Yaya 3
3
Isa nun Nikodemu la sumuŋɛ
1Awa, mɔgɛ do le be ɲɔ nun, a be Farisinu le ɲaama, a tɔgɔ Nikodemu. A mu Yahudenu la kuntige do le la. 2Lun do, wolo tagata Isa yen sue tɔ, a ka a fɔ a ye, a ko: «Rabi, mɔ ka a lɔn i be naren karamɔgɔ kɛɲa le ma, min be fatanden Ala la. Bayi i be tɔnkumanu minnu mala, mɔgɔ yo te nɔ wonu mala ka a tigi nun Ala le ma.» 3Isa ka a jaabi, a ko a ma: «N ni tɔɲa beeyareŋɛ pɔsi fɔ i ye, ka mɔgɔ yo ma tasɔtɔ a nama la, a te nɔ Ala la mansabaya la ko yenna.» 4Nikodemu ka a maɲininka, a ko: «Mɔgɛ mɛn si nɔ tasɔtɔla bitugun ba, a bata ban kayibayala? A mɛn be tasaagila kama le a nɛɛnɛ bue tɔ, a mɛn ni tasɔtɔ?» 5Isa ka a jaabi, a ko: «N ni tɔɲa beeyareŋɛ pɔsi fɔ i ye, ka mɔgɛ ma sɔtɔ je nun Ala Hakkili saniyandeŋɛ la, a te nɔ donna Ala la mansabaya tɔ. 6Min sɔtɛ fatanta mɔgɛ la, mɔgɛ le wo la. Min sɔtɛ fatanta Ala Hakkili saniyandeŋɛ la, wo be balula wo Hakkili saniyandeŋɛ le la. 7N to bata a fɔ i ye, fɔ wo mɛn ni tasɔtɔ a nama la, i kana kaabɛ wo la de! 8Ka min diyata fɔɲɛ ye, a be bɔɔla ɲɔla le. I si a kulɛ mɔɛ, kɔnɔ i te a bɔɔdula lɔn, ka wo ma a tagadula. Min bɛ be sɔtɔren Hakkili saniyandeŋɛ la, wonu la ko tugun be ɲɔgɔnna le.»
9Nikodemu ka a maɲininka, a ko a ma: «Kɛ si nɔ mala kama le?» 10Isa ka a jaabi, a ko a ma: «Bani Isirayila karamɔgɔ banba do ma ile la ba? Ile ma wo lɔn ba? 11N ni tɔɲa beeyareŋɛ pɔsi fɔ i ye: mɔ ka koe min lɔn, mɔ be wolo fɔla. Mɔ ka koe min yen, mɔ mu wolo seede la. Wo dun bele mɔ la seedeɲɔgɔya bitala. 12N to ka duge tɔ koenu fɔ wo ye, wo ma laa a la. Ka n tagata saŋɛ tɔ nɛŋɛnu fɔ wo ye kɔtɛ, wo si nɔ laala wo la kama le? 13Adun, mɔgɔ yo ma yɛlɛ saŋɛ tɔ, fɔ nde Adamadeŋɛ min be saŋɛ tɔ nun, min tugun jigita bɔɔla saŋɛ tɔ.
14Fɔlɛ tɔ nun, annabi Musa ka kaa taasanɛŋɛ ɲiɲa, a ka a mayɛlɛ lɔgɔ kayanma la janfue tɔ.#3:14 Taureta Musa, kitabu naaniɲɔgɛ, sora 21, haaya 9 fɛlɛ. A fɛrɛ bele fɔ nde Adamadeŋɛ tugun ni yɛlɛ ɲɔgɔnna le, 15alako ka min yo dɛnkɛnɛyata n ma, a ni abada kise sɔtɔ. 16Bayi Ala ka dunuya mɔgɛnu kanu le han a ka nde a la den kayiren dɔndɛ dii, alako ka min yo dɛnkɛnɛyata n ma, wo tigi kana bɔnɔ, a ni abada kise sɔtɔ. 17Bayi Ala ma nde a la den kayiren dɔndɛ lasanba dunuya, a ni dunuya makiiti, ade fɔ a ni dunuya lakisi le nde sabu la. 18Min tini dɛnkɛnɛya n ma, kiiti bele wo tigi ma. Kɔnɔ min ma dɛnkɛnɛya n ma, wo la kiite bata ban tiɲala, bayi a ma dɛnkɛnɛya Ala la den kayiren dɔndɛ ma. 19Kiite kuŋɛ be bɔɔren kɛ-lɛ tɔ: kɛnɛ bata na dunuya, kɔnɔ mɔgɛnu ka dibe le kanu tanbi kɛnɛ la, bayi anu la walenu koron. 20Ko koron malá be kɛnɛ kɔnna le, a bele diren bɔɔla kɛnɛ ma, alako a la wo wali koroŋɛnu kana sa kɛnɛ ma. 21Kɔnɔ min wali ɲa be telenden, wo yan kan si bɔɔ le kɛnɛ ma, alako a ni lɔn ma a be walenu minnu mala, Ala be wonu fɛ.»
Yaya malasuwɛlá la seede bɔɛ Isa la ko tɔ
22Awa, wo kɔma Isa nun a la talibenu tagata Juda duge tɔ. A ka wagati do ma anu fɛ ɲɔ, a tota mɔgɛnu lasuwɛla je tɔ. 23Dula min tɔgɔ Enon, ka min be Salimu saa kɛnna, Yaya tugun be mɔgɛnu lasuwɛla ɲɔ, bayi ji siyama be ɲɔ; mɔgɛnu tota tagala, Yaya ni anu lasuwɛ je tɔ. 24Wo ka a taran, Yaya ma sa geele tɔ betunna.
25Wo tɛmuɛ, Yaya la talibenu nun Yahude do, sɔsɔre tota anu tɛma, saniyaŋɛ kɛɲa la ko sabu la. 26Wo butɔ, anu tagata ke Yaya ma, anu ka a fɔ a ye: «Karamɔgɔ, i nun min be nun ɲɔgɔn na Yurudɛn kɔkɔma, i be min na seedeɲɔgɔya bɔɔren, awa, wo tigi be mɔgɛnu lasuwɛla je tɔ le ka! Mɔgɛ bɛ be tagala ale le dula.» 27Yaya ka anu jaabi, a ko: «Mɔgɔ te nɔ fenfen bitala, fɔ ka min donta a bolo ka bɔɔ saŋɛ tɔ. 28Wole yɛtɛ mu n seede la, n ka a fɔ le, n ko: Ala la mɔgɔ masubɛreŋɛ ma nde la de! N be kiiren de n ni sɔ ale ye ɲatɔ. 29Jonba ma bɛn donna jonba tige le bolo ba? Jonba tige kafuɲɔgɛ kan min be sɔren ɲɔ a ni a tolomasɔ jonba tige tɛn kuma la, wo si sɛɛwa le koola a kulɛ la ko la. Awa, nde tugun na kɛ sɛɛwa bata kamali. 30A fɛrɛ bele fɔ Isa la ko ni mayɛlɛ le, nde Yaya tɛŋɛ ni majigi.»
Min be naren bɔɔla saŋɛ tɔ
31Yaya mɛn ko: «Min be naren bɔɔla saŋɛ tɔ, wolo be mɔgɛ bɛ kunma. Nde min be sɔtɔren duge tɔ, n mu duge tɔ nɛŋɛ le la, n be duge tɔ kuma le fɔla. Iyon, ale min be bɔɔren saŋɛ tɔ, ale le be a bɛ kunma. 32A ka min yen anun a ka min mɔɛ, a be wolo seede bɔɔla. Kɔnɔ mɔgɔ yo bele a la seedeɲɔgɔya bitala. 33Min tini a la seedeɲɔgɔya bita, wo bata seedeya ka a fɔla Ala be tɔɲa le fɔla. 34Ala bata min nasanba, wo be Ala la kuma le fɔla, bayi Ala be a Hakkili saniyandeŋɛ barikɛ le lajigiren a ma dan bele min na. 35Baaba Ala la kɛ den kayireŋɛ di a ye, a be koe bɛ taakuren a la. 36Ka mɔgɔ min be dɛnkɛnɛyaren Ala la den kayireŋɛ ma, a si abada kise sɔtɔ le. Ka mɔgɔ min ma Ala la den kayireŋɛ kulɛ bita, wo tigi te nɔ kisila. Ala la dumɛ ɲan si to le a kunma.»
Currently Selected:
Yaya 3: MOG
Highlight
Share
Copy
Want to have your highlights saved across all your devices? Sign up or sign in