Matio 5
5
Matinak ka aiarimwetc Cecoc
(Matio 5–7)
1Ka wapaketc Cecoc e mitcetinaniwonik waska e nanipowitc, ki amatciwew matinak e nta apitc. Owitcewakana ki pe natawapamiko. 2Ekoni e iti kiskinohamawatc, e aitetc:
Tapwe caweritakosiwin
(Natawapata kaie Luc 6.20-23)
3“Caweritakosiwok kaskina ka kiskerimitisotcik e kitimakisitcik otcitcakociwak itekera.#5.3 ka kiskerimitisotcik e kitimakisitcik otcitcakociwak itekera: Peikon kata ki ici nisitotakon: tekaci ka tipaterimitisotcik, e niciki micta mirotakon.
Enko aniki tapwe ka ici tatakik Kice Manitowa Okimawiniw.
4Caweritakosiwok aniki ka matotcik.
Kata meka kakisomikowok Kice Manitowa.
5Caweritakosiwok aniki ka pekatisitcik.
Kata meka pe otitikowok askiriw ka ki itikotcik Kice Manitowa kitci mirakaniwitcik.
6Caweritakosiwok aniki ka pasoweritakik kitci ici pimatisitcik Kice Manitowa e ici nataweritamiritci.#5.6 aniki ka pasoweritakik kitci ici pimatisitcik Kice Manitowa e ici nataweritamiritci: Mia itemakan: ka pakatetcik kirika ka pakatamotcik ohweriw otci.
Kata meka mirikowok kaskina aniheriw ka ici nataweritakik.
7Caweritakosiwok aniki ka kitimakerimatcik owitc iriniwawa.
Kecko meka kata kitimakerimikowok Kice Manitowa.#5.7 kata kitimakerimikowok Kice Manitowa: Peikon kata ki ici nisitotakon: kata kitimakerimakaniwiwok. Matci kaie kata ki acotcictew: tipaskonakaniwonike.
8Caweritakosiwok aniki tekaci ka mirwinakositcik otehiwak.
Kata meka wapamewok Kice Manitowa!
9Caweritakosiwok aniki ka otamirotatcik pekaterimowiniw kitci miroparihitonaniwonik neta e ici taciketcik.#5.9 Natawapata kaie Cak (Jacques) 3.18.
Kata meka icinikatikowok Kice Manitowa ‘ninitcanicak’!
10Caweritakosiwok aniki ka nekatcihakaniwitcik, osam e itatisitcik Kice Manitowa e ici nataweritamiritci.
Enko aniki tapwe ka ici tatakik Okimawiniw.”
11“Ki caweritakosinawaw kecpin e kiraskinaniwok e marerimikoiekw, e nekatcihikoiekw, kecpin kaie kaskina wiec e itikoiekw e marerimikoiekw, osam nin e nosanehwiekw. 12Ekoni ici micta kice mireritamokw! Micta mireritamokw! Kecko meka ki ka micta cawerimikowinawaw wakwek. Ekoni peikon kaie wirawaw ka ki pe ici nekatcihakaniwitcik iriniwok weckatc ka pe nikan tipatcimowaspan, ka pe pimatisiwakopanen ota askik epwamoci kirawaw.”
Ciwotakan kirika wactenamakan
(Natawapata kaie Mark 9.50; Luc 14.34-35)
13“Mia ciwotakan kit iteritakosinawaw ota askik.#5.13 Mia ciwotakan kit iteritakosinawaw ota askik: Pot wi itemakanotake: Ki kiskeritenawaw e irapatak ciwotakan. Wikacin mitcimik e actakaniwok, nama kaie wipatc maratan mitcim e ciwotakatcikatek. Kirawaw ka pe nosanehwiekw, ekoni e iteritakosiekw, iriniwok otci. E miroteheiekw, ki witcihawawok kotakihik iriniwok kaie wirawaw kitci mirotehetcik. Kecpin aric aka awocamec nisitospokoke ciwotakan, tan ke ki totcikatek kitci koski ciwak? Nama aci wiec irapatan. Ekoni e ici orowepinikatek kitci takoskatakik iriniwok.”
14“Mia kaie wactenamakan kit iteritakosinawaw ota askik. Nama kata ki katakaniwon otenaw, okititin e ki ocitakaniwok. 15Peikon wactenamakan nama iskahikatew tepirak kitci actakaniwok atamik askikok. Nitowatc actakaniwon neta ko ka ici tcimatakaniwonik kitci ki miro wactek mikiwamik, kaskina neta ka taciketcik kitci miro wapatakik. 16Ekoni tca e actek kitci irapatisiekw iriniwok otci, kitci wactenamowekok mia wactenamakan, kitci ki miro wapatakik aniheriw ka mirwacinik ka totamekw acitc kitci otci mirwatcimatcik Kotawiwawa wakwek ka tacikeritci.”
Aiamihe irakonikewin
17“Aka iteritamokw e ki pe icaian kitci pe nta pikotawak Moïse otirakonikewin kirika okiskinohamakewiniwaw aniki ka ki pe nikan tipatcimowaspan. Nama ni ki otci pe ican kitci pe nta otamirotawak aka awocamec kitci nosanetakaniwonik, aric ma kitci pe nta wapatahiwewak tan mia wa itemakanik. 18Tapwe ohwe ka witamatakok: irikik ke takok wakwek kirika aski, tekaci nama otci peikw nta e tatiki irakonikewina kata maninikatew e itactek, misawatc anihe mawotci aka e sapinakok; nac kaskina ickwa iciwepake.#5.18 nac kaskina ickwa iciwepake: Peikon kata ki ici nisitotakon: nac kaskina ickwa takociparinike ka ki itetc Kice Manito kitci pe iciwepanik. Kekotc: nac ickwa ponaskiwoke. 19Anahwe tca aka ka nosanetatc Kice Manitowa otirakonikewiniw, misawatc aniheriw mawotci aka e sapinakonik, kecpin kaie itate kotakihi iriniwa aka kitci nosanetaritci aniheriw irakonikewiniw, enko anahwe mawotci aka ke kicteritakositc neta Kice Manitowa Okimawinik. Aric anahwe ka nosanetatc acitc ka kiskinohamawatc owitc iriniwa kaie wirawaw kitci nosanetaritci, kata kicteritakosiw nete Kice Manitowa Okimawinik. 20Ki witamatinawaw: kecpin aka kirawe wewerita nosanetawekwe aniheriw e ici nataweritak Kice Manito patok aniki ka kiskinohamaketcik cota aiamihe irakonikewiniw kaie Pharisien iriniwok,#5.20 cota aiamihe irakonikewiniw kaie Pharisien iriniwok: Enko aniki meka ka micta ko kokwetcitawakopanen mia kitci nosanetatcik kaskina cota aiamihe irakonikewiniw. nama ki ka ki pitakanawaw Kice Manito Okimawinik.”
Kiciwasiwin
21“Ki ki petenawatake e ki itakaniwitcik weckatc kitaniskotape kimocominapanak:
‘Nama ki ka manohon.’ Exode 20.13; Deutéronome 5.17
‘Kecpin awik nipahate owitc iriniwa,
kata kackitamatiso kitci tipaskonakaniwitc.’
22Aric anotc nin ki witamatinawaw: kecpin awik wawatc tepirak kiciwasictowate owitcicana,#5.22 owitcicana: Peikon kata ki ici nisitotakon: owitc iriniwa kaie wir ka nosanehwaritci Cecoca. kata kackitamatiso kitci tipaskonakaniwitc. Anahwe ka itatc owitcicana: ‘Ki kiwockwan!’ acteriw kitci tipaskonikotc anahweriw cota iriniwa ‘Ka Kitci Tipaskonikeritci’ ka icinikatakaniwiritci. Anahwe aric ka itatc owitcicana: ‘Tekaci nama wiec kit irapatisin!’ kackitamatiso kitci iciwepinakaniwitc matci ickotek, atamaskamikok ka takonik.”
23“Kecpin pe icaine aiamihe mikiwamik, neta e ici aiamihe pakitinikaniwok ko, e wi aiamihe pakitinikein Kice Manito otci, mikawiine tca e ki akohatc kiwitcican, 24nakatekan neta nikanik anihe ka wi pakitinaman. Pitama ki ka natawapamaw anahwe kiwitcican, kitci kakitcihatc kiapatc kitci miroparihitoekw. Minawatc ki ka pe kiwan neta aiamihe mikiwamik. Pitceraka tca ki ka ki cawerimaw Kice Manito.”
25“Kecpin awik wi arimihiske, tecikotc ki ka wecitowaw, mekwata kiapatc e pimoteiekw, epwamoci takociniekw arimitakosiwikamikok. Kecpin aka ni itotiskeine, tipaskonike irinik ki ka iciwirikw. Takonike irinik tca ki ka iciwirikw tipaskonike iriniw. Minawatc ki ka kipohokowin. 26Tapwe ni ohwe ka witamatan: kecpin kipohotowikamikok iciticohokoine, nama wipatc ki ka orowin neta, patoc kaskina kicikamane irikik ka actakaniwok kitci orowiin. Ekoni patoc ke pakitinikoin.”
Pacikwatisiwin
27“Ki ki petenawatake weckatc kiskinohamakewin e pe itwaniwok:
‘Nama ki ka pacikwatisin.’ Exode 20.14; Deutéronome 5.18
28Aric nin ki witamatinawaw: kecpin iriniw e kanawapamatc owitc iriniwa okomiriw, e tca natawerimatc, ekoni aci e pacikwatisitc otehik.”
29“Kecpin tca kinihiwini kickicikw e pactatiwakein, manipata! Warawik iciwepina! Kirawe kata miroparinopan kir otci aka misiwe kitci takok kiwiawik, patok kaskina kitci takok e itikitiin kitci tca iciwepinikoin atamaskamikok.”
30“Kecpin kinihiwini kitcitci e pactatiwakein, kickitcitcehotiso! Warawik iciwepina! Kirawe kata miroparinopan kir otci aka misiwe kitci takok kiwiawik, patok kaskina kitci takok e itikitiin kitci tca iciwepinikoin atamaskamikok.”
E wepinitonaniwok
(Natawapata kaie Matio 19.9; Mark 10.11-12; Luc 16.18)
31“Weckatc kaie ki pe itwaniwon:
‘Anahwe ka wepinatc okoma,
acteriw kitci miratc masinahikaniw
e itemakanik e wi wepinatc.’ Deutéronome 24.1
32Aric nin ki witamatinawaw: kecpin iriniw e wepinatc okoma, aka aric e ki otci wecimikotc, pacikwatisihew, kecpin minawatc wikimaritena kotakihi iriniwa. Minawatc anahwe iriniw ka wikimatc anihi iskwewa ka ki wepinakaniwiritci, kaie wir pacikwatisiw.”
E nespi tapwaniwok
33“Ki ki petenawatake aniheriw ka ki ici kiskinohamawakaniwitcik weckatc kitaniskotape kimocominook:
‘Aka pikota ka ki ici nespi tapwein.
Otcitakotc tca ki ka toten anihe
ka ki ici nespi tapwein Teperitciketc otci kitci itotiskein.’ Lévitique 19.12; Nombres 30.3(2); Deutéronome 23.22-24
34Aric nin ki witamatinawaw ohwe: aka nespi tapwewake kekocic kitci tapwetakoin, kecpin kekocic wa totamane. Nama ki ka nespi tapwewakan wakwek. Ekota meka e ici apitc Kice Manito. 35Nama kaie aski ki ka nespi tapwewakan. Ekota ota meka ka icisitecik.#5.35 Ekota ota meka ka icisitecik: Peikon kata ki ici nisitotakon: Enkweriw meka ka ici tiperitak. Nama kaie Jérusalem otenaw ki ka nespi tapwewakan. Enkweriw meka otenam Kikice Okimamino. 36Nama kaie kictikwan ki ka nespi tapwewakan. Nama meka ki kackitan kitci wapiskwehitisoin kekotc kitci makateatipehitisoin, nama otci peikw nta e tatiki kiwirisis. 37Tepirak ‘ehe’ ki ka itan, kekotc ma, ‘nama.’ Ekoni kotc ke itein. Minawatc awocamec iteine, Ka Matcatikositc#5.37 Ka Matcatikositc: Enko na Matci Manito. ni ke itehisk.”
Aka kitci koski mirekw awik ka ki akohitakw
(Natawapata kaie Luc 6.29-30)
38“Ki ki petakanawatake e itwaniwok:
‘Kecpin awik e namehak kickicikoriw e macikask,
acteriw kaie wir ockicikw kitci namehamowakaniwitc.
Kirika kecpin awik e maniwepahak kiwipitiriw e otamikwehisk,
acteriw kaie wir kitci maniwepahamowakaniwitc owipit.’ Exode 21.23-25; Lévitique 24.19-20; Deutéronome 19.21
39Pitoc aric nin kit ici witamatinawaw: nama ki ka koski matci totawaw awik ka ki matci totask.#5.39 ki ka koski matci totawaw awik ka ki matci totask: Peikon kata ki ici nisitotakon: Akawir nanakaskoho awik ka matci totask. Kecpin awik pasakwehwiske kinihiwinik itekera, ki ka pakitinaw kitci otamahwisk kinamatciwini kitamikikekanik. 40Kecpin awik wi arimihiske, kitci otapinak kipapakiwaniw, pakitini kaie kikapotowaniw kitci otapinak. 41Kecpin awik itiske: ‘Patam ki ka miwotamowin ohwe ka kosikok peikwo tipahikan irikik e asitcarik,’ nitowatc nicwo tipahikan irikik ki ka iciwitawan aniheriw. 42Miri anahwe ka nataweritamask kekociciriw. Awihi awik aniheriw ka wi awihasomisk.”
Kitci sakihekok aniki ka cikerimitakok
(Natawapata kaie Luc 6.27-28,32-36)
43“Ki ki petenawatake e itwaniwok:
‘Ki ka sakihaw kiwitc iriniw,
aric ki ka cikerimaw awik ka cikerimisk.’ Lévitique 19.18
44Pitoc aric nin kit ititinawaw: sakihakok aniki ka cikerimitakok kaie aiamihectamowakok aniki ka nekatcihitakok. 45Ekoni tca ke iteritakosiekw Kotawiwaw Kice Manito wakwek ka taciketc onitcanica. Wir meka ka pakitinak kitci sakasikeritci kicikaw pisimwa ka matci iriniwiritci, kaie ka miro iriniwiritci otci. Pakitinam kaie kitci kimiwonik wiec e ici tacikeritci anahweriw icikowisk ka iteritakosiritci, kaie peikon neta e ici tacikeritci aka icikowisk ka iteritakosiritci. 46Kecpin sakihekwe tepirak aniki ka sakihitakok, kekwan wetci petaiekw kitci cawerimitakw Kice Manito? Wawatc ka natockaketcik sakihewok anahweriw ka sakihikotcik. 47Kecpin tepirak kiwitcicaniwawok e arimikowekok, nama micta kitci kekocic ki totenawaw! Wawatc iriniwok aka ka kiskerimatcik Kice Manitowa itotiskewok! 48Mia tca ki ka itatisinawaw, kotc e itatisitc Kotawiwaw wakwek ka taciketc.”
Currently Selected:
Matio 5: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014