Kucangtsi 1
1
Rimam Mam Utense
1Ti kucangtsi ti Rimam mam apupwen ti riben, 2utense tsi rubwen, iken iki ta-yi uwae atang be, si nyáng kubunn ambyi, ti kufub ti sikyi yi. Ama kusung Rimam ku yang pakob risu ambyi.
3Ama Rimam ri baa, “Kufarang ā ba tsi.” Ama kufarang tsi. 4Ama Rimam sae kufarang wune baa, awu na nyang, ama awu kata kufarang wu te kufub. 5Rimam kunn kufarang wu baa, “Usirtaen.” Kufub ama, awu kunn wu baa, “Utitang.” Ama usir sa te, ucwe sa famsi, uwae usir ti kinjo.
6Ama Rimam ri baa, “Apwa tiyaen ā nae kutampwa ambyi, ti ayi ā kata ambyi ifaen.” 7Ikyaen yine Rimam kyae apwa, u kata ambyi ti riben tí ti apupwen. Ama ayi tsi pangma ti Rimam ri. 8Rimam kunn apwa wu baa, “Apwa apupwen.” Ama usir sa te, ucwe sa famsi, uwae usir ti ifaen.
9Ama Rimam ri baa, “Ambyi ti munnkyi riben ā pu funn atso uwog kinjo, ti riben ā nae ise.” Ama ayi nde pangma ti Rimam ri. 10Rimam kunn riben ti nae ise ne baa, “Akaen ise.” Ambyi yi ti pu funn atso uwog kinjo ama awu kunn yi baa, “Uyinn.” Ama Rimam sae baa, ayi na nyang. 11Tiri Rimam ri baa, “Afub ti irum ā tsoye. Ituku ti ku waen awaen, ti itso-yi meme, ā tsoye.” Ama ayi nde pangma ti Rimam ri. 12Ama irum ti ituku ti itsotso ti ku waen awaen tsoye meme. Ama Rimam sae baa, ayi na nyang. 13Ama usir sa te, ucwe sa famsi, uwae usir ti ita.
14Ama Rimam ri baa, “Iken ti u nda itisaenkyag ā mbug ru ye uwae apwa apupwen, ti ayi ā kata usir ti utitang. Ayi ā sa ice tsi, ti ku tatso kiye ti usir ti kusang. 15Ayi ā tsen apupwen, ti uwog ā paenine riben ike.” Ama ayi nde pangma ti Rimam ri. 16Rimam mam iken ifaen tiyang tiyang. Awu ti ko siskeb ā tsi usirtaen, awu ti ko sisi ama ā tsi utitang. Awu mam aswer fa ti atang meme. 17Rimam pu yi baefa apwa apupwen ti ititsen-yi ā nda riben ike saen paenine. 18Ayi u ta risu usirtaen ti utitang, ti ayi ā kata kufarang ti kufub. Ama Rimam nung baa, ayi na nyang. 19Ama usir sa te, ucwe sa famsi, uwae usir ti inje.
20Ama Rimam ri baa, “Iken ti ku nyang unyang ti tsotso ā munnkyi uwae ambyi, inung ti tsotso ā pinn apupwen ko aka uwae utense.” 21Ayine si fengo ti Rimam mam itso ibye tiyang ti ta uwae uyinn, ti itso ibye ti tsitsi ti ta uwae ambyi, fa ti itso inung meme. Ama Rimam sae baa, ayi na nyang. 22Rimam nde yi itinyang, u ri baa, “Ni mbae yiyag, ti ni mbae jwunn, ti ni jwunn kyife uwae ambyi ti uyinn meme. Inung ama ā mbae jwunn, ti ayi ā jwunn kyife utense meme.” 23Ama usir sa te, ucwe sa famsi, uwae usir ti itsong.
24Rimam ri baa, “Riben ā pu ru ye iken ti site unyang ti itsotso, asinn ti iken ti site unyang ti ku kun riben, fa ti ibye kutur ti itsotso.” Ama ayi tsi pangma ti Rimam ri. 25Rimam mam ibye kutur ti itsotso ti asinn ti itsotso, fa ti iken ti ku kú riben txi txi txi. Ama Rimam sae baa, ayi na nyang.
26Ama Rimam ri baa, “Tine, ti kyae unde rukwer ijwe-ti, ti awu ā si pangma ati, ti aba ā ta risu iwag ti ta uwae ambyi, ti inung ti apupwen, ti asinn, ti meme iken ti ku kyang riben ko aka meme uwae utense.” 27Ama, Rimam kyae unde rukwer ijwe-wu.
Awu kyae unde pangma ti awu Rimam si.
Awu kyae ba, urom ti unda.
28Rimam wae ira na ba, u ri baa, “Ni mbae yiyag, ti ni mbae jwunn, ti ni jwunn kyife uwog meme, u ta risu utense. Ani u ta risu iwag ti ta uwae ambyi, ti risu inung ti apupwen, fa ti itso iken ti ku kyang riben meme.” 29Rimam ri baa, “Ame pu na pu m ani patag iken ti ku shab atsing, ti ayi ti ku waen awaen ti ta ko aka uwae sise ne, fa ti meme itso kutuku ti ku waen awaen ti ta utense. Ayi ā si wuci-ni. 30Ama meme iken tirisub ti ku shishab, ame pu yi na ibye kutur ti inung ti apupwen, ti itso iken ti ku kyang riben, ti meme iken ti si te unyang, ti ayi ā si wuci-ba.” Ayi tsi pangma ti Rimam ri. 31Rimam sae meme iken ti awu kyae baa, ayi na nyang timambe. Ama usir sa te, ucwe sa fam si, uwae usir ti itsongnjo.
Currently Selected:
Kucangtsi 1: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017