YONI 5
5
Yesu ikatumovi taitala okatuwotu
1Oluvi, mina Yudia kasi paka kwaitala#kasi paka kwaitala. Mimilisi buki pilabubogwa iginisi “kasi paka makwaina”, e baisa kaina Luvapela. ikaloubusi; e Yesu ila Yerusalem. 2E kwaitala katuwotu isisu Yerusalem katitaikina makaduyona Sipi si Kabosusuvi. Obonasi mina Iberu idokaisi katuwotu Betisata, e makwaina sopi isim kala kabosusuvi kaduyolima. 3E bidubadu tokwatoula ikanukwenusi makaduyosina, tokwau, topem, togolia.#Mimilisi buki pilabubogwa ikatumkulovaisi mabigana, iginisi, “Itulotulasi igau avai tuta sopi biyeboebo. 4 Paila mimilisi tuta la anelosi Guyau bibusi wa sopi e bikatuluwi. E availa bivabusibogwa tutala iyeboebo sopi, matauna bibwaina kala katoula.” 5E taitala tau isisu baisa, kala lelia kweluwotolu kwailima kwaitolu taitu. 6E tutala Yesu igisi matauna ikanukwenu, e inikoli la sisu tuta kaduwonaku makawala, iluki matauna, kawala, “Magim bukubwaina ke?”
7Matauna tokwatoula ivitakauloki Yesu, kawala, “Tomoya, gala availa bisailigu wa sopi tutala iyeboebo; mitaga tutala amaima, tomota ituwoli ikalisauwaigu ivabusibogwa.”
8Yesu iluki matauna, kawala, “Kutokaia, kukwatupwi m moi, e bukula.” 9E matauna saina nanakwa ibwaina, ikatupwi la moi, e ila.
E yam makwaina yam sabate. 10Mapaila mina Yudia ilukwaisi matauna eibwaina, kawasi, “Yam makwaina yam sabate e gala ibodi Mosese la Karaiwaga#Baisa si Buki Pilabumaboma mina Yudia, mitaga saina ikikamiabaisi pilalima mapilasina pilimatala. kidamwa bukukeula m moi.” #Nie 13.19; Yer 17.21
11Mitaga ivitakauloki matausina, kawala, “Matauna tau eikatumovaigu ilukwaigu, kawala, ‘Kukwatupwi m moi, e kula.’”
12Ikatupoiyaisi matauna, kawasi, “Avai tau eilukwaim, kawala, ‘Kukwatupwi m moi, e kula’?”
13Mitaga matauna eibwaina gala inikoli avai tau, paila tobobawa isisuaisi baisa e Yesu bogwa leila.
14Oluvi Yesu ibani matauna wa Bwala Kwebumaboma, e iluki matauna, kawala, “Ka, bogwa lokubwaina; taga tuvaila kumitugaga, kaina avai vavagi kala mwau bikalisau kam kwatoula biyosaim.”
15E matauna ila e iluki mina Yudia kidamwa Yesu bogwa ikatumovi matauna. 16E mauula mina Yudia ivitouulasi si lamadada baisa Yesu paila ivagi vavagi makwaina wa yam sabate. 17Mitaga Yesu ikamitilaki matausina, kawala, “Tuta tuta Tamagu ipupaisewa, e yeigula tuvaila apupaisewa.”
18E mina Yudia inainevisi saina minimani bikatumataisi matauna; gala paila ikodidaimi sabate wala, mitaga idoki Yaubada matauna Tamala tatoula goli, e makawala matauna iyovitavatasi sola Yaubada.
Yaubada isaiki Latula karaiwaga
19Yesu iluki matausina, kawala, “Biga mokwita alukwaimi gala igagabila bavagi avaka titoulegu, mitaga avaka bagisi Tamagu biuvagi, e makwaiwena bavagi; paila avaka avaka matauna iuvagi, auvagi makwaisina makawala goli. 20Paila Tamagu iyebwailigu, e iuvitulokaigu komwaidona vavagi makwaisina avaka eiuvagi; e tuvaila bivitulokaigu avaka bikalisauwaisi vavagi makwaisina, e bitutu uwomi. 21Paila makawala Tamagu itomiliwoli tomata e imovavausi, makawala goli yeigu Latula ayomovi availa availa goli lanagi bimovasi. 22Tamagu gala iyakali availa mitaga bogwa leisaiki yakala kala karaiwaga komwaidona baisa yeigu Latula, 23kidamwa komwaidosi bitemmalaigusi, makawala itemmalaisi Tamagu. Availa gala itemmalaigu, matauna gala itemmali Tamagu matauna leiwitalaigu.
24“Biga mokwita alukwaimi, matauna ilagi ulo biga e idubumi matauna eiwitalaigu, bikau momova kwekanigaga; e gala bibani yakala, mitaga metoya okaliga bogwa iluvapela baisa omomova.
25“Biga mokwita alukwaimi, tuta makateki, e bogwa leima goli, tomata bilagaisi kaigagu yeigu Yaubada Latula, e matausina ilagaisi bimovasi. 26Paila makawala Tamagu tolimomova makawala goli ivigakaigu tolimomova. 27E tuvaila isakaigu karaiwaga bavagi yakala, paila uula yeigu Latula Tomota. 28Taga bitutu uwomi paila baisa; paila tuta makateki komwaidosi tomata isisuaisi wa laka bilagaisi kaigagu, 29e bisunapulasi; matausina tomitukwaibwaila bitokaiasi bimovavausi; e matausina tomitugaga bitokaiasi bibodasi kasi kamwaga. #Dan 12.2
Availa bikamituli paila Yesu
30“Gala igagabila yeigu titoulegu bavagi avaka; aniganaga makawala Tamagu ilukwaigu, e ulo naga duwosisia paila gala anainevi nanogu, mitaga nanola matauna leiwitalaigu.
31“Kidamwa bakamituli avaka paila titoulegu, makwaina kamatula kaina gala bibodi bukudubumaisi. 32Mitaga taiyuwela isisu isilasola paila yeigu, e anikoli makwaina avaka ilivala paila yeigu baisa mokwita. 33Lokuwitalaisi mi touwata ilosi baisa Yoni e matauna ikamituli avaka mokwita, e ikabuboti. #Yn 1.19-27; 3.27-30 34Gala goli ibodi tomota bisilasolasi paila yeigu; mitaga akatululuwaiyaimi kidamwa bukumovasi. 35Yoni goli kaitapa ilululu ititapi; e lokutagwalasi kwaitala momwa bukummwasawasi goli ovisigala. 36Mitaga agu tosola isisu ikalisuwoli kamatula makwaina avaka Yoni eikamituli; paila vavagi makwaisina avaka Tamagu eisakaigu bavagi, vavagi makwaisina auvagi isilasolasi paila yeigu, ikibubotaisi kidamwa Tamagu leiwitalaigu. 37E Tamagu eiwitalaigu, matauna tuvaila isilasola paila yeigu. Gala kwaitala tuta kulagaisi kaigala kaina kugisaisi migila. #Md 3.17; Mk 1.11; Lk 3.22 38E mapaila la biga gala isisu olumoulemi, paila gala kudubumaisi matauna eiwitali. 39Kunainevisi olumoulela Buki Pilabumaboma,#Kunainevisi olumoulela Buki Pilabumaboma. Gagabila bitagini, “Ibodi bukunainevisi olumoulela Buki Pilabumaboma” paila kudokaisi bukubanaisi momova kwekanigaga olumoulela mpana, e ginigini makwaisina goli ikamitulaisi paila yeigu. 40E gala magimi bukumakaiagusi kidamwa bukumovasi.
41“Yeigu gala akukuli si yakaula tomota. 42Mitaga yokomi anikolaimi, anikoli gala wala kuyebwailisi Yaubada oninami. 43Lama paila Tamagu isakaigu ulo kwaraiwaga, e gala kubodaigusi. Mitaga kidamwa availa bima deli la karaiwaga titoulela, matauna bukubodaisi. 44Yokomi bukukulaisi kami yakaula taitala metoya baisa sola, e gala bukunevisi kami yakaula metoya baisa Yaubada kalamwaleta. Ki, ammakawalaga gagabila bukudubumaisi? 45Taga bukudokaisi kidamwa yeigu batabinakaimi omatala Tamagu; matauna Mosese bitabinakaimi, matauna goli mi kabopikwaku. 46Paila kidamwa bukudubumaisi Mosese, bogwa bukudubumaigusi; paila matauna leigini#Ililivala paila mapilasina buki pilalima omatala si Buki Pilabumaboma mina Yudia. paila yeigu. 47Mitaga kidamwa gala kudubumaisi la ginigini, ammakawala bukudubumaisi ulo biga?”
Currently Selected:
YONI 5: PNGKIR
Highlight
Share
Copy
Want to have your highlights saved across all your devices? Sign up or sign in
Kiriwina Bible (Buki Pilabumaboma) © Bible Society of Papua New Guinea, 2011.