Joyn 21
21
Yesò ə fʉ̀ a kə̀ʼ ə̀ ndzɨ̀mtə̀sə bàm wen sòmbo
1Yesò ə be ə fʉ̀ ə kwʉ̀ʼsə a kəʼ ə̀ ndzɨ̀mtə̀sə bàm ə wensə sòmbo a kətsi kə tsèn, a benə mo ə Tàybelìyàs. Kənyʉ̀ na kì nfʉ̀ a ji ghèn lə. 2Ndzɨ̀mtə̀sə bàm ə̀ Yesò sə tsèntə diʼ to kəshi kə mùʼ sòmbo, a diʼ Saymun Bità nə̀ Tòmos yi a və toŋtə la Didimùs, nə̀ Nàtanyèl ə wàyn ə wù ə ntə̀ʼ Kanà, alòʼ ə Galìlì, nə̀ vunə Zebedì, benə ndzɨ̀mtə̀sə bàm wen sə tsensə sə bò, 3Saymun Bità ə gàʼ a vəwenə la, “Ma fʉ̀ dyʉ̀ əku ə shʉsə.”
Vəwenə bwensə la, “vəghəŋ ə̀ fʉ̀ to amuʼ.” Vəwenə gàʼ ali ə dyʉ̀ kwen a kəbàŋ, ali ətʉʼ ə na jèʼ layn ko andiʼ la vəwenə ghaʼa li kəfo. 4Əchʉ̀ əzhʉ ə sə saʼ vi to lə, Yesò ə vi tɨmə a bè fwàyn, ali ndzɨ̀mtə̀sə wensə nko kɨ la à diʼ wen. 5Ghə̀ dzàŋ bèm a vəwenə la, “Ghə̀ŋ ko ghaʼa kəfo a və vəlemə?”
Vəwenə bwensə la, “Yes ə ko ku.”
6Ghə̀ gàʼ la, “Ghə̀ŋ mòʼ fə̀làm fifə ji fa shə kwoŋ ə toghə ghə̀ŋ zizi ghə̀ŋ ku.” Vəwenə mòʼ ə ku shʉsə, to kədə̀ŋ, fə̀làm na fifə ə sə dìʼì ghoʼo vəwenə ə və gùf ə kwensə a kəbàŋ.
7Ndzɨ̀mtə̀ əbam Yesò yì a ghə̀ kòŋ nəkwoŋ li, ə gàʼ a Bità la, “Wìʼ yì diʼ alə, a diʼ Bobo!” Saymun Bità ə sə zhʉ vi alə̀ ə lyɨ̀ təwàf tə wen ə mòʼ, ə tsòʼ a mù. Ghə̀ ndiʼ ali mu ghə̀ ə ntsuʼ li ndisə wen. 8Ndzɨ̀mtə̀sə tsen sisə ə be dyʉ̀ to fa wen abàm, gùfə̀ ə dyʉ̀ nə̀ fə̀làm fè shʉsə fifə. A ndiʼ ali, ko kəgàfkə be diʼ ə dyʉ̀ ə zàʼa a bene ə fwàyn. 9Vəwenə dyʉ̀ fʉ̀ a bene a fwàyn ə yen əzhiʼ ando ghə̀ fwi, shʉsə diʼ ayi kəchʉ̀ nə̀ kəbayn kə. 10Yesò ə gàʼ a vəwenə la, “Ghə̀ŋ vi nə̀ shʉ̀ sə tsensə, fa a ntìntìn sisə a ghə̀ŋ ku to luwen li.”
11Saymun Bità ə bwenə kwen a kəbàŋ ə gùfə̀ vì nə̀ fə̀làm fè shʉsə fifə a bè fwàyn. Shʉsə tsèntə diʼ tsu ghɨ nə̀ shʉsə njʉ̀sə̀ tàʼ a məwumə ə tayn, ghoʼkə no lə. Sə ə ghoʼo ali, fə̀làm fè ə faŋ kò fə lə tinkə. 12Yesò ə mu gàʼ a vəwenə la, “Ghə̀ŋ vi ə ghaʼ fozhɨvə nə̀nchwì.” Ghə̀ gàʼa ali, no dzɨ̀mtə̀ əbam ə wen ə mùʼ ko ə mwomsə bèm la, “A diʼ wù ndò?” Byìʼì ando vəwenə ə kɨ la à diʼ Bobo. 13Yesò ə dyʉ̀ lyɨ̀ kəbayn kì ə ku a vəwenə ə be nè to ali nə̀ shʉ̀ sisə.
14Yesò nà diʼi wen ə wen a ndzɨ̀mtə̀sə bàm ə wensə akəshi na ghèn, a sə diʼ aghayn a tàʼ fa kətsi a ghə̀ bwensə lù fa pfʉ.
Yesò ə bèm la Saymun kòŋ wen lo
15A ndiʼ to ando vəwenə zhɨ̀ mwetə, Yesò ə toŋtə Saymun Bità ə bèm a wen la, “Saymun, wàyn ə Joyn, wù shɨtə kòŋ mò nəmwèʼè chò viʼi vətsenvə venə a?”
Ghə̀ byɨmə ə gàʼ la, “Bobo, wù kɨli la ma kòŋ wù.”
Yesò ə gàʼ a wen la, “Wù a zhisə vunə njɨ̀ ə mò.” 16Yesò ə be bèm kwʉ̀ʼsə a wen la, “Saymun, wàyn ə Joyn, wù shɨtə kòŋ mò nəmwèʼè?”
Ghə̀ byɨmə ə gàʼ la, “Bobo, wù kɨli la ma kòŋ wù.”
Yesò ə gàʼ a wen la, “Wù a tuʼmə nə̀ byisə vənjɨ̀ shomsə.” 17Yesò ə be toŋtə wen, à aghayn a tàʼ, ə gàʼ la, “Saymun, Wàyn Joyn, wù kòŋ mò?”
Kənyʉ̀ a kì kə sə ku ngəʼ a Bità ando Yesò be kùmtə bèm li, à sə diʼ aghayn a tàʼ la, “Wù kòŋ mò?” Ghə̀ mu gàʼ a Yesò la, “Wù kɨli no tèbe ghò a Bobo. Wù kɨli la ma kòŋ wù.”
Yesò ə gàʼ a wen la, “Wù a zhisə byisə vənjɨ̀ shomsə. 18Ma gàʼà a wù to no nəmwèʼè la, a ndiʼ to ando wù bo diʼ wàyndyə, wù lafə, dyʉ̀ no tèbe fè ando wù kòŋ. Alì, wù na dwin, wu naʼsə̀ akwoŋ à wu, wìʼ ə labsə wù ə lyɨ̀ dyʉ̀ nə̀ wù akəshi, ko andiʼ la wu kòŋ.” 19Yesò ə gàʼa alə̀, diʼi ji yì a Bità lu pfʉ fa tsù, ghə̀ vi nə̀ əkuʼsə a Nyìngòŋ. Yesò ə gàʼa ali, ə be mu gàʼ la, “dzɨ̀mtə̀ mò.”
20Bità ə bwensə sə ki ə yenə dzɨ̀mtə̀ yì a Yesò ə kòŋ nəkwoŋ li, ghə̀ vi fa vəwenə abàm, a diʼ yi a ghə̀ nyeʼtə dyʉ̀ wèn nə̀ Yesò akəshi kə zhɨkə ə bèm a wen la, “Bobo, a baʼlə ndò wù a?” 21Bità ə yen ali ə bèm a Yesò la, “Kə na ndiʼ ale a ghèn a Bobo?”
22Yesò ə bwensə gàʼ la, “Mà lə ndiʼ ə moʼtə la ghə̀ nə̀ tsi to tsì zaʼa fa kətsi mà lù bwenə vi, ngəʼ ə wù sə diʼ ghò tsu a? Wù diʼ ə dzɨ̀mtə̀ mo.”
23A le kənyʉ̀ ki a kə nè, ndzɨ̀mtə̀sə bàm Yesò sə sə gàʼa dyʉ̀ to la, na ghèn ko lu pfʉ̀. Alì, Yesò ə ko ngàʼa la ghə̀ ko a pfʉ̀. Ghə̀ ngàʼa la, “Ma le diʼ ə moʼtə la ghə̀ tsi to tsì zaʼa fa kətsi mà lù bwenə vi, ngəʼ ə wù ə sədiʼ ghò tsu a?”
24Ndzɨ̀mtə̀ əbam ə Yesò na ghèn diʼ yi a ghə̀ shə̀ʼtə̀ nyʉ̀ na venə, a diʼ to wen yi a ghə̀ nyoʼ nyʉ̀ a vyi. Yès ə kɨ la kənyʉ̀ a ghə̀ gàʼà diʼ to nəmwèʼè.
Ə mwetə
25Ənyʉ̀ ə bo diʼ, to kədə̀ŋ a Yesò ə nè, mu və ndiʼ ə nyòʼ to ə tsèm, mà kwoʼtə la no mbyi ghèn no tsèm ko ghoʼo kwʉ̀ʼ ə və ghʉ̀ vəŋwàʼlə̀ a vyi tsu.
Currently Selected:
Joyn 21: bbkDBLnt
Highlight
Share
Copy
Want to have your highlights saved across all your devices? Sign up or sign in