Ohuchaaka 2
2
1Ao mani ekulu neende esyaalo nibimala ohuloongwa, neende ebiindu byoosi ebibirimo. 2#Hut 20:11. #Abaib 4:4,10. Hu ludaalo lwa hataanu-na-habiri, Nasaae yamala omulimo kwae ku yali naaholere, mani n'awuluuha hu ludaalo lwa hataanu-na-habiri n'amalire omulimo kwae. 3Nasaae yaberesa oludaalo lwa hataanu-na-habiri ehabi mani yaaluhusa, olwohuba oludaalo olwo, nilwo lu Nasaae yawuluuhiraho n'amalire omulimo kwae ku yali naaholere okw'ohuloonga.
4Yino mani niyo engeri yii kulu neende esyaalo byaloongerwamo.
Endalo y'Edeni
Omwaami Nasaae niyaloonga ekulu neende esyaalo, 5emisaala kyoosi nikibula hu syaalo, haandi olumwo lwoosi nilusisiiri ohumera, olwohuba Nasaae yali n'asisiiri ohukwiisa efula hu syaalo, haandi naabulao omuundu olima eloba. 6Nae amaachi kasoohaanga ohutula aasi mu loba nikanyisa esyaalo syoosi.
7 #
1 Kor 15:45. Ao Omwaami Nasaae yabukula olufu ohutula hu loba, naloongamo omuundu, naamuyeereramo omuuya kwobulamu mu moolu, mani omuundu n'achaaka ohuba omulamu. 8Ao Omwaami Nasaae yahola endalo mu Edeni, eyali ebukwe; mani yaayitaamo omuundu yi yali naloongere. 9#Hubwi 2:7; 22:2,14. Nasaae naakera emisaala kya buli ngeri nikimera mu ndalo eyo. Buli musaala kwali nikubonehana bilai, haandi kwali omulai kw'ohulya. Nae omusaala kwobulamu kwosi kwali nikuli akatikaati w'endalo eyo, neende omusaala kw'ohumanya esilai neende esibi.
10Omwaalo kwaliwo okwahulukusaanga nikutula mu Edeni nikuchuhiirisa endalo eyo, kwakabuhanamo mani nikweehola emyaalo kine. 11Eliita ly'omwaalo kutaangira nilyo Pisoni; kuno nikwo omwaalo okuhulukusa nikwebodoohania esyaalo sya Hafila, esirimo efeesa; 12(efeesa eyomu syaalo omwo ndai niyo; haandi amafuta k'esing'aari neende amakina k'engaanga koosi kali mu syaalo omwo.) 13Eliita ly'omwaalo kwohubiri nilyo Gihoni; kuno nikwo okuhulukusa nikwebodoohania esyaalo sya Kuusi syoosi. 14Eliita ly'omwaalo kwohudatu nilyo Tigiriisi, kuno nikwo okuhulukusa nikuchia ebukwe wa Asiria. Nae omwaalo kwohune nikwo Ewufuraate.
15Ao Omwaami Nasaae yabukula omuundu yi yaloonga mani yaamuta mu ndalo y'Edeni ohuyirimaanga neende ohuyiliindanga. 16Nasaae yalagira omuundu n'aboola ati, “Oli omulehuule ohulya hu buli musaala okuli mu ndalo yino; 17nae hu musaala kwohumanya esilai neende esibi haba sokulichaangaho, olwohuba hu ludaalo luwahakuliireho sa oti, ochia ohufwa.”
18Ao Omwaami Nasaae yaboola ati, “Haba sisilai omuundu ohubechaanga yeeng'ene daawe; Njia ohumuholera omuhoonyi omuhoyera.” 19Mani Nasaae yabukula eloba naaholamo buli sisolo esiri hu syaalo neende buli yoni elibburuha, mani n'abileeta eyiri omuundu abone koti lwaanabilaange. Buli liita li muundu yakulihaanga buli siindu, nilyo li basilaangaanga. 20Mani omuundu naakuliha buli syaayo eliita, neende buli mayoni kabburuha, haandi neende buli sisolo syomu siino. Nae omuundu chana nae haba siyaliho neende owaasye omuhoyera yeesi daawe. 21Ao mani Omwaami Nasaae yaakera omusaacha yaakona endoolo ch'amaani, mani omusaacha niyali naakonere, Nasaae yamutusamo olubafu lulala yabwiihao neende enyama. 22Nae olubafu lu Nasaae yali n'atusire mu musaacha, yaluholamo omuhasi yaamuleeta eyiri omusaacha. 23Mani omusaacha yaboola ati,
“Wuno bulaanu niye ekuumba ohutula hu makuumba kaange
haandi enyama ohutula hu nyama yaange;
achia ohulaangwaanga ‘Omuhasi,’
olwohuba yatuswa mu ‘musaacha’.”
24 #
Mat 19:5; Mrk 10:7,8; 1 Kor 6:16; Efes 5:31. Sino nisyo esikera omusaacha yalehaanga laatang'ene neende ng'ina mani yeyambania neende omuhasi wae, nibaba silala.
25Omusaacha neende omuhasi bali nibali syeekenye, nae esoni haba sichabadiiraangaho daawe.
Currently Selected:
Ohuchaaka 2: SAMIA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
©Bible Society of Uganda, 2019