Marko 4
4
Mammahti eti ilmo harrati yeerare kichibo
(Mattaayo 13:1-9, Luuka 8:4-8)
1Yeesso toro beyti Gaalilaaya afiche ka, Wori Haaggan enenyet abche. Jeenteti ururi weyti buure iyimiy u, Yeesso koobanhoo goya koorronte, enenyet la bey afiche khaariche, dagansate. 2Enenyet mammaho ka wihi buure abche, wihi us yidah, 3“Dagansada bal! Etoo gos khabo a irte ilmo harra kachibaa. 4Ilmoha us taaꞌhicho, gaasoo jit goya kadiheene, chimbiro la yimaateene, yumheen. 5Gaasoo ilassi ngꞌaajjeenye harrati rucchul khabto kadiheen. Wahaas dowwa on soobaheen, a mehe harra rucchulee. 6Iꞌdaasenyi chiꞌ orrahe soobahte ka, orrahe geeyohaas soobahe gubte. Hiiyyaye laa yihiin gone, angageen. 7Gaasoo laka inti geeyohi rurrucchule kudah khabo kadiheen. Geeyohaas la geeyohi soobahe afcheene ꞌdeerka gurnaan icho deleen mele. 8Gaasoo la inti harrati haaggan khabto kadiheene, mujjum baheene, weynaateene, gurnaan deleen. Gaasoo kol tomon seyyah deleene, gaasoo kol tomon lih deleene, gaasoo laka kol kudoo deleen.”
9Yeesso ꞌdeerka wihi us yidah, “Eti dogo khabo, a daago giꞌde!”
Yeesso wihi mammahtaas enenyet abisso ergaanotiis idowdowa
(Mattaayo 13:10-17, Luuka 8:9-10)
10Yeesso inkoo us keley yitah, ergaanotiisti tomon ichoow lammee ichoow ꞌdooꞌdoo usu sooraahe iyimiyye, wihi mammahohaas yihiin worsateen. 11“Waakh atine wihi dagsane dakhi Waakh miinsan atin siiche. Iꞌdaasenyi ꞌdooꞌdi kharaat walah tuumman ka a liimammahta, 12ꞌdeerka,
“ ‘Walah a yeyaane, yeyaane, iꞌdaasenyi jirtuu ma gelaan.
Toro la a dagansataane, dagansataane, iꞌdaasenyi jirtuu ma abtaan.
Chiꞌiche iꞌdaas ieheynan, uskeelicho a kasoonokhanne, Waakh la uskeelicho ikakuta.’#4:12 Isaaya 6:9-10.”
13Yeesso ꞌdeerka wihi us icho iyidah, “Chirri atin mammahta wihi iche tahe igaran, sag ꞌdeerka atin mammahohi addan wihicho iabattaan mele gon. 14Etaas gos khabo, a eti Yeedi Waakh taaꞌhicho. 15ꞌDooꞌd gaasoo a iꞌdi ilmohi jit lakachibe. Waha a inti Yeedi Waakh lakataaꞌhicho. Uus icho Yeedi Waakh daagaan, Seytaan chirraas on yamiite, yeedaas icho daageen kakhaata. 16ꞌDooꞌd gaasoo la, a iꞌdi ilmohi ilassi ngꞌaajjeenye harrati rucchul khabto lakachibe. Yeedi Waakh uun icho daagaan, hamaadi buure ka khaattaan. 17Iꞌdaasenyi hiiyyay icho khabaan mele, mujjum ma tolossataan. Maanti jeenteti Yeedi Waakh u sinatoo isoobahte ommos sina loomhiche, dowwa on soodihaan. 18ꞌDooꞌd gaasoo a iꞌdi ilmohi inti geeyohi kudah khabto lakachibe. Icho Yeedi Waakh a daagaane, 19iꞌdaasenyi dowwa on waꞌdwaaꞌdi harrata ichoow ꞌdamaanki kamurroon ichoow wahanyeyyohi addane liimoono ba Yeeda afchaane, gurnaan icho delaan mele. 20ꞌDooꞌd gaasoo a iꞌdi ilmohi harrati haaggan lakachibe. Icho Yeedi Waakh a daagaane toro khaattaane, gurnaanki buure delaan. Gaasoo kol tomon seyyah delaane, gaasoo la kol tomon lih delaane, gaasoo la kol kudoo delaan.”
Mammahti taahi kombor fuulo
(Luuka 8:16-18)
21Toro wihi Yeesso iyidah, “Etoo taa a bolkhicha, ꞌdee baakhuul kaankuba ommos siriir iliche gessa? Taa wohoo menya korcho? 22A mehe wihi dagsan a lasoobahcha, wihi oboobsan la ꞌdowe liisoobahcha. 23Chiꞌ etoo dogo khabo, a daago giꞌde!”
24Toro wihi us iyidah, “Waha atin daagtaan la, weyti dagansada. Geeddi atin ꞌdooꞌdi addan iyeessaan geeddaase atin liiyeela, toro la ꞌdirihiis atin liiyeela. 25Eti tuummane wihi dahan lagesse mujjum woywoye a liikakhaya. Iꞌdaasenyi eti wihi dahan lagesse mujjum iwoywoyin, wihi us khabo laka a lakakhaata.”
Mammahti ilinti bahto
26Yeesso toro imammahte, wihi us iyidah, “Mammahtoo addane dakhi Waakh cheekto talla. Etoo ilmohi golole il gessa, kataba. 27Maalim ichoow ibeen us uꞌduryeey ommos neybaayyeey ka ba, ilime a bahta one weynaatta, chuꞌus saggi iche ibahto igaran laka. 28Harra on gurnaan bihissa, kolooraat la geeye bihissa, geeyaas ꞌdeerka ilim dela. 29Uuꞌ gurnaan bissaati on yamiite warhanti gurnaan lakagoocho ka goocha, a mehe a maanti gurnaanee.”
Dakhi Waakh a iꞌdi ilinti weyti rucchule toro weyti buuraatti
(Mattaayo 13:31-32, 34, Luuka 13:18-19)
30Toro mehe iyidah ya, “Kamalda bal, dakhi Waakh a koo meheenye nadeeh? Toro la mammahtoh iꞌdi uꞌ yahe dowdowta? 31Dakhi Waakh a iꞌdi ilinti geeyi dahare, iche la ilmo goyaka a ilinti weyti rucchule il lagesso. 32Maanti il lagesse iche soobahte la, gos goyaka geeyi geeyo tuumman kabuurenye liikhimohi burbuure khabo tateeh. Chimbirohi saraat la oosintiis kafiddiyaan.”
33Yeesso mammahohi ittaawenye tan iyoog ka, wori Waakh geeddi icho aban yabuuꞌdiin icheeke. 34Enenyet mammah on menye, wohoo addan walah ma kaabin. Iꞌdaasenyi maanti icho keley yahiin, abattitiis mammahohaas wihi icho yahiin a icheeke.
Yeesso hafari ir keene il ijeycha
(Mattaayo 8:23-27, Luuka 8:22-25)
35Maalinkaas geleb ka, Yeesso abattitiis, “Beyta Gaalilaaya maahno, aficheki ꞌdiri a iranni,” iyidah. 36Abatti Yeesso iꞌdiis yahaayi khaatte kooban kaleedihte, dowte, urur bey afichekaas katabte. Koobanohoo addan laka kicho a leejireen. 37Hafaroo buure la yimiyye bicche irtoo uskul bahcheene, kooban ꞌdollo jaheene, ichoowka bicche kooban goya isootabeene, buuhin leheet. 38Yeesso la kootte reentoo ꞌdaꞌddabakhenye matah gessate, kooban ꞌdubichekuus ka a urꞌda. Abatti Yeesso kihisse wihi iche itidah, “Eti weenoow, innoha bicche inno khaataan laka aw ma inno ikhabto ba?”
39Ulla sookahe, hafar leejaakhe, ir “Gammadicha! Yaasa!” iyidah. Hafari kootte ir kahcho, baabe beye rukkuy goosse.
40Wihi us abattitiis iyidah, “A iꞌdoh iꞌduu iburꞌdowteen? Atin uliba Waakh ma kakhuuftaan a?”
41Iche tuumman weyti nahte, wihi iche isworsatte, “Icho eta a ayyo? Hafar ichoow ire laka yeediis daagaan?”
Currently Selected:
Marko 4: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.