SI VAVAGI APOSETOLO 8
8
1E Saulo itagwala paila kala katumata.
Saulo ilamidadi ekalesia
Yam makwaiwena wala mabudona ekalesia mapilana Yerusalem ibodaisi kasi lamadada saina vakaigaga. Komwaidosi todubumi ibutugeyaisi ilosi mapilasina valu Yudia, deli Sameria. Mesinaku aposetolo gala ibutusi. 2Taivilesi totapwaroru mokwita ibakwaisi Sitibeni ivilamwaisi matauna sainela.
3Mitaga Saulo ivigikoni mwada bikaiyouli ekalesia, ilokaia bwala kwaitala kwaitala isusuvi e metoya baisa ibititani todubumi metoya osi bwala, tauwau deli vivila, e ikatuvisuvi matausina wa bwala katupipi. #VA 22.4-5; 26.9-11
Kala kamatula Bulogala Bwaina mapilana Sameria
4Matausina todubumi leibutubogwasi ilokaiasi ambaisa ambaisa ikamitulaisi Bulogala Bwaina. 5E Pilipi#Matauna taitala matausina kasitailima kasitaiyu toekalesia mapilana Yerusalem einagaisi; kugisi VA 6.5. ila vilouveka kwaitala olopola mapilana Sameria#Mapilana katupotala mina Yudia si valu isisu oluwalaisi mapilasina Yudia deli Galili. Mina Yudia idokaisi mina Sameria tokukolosi wala, paila si boda, kasi gulogula, si tokwaraiwaga deli si tapwaroru kedasi ituwoli ituwoli. e ikamituli baisa tomota paila Mesaia. 6E tomota inakaigalaisi Pilipi avaka eilivali, e komwaidosi iligimlilaisi matauna, deli igisaisi vavagi siligaga eiuvagi. 7Paila baloma gaga iukuwakulasi isusunapulasi metoya baisa tomota bidubadu; bidubadu tobulomata deli topem bogwa leibwainalabasi. 8E valu makwaina tomotala imwasawasi kwaiveka.
9Mitaga ovalu makwaina taitala tau isisu yagala Saimoni, matauna tomigameguva. E tuta kaduwonaku iyowa luposi mina Sameria paila la meguva. Matauna ikaibiga, kawala, “Yeigu taitala toveka!” 10E komwaidosi tomota ovalu makwaina, gweguya deli tokai, einakaigalaisi kawasi, “Yaubada Topeula bogwa eisividuli matauwena, bitadoki yagala Topeuligaga Sainela.” 11Matauna tomigameguva eikayou luposi matausina tuta kaduwonaku mapaila inakaigalaisi matauna. 12Mitaga tuta matutona idubumaisi Pilipi la biga ikikamituli Bulogala Bwaina paila la karaiwaga Yaubada deli ikikamituli matauna Yesu, e matausina ibapitaisasi, tauwau deli vivila. 13E matauna Saimoni deli idubumi e oluvi ibapitaiso. E isisu otalila Pilipi; bogwa eigisi vavagi siligaga deli kaboyowalula eiviloubusi, e mapaila iyowa lopola.
14E aposetolo mapilana Yerusalem bogwa ilagaisi kidamwa mina Sameria eikauwaisi la biga Yaubada; mapaila iwitalaisi Pita sola Yoni bilokaiasi matausina. 15Iviloubusisi e inigadasi paila todubumi kidamwa bikauwaisi Baloma Tobumaboma. 16Paila Baloma Tobumaboma igau gala bibusi baisa availa matausina. Paila eibapitaisasi wala oyagala Guyau Yesu. 17Mapaila Pita sola Yoni oyumasi ikiwotaisi dubasi matausina e ikauwaisi Baloma Tobumaboma.
18Saimoni bogwa igisi kidamwa Baloma Tobumaboma eikauwaisi tuta matutona wala aposetolo eisailasi yumasi odubasi matausina todubumi. Mapaila iyosali mani mwada bisaiki Pita sola Yoni, 19e iluki, kawala, “Kusakaigu goli peula makwaina, mapaila kidamwa wala basaili yamagu odabala availa, matauna bikau Baloma Tobumaboma.”
20Mitaga Pita ivitakauloki, kawala, “Ibodi yoku bukusilagi deli m mani goli; paila m nanamsa kudoki mwada bukugimloki Yaubada la semakavi metoya wa mani. 21Yoku gala isim kabam kaina gala kam vilavila oma wotetilasi, paila nanom gala duwosisia baisa omatala Yaubada. 22Kuninavila metoya om nanamsa doudoga, e kunigada baisa Guyau kidamwa biligaiwa m mitugaga, paila kuninanamsa makawala baisa. 23Paila bogwa lavitusaim saina wala topugipogi yoku e deli m mitugaga bogwa eikatupipaim.”
24Saimoni iluki Pita sola Yoni, kawala, “Ayokakapisi baisa yokomi kunigadasi baisa Guyau paila yeigu, kidamwa taga babodi vavagi makwaisina.”
25E Pita sola Yoni isilasolasi ilivalaisi Guyau la biga, e oluvi ikaimilavausi Yerusalem. Ililoulasi bikaimilavausi e ikikamitulaisi Bulogala Bwaina mapilasina viluwela Sameria.
Pilipi deli guma Idiopia
26La anelosi Guyau iluki Pilipi, kawala, “Kukwatubaiasa kutokaia e bukula opilibolimila bukuboda makadana metoya Yerusalem bilokaia Gasa.” (Makadawena bilokaia oviloupakala.) 27-28Mapaila Pilipi ikatubaiasa e ila. E makadana taitala yunaki guma Idiopia ililoula bila ola valu. Matauna tau saina toveka tokwaraiwaga la giyouvila Kanidesi, minana si giyouvila mina Idiopia, e matauna giyouvila la veiguwa kala toyamata. Bogwa leilokaia mapilana Yerusalem kidamwa bitapwaroru baisa Yaubada,#Matauna gala guma Yudia, mitaga bogwa eiluvapela mwada bikabikaula baisa Yaubada. e baisa tuta ikikaimilavau ola waga kaibibiu. Waga isisakaula, e ikikalawa la buki Aisea tovitoubobuta. 29E Baloma Tobumaboma iluki Pilipi, kawala, “Bukulokaia e kuliloula otalila makaina waga.” 30Pilipi isakaula ila e bogwa ilagi tosikwawa ikikalawa metoya ola buki Aisea tovitoubobuta, e ikatupoi matauna, kawala, “Ki, kukwateta avaka kukukwalau?”
31E tokwaraiwaga ivitakaula, kawala, “Ammakawala bakateta kidamwa gala availa bitaneku baisa yeigu?” E inigadi Pilipi bimwena bisila wa waga kaibibiu deli matauna. 32E mapilana mavilela ikalau makawala baisa.
“Matauna makawala sipi, minana bikauwaisi mwada bikatumataisi,
kaina makawala lam, minana gala bigilagela tutala ikapitunaisi unuunula.
Matauna gala ilivala avai biga. #Ais 53.7-8
33Matauna bogwa eikuli kala mmosila, mitaga gala availa ikau piela.
Gala availa igagabila bilivala paila pesila,
paila la momova odabala pwaipwaia bogwa leiwokuva.”
34E tokwaraiwaga ikatupoi Pilipi, kawala, “Kulukwaigu, matauna tovitoubobuta eilivala baisa, ki, ililivala paila availa? Kaina paila titoulela kaina paila availa tuwoli?” 35E Pilipi ikawota; ivitouula metoya ginigini mapilana iluki matauna Bulogala Bwaina paila Yesu. 36Ikokewasi wa keda e eimaisi makatupona ambaisa sopi eisisu. E tokwaraiwaga ikaibiga, kawala, “Kugisi sopi makwaina. Avaka isilibodaigu kidamwa babapitaiso?”#Mimilisi buki pilabubogwa ikatumkulovaisi mailela 36, iginisi, “ 37 Pilipi iluki matauna, kawala, ‘Kidamwa kudubumi onanom komwaidona, gagabila babapitaisaim.’ E ivitakauloki, kawala, ‘Mitaga, adubumi Yesu Keriso kidamwa matauna Latula Yaubada.’”
38E tokwaraiwaga ikaraiwaga kaibibiu bikota, e kasitaiyu itobusisi, Pilipi deli tokwaraiwaga. Ivabusisi wa sopi e Pilipi ibapitaisi matauna. 39Matausina ivalaguvasi metoyasi wa sopi e Guyau la Baloma ikau Pilipi ila. E tokwaraiwaga gala tuvaila igisi matauna, e deli la mwasawa isaitaula wala. 40Mitaga Pilipi ila Asidodi; ila ititavina komwaidona valu makwaisina ikikamituli Bulogala Bwaina igau tutala iviloubusi mapilana Sisaria.
Currently Selected:
SI VAVAGI APOSETOLO 8: PNGKIR
Highlight
Share
Copy
Want to have your highlights saved across all your devices? Sign up or sign in
Kiriwina Bible (Buki Pilabumaboma) © Bible Society of Papua New Guinea, 2011.