JOHAN 5
5
Bethesda A Hihdamna
1Huai thil nung in Judate ankuangluina a-om a; Jerusalem ah Jesu ahohtou hi. 2Jerusalem ah belam kongkhak kiang ah dil khat a-om a, huai mun Hebru pau in Bethesda achi ua, inlim nga anei hi. 3Huai ah tui hong tat ngak in damloute, mittawte, khebaite, zawte tampi alum phengphung uhi. 4Bang hun hiam in huai dil ah angel ahohsuk a, tui ava tok zel a; kuapeuh huai tui kitoh khit a va lut masa penpen in, bangchibang natna nei hileh leng hihdam in a-om zel hi. 5Huai ah kum sawmthum-le-giat damlou mi kuahiam a-om hi. 6Jesu'n huai a lum amu a, huchibang in sawtpi ana omta chih athei a, akiang ah, “Hihdam na ut hia?” achi hi.
7Damloupa'n, “Pu, tui kitoh in dil a hon koih ding mi ka nei kei a, ka kuan sung in midang in hon makhelh nak uh,” chi in adawng hi.
8Jesu'n akiang ah, “Thou inla, na awngphah la inla, khe in paita in,” achi hi. 9Thakhat in huai mipa adam pah a, a-awngphah la in, apaita hi. 10Huai ni Sabbath ni ahi a, Judate'n adampa kiang ah, “Sabbath ni ei ve, na awngphah na lak asiang kei,” achi uhi.
11Ama'n akiang uah, “Hon hihdampa ngeingei in ka kiang ah, ‘Na awngphah la inla, khe in paita in,’ hon chi ahi,” chi in adawng hi.
12Amau akiang ah, “Na awngphah la inla, khe in paita in, na kiang a chipa kua ahia?” chi in adong uhi.
13Himahleh adampa'n kua ahia ahih athei kei, huai a mipi a-om ziak un Jesu apaimangta hi.
14Aden chiang in Jesu'n amah tempul ah amu a, akiang ah, “Ngai in, na damta hi, khial nawn ke'n, huchi lou in zaw thil hoih lou sem na tung ah ahong tung kha ding,” achi hi.
15Huan huai mi ava paikhia a, Judate kiang ah, “Ahihdampa Jesu ahi,” chih ahilh hi.
Khrist, Tapa Tungtawn A Hinna
16Huchi in Sabbath ni a athilhih ziak in Judate'n Jesu a-engbawl ua, thah ding in azong uhi. 17Himahleh Jesu'n amau ahoupih a, akiang uah, “Ka Pa'n tu tanpha in nna asem zel a, ke'n leng ka sem zel,” achi hi.
18Huchi in Judate'n hihlup atum semsem ua, Sabbath ni atan louh ziak kia ahi kei, Pathian amah Pa a abawl leh Pathian toh kikim a akibawl ziak in leng ahi. 19Jesu'n akiang uah, “Chihtaktak in, chihtaktak in ka hon hilh ahi, Tapa in amah in bangmah ahihthei kei, Pa thilhih amuh kia lou ngal; thil ahih peuhmah, Tapa in leng ahih sam zel hi. 20Pa in Tapa a-it a, athilhih peuhmah akiang ah amusak a; hiaite sang a thilhih thupizaw akiang ah amusak lai ding, lamdang na sak ding un. 21Pa in misite kaithou a, hinna apiak bang in, Tapa in leng a-utna peuh kiang ah hinna apia hi. 22Pa in kuamah vai ahawmsak ngei kei, himahleh vai tengteng Tapa in ahawmsak zaw hi; 23mi tengteng in Pa zahna apiak bang un, Tapa leng zahna apiakna ding un. Kuapeuh Tapa zahloute'n, Pa asawlpa leng azah kei uhi.
24“Chihtaktak in, chihtaktak in ka hon hilh ahi, kuapeuh ka thu za a, hon sawlpa gingta in, tangtawn hinna anei; siam louh in a-om kei a, sihna a kipan apawt a, hinna ah alut zawta hi. 25Chihtaktak in, chihtaktak in ka hon hilh ahi, ahun atung dekta, tu in leng atung lellel, huai hun chiang in misite'n Pathian Tapa aw aza ding ua, aza peuhmah ahing ding uh. 26Pa in amah a hinna aneih bang in, Tapa in leng amah a hinna nei ding in apeta hi. 27Mihing Tapa ahih ziak in, akiang ah thukhenna leh thuneihna apia hi. 28Hiai lamdang sa kei un, ahun atungta, huai hun chiang in han a om tengteng in a-aw aza ding ua, 29ahong pawt vek ding uh; thil hoih hihte hinna tang in athounawn ding ua, thil gilou hihte siam louh tang in athounawn ding uhi.
Johan Theihpihna
30“Keimah in bangmah ka hihthei kei; bil a ka zak bangbang in vai ka hawm zel; ka vaihawm adik ahi, keimah deihlam a om ka tum kei; hon sawlpa deihlam a om ka tup zel ziak in.
31“Keimah tanchin theihpihtu a pang hi leng, ka thu theihpihna adik kei ding hi. 32Ka tanchin toh kisai theihpihtu midang khat a-om, ama'n ka tanchin atheihpihna apiak pen dik ahi, chih ka thei hi. 33Nou Johan kiang ah mi na sawl ua, ama'n thutak thu ahon theihpih hi. 34Thu theihpihna ka san mihing a kipan ahi kei a; himahleh na hinna ding un hiai thu ka gen ahi. 35Huai Johan khawnvak kuangtak leh vaktak ahi, avak ah nopsak takdih na ut uhi.
Jesu Nasep Theihpihna
36“Himahleh theihpihna ka neih zaw Johan theihpihna sang in athupizaw hi; Pa'n thilhih zoh ding a ahon piak, ka thilhih ngei in Pa'n hon sawl chih ka tanchin atheisak hi.
Pa Theihpihna
37“Pa hon sawlpa ngei leng ka tanchin atheihpihtu in apang hi. Nou chik lai mah in a-aw na za ngei kei ua, amel leng na mu ngei kei uh. 38Athu leng noumau ah na tengsak kei uh, asawl mipa na gintak louh ziak uh ahi.
Laisiangthou Theihpihna
39“Laisiangthou sung a tangtawn hinna om ding a na ngaihtuah ziak un na nak zon ngial ua; huaite mah ka tanchin theihpihtute ahi uhi. 40Himahleh hinna nei ding in ka kiang ah na hong nuam kei uhi.
41“Mihing pahtawina ka sang kei. 42Himahleh nou ka hon thei hi, Pathian itna noumau ah na nei kei uhi. 43Ka Pa min in ka hong a, noute'n na hon kipahpih kei uh; midang ama min in hong taleh amah na na kipahpih ding uhi. 44Nou kipahtawi tuahna paktate'n Pathian tak kia a pawt pahtawina zong lou in bangchi in kei na hon gingta thei ding ua? 45Ke'n Pa kiang a nou ka hon hek ding gingta kei un; nou hon hek khat a-om, na muan uh Mosi ngei. 46Mosi gingta hi le uchin, kei leng na hon gingtata ding uh; ka tanchin gelh lah amah ahi ngal a. 47Himahleh ama thugelh gingta lou in, bangchi in ka thute na gingta ding ua?” achi hi.
Currently Selected:
JOHAN 5: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.