JUAN 9
9
Jesús kachakátsin yurikiynimpeq wiskuta
1Jesús pasareykarnam, rikárerqan juk nunata yurinqanpeq wiskuta. 2Disípulunkunanam tapuyarqan, nishpa: —Rabí, ¿pitaq jutsallikushqa, keyku o teytankunaku, wisku yurinampaq?
3Jesusnam yaskerqan: —Manam keytsu jutsallakushqa, ni teytankunatsu, sinowqa Dyospa rureyninkuna peychow rikakánampaqmi. 4Kachamaqniypa rureyninta wananmi noqa ruraná, junaq duranqanyaq; ampi shamuptenqa, manam pipis uryeyta pwedintsu. 5Key munduchowraq keykarqa, mundupa aktsinmi ká.
6Keyta nirirnam, toqarerqan allpaman, i leqitata rurarerqan toqaninwan, i wiskupa nawinta llushirerqan leqitawan, 7i nerqan: —Eywey i paqakiy Silowey kitachow, (keymi ninan Kachashqa).
Tseynam eywar, paqakurerqan, i kutiramorqan rikeykarna. 8Tseynam besínunkuna, i uneypita wisku kanqanta reqeqninkuna, niyarqan: —¿Manaku key limushnakur tákoq?
9Jukninkunanam niyarqan: —Peymi.
I wakinkunanam: —Pey rikoqmi.
Peynam nerqan: —Noqam ká.
10Tseynam niyarqan: —¿Imanowpataq nawikikuna kichakarqon?
11Peynam yaskirnin nerqan: —Taqey Jesús jutiyoq nuna leqitata rurarir, nawiykunata llushiramur, nimarqan: “Eywey, i paqakiy Silowechow.” I eywar paqakorqá, i chaskirerqá rikeynita.
12Tseynam niyarqan: —¿Meychowtaq keykan pey?
Peynam nerqan: —Manam musyatsu.
Farisewkuna tapupáyan kachakashqata
13Apayarqan farisewkunaman wisku kashqata. 14I jamakiy junaqmi karqan Jesús leqitata ruranqan, i nawinkunata kichanqan. 15Yapeynam, tapuyarqan farisewkunapis, imanow nawin kichakashqanta. Peynam nerqan: —Leqitatam nawíkunaman churarkamorqan, i paqakurerqá, i riká.
16Tseynam wakinkaq farisewkuna niyarqan: —Manam tsey nunaqa Dyospitatsu shamun, jamakiy junaqtapis wardantsu.
Wakinkunanam niyarqan: —¿Imanowpataq, juk jutsasapa nuna ruranman key señalkunata?
I kikinkunapuram liryakurkuyarqan. 17Tseynam yapey niyarqan wiskuta: —¿Imataq ninki qam nawikikuna kichamoqpaq?
Peynam nerqan: —Keyqa profetam.
18Peru judyukunaqa manam kreyiyarqantsu wisku kashqanta, i nawinkuna kichashqa kanqanta, nawin kichakashqapa teytankunata qayayamonqanyaq, 19i tapuyarqan nishpa: —¿Qamkunapa tsurikiku key, wiskum yurishqa niyanqeykiku? ¿Imanowpataq, kanan rikan?
20Teytankuna yaskirnam niyarqan: —Musyayámi key tsuriykuna kanqanta, i wisku yurinqanta; 21peru kanan imanowpa rikanqantaqa manam musyayátsu o pí nawinkunata kichashqanta, manam noqakunapis musyayátsu; awkisnam tapuyey peyta, kikinmi willakonqa.
22Keyta niyarqan teytankuna judyukunata mantsarnin, judyukuna yachatsinakushqa kayarqan pipis Jesuspaq Mesiyasmi neqtaqa, eyllukáyanan wayipita qarqushqa kanampaq. 23Keynow kaptinmi teytankuna niyarqan: “Awkisnam, kikinta tapuyey.” 24Tseynam yapey qayayarqan wisku kashqa nunata, i niyarqan: —¡Dyosta gloryata qoy! Noqakuna musyayámi taqey nuna jutsasapa kanqanta.
25Tseynam pey yaskir nerqan: —Si jutsasapatsuraq, manam musyatsu; juktam musyá, wiskum karqá, kananqa riká.
26Yapeynam niyarqan: —¿Imatataq rurashorqeki? ¿Imanowtaq nawikikunata kichamorqan?
27Peynam yaskerqan: —Niyarqoqnam, wiyeyta munayankitsu. ¿Imanirtaq yapey wiyeyta munayanki? ¿Qamkunapis disípulun keytaku munayanki?
28Piñaparnin niyarqan: —¡Qanmi disípulunqa kanki! ¡Noqakunaqa, Moysespa disípulunkunam kayá! 29Noqakunaqa musyayámi Moysesta Dyos parlapanqanta; peru peypaqqa, musyayátsu meypeq kashqantapis.
30Nunanam yaskirnin nerqan: —¡Keymi almirakiypaqqa qamkunaqa musyayankitsu meypita kanqanta, noqataqa nawíkunatam kichamushqa! 31Musyantsikmi Dyos wiyantsu jutsasapakunataqa; peru pipis Dyostatsun mantsakun i munashqanta ruran, peytam wiyan. 32Qallananpita manam wiyeytsu kashqa pipis juk wisku yurishqapa nawinta kichashqanta. 33Si keytsun Dyospita mana shamunman, manam ni ima rureyta pwedinmantsu.
34Yaskirnam niyarqan: —Qamqa yurishqa kanki llapan jutsachowmi, ¿noqakunataku yachatsiyamanki?
I qarquriyarqan.
Kachakátsishqa wisku Jesusman kreyin
35Jesusnam wiyarerqan qarqurishqa kanqanta; i taririrnam, nerqan: —¿Qam kreyinkiku Dyospa Tsurinman?
36Peynam yaskirnin nerqan: —¿Pitaq pey, Señor, peyman kreyinápaq?
37Jesusnam nerqan: —Rikarqonkinam, i qamwan parlaqmi, peymi.
38Peynam nerqan: —¡Kreyillami, Señor!
I adorarqan.
39Jesusnam nerqan: —Noqaqa shamushqa ká key munduman fisyupaqmi; mana rikaqkuna, rikáyanampaq, i rikaqkuna wiskuyayanampaq.
40Tseynam farisewkunapita wakin, peywan keykaqkuna, keyta wiyar, niyarqan: —¿Noqakuna akasu wiskuku kayá?
41Jesusnam yaskerqan: —Wisku karqa, jutsannaqmi kayankiman, kananqa, rikámi niyanqeykireykur: Jutseykikuna keykanraq.
Currently Selected:
JUAN 9: QUEAN
Highlight
Share
Copy
Want to have your highlights saved across all your devices? Sign up or sign in
Quechua Ancash New Testament © Peruvian Bible Society, 1992.