Luka 23
23
Yesu ngɛ Pilato hɛ mi
(Mateo 27.1-2, 11-14; Marko 15.1-5; Yohane 18.28-38)
1Kpe nguaa a mi bi ɔmɛ tsuo te si, nɛ a hɛɛ Yesu mi kɛ ya Pilato ngɔ. 2Nɛ a bɔni e nya pomi ke, “Wa nu nyumu nɛ ɔ nɛ e ngɛ wa ma mi bi ɔmɛ a tue puɛe. Wa nu nɛ e ngɛ mɛ dee ke a ko tsu tó ha Kaisare ɔ, se lɛ nitsɛ ji Kristo, matsɛ ɔ nɛ.”
3Pilato bi lɛ ke, “Anɛ mo ji Yuda bi ɔmɛ a matsɛ ɔ lo?”
Yesu he nɔ ke, “Ja o deɔ nɛ.”
4Jehanɛ ɔ, Pilato de osɔfo nikɔtɔma amɛ, kɛ ma kpekpemi ɔ nɛ ngɛ lejɛ ɔ ke, “I nɛ nɔ́ yayami ko ngɛ nyumu nɛ ɔ he nɛ buɔ lɛ fɔ.”
5Se a nya sɔ wo e he, nɛ a de ke, “E ngɔ e ní tsɔɔmi ɔ kɛ ngɛ ma mi bi ɔmɛ a tue puɛe ngɛ Yudea tsuo. E je sisi kɛ je Galilea, nɛ amlɔ nɛ ɔ, e ba su hiɛ ɔ.”
Yesu ngɛ Herode hɛ mi
6Benɛ Pilato nu enɛ ɔ, e bi ke, “Nyumu ɔ, Galilea no ji lɛ lo?” 7Benɛ e na le kaa Yesu je Herode nɔ yemi he ɔ, e ha nɛ a ngɔ lɛ ya ha Herode. Jamɛ a be ɔ, Herode hu ba Yerusalem. 8Herode nu Yesu he kɛ, nɛ e je bɔni lɛ hlami nɛ e na pi mwɔnɛ. E hemi kɛ yemi hu ji kaa Yesu maa pee nyakpɛ nɔ́ ko nɛ e na. Lɔ ɔ he ɔ, benɛ a kɛ Yesu ba e ngɔ ɔ, e na bua jɔmi babauu. 9Enɛ ɔ ha nɛ e bi Yesu munyuhi fuu, se e ha we lɛ kake po heto. 10Kɛkɛ nɛ osɔfo nikɔtɔma amɛ, kɛ mlaa tsɔɔli ɔmɛ ba da si, nɛ a po Yesu nya babauu. 11Herode kɛ e ta buli ɔmɛ ye Yesu he fɛu, nɛ a bɔ lɛ ahlua. A wo Yesu tade klɔii saminyayoo ko, nɛ Herode ha nɛ a kpale lɛ ya ha Pilato ekohu. 12Jamɛ a ligbi ɔ nɔuu ɔ, Pilato kɛ Herode nu huɛ; jinɛ sa a, a kɛ a he yi.
A bu Yesu gbenɔ fɔ
(Mateo 27.15-26; Marko 15.6-15; Yohane 18.39—19.16)
13Pilato tsɛ osɔfo nikɔtɔma amɛ, ma nimeli ɔmɛ, kɛ ma a kɛ ba kpe, 14nɛ e de mɛ ke, “Nyɛɛ kɛ nyumu nɛ ɔ ba ye ngɔ, nɛ nyɛ ba po e nya ke e ngɛ ma mi bi ɔmɛ a tue puɛe. Amlɔ nɛ ɔ, i hla e sane ɔ mi ngɛ nyɛ hɛ mi, se i nɛ kaa e yeɔ fɔ ngɛ sanehi nɛ nyɛ kɛ ba po e nya a ekoeko mi. 15Herode hu bui lɛ fɔ, nɛ lɔ ɔ he nɛ e kpale lɛ ba ha wɔ ɔ nɛ. Nyumu nɛ ɔ pee we nɔ́ yayami ko nɛ hia kaa ma bu lɛ gbenɔ fɔ. 16Lɔ ɔ he ɔ, ma ha nɛ a fia lɛ kpa, nɛ ma ngmɛɛ e he.”
[ 17Daa ke e su Hetsɔmi nyami be ɔ, Pilato ngmɛɛɔ pã mi no kake he ngɔ haa ma a.]
18Se mɛ tsuo a kpa ngmlaa ke, “Gbee lɛ, nɛ o ngmɛɛ Baraba he ha wɔ!” 19(A wo Baraba tsu, ejakaa e tsɔ atuã ngɛ ma a mi be ko, nɛ e gbe nɔmlɔ hulɔ.)
20Pilato hla kaa e maa ngmɛɛ Yesu he, lɔ ɔ he ɔ, e kɛ ma a tu munyu ekohu. 21Se a kpale kpa ngmlaa ekohu ke, “Sɛu lɛ! Sɛu lɛ!”
22Pilato bi mɛ si etɛne ɔ ke, “Se mɛni yayami nɛ e pee? I nɛ nɔ́ ko nɛ e pee nɛ sa kaa a gbe lɛ. Lɔ ɔ he ɔ, ma ha nɛ a fia lɛ kpa, nɛ ma ngmɛɛ e he.”
23Se a ya nɔ kpa ngmlaa wawɛɛ ke Pilato nɛ ha nɛ a sɛu Yesu. Ngmlaa nɛ ngɛ pɛe ɔ, nɔ́ ko nɔ́ ko hí peemi ngɛ he. 24Lɔ ɔ he ɔ, Pilato bu Yesu gbenɔ fɔ kaa bɔ nɛ ni ɔmɛ ngɛ hlae ɔ. 25E ngmɛɛ nɔ nɛ a ngɛ hlae ɔ he ha mɛ, nɔmlɔ nɛ a wo lɛ tsu kaa e tsɔ atuã, nɛ e gbe nɔmlɔ hulɔ ɔ. Se Yesu ɔ lɛɛ, e ngɔ lɛ ngɔ ha nɛ a ya sɛu lɛ kaa bɔ nɛ a ngɛ hlae nɛ e pee ɔ.
A sɛu Yesu
(Mateo 27.32-44; Marko 15.21-32; Yohane 19.17-27)
26Benɛ Roma ta buli ɔmɛ ngɔ Yesu kɛ yaa a, a kɛ Kirene no ko kpe nɛ je ngmɔ si kɛ ma ma a mi. E biɛ ji Simon. A nu lɛ, nɛ a wo sɛumi tso ɔ ngɔ tloo lɛ, nɛ e kɛ nyɛɛ Yesu se.
27Nimli babauu nɛ nyɛɛ Yesu se ɔ, a ti ni komɛ ji yihi nɛ wo yana kɛ ngɛ awe nyae ha lɛ. 28Se Yesu plɛ e hɛ mi kɛ kpee mɛ, nɛ e de mɛ ke, “Yerusalem yihi! Nyɛ ko fo ya ha mi; se mohu nyɛ fo ya ha nyɛ nitsɛmɛ nyɛ he, kɛ nyɛ bimɛ. 29Ejakaa be ma nɛ a ma de ke, ‘Yosahi, kɛ yihi nɛ a mi mi wui ngma, kɛ ni nɛmɛ nɛ ha we nyɔ hyɛ ɔ, a he ngɛ ní pɛ!’ 30#Hos 10.8; Kpoj 6.16 Jamɛ a be ɔ, nihi ma de ke, ‘Wa na nɛ yo ɔmɛ ba nɔ wa nɔ; nɛ yoku ɔmɛ ha wa nɔ.’ 31Ejakaa ke tso mumu lɛ a pee enɛ ɔ ɔ, tso gbigbli lɛɛ kɛ e nɔ́ maa hi kɛɛ?”
32A ngɔ yayami peeli enyɔ komɛ hu kɛ ho, konɛ a ya gbe mɛ ngɔ piɛ Yesu he. 33Benɛ a su he nɛ a tsɛɛ “Yikoklodonya a”, a sɛu Yesu, kɛ yayami peeli enyɔ ɔmɛ ngɛ lejɛ ɔ; nɔ kake ngɛ e hiɔ nɔ, nɛ nɔ kake hu ngɛ e muɔ nɔ. [ 34#La 22.18 Nɛ Yesu de ke, “Tsaatsɛ, kɛ pa mɛ! A li nɔ́ nɛ a ngɛ pee ɔ.”
Kɛkɛ nɛ a fɔ sɔ kɛ dla e tade ɔmɛ.] 35#La 22.7 Ma mi bi ɔmɛ daa si ngɛ lejɛ ɔ ngɛ hyɛe, be mi nɛ ma nimeli ɔmɛ lɛɛ a ngɛ e he fɛu yee ngɛ dee ke, “Tse o he ni komɛ a yi wami! Yoo, ke mo ji Kristo ɔ, nɔ nɛ Mawu hla a, he mo nitsɛ o yi wami koo!”
36 #
La 69.21
Ta buli ɔmɛ hu ye e he fɛu. A hɛ mɛ kɛ su e he, nɛ a ha lɛ dã nɛ kuã, 37nɛ a de lɛ ke, “Ke mo ji Yuda bi ɔmɛ a matsɛ ɔ, he mo nitsɛ o yi wami koo!”
38A ngma munyu ko ngɔ mɛtɛ e yi je ke, “Nɔ nɛ ɔ ji Yuda bi ɔmɛ a matsɛ ɔ nɛ.”
39Yayami peeli nɛ a sɛu ɔ, mɛ hu a ti nɔ kake fia Yesu lilɛ saminya. E de lɛ ke, “Pi mo ji Kristo ɔ? He mo nitsɛ o yi wami, konɛ o he wɔ hu wa yi wami!”
40Se nɔ kake ɔ ka e hɛ mi, nɛ e de ke, “O yi Mawu gbeye? Waa kɛ lɛ tsuo ɔ, gbenɔ fɔ kake ɔ nɔuu lɛ a bu wɔ. 41Wɔɔ lɛɛ wa nɔ́ ɔ sa wɔ; ejakaa níhi nɛ wa pee ɔ, a he hiɔwo nɛ wa na a nɛ. Se nyumu nɛ ɔ lɛɛ e pee we nɔ́ ko nɛ sɛ.” 42Nɛ e de Yesu ke, “Yesu, ke o ba bɔni matsɛ yemi ɔ, kai mi!”
43Yesu de lɛ ke, “I ngɛ mo si woe kaa mwɔnɛ ɔ, i kɛ mo maa hi Paradeiso.”
Yesu gbo
(Mateo 27.45-56; Marko 15.33-41; Yohane 19.28-30)
44Piani ngmlɛ nyɔngma kɛ enyɔ ɔ, pu jɔɔ kpɛmi, nɛ diblii wo ngɛ zugba a nɔ tsuo kɛ ya si gbɔkuɛ ngmlɛ etɛ mi. 45#Mose II, 26.31-33 Nɛ sɔlemi we ɔ mi pomi bo ɔ mi gba enyɔ. 46#La 31.5 Kɛkɛ nɛ Yesu kpa ngmlaa wawɛɛ ke, “Tsaatsɛ, i tu ye mumi ɔ kɛ wo o dɛ mi!” Nɛ e de kikɛ ɔ, kɛkɛ nɛ e ma nya.
47Benɛ asafoatsɛ ɔ na nɔ́ nɛ ba a, e je Mawu yi, nɛ e de ke, “E ngɛ mi niinɛ kaa nyumu nɛ ɔ pee we nɔ́ ko nɛ sa gbenɔ!”
48Ma kpekpemi ɔ nɛ ba nɔ́ hyɛmi, nɛ ba bua a he nya a, benɛ a na nɔ́ nɛ ba a, kikɛ nɛ ɔ mɛ tsuo a ngɛ a gugue ma gbae, nɛ a kɛ kpale a se kɛ ho we mi ya kɛ aywilɛho. 49#Luk 8.2-3 Nihi tsuo nɛ le Yesu saminya, kɛ yihi nɛ nyɛɛ e se kɛ je Galilea a hu daa si ngɛ se lokoo ngɛ nɔ́ hyɛe.
A pu Yesu
(Mateo 27.57-61; Marko 15.42-47; Yohane 19.38-42)
50-51Nyumu ko hi si. E biɛ ji Yosef, nɛ e je Yudea ma ko nɛ a tsɛɛ Arimatia a. Nɔmlɔ kpakpa, kɛ Mawu jalɔ ji lɛ. Daa nɛ ɔ, lɛɛ e ngɛ Mawu matsɛ yemi ɔ blɔ hyɛe. Kpe nguaa a mi no ji lɛ mohu, se yi mi nɛ a to, kɛ nɔ́ nɛ a pee ɔ, lɛɛ e kplɛɛ we. 52Nyumu nɛ ɔ ya Pilato ngɔ, nɛ e ya bi lɛ nɛ e ha lɛ Yesu gbogboe ɔ. 53E ya je gbogboe ɔ kɛ kple si, nɛ e ngɔ kploba ngɔ blaa lɛ, nɛ e ya to lɛ ngɛ yɔkɔ ko mi. Yɔkɔ nɛ ɔ, a kpɛ ngɛ tɛ sa mi, nɛ a tui nɔ ngɛ mi hyɛ. 54Jamɛ a ligbi ɔ ji he dlami ligbi ɔ nɛ, nɛ Hejɔɔmi ligbi ɔ su ta.
55Yihi nɛ nyɛɛ Yesu se kɛ je Galilea a, a kɛ Yosef ho, nɛ a ya na yɔkɔ ɔ, kɛ bɔ nɛ a to Yesu gbogboe ɔ ha. 56#Mose II, 20.10; Mose V, 5.14 A kpale a se kɛ ho we mi ya ya hla tsopa kɛ e he via, kɛ nu via ngɔ to.
Hejɔɔmi ligbi ɔ, a jɔɔ a he kaa bɔ nɛ mlaa a tsɔɔ kaa a pee ɔ.
Currently Selected:
Luka 23: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.