Mariko 11
11
Yesu wakunjira na mazaza mu Yerusalemu
(Mat 21.1-11; Luk 19.28-40; Yoh 12.12-19)
1 Yesu na ŵasambiri ŵakhe ŵakati ŵaneng'enera ku Yerusalemu, pafupi na mizi ya Betifage na Betaniya, ŵakafika ku Phiri la maOlive. Yesu wakatuma ŵaŵiri mwa ŵasambiri ŵakhe, 2na mazgu ghakuti, “Rutani ku chikaya icho mwadunjikana nacho, ndipo para mwamkunjira waka mwamkusanga mwana wa mbunda wakakika uyo munthu walije kukwerapo na kale. Mukamusutule na kwiza nayo kuno. 3Usange munthu wamkumufumbani kuti, ‘Chifukwa uli mukusutula mwana wa mbunda?’ Mukamuphalire kuti, ‘Fumu yikumukhumba ndipo yamkumuwezgera kuno sonosono.’ ”
4Ntheura ŵasambiri ŵakaruta ndipo ŵakaya kamusanga mwana wa mbunda wakakika pa muryango pafupi na msewu, ndipo ŵakamusutula. 5Ŵanthu ŵanyakhe awo ŵakimilira penepara ŵakaŵafumba ŵakati, “Mukuchitachi imwe pakusutula mwana wa mbunda?”
6Ŵakaŵazgora nga ndi umo Yesu wakaŵaphalirira. Ntheura ŵakaŵareka kuti ŵamusutule mwana wa mbunda. 7Para ŵasambiri ŵara ŵakati ŵiza na mwana wa mbunda kwa Yesu, ŵakaŵikapo vyakuvwara vyawo pa muwongo wakhe ndipo Yesu wakakwerapo. 8Ŵanthu ŵanandi ŵakatandika vyakuvwara vyawo mu msewu, apo ŵanji ŵakatandika vivwati ivyo ŵakaphajula mu makuni gha mu minda. 9Ŵanthu awo ŵakadangira na awo ŵakizanga kumanyuma ŵakachemerezganga ŵakati,
“Hosana!
Ngwakutumbikika uyo wakwiza
mu zina la Fumu!#Mas 118.25-26
10Ngwakutumbikika ufumu wa Dada withu Davide
uwo ukwiza,
Hosana, uchindami kwa Chiuta kuchanya nkhanira.”
11Yesu wakati wafika mu Yerusalemu, wakaya kanjira mu Nyumba ya Chiuta, na kulaŵiskalaŵiska pa vyose. Kweni pakuti kukaŵa mise kale, wakaruta ku Betaniya pamoza na ŵasambiri ŵakhe 12.
Kutembeka kwa chikuyu
(Mat 21.18-19)
12Na machero ghakhe apo ŵakafumanga mu Betaniya, Yesu wakaŵa na njara. 13Wakawona chikuyu pataliko icho chikaŵa na mahamba, wakaruta kuya kawona usange wangasangamo vipambi. Wakati wafika penepapo, kuti wakasangamo kanthu chara, kweni mahamba pera pakuti yikaŵa nyengo yakhe ya vipambi chara. 14Yesu wakati ku chikuyu, “Kuŵavye munthu na yumoza wakuti wize karyemo vipambi mwa iwe.”
Ndipo ŵasambiri ŵakhe ŵakaghapulika mazgu agha.
Kutozgeka kwa Nyumba ya Chiuta
(Mat 21.12-17; Luk 19.45-48; Yoh 2.13-22)
15Ŵakati ŵafika mu Yerusalemu, Yesu wakanjira mu Nyumba ya Chiuta ndipo wakamba kufumiska awo ŵakaguliskanga vinthu vyawo na awo ŵakagulanga. Wakagadabula matebulu gha awo ŵakasinthanga ndarama na vitengo vya awo ŵakaguliskanga nkhunda. 16Ndipo kuti wakazomerezga munthu chara kuti waporote mu Nyumba ya Chiuta uku wayegha katundu. 17Ndipo wakaŵasambizga wakati, “Asi chili kulembeka kuti, ‘Nyumba yane yiti yichemekenge nyumba yakuromberamo mafuko ghose?’ Kweni imwe mwayizgora mphanji ya ŵankhungu!”#Yes 56.7; Yer 7.11
18 Ŵasofi ŵarara na ŵamanyi-marango ŵakati ŵapulika ichi, ŵakamba kupenja nthowa iyo ŵangamukomera. Kweni ŵakamopanga Yesu pakuti ŵanthu wose ŵa mu mzinda ŵakazizwanga na kusambizga kwakhe.
19Kukati kwaŵa mise, Yesu na ŵasambiri ŵakhe ŵakafumamo mu msumba.
Chisambizgo chakufuma mu chikuyu chakomira
(Mat 21.20-22)
20Na mulenjelenje machero ghakhe, apo ŵakendanga mu msewu ŵakawona kuti chikuyu chira chomira na misisi yakhe wuwo. 21Petrosi wakakumbuka ndipo wakati kwa Yesu, “Musambizgi, wonani! Chikuyu icho mukachitemba chomira.”
22Yesu wakazgora wakati, “Muŵenge na chipulikano mwa Chiuta. 23Nkhumuphalirani unenesko wose kuti, usange munthu wakuyowoya ku phiri ili kuti, ‘Nyamuka, ukajiponye mu nyanja’ ndipo kuti wakukayika chara mu mtima wakhe, kweni wakupulikana kuti icho wakuyowoya chichitikenge, chimuchitikirenge nadi.#Mat 17.20; 1 Kor 13.2 24Ntheura nkhumuphalirani kuti, chose icho mukupempha mu kuromba, pulikanani kuti mwachipokera, ndipo chiŵenge chinu nadi. 25Para mukwimilira na kuromba, muŵenge ŵakugowokera usange muli na kafukwa na munthu. Ndipo Ŵawiskemwe ŵa kuchanya nawo ŵati ŵamugowokerani kwananga kwinu.”#Mat 6.14-15 [26Kweni usange mukukana kuŵagowokera ŵanthu, ipo namwe ŵawiskemwe ŵa kuchanya kuti ŵati ŵamugowokeraninge masovyo ghinu chara.]
Yesu wakufumbika na mazaza ghakhe
(Mat 21.23-27; Luk 20.1-8)
27 Yesu na ŵasambiri ŵakhe ŵakizaso ku Yerusalemu. Apo Yesu wakendanga mu Nyumba ya Chiuta, ŵasofi ŵarara, ŵamanyi-marango, na ŵarara ŵakiza kwa iyo. 28Ŵakamufumba ŵakati, “Kasi ndi mazaza uli agho ukuchitira vinthu ivi? Ndipo ndi njani uyo wakakupa mazaza ghakuchitira vinthu ivi?”
29Yesu wakati, “Nane nditi ndimufumbaninge fumbo limoza, para mwandizgora, nditi ndimuphalirani mazaza agho nkhuchitira vinthu ivi. 30Kasi mazaza agho Yohane wakabapatiziranga ghakafuma kwa njani? Kwa Chiuta panji ku ŵanthu? Mundizgore!”
31Kweni iwo ŵakamba kususkana ŵekha ŵakati, “Usange tingamuzgora kuti, ‘Ghakafuma kwa Chiuta’ watifumbenge kuti, ‘Chifukwa uli mukareka kupulikana?’ 32Kweni tingayowoya chara kuti, ‘Ghakafuma ku ŵanthu.’ ” (Ŵakayowoya ntheura chifukwa ŵakopanga ŵanthu pakuti ŵanthu wose ŵakamupima kuti Yohane wakaŵa nchimi nadi.) 33Ntheura ŵakamuzgora Yesu ŵakati, “Tikumanya chara.”
Yesu wakaŵazgora wakati, “Nane kuti nditi ndimuphalirani chara uko ghakafuma mazaza agho nkhuchitira vinthu ivi.”
Currently Selected:
Mariko 11: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi