Luka 22
22
A so Yesu yi nɔ
(Mateo 26.1-5; Marko 14.1-2; Yohane 11.45-53)
1 #
Mose II, 12.1-27
Jehanɛ ɔ, Abolokplolo nyami be ɔ nɛ a tsɛɛ Hetsɔmi ɔ ba su. 2Osɔfo nikɔtɔma amɛ, kɛ mlaa tsɔɔli ɔmɛ ye ma a gbeye; lɔ ɔ he ɔ, a hla blɔ nɔ nɛ a maa gu kɛ gbe Yesu ngɛ laami mi.
Yuda kplɛɛ kaa e maa tsɔɔ Yesu se blɔ
(Mateo 26.14-16; Marko 14.10-11)
3Abosiami ba sɛ ni nyɔngma kɛ enyɔ ɔmɛ a ti nɔ kake nɛ a tsɛɛ Yuda a mi. Yuda biɛ kpa ji Iskariot. 4Kɛkɛ nɛ e pue nɔ kɛ ho, nɛ e kɛ osɔfo nikɔtɔma amɛ, kɛ sɔlemi we ɔ asafoatsɛmɛ ɔmɛ ya sɛɛ ní, nɛ e tsɔɔ mɛ bɔ nɛ e maa pee nɛ e je Yesu ngɔ ha mɛ. 5A bua jɔ, nɛ a wo lɛ si ke a ma ha lɛ sika. 6Yuda kplɛɛ, nɛ e bɔni blɔ hlami, konɛ e ngɔ Yesu ngɔ wo a dɛ mi zaa nɛ ma a kó nu he.
Yesu dla kɛ ha Hetsɔmi niye ní ɔ yemi
(Mateo 26.17-25; Marko 14.12-21; Yohane 13.21-30)
7Jehanɛ ɔ, Abolokplolo nyami be ɔ ligbi tutuutu nɛ a gbeɔ to bi ɔ nɛ a kɛ yeɔ Hetsɔmi ɔ ba su. 8Yesu tsɔ Petro kɛ Yohane, nɛ e de mɛ ke, “Nyɛɛ ya nɛ nyɛ ya pee Hetsɔmi niye ní ɔ ngɔ to wɔ nɛ wa ba ye.”
9A bi lɛ ke, “Jije nɛ o suɔ nɛ wa ya pee niye ní ɔ ngɔ to mo ngɛ?”
10E he nɔ ke, “Nyɛɛ bu tue! Ke nyɛ sɛ ma a mi ɔ, nyɛɛ kɛ nyumu ko nɛ tloo buɛ kɛ nyu maa kpe. Nyɛɛ nyɛɛ e se kɛ ya we mi he nɛ e yaa sɛ ɔ, 11nɛ nyɛ ya de wetsɛ ɔ ke, ‘Tsɔɔlɔ ɔ ke wa ba bi mo ke nibwɔhi a tsu ɔ, he nɛ i kɛ ye kaseli ɔmɛ maa ye Hetsɔmi niye ní ɔ ngɛ ɔ, jije e ngɛ?’ 12E maa tsɔɔ nyɛ hiɔwe asa nguaa ko nɛ a dla mi, konɛ nyɛ ya pee niye ní ɔ ngɔ to ngɛ lejɛ ɔ.”
13A pue nɔ kɛ ho, nɛ a ya na nɔ́ tsuaa nɔ́ pɛpɛɛpɛ kaa bɔ nɛ Yesu de mɛ ɔ. Nɛ a ya pee Hetsɔmi niye ní ɔ ngɔ to.
Nyɔmtsɛ niye ní ɔ
(Mateo 26.26-30; Marko 14.22-26; Korinto Bi I, 11.23-25)
14Benɛ ngmlɛfia a su ɔ, Yesu ya hi e blɔ he ngɛ okplɔɔ ɔ he; e kɛ bɔfo nyɔngma kɛ enyɔ ɔmɛ. 15E de mɛ ke, “I kɛ he hiami hyɛ blɔ wawɛɛ kaa i kɛ nyɛ maa ye Hetsɔmi niye ní nɛ ɔ loko ma na amanehlu! 16Ejakaa i ngɛ nyɛ dee ke, i be eko yee hu kɛ yaa si Mawu matsɛ yemi ɔ maa ba, nɛ́ nɔ nɛ Hetsɔmi niye ní ɔ tsɔɔ ɔ maa je kpo paa.”
17Kɛkɛ nɛ Yesu wo kplu, nɛ e na Mawu si, nɛ e de ke, “Nyɛ he nɛ nyɛ tsuo nyɛɛ nu. 18I ngɛ nyɛ dee ke, enɛ ɔ se ɔ, i be wai nɛ ɔ nue hu kɛ yaa si Mawu matsɛ yemi ɔ maa ba.”
19Jehanɛ ɔ, e kɛ̃ abolo, nɛ e na Mawu si, nɛ e ku mi, nɛ e ngɔ ha mɛ, nɛ e de ke, “Enɛ ɔ ji ye nɔmlɔ tso [nɛ a ngɔ sã bɔ ha Mawu ngɛ nyɛ he. Nyɛɛ pee enɛ ɔ nɛ nyɛ kɛ kai mi.” 20#Yer 31.31-34 Benɛ a ye ní ɔ ta a, e wo kplu ɔ ja nɔuu, nɛ e de mɛ ke, “Kplu nɛ ɔ ji Mawu somi he ɔ nɛ a ngɔ ye muɔ nɛ a plɛ ngɔ pue si ha nyɛ ɔ kɛ sɔu nya a nɛ.]
21 #
La 41.9
“Se hyɛ! Nɔ nɛ maa tsɔɔ ye se blɔ ɔ kɛ mi ngɛ ní yee ngɛ hiɛ ɔ! 22Nɔmlɔ Bi ɔ ma gbo kaa bɔ nɛ Mawu to ɔ, se musu tloo nɔ nɛ maa tsɔɔ e se blɔ ɔ!”
23Kɛkɛ nɛ a bɔni a he bimi ke a kpɛti mɛnɔ po maa pee nɔ́ nɛ ɔ.
Mɛnɔ ji nɔmlɔ nguaa pe kulaa?
24 #
Mat 18.1; Mar 9.34; Luk 9.46 Kaseli ɔmɛ sɔuu ba bɔni nya sami kaa a kpɛti mɛnɔ lɛ sa kaa a buu nɔmlɔ nguaa pe kulaa. 25#Mat 20.25-27; 10.42 Yesu de mɛ ke, “Ma je li ɔmɛ a matsɛmɛ ɔmɛ ngɛ he wami ngɛ a ma mi bi ɔmɛ a nɔ, nɛ a ti ni komɛ tsɛɔ a he ke ‘Ma he dooli.’ 26#Mat 23.11; Mar 9.35 Se nyɛɛ lɛɛ e be nyɛ jã. Mohu ɔ, nɔ nɛ ji nɔ nguaa pe kulaa ngɛ nyɛ kpɛti ɔ, e pee e ní kaa jokuɛyo pe kulaa; nɔkɔtɔma a, e pee e ní kaa sɔmɔlɔ. 27#Yoh 13.12-15 Te nɔ nɛ pe e nyɛmi nɛɛ: nɔ nɛ hii okplɔɔ he nɛ yeɔ ní, aloo nɔ nɛ sɔmɔɔ lɛ? Anɛ pi nɔ nɛ hii okplɔɔ he nɛ yeɔ ní ɔ lo? Se imi lɛɛ i ngɛ nyɛ kpɛti kaa nɔ nɛ sɔmɔɔ.
28“Ye haomi be ɔmɛ a mi ɔ, nyɛ ji nihi nɛ daa si kpɛii ngɛ ye se. 29Lɔ ɔ he ɔ, he wami nɛ Tsaatsɛ ha mi nɛ ma kɛ ye e ma a nɔ ɔ, imi hu i ngɛ nyɛ jamɛ a he wami ɔ hae. 30#Mat 19.28 Nyɛ maa ye ní, nɛ nyɛ maa nu ní ngɛ ye we okplɔɔ ɔ he ngɛ ye matsɛ yemi ɔ mi; nɛ nyɛ maa hi matsɛ sɛhi a nɔ kɛ kojo Israel wɛtso nyɔngma kɛ enyɔ ɔmɛ.
Yesu de to ke Petro ma kua lɛ
(Mateo 26.31-35; Marko 14.27-31; Yohane 13.36-38)
31“Simon, Simon! Bu tue! Mawu ha Abosiami blɔ ke e ka nyɛ, nɛ e je nimli kpakpa amɛ kɛ je nimli yayami ɔmɛ a kpɛti kaa bɔ nɛ ngmɔ hulɔ saa ngma mi ɔ. 32Se imi lɛɛ i sɔle ha mo Simon, nɛ o hemi kɛ yemi kó ta, konɛ ke o kpale o se kɛ ba ye ngɔ ekohu ɔ, mo hu o wo o nyɛmimɛ ɔmɛ he wami.”
33Petro de lɛ ke, “Nyɔmtsɛ, i dla ye he ngɔ to nɛ ke tsu mi oo, gbenɔ mi oo, i kɛ mo maa ya!”
34Yesu de lɛ ke, “Petro, i ngɛ mo dee ke, kungwɔ be nɔ́ kpae nyɔ nɛ ɔ mi, nɛ o ma de si etɛ ke o li mi.”
Sika kpɛɛ, kotoku, kɛ klaate
35 #
Mat 10.9-10; Mar 6.8-9; Luk 9.3; 10.4 Enɛ ɔ se ɔ, Yesu bi e kaseli ɔmɛ ke, “Be ko benɛ i tsɔ nyɛ, nɛ nyɛɛ hɛɛ we sika kpɛɛ, loo kotoku, loo tokota a, anɛ nɔ́ ko hia nyɛ lo?”
A he nɔ ke, “Nɔ́ ko nɔ́ ko hia we wɔ.”
36Yesu de mɛ ke, “Jehanɛ ɔ lɛɛ nɔ nɛ ngɛɛ sika kpɛ ɔ, e ngɔ; nɔ nɛ ngɛ kotoku ɔ, e ngɔ; nɔ nɛ be klaate ɔ, e jua e tade, nɛ e kɛ he eko. 37#Yes 53.12 Ejakaa ngmami ɔ nɛ deɔ ke, ‘A bu lɛ ngɔ ta yayami peeli a he’ ɔ, ye he a ngma ngɛ. Nɛ nɔ́ tsuaa nɔ́ nɛ ngmami ɔ deɔ ngɛ ye he ɔ, ja e ba mi.”
38Kaseli ɔmɛ de ke, “Nyɔmtsɛ, hyɛ! Klaate enyɔ ngɛ hiɛ ɔ!”
E he nɔ ke, “E hiɛ!”
Yesu ya sɔle ngɛ Oliv yo ɔ nɔ
(Mateo 26.36-46; Marko 14.32-42)
39Yesu je ma a mi, nɛ e pue nɔ kɛ ho Oliv yo ɔ nɔ ya kaa bɔ nɛ e pɔɔ peemi ɔ. E kaseli ɔmɛ kɛ lɛ ho. 40Benɛ a su lejɛ ɔ, e de mɛ ke, “Nyɛɛ sɔle, konɛ nyɛ ko sɛ ka mi.”
41Kɛkɛ nɛ e si mɛ maa pee tɛ fɔmi mi kɛmi, nɛ e ya kpla si, nɛ e sɔle 42ke, “Tsaatsɛ, ke o suɔ ɔ, je nɔ́ nami kplu nɛ ɔ kɛ je ye blɔ mi. Se kɛ̃ ɔ, a ko pee nɔ́ nɛ imi i suɔ; se mohu a pee nɔ́ nɛ mo o suɔ.” [ 43Kɛkɛ nɛ bɔfo ko je hiɔwe ba je e he kpo tsɔɔ lɛ, nɛ e wo lɛ he wami. 44E kɛ he hiami sɔle wawɛɛ pe kekle ɔ po, nɛ e he latsa ngɛ tslee kɛ ngɛ si puee kaa muɔloku.]
45Benɛ e sɔle ta, nɛ e kpale e se kɛ ba kaseli ɔmɛ a ngɔ ɔ, e na mɛ nɛ aywilɛho nu mɛ, nɛ a hwɔ mahe. 46E de mɛ ke, “Mɛni he je nyɛ ngɛ mahe hwɔe ɔ? Nyɛɛ te si nɛ nyɛɛ sɔle, konɛ nyɛ ko sɛ ka mi.”
A nu Yesu
(Mateo 26.47-56; Marko 14.43-50; Yohane 18.3-11)
47Benɛ Yesu ngɛ munyu ɔ tue kɛ mwɔɔ ɔ, nihi babauu ba hia kpo ngɛ lejɛ ɔ. Ni nyɔngma kɛ enyɔ ɔmɛ a ti nɔ kake nɛ a tsɛɛ lɛ Yuda a nyɛɛ a hɛ mi kɛ ba. E hɛ lɛ kɛ ba Yesu ngɔ, konɛ e ba fiɔ e nya he. 48Se Yesu bi lɛ ke, “Yuda, o ma fiɔ ye nya he, konɛ o kɛ tsɔɔ imi Nɔmlɔ Bi ɔ, ye se blɔ?”
49Benɛ kaseli ɔmɛ nɛ kɛ Yesu ngɛ lejɛ ɔ na nɔ́ nɛ ma a, a bi lɛ ke, “Nyɔmtsɛ, waa hia klaate kɛ wo a he lo?” 50Kɛkɛ nɛ a ti nɔ kake ja osɔfo nɔkɔtɔma pe kulaa a nyɔguɛ klaate, nɛ e po e hiɔ nɔ tue.
51Se Yesu de ke, “E hiɛ!” Kɛkɛ nɛ e ta nyumu ɔ tue ɔ he, nɛ e tsa lɛ.
52Jehanɛ ɔ, Yesu de osɔfo nikɔtɔma amɛ, kɛ sɔlemi we ɔ asafoatsɛmɛ ɔmɛ, kɛ ma nimeli ɔmɛ ke, “Anɛ e hia kaa nyɛɛ ngɔ klaate, kɛ okpoti kɛ ba hiɛ ɔ? Ojo fialɔ ji mi? 53#Luk 19.47; 21.37 Daa nɛ i kɛ nyɛ ngɛ sɔlemi we ɔ lɛɛ nyɛ de we ke nyɛ maa nu mi. Se nyɛ ngmlɛfia a ji nɛ ɔ nɛ; diblii matsɛ ɔ ní tsumi be su!”
Petro de ke e li Yesu
(Mateo 26.57-58, 69-75; Marko 14.53-54, 66-72; Yohane 18.12-18, 25-27)
54A nu Yesu, nɛ a ngɔ lɛ kɛ ho osɔfo nɔkɔtɔma pe kulaa a we mi ya; nɛ Petro nyɛɛ se ngɛ lokoo. 55A slɛ la ngɛ kue ɔ kpɛti, nɛ nihi hii si kɛ bɔle la a, nɛ Petro ho ya piɛ a he. 56Mawayi ɔmɛ a ti nɔ kake na lɛ nɛ hii si ngɛ la a he ngɛ lejɛ ɔ. Mawayo ɔ hyɛ Petro too, nɛ e de ke, “Nyumu nɛ ɔ hu piɛ e he!”
57Se Petro kplɛɛ we. E de lɛ ke, “Awenyɛ, i li lɛ!”
58Be bɔɔ se ɔ, nyumu ko hu yo Petro, nɛ e de ke, “Mo hu a ti nɔ kake ji mo!”
Se Petro he nɔ ke, “Awetsɛ, pi a ti nɔ kake ji mi!”
59Maa pee ngmlɛfia kake se ɔ, nyumu kpa ko hu ma nɔ mi veveeve, nɛ e de ke, “Nyumu nɛ ɔ hu Galilea no ji lɛ, nɛ nɔ́ jemi ko kulaa be he kaa lɛ hu e kɛ Yesu lɛ ngɛ!”
60Se Petro de lɛ ke, “Awetsɛ, i li nɔ́ nɛ o ngɛ dee ɔ!”
Tlukaa a, benɛ e ngɛ munyu ɔ tue kɛ mwɔɔ ɔ, kungwɔ kpa nɔ. 61Nyɔmtsɛ ɔ plɛ e he nɛ e hyɛ Petro. Nɛ Petro kai kaa Nyɔmtsɛ ɔ de lɛ be ko ke, “Loko kungwɔ ma kpa nɔ nyɔ nɛ ɔ mi ɔ, o ma de si etɛ ke o li mi.” 62Kɛkɛ nɛ Petro je kpo, nɛ e ya fo ya wawɛɛ nitsɛ.
A ye Yesu he fɛu, nɛ a fia lɛ ní
(Mateo 26.67-68; Marko 14.65)
63Nihi nɛ ngɛ Yesu he bue ɔ ye e he fɛu, nɛ a fia lɛ ní. 64A fi e hɛ mi, nɛ a bi lɛ ke, “Mɛnɔ lɛ fia mo nɔ́ ɔ? De wɔ!” 65Nɛ a de ní kpahi fuu kɛ bɔ lɛ ahlua.
Yesu ngɛ kpe nguaa a hɛ mi
(Mateo 26.59-66; Marko 14.55-64; Yohane 18.19-24)
66Benɛ je na a, ma nimeli ɔmɛ, kɛ osɔfo nikɔtɔma amɛ, kɛ mlaa tsɔɔli ɔmɛ a nya ba bua, nɛ a ngɔ Yesu kɛ ba da kpe nguaa a hɛ mi. 67A bi lɛ ke, “Mo ji Kristo ɔ lo? De wɔ!”
E he nɔ ke, “Ke i de nyɛ ɔ, nyɛ be hee maa ye, 68nɛ ke sane ko nɛ i bi hu, nyɛ be mi heto hae. 69Se e be kɛe kulaa nɛ Nɔmlɔ Bi ɔ maa hi Mawu Ope ɔ hiɔ nɔ.”
70Kɛkɛ nɛ mɛ tsuo a bi lɛ ke, “Lɛɛ tse Mawu bi ji mo?”
E he nɔ ke, “Ja nyɛ de ɔ nɛ.”
71Kɛkɛ nɛ a de ke, “Odase yeli kpahi a he hia we wɔ hu! Wɔ nitsɛmɛ wa nu kɛ je e nya!”
Currently Selected:
Luka 22: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.