Mariko 10
10
Yesu wakusambizga vya chipati
(Mat 19.1-12; Luk 16.18)
1Sono Yesu wakafumako ku malo ghara ndipo wakaruta ku chigaŵa cha Yudeya na ku sirya linyakhe la mronga wa Yorodani. Mzinda wa ŵanthu ŵanandi ukawunganira kwa iyo, ndipo nga nkhaluso kakhe, wakamba kuŵasambizga.
2 ŴaFarisi ŵanji ŵakiza kwa iyo ndipo pakumuyezga ŵakamufumba ŵakati, “Kasi kukulangurika kuti munthu wapate muwoli wakhe?”
3Penepapo Yesu wakaŵazgora wakati, “Kasi icho Mozesi wakamulangulani nchivichi?”
4Ŵakazgora ŵakati, “Mozesi wakazomerezga kuti munthu wangapata muwoli wakhe pakumulembera karata wa chipati, ndipo wamupatenge.”#Mar 24.1-4; Mat 5.31
5Kweni Yesu wakati kwa iwo, “Mozesi wakamulemberani dango ili chifukwa cha unonono wa mitima yinu. 6Kweni kufuma ku mutendeko wakulenga, ‘Chiuta wakaŵalenga mwanarume na mwanakazi.#Mut 1.27, 5.2 7Ndicho chifukwa mwanarume wati wasidenge ŵawiske na ŵanyina na kubatikana na muwoli wakhe.#Mut 2.24 8Ndipo ŵaŵiri aŵa ŵakuzgoka kuŵa thupi limoza.’ Sono kuti mbaŵiriso chara, kweni thupi limoza. 9Ntheura icho Chiuta wagumanya pamoza, paŵavye munthu wakuchipatula.”
10Wakati wanjiraso mu nyumba, ŵasambiri ŵakafumba Yesu na makani agha. 11Iyo wakaŵazgora wakati, “Yose uyo wakupata muwoli wakhe na kutora munyakhe, wakumuleŵera muwoli wakhe.#Mat 5.32; 1 Kor 7.10-11 12Ndipo mwanakazi nayo usange wakupata mufumu wakhe na kutengwa ku munyakhe wakuleŵa.”
Yesu wakutumbika twana tuchoko
(Mat 19.13-15; Luk 18.15-17)
13Ŵanthu ŵanji ŵakizanga na twana kwa Yesu kuti watukhwaske, kweni ŵasambiri ŵakhe ŵakaŵachenya. 14Para Yesu wakawona ichi wakakaripa ndipo wakaŵaphalira ŵasambiri ŵakhe wakati, “Rekani twana twizenge kwa ine, mungatukanizganga, chifukwa Ufumu wa Chiuta ngwa twa ntheura. 15Nadi nkhumuphalirani kuti, yose uyo wakureka kupokerera Ufumu wa Chiuta nga ndi mwana, kuti wamkunjiramo chara.”#Mat 18.3 16Yesu wakatupakata twana na kuŵika mawoko ghakhe pa ito ndipo wakatutumbika.
Munthu musambazi
(Mat 19.16-30; Luk 18.18-30)
17Apo Yesu wakawukanga kuruta pa ulendo wakhe, munthu yunji wakamuchimbilira na kujikama panthazi pakhe ndipo wakamufumba wakati, “Musambizgi muweme, kasi ndichitechi kuti ndihare umoyo wa muyirayira?”
18Yesu wakamuzgora wakati, “Ukundichemerachi kuti ndili muweme? Palije muweme kweni Chiuta pera. 19Kasi ukughamanya marango agho ghakuti, ‘Ungakomanga, Ungaleŵanga, Ungibanga, Ungaperekanga ukaboni wa utesi, Ungazgereranga, Chindika ŵawuso na ŵanyoko.’ ”#Kuf 20.12-16; Mar 5.16-20
20Munthu yura wakati, “Musambizgi, vyose ivi ndili kuvisunga kufuma ku wanichi wane.”
21Yesu wakamulaŵisiska na kumutemwa. Wakamuphalira wakati, “Ukusoŵerwa chinthu chimoza. Rutanga, ukaguliske vyose ivyo uli navyo ndipo ndarama zakhe ukaŵape ŵakavu, ndipo wamkuŵa na usambazi kuchanya. Ntheura wize kandirondezge.” 22Pa mazgu agha chisko cha munthu yura chikabwanthuka. Ndipo wakaruta wali na chitima chifukwa wakaŵa na musambazi chomene.
23Yesu wakalaŵiska ŵanthu awo ŵakamuzingirizga ndipo wakati ku ŵasambiri ŵakhe, “Nawo mbunonono kunjira mu Ufumu wa Chiuta ŵanthu awo ŵali na usambazi!”
24Ŵasambiri ŵakhe ŵakazizwa chomene na mazgu agha. Kweni Yesu wakawerezgaso wakati, “Mwa ŵana, nawo mbunonono kunjira mu Ufumu wa Chiuta! 25Nchipusu kuti ngamila yisorote mu jiso la sindano kuruska kuti musambazi wakanjire mu Ufumu wa Chiuta.”
26Penepapo ŵasambiri ŵakazizwa chomene, ŵakamba kufumbana kuti, “Kasi ndi njani uyo wangaponoskeka?”
27Yesu wakaŵalaŵiska wakati, “Kwa munthu, nchambula machitiko, kweni nchamachitiko na Chiuta. Chifukwa vinthu vyose nvyamachitiko na Chiuta.”
28 Petrosi wakati, “Wonani ise tili kusida vyose na kumurondezgani.”
29Yesu wakati, “Na unenesko wose nkhumuphalirani kuti, yose uyo wali kusida nyumba, ŵabali, ŵadumbu, ŵanyina, ŵawiske, ŵana, panji minda chifukwa cha ine na Uthenga Uweme, 30wati wapokerenge vya mphapikira 100 mu muwiro uno nga ndi zinyumba, ŵabali, ŵadumbu, ŵanyina, ŵana, minda pamoza na kuzikizgika ndiposo, mu nyengo iyo yikwiza, wamkupokera umoyo wa muyirayira. 31Kweni ŵanandi awo mbakudanga ŵamkuŵa ŵakumalira, ndipo awo mbakumalira ŵamkuŵa ŵakudanga.”#Mat 20.16; Luk 13.30
Yesu wakuphara kachitatu za nyifwa na kuwuka kwakhe
(Mat 20.17-19; Luk 18.31-34)
32 Yesu na ŵasambiri ŵakhe wakaŵa pa ulendo wakuya ku Yerusalemu. Ndipo Yesu wakaŵadangirira. Ntheura ŵasambiri ŵakhe ŵakazizwa ndipo awo ŵakamurondezganga ŵakaŵa na wofi. Yesu wakaŵatoreraso pa mphepete ŵasambiri 12 na kuŵaphalira na ivyo vyamkuchitika na kumuwira. 33Yesu wakati, “Tegherezgani, tikukwerera ku Yerusalemu, kwenekuko Mwana wa Munthu wamkuperekeka ku ŵasofi ŵarara na ŵamanyi-marango. Iwo ŵamkumususka kuti wakomeke na kumupereka ku ŵamitundu. 34Aŵa ndiwo ŵamkumugoska, ŵamkumufunyira mata, kumuthyapula na kumukoma. Kweni para ghajumphapo mazuŵa ghatatu wamkuwuka ku ŵakufwa.”
Pempho la Yakhobe na Yohane
(Mat 20.20-28)
35Penepapo Yakhobe na Yohane, ŵana ŵa Zebediya, ŵakiza kwa Yesu ndipo ŵakati, “Musambizgi, pali kanthu ako tikukhumba kuti imwe mutichitire.”
36Yesu wakaŵafumba wakati, “Kasi mukukhumba kuti ndimuchitirani vichi?”
37Ŵakazgora ŵakati, “Tikukhumba kuti para mwamkukhara mu uchindami winu, mwizakatiŵike ise yumoza ku woko linu la maryero munyakhe ku woko linu la mazere.”
38Kweni Yesu wakati, “Mukumanya chara icho mukuromba. Kasi imwe mungamweramo mu nkhombo ya visuzgo iyo ndizamkumweramo ine, panji kupokera ubapatizo weneuwo ndizamkupokera ine?”#Luk 12.50
39Iwo ŵakamuzgora kuti, “Inya, tingachita.”
Yesu wakati kwa iwo, “Mwizamkumweramo nadi mu nkhombo iyo ndizamkumweramo ine, ndipo mwizamkupokerera nadi ubapatizo uwo ndizamkupokerera ine. 40Kweni kukhara ku woko lane la maryero panji la mazere kuti nkhwa ine kupereka chara. Malo agha nga awo Ŵadada ŵali kuŵanozgera.”
41Para ŵasambiri ŵanyawo khumi ŵakapulika ichi, ŵakaphyira mtima Yakhobe na Yohane. 42Ntheura Yesu wakaŵachemera kwa iyo wose pamoza na kuyowoya nawo kuti, “Mukumanya kuti awo ŵakupimika kuti mbakuwusa mukati mu ŵamitundu, ŵakaŵawusira ŵanthu ŵawo mu mazaza, ndiposo ŵarongozgi ŵawo nawo ŵali na mazaza pakuwusa ŵanthu ŵawo.#Luk 22.25-26 43Kweni kuti kuli ntheura chara kwa imwe. Usange yumoza wa imwe wakukhumba kuŵa mukuru, wakwenera kuŵa muteŵeti winu.#Mat 23.11; Mrk 9.35; Luk 22.26 44Ndipo yose uyo wakukhumba kuŵa murongozgi mukati mwinu, wakwenera kuŵa muzga wa wose. 45Pakuti nanga ndi Mwana wa Munthu nayo kuti wakizira kuteŵetereka chara kweni kuteŵetera na kupereka umoyo wakhe kuti uwombole ŵanthu ŵanandi.”
Yesu wakuchizga Baratimeyu wa chiburumutira
(Mat 20.29-34; Luk 18.35-43)
46 Yesu na ŵasambiri ŵakhe pamoza na mzinda ukuru wa ŵanthu ŵakafika ku Yeriko. Apo ŵakafumanga mu msumba wa Yeriko, ŵakasanga munthu wa chiburumutira zina lakhe Baratimeyu, mwana wa Timeyo uyo wakakhara mu mphepete mwa msewu ndipo wakapemphanga. 47Wakati wapulika kuti ndi Yesu wa ku Nazarete, wakamba kuchemerezga wakati, “Imwe Yesu, Mwana wa Davide, mundilengere lusungu!”
48Ŵanthu ŵanandi ŵakamuchenya pakumuphalira kuti wakhare chete. Kweni iyo wakachemerezga kwakuruska wakati, “Imwe Mwana wa Davide, mundilengere lusungu!”
49Yesu wakimilira ndipo wakati, “Muchemani.”
Ntheura ŵakamuchema munthu wa chiburumutira yura, ŵakati, “Khwima mtima! Wuka, wakukuchema.”
50Wakataya pasi laya lakhe, wakadukira muchanya ndipo wakiza kwa Yesu.
51Yesu wakamufumba wakati, “Kasi ukukhumba kuti ndikuchitirechi?”
Wachiburumutira wakazgora wakati, “Musambizgi, nkhukhumba kuti ndilaŵiskeso.”
52Yesu wakamuphalira wakati, “Rutanga, chipulikano chako chakuchizga.”
Penepapo wakamba kulaŵiska ndipo wakamurondezga Yesu pa ulendo wenewura.
Currently Selected:
Mariko 10: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi