Luki 23
23
Isa doni koe mansa Pilati bata
1Wo kɔma, jama bɛ labɛndeŋɛ wulita anu ka Isa doni mansa Pilati bata. 2Anu la kereŋɛ ɲɔ, anu bakkuta Isa tɔɲɛgɛ koe la, anu ko: «Mɔ bata a taran kɛ kaye be mɔ la jamanɛ mɔgɛnu yɛlɛmanna, a be a fɔla anu ye aa anu kana duute dii Rɔmu mansa banba ma, a ko aa ale yɛtɛ mu mansa masubɛreŋɛ le la.» 3Pilati ka Isa maɲininka, a ko: «Ile mu Yahudenu la mansa le la ba?» Isa ka a jaabi, a ko: «I be a fɔren ki min na, a be ɲɔgɔnna le.» 4Wo butɔ, Pilati ka a fɔ sarika lakela kuntigenu nun jama bɛ ye, a ko: «N bele fenfen yenden kɛ kaye la, min si ma a jihadi sabu la.» 5Kɔnɔ anu mabɛlɛyata wo kuma ma koola, anu ko: «Kɛ kaye be jama lamurutɛla a la karaŋɛ sabu la, a ka a fɔlɔ Galile duge ma, a nata Juda duge bɛ tɔ han a keta yan.»
Isa doni koe mansa Herodu bata
6Pilati to ka wo kuma mɔɛ, a ka anu maɲininka ka ale kaye mu Galile kaa le la. 7A to ka a mɔɛ a be bɔɔren Galile duge tɔ le, a ka a lasanba Herodu ma, bayi ale le be mansaya tɔ Galile. Wo ka a taran, Herodu wunde tugun be Darisalamu wo tele fila. 8Herodu to ka Isa yen, a sɛɛwata a ɲinma la, bayi a be diren a yenna bɔɔla bima. A to ka a mɔɛ anu be a la ko fɔla, a sɔgɔ be a la Isa ni kabanakoe do ma a ni a yen. 9Herodu tota a maɲininkala kuma siyama la, kɔnɔ a ma a jaabi fenfen na. 10Sarika lakela kuntigenu nun sariya karamɔgɛnu be sɔren ɲɔ, anu be Isa tɔɲɛgɛla a koroŋɛ la. 11Herodu nun a la sɔɔrenu ka a dɔgɔya, anu yota a la. Wo kɔma, anu ka doroki malanna lajigi a ma, a ka a talasanba Pilati ma. 12Wo ka a taran, Pilati nun Herodu be ɲɔgɔn jaguyaren fɔlɔ nun, kɔnɔ wo lun de anu mata kɔnpinimanu la.
Pilati la Isa boloka koe
13Pilati ka sarika lakela kuntigenu nun mansanu nun jama madɛn, 14a ka a fɔ anu ye, a ko: «Wo bata kɛ kaye nati n ɲɛ, wo ko aa a be jama yɛlɛmanna. Awa, wo be a siɲɛren min na, n bata a tefire ma wo ɲala, kɔnɔ n ma fenfen yen kɛ mɔgɛ la, min si ma a jihadi sabu la. 15Herodu ka a talasaagi wo mɔ ma, wo be a yitaren ale tugun ma fenfen yen a la. Awa, kɛ kaye bele fenfen maren a bɛnta a ni faga min na. 16Wolo mu n si naa a botege lonba la, n mɛn ni a boloka.» 17⸂Wo ka a taran, hɔrɔya sali yo hɔrɔya sali, Pilati si gelemanɛ dɔndɔ boloka jama ye.⸃
18Kɔnɔ anu bɛ labɛndeŋɛ ka sɔnkɛ layɛlɛ sɛnbɛ la, anu ko: «I ni kɛ kaye nɛ bɔɔ, i ni Barabasi boloka mɔ ye!» 19Wo ka a taran, Barabasi be saren geele tɔ, bayi a ka kɛlɛ banba lawuli le saa butɔ, a ka mɔgɛ do tugun faga. 20Pilati mɛn ka a kulɛ labɔɔ anu ma, bayi a sɔgɔ be a la a ni Isa boloka. 21Kɔnɔ anu be anu kulɛ mayɛlɛla, anu ko: «A banban! A banban lɔgɔ bangalandeŋɛ tɔ.» 22Pilati ka anu maɲininka a kunɲama sabaɲɔgɛ la, a ko: «Fenna? A ka ko koron miniman ma? N ma fenfen yen a la, min si ma a faga sabu la. N si a botege n mɛn ni a boloka.» 23Kɔnɔ anu ka kuma labɛlɛya koola, han anu tota anu kulɛ labɔɔla a mayɛlɛreŋɛ la, anu ko tekku fɔ Isa ni banban lɔgɔ bangalandeŋɛ tɔ; wo butɔ anu ka Pilati manɔ, 24han a ka yamɔri sa, anu dita min ye, wo ni ma. 25Anu ka gelemanɛ min na ko fɔ, min ka mɔgɛnu lamurutɛ, a ka mɔgɛ faga, Pilati ka wo boloka, a mɛn ka Isa to anu sagoe tɔ.
Isa banban koe lɔgɔ bangalandeŋɛ tɔ
26Anu to be Isa donila, wo ka a taran Sirɛni kaa do be bɔɔla sɛnɛ tɔ, a tɔgɔ Simɔn. Anu ka a bita anu ka Isa la lɔgɛ bangalandeŋɛ sa a kan ma, a ni a wakkɛ a ni sɔ Isa kɔma. 27Anu taga tɛmuɛ, jama banba be sɔren a kɔma. Musu siyama tugun be a jokkiren, anu be anu jusu kuŋɛ mabotegela suunɛ la, anu be dila a la ko la. 28Isa ka a firifiri anu ma, a ka a fɔ anu ye, a ko: «Darisalamu musenu, wo kana di nde la ko la. A bɛnta wo ni di wo yɛtɛ nun wo la deŋɛnu la ko la, 29bayi wagate do si naa ke, mɔgɛnu si a fɔ wo lun, anu ko: ‹Musu den sɔtɔbalenu, musenu minnu ma den ko lɔn, minnu ma singi yo dii deŋɛ ma, hɛra be wondelen ye.›
30Wo tɛmuɛ, mɔgɛnu si naa a fɔ kɔnkɛnu ye:
Wo boe mɔ ma!
Anu si naa a fɔ kɔnkɔrɛnu ye:
Wo butin mɔ kunma! # 23:30 Annabi Hoseya la kitabue, sora 10, haaya 8 fɛlɛ.
31N ni a fɔ wo ye: anu be koe min maren n na, ka mɔgɛnu ka wo bɛ ma lɔgɔ kutaŋɛ la, fen de si naa ma lɔgɔ bala la?» 32Anu ka ko koron mala fila tugun doni faga dula, sa Isa la.
33Anu la kereŋɛ dula tɔ, ka min tɔgɔ «Kun konkota», anu ka Isa banban lɔgɛ bangalandeŋɛ tɔ ɲɔ le, anun wo ko koron mala fila. Dɔndɛ banbanta lɔgɛ bangalandeŋɛ do tɔ Isa bolo ɲinma tɔ, dɔndɛ tugun Isa bolo mara tɔ. 34Isa ka a fɔ, a ko: «Baaba, i ni anu la ko koroŋɛ kafari, bayi anu be koe min maren anu bele wo fahamuren.» Wo kɔma, sɔɔrenu ka tonbola ma, anu ni a la kutanu fatan ɲɔgɔn ma.#23:34 Jaburu, sora 22, haaya 19 fɛlɛ. 35Jama be sɔren ɲɔ, anu be a fɛlɛla. Yahude kuntigenu tota a mayola a koroŋɛ la, anu ko: «A ka mɔgɛnu donu lakisi nun. Ka Ala la mɔgɔ masubɛreŋɛ le mu a la, Ala be min kanuren, a ká a yɛtɛ lakisi!» 36Sɔɔrenu tugun ka anu madon a la anu ka a majele, anu ka a kɔ rɛsɛn deŋɛ ji lanmɛreŋɛ la. 37Anu ka a fɔ a ye, anu ko: «Ka Yahudenu la mansa le mu i la, i yɛtɛ lakisi.»
38Wo ka a taran, sɛbɛre do be bakkuren Isa kunma, a be sɛbɛren: «Yahudenu la mansa le mu ka.»
39Ko koron mala fila minnu be banbanden, dɔndɛ tota tana kuma fɔla Isa kunma, a ko: «Ala la mɔgɔ masubɛreŋɛ ma ile la ba? Wo butɔ, i yɛtɛ lakisi i ni mɔle tugun nakisi!» 40Kɔnɔ doe fatiyata a ma, a ka a jaabi, a ko: «Ile bele kilanden Ala la ba? I ma a lɔn ba, wo mɔ bɛ be jihadi dɔndɔ le tɔ? 41Mɔle bɛnta kɛ jihade sɔtɔla, bayi mɔ ka ko koroŋɛ min ma, a sɔŋɛ le mu kɛ la. Kɔnɔ kɛ kan ma fenfen ma.» 42Wo kɔma, a ka a fɔ Isa ye, a ko: «Isa, i tini ma mansa la i ni n na ko talɔn.» 43Isa ka a jaabi, a ko: «N ni tɔɲa fɔ i ye: bi yɛtɛ i si to n fɛ arijanna.»
44Fayida tele be kunna, dibe jigita jamanɛ bɛ tɔ, han salifana tanbi kɔma, wo bɛ dibe be jigiren, 45tele be lafinden. Hɔrɔma dingira parawan banba farata tɛma. 46Isa ka a kulɛ bɛlɛŋɛ labɔɔ, a ko: «Baaba, n be n nɛ lasaagila i ma.#23:46 Jaburu, sora 31, haaya 6 fɛlɛ.» A to banta wo fɔla, a nɛ bɔɔta. 47Wo bɛ mata sɔɔri mansa ɲala min be sɔren ɲɔ, a ka Ala tantu, a ko: «Tɔɲa yati le: kɛ kaye be telenden de nun!» 48Jama min bɛ madɛnta kɛ koe fɛlɛdula, anu to ka a yen min mata, anu saagita saa tɔ, anu be anu jusukuŋɛ mabotegela nimisa la. 49Kɔnɔ Isa lɔnbaga bɛ be sɔren kan yanfama tɔ, anun musenu minnu tota a kɔma ka bɔɔ Galile duge, anu be a fɛlɛla koe min be tanbila.
Isa la baadɛ
50-51Mɔgɔ do le be ɲɔ nun, a tɔgɔ Yusufu. Mɔgɔ telendeŋɛ le mu a la, a kaɲin. A be bɔɔren Arimati saa min be Yahudenu la duge tɔ. A be kuntigenu la mamadɛŋɛ ɲaama, kɔnɔ a bele basanden anu la koenu nun anu la natanu fɛ, a be a yili sɔren Ala la mansabaya le ma. 52A tagata Pilati bata a ka a madiya, a ni Isa fure don a bolo. 53A tagata a fure lajigi. A ka a kasange, a tagata a sa gabure min be soeren fata tɔ, han bi mɔgɔ ma sa min tɔ betunna. 54Wo koenu bɛ mata juma luŋɛ le Yahudenu be anu tabɛnna lun min na, bayi a banba bele toren sulen lɔ́gɛ́ ni ke. 55Muse minnu ka Isa masɔ kabɔɔ Galile duge tɔ, wonu ka Yusufu jokki, anu tagata gabure fɛlɛ, anun a be Isa fure sala ki min na. 56Wo kɔma, musenu saagita saa tɔ. Anu la kereŋɛ ɲɔ, anu ka tulu kuɲɛ diyama nun labundɛ tabɛn fure ye. Sulen lɔ́gɛ́ to keta, anu ka anu sulen, Ala la yamɔre butɔ.
Currently Selected:
Luki 23: MOG
Highlight
Share
Copy
Want to have your highlights saved across all your devices? Sign up or sign in