Luka 20
20
Bơta lùp bơh gơnoar Kơnràñ dê
(Mathiơ 21:23-27; Mak 11:27-33)
1Gơs dô ngai ne, Yàng Jesu ơm bơto sồr làng bol tòm hìu duh khoai mơ bơto yal Jơnau Niam, nisơna ală cau gơnoar lam bồ ơn phan duh khoai, ală cau bơto bơta boh lam, mơ ală cau kwang kra lòt tus bal, 2đơs mơ Kơnràñ lah: “Yal tĕ bol hi in git, bơh gơnoar lơi mơ ồng lơh ală bơta do taih? Ñcau neh ai ồng in gơnoar hơ̆ taih?” 3Kơnràñ ho lah: “Añ kung lùp bol mê dô jơnau, ho tĕ Añ in: 4Bơta ƀaptem Jang dê la bơh trồ hala bơh cau mơ tus taih?” 5Bol khai tòmbơyai bal lah: “Dilah bol he đơs: ‘Bơh trồ,’ gen khai rơp đơs lah: ‘Behơ̆ mbe bol mê ò dòn Jang taih?’ 6Ai dilah đơs: ‘Bơh cau,’ gen jơh làng bol rơp cơm lŭ dê bol he, bơh bol khai dòn nền ngan Jang la cau gơnoar hwơr.” 7Gen tàng bol khai ho lah ò git ƀaptem hơ̆ tus bơh lơi. 8Yàng Jesu đơs mơ bol hơ̆ lah: “Añ kung ò yal bol mê in git bơh gơnoar lơi mơ Añ lơh ală bơta do.”
Pơnyơu bơh cau tam ño
(Mathiơ 21:33-46; Mak 12:1-12)
9 #
Esai 5:1. Gen Yàng Jesu yal mơ làng bol jơnau pơnyơu do: “Gơs dô nă cau neh tam dô nơm suơn ño, mơ ai ală cau lơh suơn in ơpah gơ, gen khai lòt hơ lơgar ndai jŏ ngai. 10Tus di kơnhai pic plai, cau tòm sồr dô nă dĭ lòt tus hơ ală cau lơh suơn nàng dòp cồng nha suơn ño dê, mơya ală cau lơh suơn pù lơh cau dĭ mơ bơtrơh rê gòi. 11Cau tòm sồr tai dô nă cau dĭ ndai lòt tus, mơya cau ơpah suơn pù lơh khai, bơtat bơtròh#20:11 Cil: bơtat tơmbe. mơ bơtrơh rê gòi. 12Cau tòm sồr tai dô nă cau dĭ dơ̆ pe, mơya cau ơpah suơn kung lơh cau hơ̆ jê sồt mơ bơtrơh tơlik. 13Chòp cau tòm suơn ño đơs lah: ‘Ñchi añ pal lơh taih? Añ rơp sồr kòn klau kòñ gơboh añ jê; digơlan bol khai rơp ki ngàm di khai.’ 14Mơya dơ̆ bol lơh suơn gŏ khai, gen tòmbơyai bal lah: ‘Do la cau pơrdòn; heh, tơnchơt tĕ khai nàng sre brê khai gơrê mơ bol he.’ 15Gen bol hơ̆ sơrbì khai hơ bơdìh suơn mơ tơnchơt tơn. Behơ̆ cau tòm suơn ño hơ̆ rơp lơh mbe lơi di bol hơ̆ taih? 16Khai rơp tus tơnroh ală cau lơh suơn hơ̆, mơ jào suơn ño hơ̆ ală cau ndai in.” Làng bol kơno behơ̆ gen đơs lah: “Ò gơs broă behơ̆ ò.” 17#Đơs Crih 118:22.Yàng Jesu sền di bol khai mơ đơs lah: “Behơ̆ gen jơnau neh cih:
‘Pơnai lŭ mơ ală cau bơt hìu neh sang tơlik,
Lŭ hơ̆ neh gơlik gơs lŭ mum hìu,’ la ñchi taih?
18Cau lơi dùh hơđang pơnai lŭ hơ̆ gen rơp lề lac; ai lŭ hơ̆ dùh di cau lơi, gen rơp lơh cau hơ̆ lề trak.” 19Ală cau bơto bơta boh lam mơ ală cau gơnoar lam bồ ơn phan duh khoai git Kơnràñ đơs pơnyơu hơ̆ la sơnio bơh bol khai, gen tòm jơ hơ̆ bol khai jòi bơta nàng kup Kơnràñ, mơya bol khai rngòt di làng bol.
Bơta boh dia Sesa in
(Mathiơ 22:15-22; Mak 12:13-17)
20Bol khai kơp sền Kơnràñ, loă sồr cau sền òm lơh blac be cau song, tồ kup Kơnràñ tòm jơnau đơs, nàng bơtào Kơnràñ tòm tê kwang bàng mơ cau kwang đơng lơgar.
21Bol hơ̆ lùp Kơnràñ lah: “Ơ Cau Bơto, bol hi git ồng đơs mơ bơto song lơm, ò rngòt di cau lơi, mơya bơto gùng Yàng Tom Trồ dê dô bă song ngan. 22Behơ̆, bol he pal boh dia Sesa in hala ò?” 23Git loh kai lac lèo bol hơ̆ dê, gen Kơnràñ đơs lah: 24“Ai tĕ dô dơnie Añ in sền. Rùp mơ sơnđan do la ñcau dê taih?” Bol hơ̆ ho lah: “Sesa dê.”#20:24 Sesa: la sơnđan mơ cau Rôma hòi di bơtau bol khai dê. 25Chòp Kơnràñ đơs mơ bol khai lah: “Behơ̆ tơm wơl tĕ Sesa in phan lơi Sesa dê, mơ tơm wơl tĕ Yàng Tom Trồ in phan lơi Yàng Tom Trồ dê.” 26Di đap làng bol, bol khai ò rgơi kup Kơnràñ tòm dô jơnau đơs lơi. Bol khai ai lơh krơi bơh jơnau ho Kơnràñ dê, gen ơm mŏ mŏ be cau kloat.
Jơnau lùp bơh bơta kis wơl
(Mathiơ 22:23-33; Mak 12:18-27)
27 #
Broă 23:8. Gơs dô êt nă cau Saduse,#20:27 Sền jơnau cih kah tòm Mat 3:7. la cau đơs ò gơs bơta kis wơl, lòt tus lùp Kơnràñ lah: 28#Yalw 25:5.“Ơ Cau Bơto, Môise neh cih bol hi in lah: ‘Dilah cau bi lơi chơt lòi wơl bau ùr mơ ò gơs kòn, gen oh khai pal bau mơ cau ùr bơnrau hơ̆ nàng tơrbŏ jơi bi khai in.’ 29Do, gơs poh nă oh mi; cau bi tơnhoa bau, mơ khai chơt ò gơs kòn. 30Lồc behơ̆ cau dơ̆ bàr, 31gen cau dơ̆ pe bau mơ ùr hơ̆, mơ jơh poh nă kung bau mơ khai, poh nă chơt jơh mơ ò gơs kòn. 32Lồi tơnơ̆, cau ùr hơ̆ kung chơt. 33Behơ̆ gen, tŭ kis wơl, cau ùr hơ̆ rơp la bau ñcau dê tòm bol hơ̆ taih? Bơh poh nă cau hơ̆ neh bau mơ khai.” 34Yàng Jesu đơs mơ bol khai lah: “Cau rài do lap klau tòmbau ùr, 35ai ală cau geh kòp la di pal dòp rài tơnơ̆ mơ geh kis wơl bơh bơta chơt, gen ò lap klau tòmbau ùr. 36Bol khai rơp ò chơt tai, bơh bol khai tòm toh be ală cau gơnrơh mơ la kòn Yàng Tom Trồ dê, hơ̆ la kòn bơta kis wơl dê. 37#Lik 3:6.Tòm tiah cih bơh rlau lò ồs sa, Môise neh yal tơlik lah ală cau chơt geh kis wơl, tài bơh khai neh hòi Yàng la Yàng Tom Trồ Abraham dê, Yàng Tom Trồ Isak dê, Yàng Tom Trồ Jakôp dê. 38Behơ̆ Kơnràñ ò di la Yàng Tom Trồ cau chơt dê ò, mơya la Yàng cau kis dê, bơh gơwèt mơ Kơnràñ, jơh tơl nă cau la kis.” 39Gơs dô êt nă cau bơto bơta boh lam ho lah: “Ơ Cau Bơto, ồng đơs di ngan.” 40Bol hơ̆ ò khin lùp Kơnràñ jơnau lơi tai.
Bơtau Krist la kòn Dabit dê
(Mathiơ 22:41-46; Mak 12:35-37)
41Yàng Jesu lùp bol khai lah: “Ñchi bơh tài cau đơs Bơtau Krist la kòn Dabit taih? 42Bơh să tòm Dabit neh đơs tòm Sră Đơs crih lah:
‘Yàng neh đơs mơ Yàng añ:
Nggui tĕ đah ma Añ,
43 #
Đơs Crih 110:1. Jơl tus di tŭ Añ ơn ală cau sò tơm mê dê lơh gơs kơrnòl jơng mê dê.’
44Behơ̆ Dabit neh sơnđan Kơnràñ la Yàng, gen mbe Kơnràñ la kòn khai dê taih?”
Yàng Jesu lah pơrhơng ală cau gơnoar cih
(Mathiơ 23:1-36; Mak 12:38-40)
45Tòm tŭ jơh làng bol ơm iat, gen Kơnràñ đơs mơ ală cau bơtê lah: 46“Kơrhia tĕ di ală cau bơto bơta boh lam, la cau kòñ soh ào jrùh mơ lòt yơng, kòñ gơs cau lùp niam să tòm gùl drà, kòñ nggui cơnòng hơđap tòm hìu jum mơ nggui tiah bồ tòm bơta ñô sa. 47Bol khai lơh bơthĭ hòi dan jòng jơnau, mơya sa loan hìu ală cau ùr bơnrau dê. Bol khai rơp kong cahrña mơ lơh nền glài kơnjơ̆ rlau tai.”
Currently Selected:
Luka 20: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.