LUKAS 22
22
Jesusta wanutsiyánanpaq yachatsinakuyan
1Lebadúrannaq tantakunapa fyestan yeykureykaptinnam, paskwa jutiyoq. 2I apun saserdótikuna i judyukunapa leynin yachatseqkuna, ashiyarqan imanowllapapis wanutsiyánanpaq; pwebluta mantsayarnin. 3I yeykorqan Satanas Judasman, Iskaryoti shunakiy jutiyoqman, keymi karqan chunka ishkeypita juknin. 4I keymi eywar parlarqan apun saserdótikunawan i tápakoqpa mandakoqninkunawan, imanowpa entregeykunanpaq. 5Peykuna kushiyarqan, i qelleyta qoyánanpaq ániyarqan. 6I pey ánirqan, i asherqan imanow entregananpaq nunakuna mana musyanqan.
Paskwapaq alistakiy
7Chámorqan lebadúrannaq tanta junaq, tseychowmi wanan sakrifikayánan paskwapa achkasninta. 8Jesús kacharqan Pedruta i Juanta, nirnin: —Eywayey, i alistayámi paskwata mikunapaq.
9Peykunanam niyarqan: —¿Meychowtaq munankiy alistayámunata?
10Peynam nerqan: —Kaq keymi, markaman yeykureykáyaptiki yarqamonqa juk nuna topayáneykipaq juk puyñupa yakuta aparnin; qatiyey wayiman yeykonqanyaq, 11i niyanki tsey wayichow kastapa teytanta: “Mayestrum nishunki: ‘¿Meychowtaq keykan kwartu paskwata disípulúkunawan mikunápaq?’ ” 12Tseynam pey rikátsiyáshunki altuschow juk jatun kwartuta alistashqatana; alistayey tseychow.
13Eywayarqan, i tariyarqan nishqannowlla i alistayarqan paskwata.
Señorpa sénan
14Órariptinna, tárerqan mésaman, i peywan apostulkunapis. 15I nerqanmi: —¡Imanowmi munarqó qamkunawan key paskwa mikiyta manaraq jiparnin! 16Niyaqmi mananam mikushaqnatsu, Dyospa reynunchow tinkunqanyaq.
17I kópata tsarirkur, grasyasta qorqan, i nerqan: —Upuyey keyta, i rakinakuyey kikikikunapura; 18niyaqmi mananam upushaqnatsu ubaspa wayíninpita, Dyospa reynun shamonqanyaq.
19I tantata tsarirkur grasyasta qorqan, i pakirir peykunata qorqan nishpa: —Keymi key kwerpú, qamkunapaqmi qoshqa; keyta rurayey noqata yarpáyámarniy.
20Tseynowlla, senarirnin, kópata tsarerqan, nirnin: —Key kópam key mushoq paktu yawarníchow qamkunareykur ramakan.
Jesús willakun Judas traysyonananta
21”Kaq key, noqawanmi mésachow keykan entregamaqnípa makin. 22Rasonpam Nunapa Tsurin eywan, disponishqanmannow; peru ¡allaw taqey nuna pipam entregashqa!
23Tseynam peykuna qalleykuyarqan kikinkunapura liryarnin, peykunapita meyqanraq kanman key ruraq.
Punta kaqpaq i sirwikiypaq
24Karqan kikinkunapura juk liryakiy peykunachow piraq kanman mayor kaq. 25Peru peynam nerqan: —Nasyonkunapa reyninkunam dwéñutukuyan peykunapita, i peykunachow mandakoqkuna alli ruraq nishqa kayan. 26Manam tseynowtsu qamkunachowqa, qamkunachow mayor kaq jobinnow katsun i pushakoq, sirwikoqnow. 27¿Meyqantaq mayorkaq, mésaman tákoq, ó sirwikoqku? ¿Manaku mésaman tákoq? Mas noqaqa qamkunachow keyká sirwikoqnow.
28”Qamkunam kayanki noqawan tsarakoqkuna prwebákunachow. 29Noqam, qoyaq juk reynuta, Teytá noqata qomashqannowlla. 30Reynuchow mikuyáneykipaq i upuyáneykipaq meysáchow, i táyankim trónukunachow chunka ishkey Israyel purwata jusgayáneykipaq.
Jesús willakun Pedru negananta
31”Señornam nerqan: Simon, Simon, kaq keymi Satanas mañakushqa trígutanow sernishuneykipaq; 32peru noqam rowakurqó qampaq, kreyikiyniki mana pishinanpaq; i qam, kutiramur, patsakátsi wawqikikunata.
33Peynam nerqan: —Señor, churakashqam keyká qanwan eyweyta manam karselllatatsu, sinowqa wanímanpis.
34I peynam nerqan: —Pedru, negamankim reqimanqeykita kima kuti manaraq gallu kantaptin.
Espiritwal pelyapa óran
35I peykunata nerqan: —Runkunnaq, alporjannaq, sapatunnaq, kachayapteq, ¿imapis pishipuyáshorqeykiku?
Peykuna niyarqan: —Ni ima.
36I peykunata nerqan: —Kananqa runkuyoq kaqqa, tsaritsun, i alporjatapis; i mana espadan kapoqqa, rantikutsun aqshunanta i jukta rantitsun. 37Tseymi niyaq wananmi tinkunan noqachow qellqashqa keykanqan: I yupashqa karqan mana alli ruraqkunawan; noqapita qellqashqa keykaqmi, tinkiynin kapun.
38Tseynam peykuna niyarqan: —Señor, keychowmi kan ishkey espadakuna.
I peynam nerqan: —Tseyllapaqmi.
Jesuspa llakikiynin Getsemaniychow
39I yarqurirnam, ewkorqan, kostumbrinmannow, Olíbus jirkaman; i disípulunkunapis qatiyarqan. 40Tsey sityuman chárirnam, nerqan: —Dyosta mañakuyey tentasyonman mana yeykuyáneykipaq.
41I pey rakikárerqan juk rumi qompeymannow; i qonkuríkur Dyosta mañakorqan, 42nirnin: —Teyta, munarqa, pasaratsi noqapita key kópata; ama rurakátsuntsu noqa munanqánowqa sinowqa qampa.
43I yuripurqan juk ángel syelupita kallpatsinanpaq. 44I allápa llakikiywan karninna, Dyosta mañakorqan sinchipa; sudornin karqan jatusaq yawar shutiynow patsakama shutorqan.
45Dyosman mañakiypita sharkurirnam, shamorqan disípulunkunaman, tarerqan puniykáyaqta llakikireykur; 46i peykunatam nerqan: —¿Imanirtaq punuyanki? Shárykuyey, i Dyosta mañakuyey tentasyonman mana yeykuyaneykipaq.
Jesusta présuyan
47Pey parleykaptinraq, yurirkuyarqan atskaqkuna; i Judas jutiyoq, chunka ishkeypita juknin, peykunapa nowpanta eywarqan; i witiykorqan Jesusyaq mutsananpaq. 48Tseynam Jesús, nerqan: —Judas: ¿juk mutseywanku Nunapa Tsurinta qoykunkiy?
49Peywan keykaqkuna susedeqkunata rikarnin, niyarqan: —Señor, ¿espádawanku tuksiyáshaq?
50Peykunapita juknin dañarerqan apun saserdotipa juk sirweqninta, i roqurerqan derécha kaq rinrinta. 51Tseynam Jesús yaskir, nerqan: —¡Tseyllana; jaqiyey!
I rinrinta yateykur, kachakáratserqan. 52I Jesús nerqan apun saserdotikunata, templu kuydaqkunapa mandakoqninkunata i awkinkunata, peypa kontran shamushqakunata: —¿Imeyka juk suwakoqmannowku yarqayámorqonki espadeykikunawan i shukshikikunawan? 53Templuchow kada junaq qamkunawan keykaptiy; mana pallariyarqeykitsu makikikunata noqapa kontrá; kananmi qamkunapa óreykikuna, i ampeqkunapa pwedeq keynin.
Pedru negan Jesusta
54I tsariyarnin, apayarqan, apun saserdótipa wayinman. Pedrunam qaterqan karullapa. 55Peykuna patyupa chowpinchow ninata sendirirna, tákuriyarqan jiruroqninchow; i Pedrupis tákurerqan peykunawan. 56Juk wáteynam, ninapa ládunchow teykaqta rikeykur, rikapeykorqan peyta, i nerqan: —Keypis peywanmi keykarqan.
57Peynam, manam nerqan, nirnin: —Warmi, manam reqítsu.
58Tseypita rátullatana, juk rikeykur, nerqan: —Qampis peykunapam kanki.
I Pedru nerqan: —Nuna, manam noqatsu ká.
59Tseypita juk óratanow, juknam jikutarqan, nirnin: —Rasonpam keypis keykarqan peywan, galilew karnin.
60Tseynam nerqan: —Nuna, manam musyatsu ninqeykita.
Tseyllanam, pey parleykaptinraq, gallu kantarerqan. 61Tseynam, Señor tumeykur, Pedruta rikeykorqan; i Pedruna yarpárerqan Señorpa palabran, nishqanta: “Manaraq gallu kantaptinmi, kima kuti negamanki.” 62I Pedrunam, jaqta yarqurir, allápa waqarqan.
Jesús sanedrinchow
63I Jesusta tápaq nunakuna burlakuyaq peypita i kutayarqan; 64nawinkunata tsaparkur kutayaq qaqllanchow, i tapuyaq, nishpa: —Adibiney, ¿pitaq key kutashorqonki?
65I niyaq allápa atska kosaskunata asharnin.
66Junaqyáriptinna eyllukáyarqan pweblupeq awkinkuna, apun saserdotikuna i judyukunapa ley yachatsikoqkuna, i apayámorqan konsilyuman, nishpa: 67—¿Qamku kanki Kristu? Niyámey.
I nerqan: —Niyapteq, manam kreyiyámankitsu. 68I Tapuyapteqpis, manam yaskiyámankitsu, ni kacharayámankitsu. 69Kanan órapitam Nunapa Tsurin tákurenqa Dyospa poderninpa deréchanchow.
70Niyarqan llapankuna: —¿Tseynowqa Dyospa Tsurinchi kanki?
I peynam nerqan: —Qamkunam niyanki noqa kanqáta.
71Tseynam peykuna niyarqan: —¿Ima mas willakitataq wanantsik? Kikintsikkunam wiyarqontsik shiminpita.
Currently Selected:
LUKAS 22: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.