Sáŋa 2
2
Gibíné gá gigiŋe naá Kána
1Naá nnyimé ya medúgú máandɛ́, gɔ́ɔ gibíné gá gigiŋe gɛ́ bɛ́ɛmbamɔ́ naá Kána, gigísi gá cí gá Gelilée. Nnyeedíi ba Yésusu a mba lɛ́ naá gibíné moánɛ. 2Bá mba lɛ́ dɔ́ŋɛ́nɔ́ɔlú tɔ́nɔ Yésusu naá gibíné moánɛ, olɔŋɔ na behúúní bɛ́hɛ́. 3Gɛcamɛna gɛ́ á dómbá, mɔgɛ́bɔ go mana. Nnyeedíi ba Yésusu go nco mo oyana a amɔ́: «Bá dɛ báá gɔnɔ́ na mɔgɛ́bɔ.» 4Kanɛ́ Yésusu go mo gundie a amɔ́: «Mma, maamɔ́ɔ o ŋgoyanɛnamɔ́ bɔ́ɔbɔ ndɔ́mɔ́ bá go ŋa#2.4 Mma: gokikilidie gó lɔ́mɔ́ Okɔ́dɔ, na nogɛlɛ́gɛ bó do báá na cigí kɔ́ɔ aŋa naá nugunu maamɔ́ɔ o ŋgoyanɛnamɔ́ bɔ́ɔbɔ ndɔ́mɔ́ bá go ŋa: gokikilidie gúncoó gó lɔ́mɔ́ o púumbene ŋkádɛ? o? Gɛcamɛna gámɛ gɛ́ gá lɛ́ gɛ́ dɛ háá.» 5Nnyeedíi go oyana beelí gibíné a amɔ́: «Ŋaáa nɔnɔ buimée bɔ́ɔbɔ a gaá ná nyó oyáná.»
6Muséní má adánɛ́ mótáanɔ na hímmue mó mba lɛ́ hɔ́ɔ sɛ́gɛ́lá sɛ́gɛ́lá, mó dúgune Beyúdene go biséégé bábɔ́ bá gɛsogona; iséní hímmue hɛ́ mba lɛ́ ba go gɔ́lɔ boóma bá ɛlɔmbɔ ntɛdɛ. 7Yésusu go oyana beelí gibíné a amɔ́: «Ncó no hóogonyo nɔnɔ miimpo naá muséní mɔ́ɔmɔ.» Gɔ́ɔ bá mbaá mó hóógónyóo dácɛ bɔmbɔ bɔmbɔ. 8Gɛ́hɛ́ go bó oyana a amɔ́: «Godɔ́ɔdɔ, bɔ́ŋɔ́dɛ́dɔ nɔnɔ miimpo máama, no ɛ́da fáa ogɔ́nɔ́ɔ ba beelí gibíné.» Bá báá lɛ gó ŋa nɔ́ɔ. 9Ogɔ́nɔ́ɔ ba beelí gibíné go ɔ́bɛdɛnɔ miimpo má báá go ɛ́ya mɔgɛ́bɔ, a dɛ íyímé go ɛ́da go úle gá máa, asáa gɔgɔ́ beelí gibíné báaba bá mbaá dɛ́gánáa miimpo bá mba lɛ́ bí íyimene. Gɔ́ɔ a dɔ́ŋɛnɔmɔ́ ugiŋénú, 10a amɔ́ gɛ́hɛ́ a amɔ́: «Mɔtɔ uŋkimée a dóanamɔ́ go namanɛna nnumpe ya mɔgɛ́bɔ, aŋa biinyí bá ŋamɔ́ bá báá go gúe mɔgɛ́bɔ, bá lɛ go bó namana gɛtɔmbɔ́ɔ. Kanɛ́ maamɔ́ o báa bɛ́dɛgana nnumpe ya mɔgɛ́bɔ gó nco go éme godɔ́ɔdɔ!» 11Gieninye gá go békúke gá busío busío gɛ́ɛgɛ Yésusu a mbaá ŋaáa gɛ́gɔ́ɔ naá Kána, gigísi gá cí gá Gelilée. A báá dúfíe nigúmi nɛ́hɛ́, behúúní bɛ́hɛ́ bá báá ágá odɛ́má yábɔ́ naá mɔ́ɔ. 12Naá nnyimé hɔ́ɔlɔ́, gɛ́hɛ́ go ɛ́da naá tɛ́sɔnɔ ya Kapɛlɛnahɔ́mɛ#2.12 Go ɛ́na naá Mot 4.13. olɔŋɔ na nnyeedíi, na bolimóní na behúúní bɛ́hɛ́. Bá mba ŋaáa hɔ́ɔ medúgú sɔŋɛ.
Yésusu a á gúnée bedúí moóma naá Nnyaŋá ya Asaŋa
13Hɔ́ɔlɔ́ gibíné gá Pásɛ́ka ya Beyúdene gɛ́ ná lɛ́ mekúígíi, gɔ́ɔ Yésusu a bólɛgamɔ́ naá Yolósalɛmɛ#2.13 Go ɛ́na naá Gihúmie 12.1-27.. 14Gɛ́hɛ́ go gíde lukúmé lukúmé, bedúí gúlúge, bedúí bɛdómbáa na bedúí mmɛŋá; benúgí muinyí bá mba lɛ́ hɔ́ɔ tɔ́nɔ#2.14 Go ɛ́na naá Mél 11.15 na gibélincígínyé.. 15Gɔ́ɔ a nogamɔ́ ɛbágɔ na duelí, go bó tusie nábɔ́ ná biimée naá Nnyaŋá ya Asaŋa, na bɛdómbáa na gúlúge sábɔ́. A báá kasáa muinyí má benúgí, a beŋgelenye tábɛ́la sábɔ́; 16a amɔ́ go bedúí mmɛŋá a amɔ́: «Úlényée nɔnɔ buimée bɔ́ɔbɔ bó lɔ́mɔ́ háalá! No do ŋaáa goŋaá nnyaŋá ya Asaŋa yɛ ɛ́ya nnyaŋá ya nyonyí!» 17Behúúní bɛ́hɛ́ go béeniŋinye dogálɔ dá Ŋgɔ́ŋɛ́ dɔ́ɔdɔ: «Gɛlola gɛ́ɛgɛ mbɛananamɔ́ go nnyaŋá yahɔ gɛ́ ná mbigidenye#2.17 Kálata ya Ɛsagɔ 69.10..» 18Kanɛ́ bagɔ́nɔ́ɔ bá Beyúdene go gɔ́lɔ dogálɔ, go mo oyana bá amɔ́: «Gieninye gá go békúke gɛ́hanɛ́ gɛ́ɛgɛ o gaá ná ŋaáa go go có dúfíe go goŋaá o bɛanana bogaaga bá goŋaá boóma bɔ́ɔbɔ o ŋamɔ́ bɔ́ɔbɔ o?» 19Yésusu go bó gundie a amɔ́: «Gadá nɔnɔ Nnyaŋá ya Asaŋa yɛ́ɛyɛ, naá nnyimé ya medúgú mádadɔ́, nná gɔnɔ yɛ fóaga#2.19 O bana, go eninye na Mot 26.61; 27.40; Mél 14.58; 15.29..» 20Bá amɔ́ gɛ́hɛ́ aá: «Batɔ bá lɛ́ ágáalú nnyómá otíno áhandɛ́ na ɛ́táanɔ na mmue go go fóaga Nnyaŋá ya Asaŋa yɛ́ɛyɛ, maamɔ́ɔ go amɔ́ o gaá ágá medúgú mádadɔ́ go go yɛ fóaga o?» 21Kanɛ́ Nnyaŋá ya Asaŋa yɛ́ɛyɛ Yésusu a mbaá lɔmɔ́ a gálagala, bó mbaá lɛ nnyɔ́dɔ yɛhɛ́. 22Gó moánɛ, aŋa Yésusu a mbaá fúfúgé naá begúe, behúúní bɛ́hɛ́ go béeniŋinye goŋaá a mba lɛ́ gálɛ́dáalú nɔ́ɔ, gáábɔ́ go oliminyo ŋgoyáamɔ́ ya Ŋgɔ́ŋɛ́, tɔ́nɔ na nogálɔ nɔ́ɔnɔ a mbaá gálɛ́dá.
Yésusu i íyimene odɛ́má yá mɔtɔ
23Aŋa gɔ́ɔgɔ Yésusu a mbaá lɔmɔ́ naá Yolósalɛmɛ, naá gɛcamɛna gá gibíné gá Pásɛ́ka ya Beyúdene, gɛca gá batɔ gɛ́ mba ágá odɛ́má naá mɔ́ɔ aŋa bá mbaá ɛ́ná bieninye bá gobékúke bɛ́ɛbɛ a mbaá ŋanánáa. 24Kanɛ́ Yésusu a dɛ mbáa lɛ odɛ́má nabɔ́, goakɛ́ a mba lɛ́ a bó íyimene bɔ́ɔ biimée bese bese. 25Gó gunde a dɛ mbáa lɛ ncaná ya goŋaá bá mo oyana boóma go mɔtɔ, goakɛ́ a mba lɛ́ íyimene mɔ́ɔ moatɛ́ odɛ́má yá mɔtɔ.
Currently Selected:
Sáŋa 2: YAS
Highlight
Share
Copy
Want to have your highlights saved across all your devices? Sign up or sign in