alamalilwakhwo eshikwoli khulwa okhwirwa khwabandi musaafu.” Mana OMWAMI Nyasaye nara eshimanyisio khu bweni bwa Kaini kho mbu, omundu yesi yesi oumunyoola aleshe okhumwira ta. 16Kho Kaini narula aha OMWAMI Nyasaye yali, ne natsia okhumenya mushialo eshilangwa mbu, “Obuchendichendi,” eshili ebukwe wa Edeni.
Abolwibulo lwa Kaini
17Kaini naba nende omukhasiwe ne omukhasiwe oyo nahela inda, niyebula Enoka. Khandi niyombakha litookho ne nakulikha mbu, Enoka, eliali eliira liomusianiwe. 18Enoka yebula Iradi, naye Iradi niyebula Mehujaeli, Mehujaeli niyebula Metsushaeli, Metsushaeli niyebula Lameki. 19Naye Lameki nateeshia abakhasi babili. Eliira liomukhasi mulala liali mbu, Ada, ne elioundi liali mbu, Zila. 20Ada yebula Yabali, owali samwana abamenyanga mumaheema nibaruka tsing'ombe. 21Eliira liomusiani wabwe Yabali liali Yubali, naye niye owali samwana abakhupanga litungu nende eshitsiliba. 22Zila naye niyebula Tubali-Kaini, owali omwiranyi webimili nende ebibia. Omukhaana wabwe Tubali-Kaini yali Nahama. 23Mana Lameki naboolela abakhasibe ari,
“Ada nende Zila, hulile amakhuwa kanje,
inywe abakhasi banje murecheresie aka emboola.
Isie ndeera omundu okhuba yali niyasaalisiye,
ndeera omundu omuraaka, okhuba yali niyasaalisiye.
24Nikaba mbu, Kaini alirungwa eshikwoli akhandi musaafu,
mubwatoo, Lameki naye yakharungwe eshikwoli akhandi amakhumi musaafu namusaafu.”
Setsi nende Enoshi
25Mana Adamu naba nende Hawa omukhasiwe ne niyebula omwana omusiani, namukulikha eliira mbu, Setsi okhuba yaboola ari, “Nyasaye yambelesiye omwana undi omusiani mushilenje shia Abeli, owa Kaini yeera.” 26Naye Setsi yesi niyebula omwana, ne namukulikha eliira mbu, Enoshi. Ne ebise ebio abandu nibachaaka okhuhabila OMWAMI Nyasaye muliiralie litakatifu.
Currently Selected:
OBUCHACHILO 4: OLUDC
Highlight
Share
Copy
Want to have your highlights saved across all your devices? Sign up or sign in