Esta 8
8
Kanaba dalagite Modekai sidinapa saba atayana gi
1A:ma kadepa menagila kanaba Sekesis amale Yu lumumunu giwa:lanapa dalagi Amanape lopala waelabega kanaba susa:gi Estadima apuloyana. A:pite kanaba susa:gi Esta amale kanaba dalagi anayana Modekaite obape dede lumagi eloyana gi. 2Kanaba dalagi Amanape maile doloyana lini obape maile saowamite egete a:pite Modekai dima atayana. A:ma linile kanabape didiya a:meta. A:pite Estate Modekai dima kamali atayana Amanate tidoloyana lopala waelabega Modekaite tida:napa elamalale.
3Esta amale gwama kanaba dalagipe a:i sokatema dilate adimada:dele kanaba anayana, obate Agagape wapiki palanapa lumagi Amanate Yu luma waelabeya:gai dapolamale miyana sosawenapa gi ekeminamalale. 4Kanaba dalagi amale obape gaolod gabi Esta dima sogomiyala Esta kanaba dalagipe lopa palala patate lelate oba anayana.
5Obate a:negelayana, a: na: iwilelonamalelona tepala gwama ne lalelowamena gi a: awapage lalalmalelona, na: iwiminanowa, a: gi milamalelo ya:ma Amedatape mata Aman Agagpe wapiki palanapa lumagite Yuda luma dapola gilala letama alilote e tidoloyana wa kabigibegama auda:miyana gilala ekeminamada:le, ya:ma gilalate pa:pa gibalama gi elamalale. 6Na: a:ta:pilamalowaya ma:ma gite gibapile na:dowali lumadima saolamalona tepala. Enobala na: pa:pa iwiminanowa ma:ma gite elamalale.
7Kanaba Sekesiseta: kanaba susa:gi Estata: gwama Modekai Yu dalagita: dima gilala wisa eladele obai saki danayana. Yu luma dapolamalale a:piloyana dalagi Aman. Na: oba a madama tao sa:ima:te tao tipi miwame. A:pite obape lopala waelabeya:gai a Esta dima apilowamena. 8Amanate a:na:miyana gi na: pa: awapa opa:ya minamalale oba na:pe gagile a:na:miyana a:pite na: na:pe didiya a lapodoyamana enobala na: pa: awapa opa:ya minamalale. A:meta da: saki de Yu luma gima powa gi letama a:na:minamadelewamena. Da: a:ma leta a:na:minamadelewa, da: sakite na:dowali gagile leta a:na:mite na:pe didiya lapoda:malewa.
923 Tepanapa kadepala salikiliwanapa siban samosola Modekaite kanaba dalagipe leta a:na:da:mida:na dala waelabega awada:miyana. Modekai obai gilala danayala obaite obate layana gi a:na:pi a:na:mina eda:mada:le. Yu luma waelabegamunu letata: gabana lumunu letata: kabigida:na gabamani lumumunu letata: a:pite 127 baigabaiga enoba Indiya wale asemite wete Itiyopia wama saola. Kanaba Sekesisepe a:iya:dela ya:mai wa tidilina gabamani opisolta: obaimunu letata: a:na:da:miniyana. Miya wala ediliyana lumadima enobai obaimunu gilalale gwama leta gweya a:na:minale leta a:na:da:miniyana. A:pite Yu lumadima iya:ta: obaimunu gilalale a:na:da:minete auda:miniyana. 10Modekaite kanaba Sekesisepe gagile leta a:na:da:munete, kanabape didiya a:ma letama dapoliyana, a:mai leta osole wamidana dalate alelamidiliyana, kanabape genama gobana sa:sa:lena agogoda:na osole eta:mi wa papalama alelamidiliyana. 11Kanabape leta gobala gilala a:na:pi dowata ediliyana, kokowabina baiga gogobala edilina Yu luma waelabeya:gaite obai dima giwa:la edelamadilina giwa:lanada lapitedelamadili. Giwa:lanate obaimnu atota: segeta: dima giwa:la edelamadilina tepala Yu lumate a:mai giwa:lana dapolamadili. Giwa:lanate eta:mi a:ibaigala gwama eta:mi wa gogobala pa:da:te obai dapolamadilina tepala, Yuda luma a:meta ya:ma giwa:lanada giwa:la eda:dele a:ma giwa:lana dapolete obaimunu lopala aleda:menamadili. 12Yu lumate kanaba Sekeses obate tidoloyana wa waelabega gobala ya:ma gi a:na:minamadilina tepa enoba naba 12 tepanapa Ada samosope naba 13 kadepala. 13Kanaba Sekesisete ameta babala miladele enoba giwa:lanate Yu lumadima giwa:la edelamadilina tepala Yu luma iya:ta ya:ma giwa:la gima wisa eda:madilina gilalate babala bukama dolayana.
14Kanaba dalagite layala, gilala alelamidilina lumate osoma dida:te sela egete na:da: bega ediyana baiga baigama. A:pite Susa kabignapa baiga gobala iya:ta: obai a:ma gilala kekemiyana.
15Modekai amale kanaba dalagipe genama elatete wama saoyana, obate kiso abilo gweyanapa kalikota: kanaba dalagipe wasanapa gigisanapa kalikota: kakamiyana, a:pite gaolod ado kamiyana. Susa kabiginapa baiga gobala ediliyana lumate oba tilite mamamida:te mida:dele sa:keladiliyana. 16A:ma tepa enoba Yu lumadima kabiginapa sa:kela tepa eyana, gi ase obai ganabi lapila a egiyana. 17Kanaba dalagipe gima kamina gite Yu lumate ediliyana wa kabigibegama weleyana. A:pite Yu lumate a:ma gilala enamada:te sa:kelada:dele kabiginapa poko ediyana. Eta:mi luma waelabegate Yu luma emoda:dele obaida menagi ediyana.
Currently Selected:
Esta 8: GBOTP
Highlight
Share
Copy
Want to have your highlights saved across all your devices? Sign up or sign in
Gogodala Bible Translation Project © Bible Society of Papua New Guinea, 2016.