GENESIS 28
28
1Huan, Isak in Jakob a sam a, a vualzawl a, thu leng a pia a, a kiang ah, “Kanan gam nungakte lak a mi zi in na nei ding ahi kei. 2Thou inla, Padan-aram gam a na nu pa Bethuel inn ah hoh inla, huai a kipan na nu sanggam pa Laban tanute lak a mi zi in va nei in. 3Pathian bangkim hihthei in hon vualzawl in, mipi tampite na hong hih theihna ding in chi tampi hon suangsak in, hon pungsak hen. 4Mikhual na hihna gam, Pathian in Abraham kiang a a piak na luah na ding in Abraham vualzawlna leng hon tangsak hen, nang leh na suante leng” a chi hi. 5Isak in Jakob a paimangsak a; Padan-aram gam a, Jakob leh Esau nu Rebekah sanggampa Suria mi Bethuel tapa, Laban kiang ah a paita hi.
Esau In Zi Dang A Nei
6Esau in, Isak in Jakob a vualzawl a, zi nei ding in Padan-aram gam ah a paimang sak, chih leh a vualzawl lai a, Kanan gam nungakte lak a mi zi in na nei ding ahi kei, 7chi’n thu a pia chih leh Jakob in a nu leh a pa thumang in Padan-aram gam ah a paita chih a thei hi. 8Esau in Kanan gam nungakte’n a pa Isak lung a hihkim kei uh chih a thei hi. 9Esau Ishmael kiang ah a va hoh a, Abraham tapa Ishmael tanu Mahalath, Nebajoth sanggamnu, zi in a nei a, zi a neihsate ban ah a neih behlap ahi.
Bethel A Jakob Mang
10Jakob Beer–sheba a kipan a pawt a, Haran kholam a zuanta hi. 11Koilai mun hiam a tung a, ni a tumkhit ziak in huai ah a giakta hi. Huai a suang khat a la a; lukham in a nei a, huai ah ihmu ding in a lumta hi. 12Mang a nei a, ngai in, leitung ah lei a hong kidoh a, a dawn in van a sun hi. Ngai in, a tung ah Pathian angelte kahtou in a kumsuk uhi. 13Ngai in, a dawn ah Toupa ading a, “Kei Toupa, na pu Abraham Pathian leh Isak Pathian ka hi. Na lupna gam nang leh na suante kiang ah k’on pe ding. 14Na suante lei a leivui zah ahi ding ua, tumlam, suahlam, mallam leh simlam ah na dalhzak ding uh. Nang ah leh na suan ah khovel a namchih vualzawl in a om ding uh. 15Ngai in, na kiang ah ka om a, na paina peuh ah k’on veng dia, hiai gam ah k’on pi kiknawn ding. Na kiang a ka gen ka hih masak keileh k’on nuse kei ding” a chi hi.
16Jakob ihmu a hong khanglou a, “Hiai mun ah Toupa a om ngeingei hi. Ken lah ka na theikei a” a chi hi. 17A lau a, “Hiai mun lauhuai na mah e! Hiai mun dang hilou in, Pathian inn na hi eive, hiai van kongpi na hi eive” a chi hi.
18Jakob zingkhang in a thou a, a suang lukham a la a, suangphuh in a phut a, a dawn ah sathau a buak hi. 19Huai mun min Bethel a sa a; a khaw min bel a tung in Luz ahi.
20Jakob in, “Pathian ka kiang a om a, ka paina lampi a a hon ven a, nekding tanghou leh silh ding puansilh Toupa’n a honpiak a, 21Ka pa inn a lungmuangtak a ka hongpai nawn leh Toupa, ka Pathian ahi ding. 22Hiai suang ka phuh leng Pathian inn ahi dia; ka kiang a na honpiak ding tengteng a sawm a khat k’on pe ngeingei ding,” chi in a kichiamta hi.
Currently Selected:
GENESIS 28: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.