Maafiù 11
11
Aŋ kèèlà Jɔ̀ɔŋ Gùà Nyùnɔ̀ɔŋ
(Luù 7.18-35)
1Nààŋ wo Jisɛ̀ naŋ wa kpɛ̀ɛ̀yɛ̀ wòò maŋ keì mɛɛ̀ŋ koɓɛ̀ anyùùŋ màŋjɛ̀wɛ̀ zììyà jɛ̀wɛ̀ tìyèeuŋ nyàŋ, wò naŋ yèwè koɓɛ̀ wii yèè wò naŋ kɔ̀ maŋ jawa nyiŋ màŋ sùà, ko gbùùyè ke mìè Dayàa.
2E teengaà wo Jɔ̀ɔŋ Gùà Nyùnɔ̀ɔŋ yaà wa ko sààŋ nyìwìi lɛ̀, wò naŋ kòmò maŋ keì maŋ wo Jisɛ̀ Kulaì yaà wa nyinie màŋ. Yèè wò naŋ tùɔ̀ŋ anyùùŋ màŋjɛ̀wɛ̀uŋ bà ko nɛ̀ɛ̀uŋ niìŋ. 3Kpeiŋ àŋ naŋ dàwè wo Jisɛ̀ nyààŋ, “Wòò wi, muàŋ nàŋ yaà wo nyùnɔ̀ɔŋ wo Jɔ̀ɔŋ naŋ woò wààŋ, wo Dayà naŋ tàeɗùù wèè wo hnàŋ wo wi joeyè wɔ? Ɔ̀ɔ̀ e yɛmɛ̀iŋ wo nyuùŋ joo bà dòmaŋ?”
4Wo Jisɛ̀ naŋ nyiŋ fasàì wààŋ, “Kɛ̀ɛìŋ maŋjɛ̀wɛ yèè niŋ woò wo Jɔ̀ɔŋ e yèɛ nìŋ naŋ kòmò yèè nìŋ naŋ yɛmɛ̀ lɛ. 5Anyuùŋ zììlè le fɛ̀ɛ̀ nyaŋ àŋ yɛ̀mɛ̀ dìì, yèè anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ àŋ kaaìŋ naàŋ tɛ̀ɛ̀. Anyuùŋ kɛ̀ɛ̀nɛ̀ŋ e sààŋ maŋkùnù nyaŋ àŋ nɔ̀ŋ zɛ̀nɛŋ nyiŋ, yèè anyuùŋ kpùɔ̀ŋ maŋ nùŋ nyaŋ komo naàŋ maŋ kàìŋ. Anyuùŋ fàa nyàŋ yèwà e fàaà dìì koɓɛ̀ wɔŋ nyiiŋ gèe, yèè àŋ wòò ke mìè gbìàŋ Ebò Siaàŋ koɓɛ̀ anyuùŋ pɔ̀ɔ nyàŋ. 6Wo Dayà do nàŋ kpùùmò anyùùŋ nyaŋ gbiŋ gòim gììyà màŋhɛɛ, èsàɓù màŋ keì maŋ mìŋ nyɛnɛŋ màŋ.”
7Nààŋ anyùùŋ màŋjɛ̀wɛ̀ Jɔ̀ɔŋ nyàŋ yaà wa kɛ̀ɛ̀ sùà maŋjɛ̀wɛ, wo Jisɛ̀ naŋ wòò anyùùŋ nyaŋ e nyaàiŋ dè wo Jɔ̀ɔŋ wààŋ, “Nààŋ nìŋ naŋ wa kɔ̀ ke fòùngà e diì wòaà sùà koɓɛ̀ Jɔ̀ɔìŋ, kiìŋ wò nyùùŋ nìŋ yaà wa yɛ̀ɛ̀mɛ̀ dòmaŋ wèè naŋ yɛmɛ̀? Wo nyuùŋ mùŋlaŋ mààŋ maŋ seìŋ mùnlòmunlo, maŋ yè maŋ wɔŋ fòìɔ mɛɛmɛ̀ɛ̀ŋ maŋ fàà maŋ gbiŋ? 8Kiìŋ nìŋ naŋ wa kɔ̀ wèè naŋ yɛmɛ̀? Wo nyuùŋ wo yèɔ naŋ kpàà maŋ deè sìàŋ sùà wɔ? Anyùùŋ nyaŋ kpaa maŋ dèè mààŋ miiŋ nyàŋ àŋ joà maŋ sààŋ aŋ kana dìì. 9Wòo nìim, kiìŋ nìŋ naŋ wa kaikpɔ kɔ̀ wèè naŋ yɛmɛ? Wo wɛ̀ijì? Tɔɔɓaa wo wɛ̀ijì wo wa. Kɛɛ tɔ̀ miŋ woòiŋ kɛ̀ wò naŋ wa nìè wo wɛ̀ijì. 10E kèè wo Jɔ̀ɔŋ wɔŋ fɛ̀ì Dayàa naŋ woò kɛ̀, ‘Wo Dayà naŋ woò wààŋ, mìŋ do nàŋ tùàŋ wo keela miɔ̀ŋ ko feìŋ wèè wo banebànè ke dòmaàŋ weèiŋ.’ 11Miŋ woòiŋ e tɔɔɓaaà, wo nyùùŋ gbiŋ fè wò yèɔ àŋ naŋ kùmìè è ɗuunyaàŋ wɔ, wo kùwìè è sɛmɛmaŋ e nìàŋ wò Jɔ̀ɔŋ Gùà Nyùnɔ̀ɔŋ. Kɛɛ wo nyùnɔ̀ɔŋ àŋ naŋ nììngè fɛ̀ɛ̀ wɔ e Kànà àìjɛnɛ̀ɛŋ sùà wò kuwa e sɛmɛmaŋ e nìàŋ wo Jɔ̀ɔŋ. 12E yìwìà e teengaà wo Jɔ̀ɔŋ Gùà Nyùnɔ̀ɔŋ, naŋ wa gbòò ke mìè Dayàa e hàì ke ɗɔɔ yɛɛ̀ nàaŋ lɛ̀, anyuùŋ dàà ke kpùùnɛɛ̀ àŋ kàmè ɗewe wèè aŋ ɓèmè e Kànà àìjɛnɛ̀ɛŋ e gààŋ sùà. 13Maŋ fɛ̀ì sìngà aŋ wɛ̀ijì nyaŋ gbiŋ, yèè maŋ Sàwà Mòòze màŋ, naŋ wòò maŋ keì maŋ hewa nàŋ kaaìŋ maŋ paŋgàà, wo Jɔ̀ɔŋ naŋ wa nɔ̀ŋ e kòmauŋ. 14Yèè sèè nìŋ haawà maŋ miè gbìaŋ nyiŋ màŋ, wo Jɔ̀ɔŋ nàŋ yaà wo Ìlaajà, wo yèɔ nìŋ yaà yɛ̀ɛ̀mɛ̀ dòmaŋ wèè wo hnàŋ wɔ. 15Weètii, jàaìŋ maŋ nùŋ dìì tɛ̀ɛ̀ sèè nìŋ kɛɛnɛ̀ŋ maŋ nùŋ!
16“Kɛɛ kiìŋ mìŋ naŋ ɓɛ̀nɛ̀ŋ tèènè anyuùŋ kpùuŋ nyàŋ nàaŋ ɗɔɔ yɛɛ̀ wèè aŋ nɔ̀ŋ? Àŋ yaà mààŋ aŋ jɔ̀àkàiŋ àŋ jaa ko mììnyɛ̀ŋ bòliì, ke gbòò guùŋ kè kpiinyàŋ aŋ dàwi, 17‘È naiŋ dàà maŋ nùŋ kpai weèiŋ, kɛɛ niŋ gò yèwà, yèè eiŋ dàà maŋ nùŋ ke nyowo, kɛɛ niŋ gò gòlà.’ 18Wo Jɔ̀ɔŋ naŋ wa hnè, kɛɛ wo gò kilià kò jììyè mànɛ̀ŋ je yèè kò tììyè màŋ tala muaŋ, yèè nìŋ naŋ woò nààŋ, ‘Wo jinàŋ naanààŋ yàaùŋ sùà!’ 19Kɛɛ nààŋ miàim wo Jɔ̀àfèlàà Nyuùŋ kpùnɔɔ̀ŋ naŋ hnè, mìŋ naŋ jènɛ̀ŋ yèè mìŋ naŋ tìè, yèè anyùùŋ nyaŋ gbiŋ naŋ woò nyààŋ, ‘Wo felaa wɛɛ̀ tɔɔ̀ wèè wo nɔ̀ŋ nyùùŋ tɔ̀ɔ̀nyaàŋ, kɛɛ wò jènɛ̀ŋ yèè wò tie zimgbe! Aŋ dàwiuŋ nyàŋ nàŋ yaà anyuùŋ kùwà nɛ̀ɛ̀nɛ̀ŋ fuɔɔ̀ŋ yèè anyùùŋ maŋ kpèè naanààŋ.’ Yɛi nɔŋ e jììkɛ̀ɛ̀ Dayàa è naŋ tɔɔ̀, wèè e nɔ̀ŋ e tɔ̀ɔ̀nyaàŋ e nyaàiŋ dè manɛ̀ŋ maŋ mìŋ nyɛnɛŋ màŋ sùà.”
Maŋ jawa gò kɛ̀ɛ̀nɛ̀ŋ hààwe màŋ
(Luù 10.13-15)
20Anyùùŋ nyaŋ maŋ jawa màŋ sùà ko yèi wo Jisɛ̀ naŋ wa nyɛ̀nɛ̀ŋ maŋ kèè mèèuŋ màŋ zimgbe lɛ̀, gò wa kìlà koɓɛ̀ Dayài. Kpeiŋ wo Jisɛ̀ naŋ nyiŋ wa tùù sìwè yèè wò naŋ nyiŋ woò wààŋ, 21“Nyɛ̀iŋ nààŋ nyùùŋ nyaŋ ko jawa gbeeì Kɔlesììŋ, e keì nyìnga yaà weèiŋ! Nyɛ̀iŋ nààŋ nyùùŋ nyaŋ ko jawa gbeeì Bɛ̀sailià, e keì nyìnga yaà wèè nyɛ̀iŋ pɛɛ! Maŋ kèè mèè maŋ mìŋ naŋ nyɛ̀nɛ̀ŋ kià maŋ, sèè ka miŋ wa weè nyɛ̀nɛ̀ŋ ko Taà yèè ko Sidɔ̀ùŋ, anyùùŋ nyaŋ kuii hewa nàŋ jɛi e teenga gɔu sùà aŋ gɔ̀àì maŋ deè bilabìlà e kìlà aŋ kpàlèè e duum maŋ ɗì wèè aŋ tɔɔ̀ kɛ̀ àŋ fè maŋ jùumù nyiŋ màŋ jɛwɛ. 22Tɔ̀ miŋ woòiŋ kɛ̀ wo Dayà do wa nàwèè nàŋ tɔ̀ɔ̀ ke nyowo gbee koɓɛ̀ anyùùŋ nyaŋ ko Taà yèè ko Sidɔ̀ùŋ eiŋ nìàŋ ke ɗɔɔɛ̀ wo Dayà do wa nàwèè nàŋ gbàì anyùùŋ nyaŋ gbiŋ e ɗuunyaàŋ lɛ. 23Nyɛ̀iŋ nààŋ nyùùŋ nyaŋ ko Kepanàùm, nìŋ manaŋ naŋ jòòwò nyɛ̀iŋ bi ko àìjɛnɛ̀ŋ? Nìŋ do nàŋ dèyè ko jàhamaŋ! Maŋ kèè mèè maŋ mìŋ naŋ nyɛ̀nɛ̀ŋ kià maŋ, sèè ka miŋ wa weè nyɛ̀nɛ̀ŋ ko Sɔdɔ̀ùŋ, màŋ heo weè nàŋ nɔ̀ŋ e teenga mààŋ tɛɛ̀ sùà. 24Weètii tɔ̀ miŋ woòiŋ e tɔɔɓaaà kɛ̀, wo Dayà do wa nàwèè nàŋ tɔ̀ɔ̀ ke nyowo gbee koɓɛ̀ anyùùŋ nyaŋ ko Sɔdɔ̀ùŋ eiŋ nìàŋ, ke ɗɔɔɛ̀ wò do wa nàwèè nàŋ gbàì anyùùŋ nyaŋ gbiŋ maŋ kpàlàùŋ kpàlàùŋ maŋ sùà lɛ e ɗuunyaàŋ.”
Hnàaìŋ ko nɛ̀ɛ̀ŋ miìŋ niŋ gè nyiiŋ
(Luù 10.21, 22)
25E teenga lii sùà wo Jisɛ̀ naŋ woò wààŋ, “Dèda, Kànà àìjɛnɛ̀ɔŋ yèè ɗuunyaàŋ, mìŋ naum gè sɛ̀ esaɓù kɛ̀, mùŋ naŋ nyɛ̀ɛ̀nɛ̀ŋ maŋ keì mɛɛ̀ŋ gbiŋ anyuùŋ nyìmàŋ nɛ̀ŋ nyaŋ sìwè, yèè mùŋ naŋ miŋ tɔ̀ɔ̀ anyuùŋ gò nyìmàŋ nɛ̀ŋ nyaŋ. 26Hɛ̀ɛɛ̀ŋ Dèda, tɛɛ̀ naum wa fɔ̀ɔ̀yɛ̀ ke jii.
27“Wo Dayà wo Dèda miɔ̀ŋ wòim kìɛ̀ŋ manɛ̀ŋ maŋ gbiŋ. Wo nyùùŋ bà gbiŋ nyimààŋ miàim wò Jɔ̀àfelaaà sɔɔ̀ nɔŋ wo Dèdaà wuŋ guùŋ, yèè wo nyùùŋ bà gbiŋ nyimààŋ miàim wo Jɔ̀àfelaaà sɔɔ̀ nɔŋ wo Dèdaà yaà aŋ yè nyaŋ miàim wo Jɔ̀àfelaaà naŋ tàeɗùù nyaŋ wèè ka nyiŋ tɔɔ̀ kɛ̀ ɓòò nàŋ yaà wo Dèdaà.”
28Wo Jisɛ̀ naŋ ɓɛìŋ woò wààŋ, “Hnaìŋ ko nɛ̀ɛ̀ŋ miìŋ, nyɛ̀iŋ nyàŋ kinɛiŋ nìŋ yaà kɔ̀ɔ̀yɛ̀ e keì nyìnga dìì e nyaàiŋ dè e yèɛ aŋ kààmɔ̀ɔ̀ŋ maŋ Sàwà nyaŋ naiŋ woò yèè àŋ naiŋ gbùwò ɗì maŋ, yèè mìŋ doiŋ nàŋ gè maŋ keì nyìnga bi ɗì. 29Ɓèmeìŋ wɔŋ nɛ̀ŋfoo mùŋga miɔ̀ŋ niŋ jàà wuŋ maŋ gbaiŋ màŋ diɛŋ, yèè niŋ gbeèim sìwè. Esaɓù kɛ̀ mìŋ kuwa ke kpèè siaŋ yèè ke jii tɔumtɔ̀ùm, yèè nìŋ do nàŋ yɛ̀mɛ̀ ko gììyè nyiiŋ wèè wɔŋ nyììŋ jinàiŋ nɔɔ̀ŋ. 30Wɔŋ nɛ̀ŋfoo mùŋgaà mìŋ doiŋ nàŋ kiɛ̀ŋ wɔŋ gò nyìngà kòa, yèè wɔŋ nɛ̀ŋfooɔ̀ mìŋ doiŋ nàŋ jàà ɗì wɔŋ, wɔŋ fè mùŋgà.”
Currently Selected:
Maafiù 11: WFESD
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.