Mose I, 28
28
1Isak tsɛ Yakob, nɛ e gbaa lɛ, nɛ e de lɛ ke, “Koo ngɔ Kanaan yo. 2Yaa Mesopotamia, esɔ. Yaa o nɛ̃ Betuel we ɔ mi, nɛ o ya ngɔ o tsɛko Laban biyi ɔmɛ a ti nɔ kake. 3Mawu Ope ɔ nɛ gbaa mo, nɛ e ha mo bimɛ babauu, konɛ o ba pee je mahi babauu a tsɛ. 4#Mose I, 17.4-8 Mawu Ope ɔ nɛ gbaa mo, kɛ o nina kaa bɔ nɛ e gbaa Abraham ɔ, konɛ zugba nɛ ɔ nɛ o ba to nubwɔ ngɛ nɔ ɔ, e ba pee o nɔ́, ejakaa Mawu kɛ zugba a ha Abraham.” 5Isak wo Yakob blɔ kɛ ho Mesopotamia ya, kɛ ya ha Aram no ɔ nɛ a tsɛɛ lɛ Betuel ɔ binyumu Laban. Laban nyɛmiyo ji Rebeka, Esau kɛ Yakob a nyɛ ɔ.
Esau ngɔ yo he
6Esau na kaa Isak gbaa Yakob nɛ e wo lɛ blɔ kɛ ho Mesopotamia ya, konɛ e ya ngɔ yo ngɛ lejɛ ɔ. E na hu kaa benɛ Isak gbaa Yakob ɔ, e ka lɛ kita ke e ko ngɔ Kanaan yo. 7Jehanɛ, e na kaa Yakob bu e nyɛ kɛ e tsɛ tue, nɛ e ho Mesopotamia ya. 8Esau ba yɔse kaa e tsɛ Isak ɔ sume Kanaan yihi. 9Lɔ ɔ he ɔ, e pue nɔ kɛ ho Abraham binyumu Ishmael ngɔ ya, nɛ e ya ngɔ Ishmael biyo Mahalat, Nebayot nyɛmiyo ɔ kɛ piɛ e yi ɔmɛ a he.
Yakob nla ngɛ Betel
10Yakob je Beersheba, nɛ e pue blɔ kɛ yaa Haran.
11Benɛ pu nɔ si ɔ, e ya su he ko, nɛ e to si ngɛ lejɛ ɔ. E ngɔ tɛ nɛ e tslɔ, nɛ e hwɔ lejɛ ɔ. 12#Yoh 1.51 E nla nɛ gba he tso ko maa si ngɛ zugba nɛ e yi mi ya pi hiɔwe, nɛ Mawu bɔfohi ngɛ gba he tso ɔ kuɔe nɛ a ngɛ kplee. 13#Mose I, 13.14-15 Kɛkɛ nɛ Yawɛ ba da si ngɛ e kasa nya, nɛ e de ke, “Imi ji Yawɛ, o nɛ̃ Abraham kɛ o tsɛ Isak a Mawu ɔ. Zugba a nɛ o hwɔɔ si ngɛ nɔ nɛ ɔ, ma ngɔ kɛ ha mo kɛ o nina. 14#Mose I, 12.3; 22.18 O nina maa hiɛ babauu kaa tabo zu. A maa ha zugba a nɔ tsuo kɛ je beleku je kɛ yaa si bonyoku je, jehanɛ kɛ je omleyi je kɛ yaa si leneyi je. Mo, kɛ o nina a nɔ a maa gu kɛ gbaa je ma amɛ tsuo. 15I kɛ mo maa hi si. He tsuaa he nɛ o yaa a, ma bu o he, nɛ ma kpale mo kɛ ba zugba nɛ ɔ nɔ ekohu. I be o he jee; ma pee níhi nɛ i wo mo a he si ɔ ha mo kokooko.”
16Kɛkɛ nɛ Yakob hɛ tsɛ̃, nɛ e de ke, “Akuanyɛ! Mamoo Yawɛ ngɛ hiɛ ɔ, nɛ i li!” 17E tsui po, nɛ e de ke, “Hiɛmɛ nɛ ɔ ngɛ gbeye! Mawu we ji hiɛ ɔ nɛ, tsa pi he kpa ko; hiɔwe agbo ɔ ji nɛ ɔ nɛ.”
18Yakob te si mɔtu kpla, nɛ e ngɔ tɛ ɔ nɛ e tslɔ ɔ ngɔ ma si kaa kaimi titima. Lɔ ɔ se ɔ, e plɛ nu ngɔ pue nɔ, nɛ e kɛ pee tɛ ɔ klɔuklɔu ha Mawu. 19E wo lejɛ ɔ biɛ ke Betel,#28.19 Betel: Ngɛ Hebri gbi mi ɔ, biɛ nɛ ɔ sisi ji “Mawu we.” se sa a, a tsɛɛ ma nɛ ngɛ lejɛ ɔ ke Luz. 20Yakob ka Yawɛ kita ke, “Ke o kɛ mi maa hi si, nɛ o maa bu ye he ngɛ blɔ nɛ i ngɛ hiae nɛ ɔ nɔ, ke o ma ha mi ngma nɛ ma ye, kɛ tade nɛ ma wo; 21ke o maa kpale mi kɛ ba tsaatsɛ we ɔ mi fiafiaafia ekohu ɔ, lɛɛ mo Yawɛ, o maa pee ye Mawu. 22Kaimi tɛ nɛ ɔ nɛ i ngɔ ma si kaa titima nɛ ɔ, maa pee he nɛ a ma ja mo ngɛ; nɛ nɔ́ tsuaa nɔ́ nɛ o ma ha mi ɔ, ma ngɔ e mi dlami nyɔngma mi kake kɛ ha mo.”
Currently Selected:
Mose I, 28: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.