Luka 21
21
A̱byii̱k Kunak Neap A̱gba̱ndang Za̱nang
(Mat 12:41-44)
1Nang Yesu ni̱ shya̱ mi̱ didyaat A̱li Nwuat Za̱nang A̱gwaza hu, a̱ si̱ swan a̱ nwuan si̱sak ji nang á̱niet nzwá ba nkhwot kurum za̱nang hu ma̱ a̱la̱n saai kurum ka a̱ni. 2A̱jawa a̱byii̱k kunak a̱ghyang nang a̱tyok nggu wu ka̱n khwu a̱ni, si̱ bai a̱ si̱ koot kurum za̱nang ku yet a̱nini a̱feang nang Yesu nwuan.
3A̱jawa Yesu si̱ nyia̱, “N tak ma̱ng a̱nyin a̱tsak a̱lyiat; nyi li a̱byii̱k kunak wuni nang a̱tyok nggu wu ka̱n khwu a̱ni a? A̱ neap za̱nang kurum a̱ swak á̱kum á̱niet ka. Mat a̱ neap a̱mgba̱m kurum nang gu byia̱ mi̱ swat nggu hu a̱ni. 4Mat á̱kum á̱niet ka bwuo kurum ma̱ chunchwiit mami a̱dodo nzwá nang ba̱ byia̱ a̱ni, ba̱ si̱ nneap za̱nang ji. A̱wot a̱byii̱k kunak wuni, a̱mgba̱m ma̱ng kunak nggu hu; a̱ si̱ kyiak a̱mgba̱m kurum nggu hu nang gu byia̱ a̱ni, a̱ si̱ nneap za̱nang ji mi̱ fwuo nyiung.”
Yesu Tak Á̱zanson tazwa Nkyang na̱ na Bai da̱ Ngaan Jen a̱ni
(Mat 24:1-2; Ma̱r 13:1-2)
5Á̱ghyang á̱niet mi̱ mman ta̱m Yesu na si̱ nwuo lyiat tazwa A̱li Nwuat Za̱nang A̱gwaza ka di̱ si̱sak nang á̱ nnok ka ma̱ng a̱cha̱chet nfang na̱ yet a̱sham a̱ni; ma̱ng ntangka̱i a̱sham nkyang nang á̱ mbeet, á̱ si̱ ngwai mbat A̱li Nwuat Za̱nang A̱gwaza ka a̱ni. A̱wot Yesu si̱ nyia̱ ma̱ng a̱mba,
6“A̱mgba̱m a̱sham nkyang nani nang nyi chyin a̱ni; jen ji chobai a̱ni, á̱ na bi̱ri̱m naa a̱mgba̱m! Á̱ mbyia̱ a̱fang a̱nyiung nang á̱ na ghwon tazwa á̱ghyang a̱ni bah!” 7Mman ta̱m na si̱ lyip Yesu nyia̱, “A̱tyu tyiet, zang jen ja nang nkyang nani na mbai da̱ a̱nu ka? A̱wot yihwa na yet a̱lama a̱ na tak zi̱t nang nkyang nani shim bai a̱ni?”
8Yesu si̱ nwuak ba shim nyia̱, “Nyi ta̱bam kalak a̱yin a̱ du laai nyin. Mat á̱niet ma̱ a̱di̱di̱t na bai ba̱ hyia̱ nyia̱ ba̱ byia̱ tyok da̱ a̱lyoot tyok nung; ba̱ bu nyia̱ bibya yet Kristi wu; a̱wot ba̱ bu hyia̱ nang jen ji nnyia̱ nang swanta hu na ntyak a̱ni! A̱wot nyi yok nwuak a̱chuchuk da̱ mba bah. 9A̱wot ka̱ nyi fwuong nkhang zwang ma̱ng jhya̱, nyi yok fa̱k a̱sok a̱fa bah. A̱tsak a̱lyiat, ku yet ta hwa nkyang nani na̱ bai da̱ a̱nu ka, a̱wot ngaan jen wu na kin bai di̱ yong a̱hwa bah.”
10Yesu si̱ bu nyia̱ ma̱ng a̱mba, “Nwap na kwan zwang ma̱ng nwap, a̱wot tyok ku kwan zwang ma̱ng tyok. 11Á̱ na nyia̱ a̱cha̱chet tyi̱ri̱m a̱byin da̱ a̱ka̱vwuo ma̱ a̱di̱di̱t, ma̱ng a̱cha̱chet nzong, ma̱ng mbyep mi̱ bibyin ma̱ a̱di̱di̱t. A̱wot mi̱ kyai tswazwa hu, á̱ na mbyia̱ a̱yaalama ma̱ng nkyang a̱wun ma̱ a̱di̱di̱t na̱ na bai a̱ni.
12“A̱wot neet nang nkyang nani ka̱n bai bah, á̱niet lak li nyin ba̱ na kyiak jen nang ba̱ ya̱shuk nyin ba̱t. Ba̱ na kwak nyin á̱ nat ndyo ma̱ á̱tutu a̱tung A̱yahudawa ba. Ba̱ bu tyei nyin mi̱ jaru ma̱ a̱di̱di̱t. Ba̱ bu na nat ma̱ng a̱nyin ma̱ á̱tutu shi̱ri̱ya ba̱ nyia̱ nyin shi̱ri̱ya a̱zaghyi á̱gwam ma̱ng a̱yaagwomna, mat nyi yet á̱niet khwi nung bya.
13“A̱wot jen jini na nwuak nyin a̱wat nang nyi na ntak ma̱ng á̱gwam ba ma̱ng á̱niet nwai khwi A̱gwaza ba A̱sham Nkhang ka tazwa nung.#21:13 Ku: “Jen jini na yet a̱wat nang nyi na shei ma̱ng a̱mba nang ba̱ mbwuk a̱ni.” 14Mat a̱nia, nyi yok nyia̱ a̱fi̱fa á̱zanson tazwa si̱sak nang nyi na nnwuak shim di̱n jen nang á̱ na mbat nyin a̱hyiak a̱ni bah. 15Mat nung gwa ma̱ a̱pyia̱ nung na nwuak nyin swáng á̱lyiat ji cha̱chaat ma̱ng tangka̱i mumwang nang á̱niet lak li nyin ba si̱ mi̱n fwuo, a̱wot ba̱ swuo chet hu a̱ni bah.
16“Ku á̱niet ba nang nyi kwon byin gi̱ngi̱ng ma̱ng a̱mba a̱ni, bibya yet á̱niet mbyin, á̱na̱nyiuk, kwai, ma̱ng á̱kpa̱ndang nyin ba; ba̱ na vwuoi a̱ka̱shuk ba̱ bwuk ma̱ng a̱nyin. A̱wot ba̱ na hyaai á̱ghyang á̱niet ma̱ nyin. 17Á̱ghyang á̱niet ma̱ a̱di̱di̱t na lak li nyin, mat nyi yet á̱niet khwi nung bya. 18A̱wot ku a̱chat pyia̱ nyin a̱nyiung, na bwuk bah! 19Nyi gbang a̱lyia̱, nyi bu yong mi̱ chet. A̱nia wa nyi na nshya̱ swuan sang sangba̱p ji.
Yesu tak Á̱zanson tazwa Bi̱ri̱m Urusha̱lima
20“A̱wot jen nang nyi ndi susot á̱niet nzwang ntyong Urusha̱lima hu á̱ keang a̱ni, si̱ nyi lyen nang jen bi̱ri̱m Urusha̱lima ji nyia̱. 21Di̱n jen a̱ja ku yet ta hwa á̱niet ba̱ shya̱ mi̱ fam a̱byin Yahudiya a̱ni, ba̱ tyong á̱ nat mi̱ tsutsok ba̱ ka shot. Ma a̱nia wa, á̱niet Urusha̱lima ba, ba̱ tyong á̱ ghwut. A̱wot á̱si̱ ba ba̱ shya̱ nta a̱ni; ba̱ yok bwuok á̱ bai ma̱ a̱keang Urusha̱lima ka bah.
22“Mat jen a̱jaja nang A̱gwaza na ntyia̱ á̱niet Urusha̱lima ba swuo a̱bung. A̱wot a̱mgba̱m kyang nang a̱yaata̱m a̱kwonu A̱gwaza ba ku tak á̱zanson gbangbang a̱ni, ku na mbai da̱ a̱nu ka.
23“Mi̱ mam a̱nia, ku na swan á̱nyiuk a̱ka̱fa, ma̱ng á̱nyiuk ba̱ nyia̱ na̱mbwon mman na̱ nwaai di̱ jen a̱ja a̱ni. Mat a̱mgba̱m á̱niet ba̱ shya̱ ma̱ a̱byin ka a̱ni, A̱gwaza na mwai lyen ma̱ng a̱mba. 24Á̱niet nzwang na hyaai á̱ghyang ma̱ mba ma̱ng tswát. A̱wot á̱ ya̱baat á̱ghyang ma̱ mba á̱ nat ma̱ng a̱mba ba̱ nyia̱ khwo mi̱ bibyin ghyáng. A̱wot á̱niet nzwang ba, na teak a̱ kai a̱keang ka, ba̱ ya̱shuk á̱niet Urusha̱lima ba, si̱ nang jen nang nnwap na̱ chyi A̱gwaza na#21:24 Wa̱i a̱lyiat: Nnwap na̱ chyi A̱gwaza na. A̱romawa bibya yet Nnwap na̱ nwai yet A̱yahudawa ba̱ ku bi̱ri̱m a̱keang Urusha̱lima ka a̱ni. nnyia̱ tyok á̱ tyak a̱ni.
Yesu Tak Á̱zanson tazwa A̱lama Bwuok Bai gu
25“A̱wot á̱ na li a̱lama a̱wun da̱ a̱nu mam, zwat, ma̱ng á̱ta̱ngwat na. Á̱niet mi̱ bibyin ma̱ a̱di̱di̱t mi̱ swanta hu na fa̱k a̱sok a̱fa, mat si̱sak nang kyai a̱sa̱khwot ma̱ng a̱gbi̱gba̱k ywan a̱sa̱khwot na ntyong mi̱ chet a̱ni. 26Á̱niet swanta ba na fa̱k a̱wun ba̱t! A̱wot ba̱ chak a̱kwi, mat nkyang a̱wun nang ba̱ na li na̱ chobai tazwa swanta hu a̱ni. Mat A̱gwaza na tyia̱ mam, zwat, ma̱ng á̱ta̱ngwat, ba̱ zwun, ba̱ ghwon á̱vwuo nswat mba na! 27A̱wot a̱jawa konyan na ndi Nggwon A̱tyubishyi ka̱ chorop a̱ chobai a̱byin mi̱ ni̱nian ma̱ng a̱gba̱ndang tyok, mbeang a̱kyenkyai shi!#21:27 Dan 7:13.
28“Mat a̱nia, jen nang nkyang nani nwuo chobai a̱ni, nyi doot yong nyi nwuan kyai tswazwa hu. Mat, jen nang á̱ na nsan nyin a̱ni, bai kpa̱mkpaan!”
Kidee tazwa A̱kwon A̱bwabwap
29Yesu si̱ bu lyiat ma̱ng a̱mba di̱ kidee nyia̱, “Nyi jhyung si̱sak ji nang a̱kwon a̱bwabwap, ku á̱kum a̱ka̱kwon ka ni̱ nfuut a̱ni. 30Ka̱ nyi li mbwak a̱kwon na nang a̱kyikyo ba ya̱kut, a̱wot ba̱ si̱ nwuo fuut; nyi fi̱k nang a̱vwuo shyim ka mbai, a̱wot a̱kwa̱i ka si̱ bwat kpa̱mkpaan. 31Ma a̱nia wa, jen nyi ndi a̱mgba̱m nkyang nani nwuo chobai a̱ni, nyi na fi̱k nang Tyok A̱gwaza hu mbai kpa̱mkpaan. 32N tak nyin a̱tsak a̱lyiat; che huni#21:32 Wa̱i a̱lyiat: Che huni. Ka̱ doot ku fa kee, 1. “Che” ku shya̱ a̱chet di̱n jen Yesu ji a̱ni. 2. Ku “che” ku shya̱ a̱chet di̱n jen nang nkyang a̱ga̱de na mbai da̱ a̱nu ka a̱ni. 3. Ku “che” ku yet tangka̱i á̱ka̱tuk á̱niet ba̱ lak fwuong ba̱ si̱ lak a̱lyiat A̱gwaza na a̱ni. 4. Ku “che” ku fa nwap A̱yahudawa ba̱ na nshya̱ di̱n jen nang Yesu bu na mbwuok a̱ bai a̱ni, a̱mgba̱m ma̱ng si̱sak nang á̱ ku nhyaai A̱yahudawa ma̱ a̱di̱di̱t mi̱ Urusha̱lima a̱ni. na kwi bah, si̱ nang nkyang nani bai da̱ a̱nu ka. 33Kyai tswazwa ma̱ng a̱byin na kuut. A̱wot a̱lyiat nung na si̱ mi̱n mak kwa a̱byin bah.
34“Mat a̱nia, nyi cham á̱pyia̱ nyin! Nyi yok ghwon nfwuo nyin na na̱ tyia̱ kpa̱p, mat hyeng a̱kan, a̱fi̱fa swanta wu, tsot wun, ma̱ng a̱shi̱shi̱k nyia̱ nang a̱ka̱la̱m a̱ni bah. Nyi yok shim mam a̱hwa ku bai nyin gba̱ngba̱ng di̱ mi̱ lyen, 35ma̱nang a̱tsi̱ntsat ni̱ nta̱bat a̱man a̱ni bah. Nkyang na̱ na bai di̱n jen a̱ja a̱ni, na̱ na tyia̱ konyan a̱wun mi̱ kuzang a̱vwuo mi̱ swanta hu.
36“Mat a̱nia, ku myim nyi swan ma̱ng la̱p vam kuzang jen. Nyi bu naai A̱gwaza nchi̱ri̱ng; nyi ka shya̱ chet nang nyi na nshot á̱ka̱tuk nkyang nani a̱ni; a̱wot nyi ka shya̱ chet nang nyi bye ngyong a̱zaghyi Nggwon A̱tyubishyi#21:36 Wa̱i a̱lyiat: Yong a̱zaghyi Nggwon A̱tyubishyi. Ku fa: 1. “Yong a̱zaghyi Yesu (Nggwon A̱tyubishyi) ma̱ng a̱gwai ma̱ng swat nyinyang.” Ku fa, 2. “Yong a̱zaghyi Yesu di̱ mi̱n fa̱k nsum.” Ku fa, 3. “Yong a̱zaghyi Yesu a̱ kyiak ang nang a̱tsotswat a̱yin a̱ni.” a̱ni.”
37Kuzang a̱ta̱mam, Yesu ni̱ nat A̱mali Nwuat Za̱nang A̱gwaza ka, a̱ ka tyiet á̱niet ba a̱ja. A̱wot kuzang jenshyung, a̱ bu ni̱ nat, a̱ si̱ kwai di̱ Tsok Za̱itun. 38Kuzang a̱tsotson, á̱niet ma̱ a̱di̱di̱t ni̱ tung A̱mali Nwuat Za̱nang A̱gwaza ka, ba̱ ka fa̱k tyiet Yesu hu.
Currently Selected:
Luka 21: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.