Marko 3
3
Yeesso Seeri Lanaso ka etoo samaacha
(Mattaayo 12:9-14, Luuka 6:6-11)
1Yeesso toro minki weysiite Yaꞌhuud gele. Etoo dahane hanjaawte la intaas a kijire. 2Chiiy Yeesso too intaas goya kijirta, wohoo icho Yeesso kacheektaane yowtaane, ꞌdeerka usu Yeesso Seeri Lanaso ka etaas samaacho ꞌdeyꞌdoocheen. 3Yeesso wihi us eti dahane hanjaawte iyidah, “Enenyet tuumman ortiis tolosso!”
4Yeesso ꞌdeerka wihi us icho worsate, “Seeri Lanaso ka, wihi haaggane layeelo ichoow suujoonki layeelo koh amurreteen israahaan? Jiroti enenyete laribo israahaan bal enenyeti layagiis?” Iꞌdaasenyi gammadicheen.
5Yeesso hol ka indo leeraahe toro weyti uur suujowe, matahmiigticho ka. Et, “Dahantaah fiti!” iyidahye, et dahan ficche, dahane toro tuum haagsatte. 6ꞌDeerka Farissaayo bahte, ꞌdooꞌd ꞌHerood iiratte, chirraas on jiti icho Yeesso kayagiisiin kamasseen.
Ururre Yeesso raahta
7Yeesso ichoow abattitiis ba intaas katabeene, beyti Gaalilaaya afiche irteene, ꞌdooꞌdi ittaawenye boroofenhi Gaalilaaya kayimiy la raahe. 8Wihi us yeelo ladaage, enenyeti ittaawe ili Yaꞌhuudiya ichoow ilkerengeetti weene Yeerusaleem ichoow ili Idumeeya ichoow ili Yoordan berihiise ichoow ilassi ilkerengeetohi Tiiro ichoow Siidon tuumman kayimiy. 9Jeenteti urur ibuuraatuu, abattitiis koobanhoo us koro, ꞌdee goya katolossati, urur iskalaabo daahe. 10A mehe enenyeti buurenye samaache, ꞌdeerka ꞌdooꞌdi khakkhannan tuumman a issootakha, Yeesso ꞌdaarin ꞌdoonaa. 11ꞌDooꞌdi ginnayyo dakhtaan chirbaaw ginnayyohaas Yeesso argeen, inkaanyit ka ortiis ka il a guꞌddaane riiraane, “Ati Weeli Waakhe!” yadeehiin. 12Iꞌdaasenyi amur ibahche uus icho eti us yahe cheekin.
Yeesso ergaanotiisti tomon ichoow lammee soobahsata
(Mattaayo 10:1-4, Luuka 6:12-16)
13Yeesso irte burroo kore, ꞌdooꞌdi us ꞌdoono isiwahe, icho la usu iyimaateen. 14Et tomon ichoow lamma soobahsate, ergaanotiis kayeesse ꞌdee usu leejirta, toro leergata Yeedi Waakh cheekta. 15Toro la antohi iche ginnayyo laka enenyet kabihisso siiche. 16Reeri tomon ichoow lammeenye us soobahsate a kan, Siimon magahi us ibahche a Beetero, 17Yaakoobohi inam Sebedaayee ichoow walaaliiski Yoohana layadeeh. Icho la magahi us ibahche a Bowwanerge. Iꞌdaakka la mehe leessa ya, “Yeeleti Karkaraho.” 18Reeri addan la a Andereeya, Fiilif, Barꞌdolomaayo, Mattaayo, Toomas, inam Alfaayo ki Yaakoobo layadeeh, ꞌDaꞌdaayo, Siimonhi magahiis Yaaftiisꞌdoone layadeeh, 19ichoow Yuuda Iskaariyoot, ki yomboka Yeessó ꞌdub gooche.
Yeesso ichoow Seytaanki Beelsebuul lakawaho
(Mattaayo 12:22-32, Luuka 11:14-23, 12:10)
20Yomboka Yeesso minki us fiddiyo isoonokhte, urur la buuraate, ichoowka usu ichoow abattitiis saggi icho igolossataan laka waayeen. 21Chirri abartiis ichoow walaalinyetiis daageen ka yimaateen, goobe geechaanee. Iꞌdi tahe mehe essaan ya, “Us a sirgowe.”
22Tagaammeti amurre la ilkerengeetti weene Yeerusaleeme katimiyye, mehe elatta ya, “Beelsebuule dakhta alah! Miigti karnati ginnayyoote enenyet ginna kabahcha.”
23Yeesso ꞌdeerka ꞌdooꞌd wahe, mammaho ka leeyyeede, “Seytaan saggoh Seytaan ibahcha? 24Yaafe chirri iche seley goote, geed iche fiddiito mele. 25Minki seley gowe, isdiho geed us fiddiyo mele. 26Seytaan laka, chirri usu on isikahe seley goggowe, geed us fiddiyo mele, a baaba. 27Rumanka et minki etoo miige gelo meehiis hato mele sammata us koloo etaas miige ihidhidin. ꞌDeerka chirraase minkiis hata. 28Runti an atin icheeko, enenyet uskeeliis tuumman ichoow gaf tuumman laka a liikakuta on. 29Iꞌdaasenyi eti Rubeyti Munyee igafe, jirtuu uskeeliis ma liikakuto. Uskeeli uꞌ gele, a ki jirtuu laka imassan.”
30Wihi us ꞌdooꞌdaas iꞌdaas ikayidah, a jeenteti icho “Usu ginna dakhatta!” iessaan.
ꞌDooꞌdi Yeesso rummeeste a hiiy Yeesso ki rummaat
(Mattaayo 12:46-50, Luuka 8:19-21)
31Abartiis ichoow walaalinyetiis ꞌdeerka yimaateene, khar tolossateen. Farniin ergeene ꞌdee Yeesso a liisoowaho. 32Ururi kootte Yeesso khaariche fiddiyo la, wihi icho Yeesso iyidaaheen, “Abartaah ichoow walaalinyetaah a kiyowtaane, kallaayo khar ka.”
33Wihi us worsate, “Kamalda bal, abarteey ichoow walaalinyeteey a ayyo illeh?”
34ꞌDooꞌda fiddiyo khaariche yeye, “Yeya, abarteey ichoow walaalinyeteey kallaayo. 35A mehe eti tuummane wihi Waakh ꞌdoono yeelo, a walaalaaya, a walaassaaya, a abartaaya,” iyidah.
Currently Selected:
Marko 3: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.