GENESIS 24
24
Isak Zineihna
1Abraham hong upata in a hongtek mahmahta hi. Toupa’n Abraham thil bangkim ah a vualzawlta hi. 2Abraham in a sikha, a inn a upapen, a neih tengteng tung a thuneipa kiang ah, “Hehpih in na khut ka pheipi nuai ah golh in. 3Toupa, van Pathian leh lei Pathian lou in, ka tenna Kanan mite nungak lak a mi ka tapa zi dia neihsak lou ding in, k’on kichiam sak ding. 4Ka gam lam a ka tanaute kiang ah hoh inla, ka tapa Isak zi na neihsak ding ahi” a chi hi.
5Sikha in a kiang ah, “Numei in hiai gam lam ah honzui nuam keileh, na tapa na hongpawtna gam a pi kiknawn ding ka diam?” a chi hi.
6Abraham in a kiang ah, “Ka tapa huai a pikik nawnlou ding in pilvang in. 7Toupa van Pathian, ka pa inn a kipan leh ka pianna gam a kipan hon pikhepa leh hon houpihpa leh, hiai gam na suante kiang ah ka pe ding, chi a, ka kiang a kichiampa’n, amah ngei in a angel na ma ah a paisak dia, huai a kipan ka tapa zi na neisak ding ahi. 8Numei in a honzuih nopkei leh, ka kiang a na kichiamna thu ah na siang ding. Abang abang hita leh, ka tapa huai ah na pikik nawn ding ahi kei” a chi hi. 9Sikha in a khut a pu Abraham pheipi nuai ah a golh a, huai thu ah a kiang ah a kichiamta hi.
10Sikha in a pu sangawngsau lak ah sangawngsau sawm a kai a, a pu thil hoih chiteng tawi in, a pawtta hi. A thou a, Mesopotamia gam a Nahor khua ah a hohta hi. 11Nitaklam a numeite tuitawi dia a kuan hunlaitakin, dainawl a tuileh kiang ah a sangawngsaute a khukdin sak hi. 12“Aw Toupa, ka pu Abraham Pathian, hehpih in tuni in hon lohchingsakin, ka pu Abraham tung ah hehpihna langsak in. 13En in, tuikhuk kiang ah ka ding a, khua a mite tanute tuitawi ding in a hong kuan uh. 14Hichi hi hen, nungak kuapeuh kiang a, hehpih in ka dawn ding in na tuibel niamsak dihve, ka chih a, aman, dawn in, na sangawngsaute leng dawn ding ka pe ding, chi peuhmah, huai mi ngei na sikha Isak zi dia na mi seh hi hen. Hiai ah ka pu tung ah hehpihna na lang sak, chih ka thei ding” a chi hi.
15Hichi ahi a, a genkhit ma in, ngai in, Abraham nau Nahor zi Milkah tapa Bethuel tanu Rebekah tuibel a liangzang a pua in a hong kuan hi. 16Huai nungak a mel a hoih mahmah a, nungak siangthou ahi a, pasal in a luppih ngeikei hi. Tuikhuk ah a paisuk a, a tuibel a dimsak a, a paitou nawn hi. 17Sikha amah tuak ding in a tai a, “Hehpih in na tuibel a tui tawmchik hon dawnsak ve” a chi hi.
18Aman, “Dawn ve, ka toupa” a chi a; kintak in a tuibel a khut in a dom khesuk a, a dawnsak hi. 19A dawn nung in, “Na sangawngsaute ading leng a dawnkham masiah uh ka tawi ding” a chi hi. 20Kintak in a tuibel gankuang ah a tei a, tuitawi ding in tuileh lam ah a tai nawn a, a sangawngsau tengteng ading leng a tawi hi. 21Sikha in a lohchingsak leh saklouh theihna ding in a daidide hi.
22Hichi ahi a, sangawngsaute’n a dawnkham tak un, sikha in dangkaeng bilbah sekel kimkhat a gik leh a khut ading dangkaeng tau nih sekel sawm a gik a suah khia hi. 23A kiang ah, “Kua tanu na hia? Hehpih in honhilh in. Na pa inn ah ka giahna ding uh mun a om diam?” a chi hi.
24Aman, a kiang ah, “Bethuel, Milkah tapa, Nahor adia a neihsaknu tanu ka hi” a chi hi. 25Amahmah in, a kiang ah, “Buhpawl leh gan an ka hau tuak uhi, giahna mun leng ka nei uh” a chi hi.
26Sikha in a lu a kunsak a, Toupa a bia hi. 27“Ka pu tung a a hehpihna leh a thutakna tawp tuanlou, Toupa, ka pu Abraham Pathian, phat in om hen. Keileng, Toupa’n ka pu unaute inn lam a hon na pi eive” a chi hi.
28Nungak a tai a, huai thute a nu inkuanpihte a va hilh hi. 29Rebekah in sanggam pasal a nei a, a min Laban ahi. Laban a pawt a, tuikhuk lam ah huai mi kiang ah a va taita hi. 30Hichi ahi a, bilbah leh a sanggamnu khut a taute a mu a, huai mi’n, “Huchi kha chi in honchi” chi a, a sanggamnu Rebekah thugente a zaktak in, huai mi kiang ah a hohta hi. Ngai in, amah tuikhuk ah sangawngsaute kiang ah a na ding gige hi. 31Laban in, “Nang, Toupa vualzawlpa, hong inla, ka inn uah lut in. Bangdia inn pua ading nilouh? inn leh mun sangawngsaute ading in ka bawl khinta” a chi hi.
32Huan inn ah a lut a, Laban in sangawngsau van a phela; sangawngsaute ading in buhpawl leh gan an a pia a, a khe leh a lawmte khesilna ding tui a pia hi. 33Abraham sikha ma ah nekding a lui a; himahleh, aman, “Ka hong nasan thu ka gen mateng ka ne kei ding,” a chi hi. Aman, “Gen ve,” a chi hi. 34“Aman, “Abraham sikha ka hi. 35Toupa’n ka pu nakpitak in a vualzawl a, mi liantak a hong hita. Toupa’n a kiang ah belamhon, bawnghon, dangka, dangkaeng, sikhapate, sikhanute, sangawngsaute leh sabiltungte leng a pia hi. 36Ku pu zi Sarah in tek nung in ka pu ading in tapa a nei a; amah kiang ah a neih tengteng a pe vek hi. 37Ka pu in, ka tenna gam a Kanante nungak lak a ka tapa zi ding a na neihsak ding ahi kei. 38Ka pa inn lam ah, ka tanaute kiang ah hoh inla, ka tapa zi na neisak zaw ding ahi, chi’n, a hon kichiam sak hi. 39Ken ka pu kiang ah, Numei in honzui nuam kei kha ding,” ka chi hi. 40Aman, ka kiang ah, “Toupa a ma a ka om zelna in a angel na kiang ah a honsawl dia; na hohna ding ah hon lohchingsak ding. Ka tapa ading in ka tanaute leh ka pa inn kawte lak a zi na neisak ding ahi. 41Ka tanaute kiang ngei na tun chiang in, ka kiang a na kichiamna a kipan na siang ding. Nungak a honpiak kei uleh ka kiang a na kichiamna a kipan na siang ding” a chi hi.
42“Tuni in tuikhuk ka hongtung a, ‘Aw, Toupa, ka pu Abraham Pathian, ka paina a n’on lohchinsak ding leh, en in, tuikhuk kiang ah ka ding hi. 43Hichi hi hen, nungak tuitawi dia hong kuan, kuapeuh kiang a, hehpih in dawn ding na tuibel a tui tawmchik honpia in, ka chih a; 44aman ka kiang a, dawn in, na sangawngsaute ading leng ka tawi ding, chi peuhmah, huai mi ngeingei ka pu tapa adia Toupa numei seh hi hen, ka chi hi.’ 45Ka lungsim a ka gen khitma in, ngai in, Rebekah, a tuibel pua in a hong kuan a; tuikhuk ah a paisuk a; tui a tawi a; a kiang ah, ‘hehpih in tui hon dawnsak ve’ ka chi hi. 46Aman kintak in a liangzang a kipan tuibel a domkhia a, ‘dawnin, na sangawngsaute leng dawn ding ka pe ding,’ a chi hi. Ka dawn a, sangawngsaute leng a dawnsak hi. 47Ken, ‘kua tanu na hia?’ chi’n ka dong a; aman ‘Nahor tapa, Milkah in a neih sakpa Bethuel tanu ka hi’ a chi hi. Bilbah a bil ah ka batsak a, taute leng a khut ah ka bunsak hi.
48Ka lu ka kunsak a, Toupa ka bia a, Toupa, ka pu Abraham Pathian, ka pu unaupa tanu a tapa adia a zi dia neisak dia lampi diktak a hon pipa, ka phat hi. 49Tuin ka pu na hehpih ua, a tung a chihtak pet a na hih ding uleh honhilh un. Na hih kei ding uleh leng honhilh un. Taklam hiam, veilam hiam, ka nga thei ding” a chi hi.
50Laban leh Bethuel in a dawng ua, “Hiai thil Toupa a kipan pawt ahi. A sia a pha leng na kiang ah ka gen theikei uh. 51En in, ‘Rebekah na ma ah a om hi, pi inla, pai in’ Toupa’n a gensa bang in na pu tapa zi ding in om hen” a chi uh. 52Hichi ahi a, Abraham sikha in a thu uh a zaktak in leisi in Toupa a bia hi. 53Abraham sikha in dangka suang kizepnate, dangkaeng kizepnate leh silhlehten a lakhia a, Rebekah a pia a; a sanggampa leh a nu kiang ah leng thil manpha pipi a pia hi.
54Amah leh a lawmte’n ne in a dawn ua, a giakta uh. Zingsang in a thou ua, “Ka pu kiang ah hon paisakta un,” a chi hi.
55A sanggampa leh a nu’n, “Nungak ni sawtlou chik, ni sawm lel bek, ka kiang uah omtadih hen. Huaikhit in a hongpai na ding,” a chi uhi.
56Aman, a kiang uah, “Hon zekaisak kei dih ua, Toupa’n lah ka hohna ah a hon lohchingsakta ngal a. Ka pu kiang a ka pai theihna ding in, honsawl zaw maive ua” a chi hi.
57Amau, “Nungak ka sam ding ua, amah kam mahmah kihoupih leh” a chi uh. 58Rebekah a sam ua a kiang ah, “Hiai mipa kiang ah na pai nuam maw?” a chi uh. Aman, “Pai nuam ve ning e” a chi hi.
59A sanggamnu uh Rebekah leh a donnu leh Abraham sikha leh a mite a paita uhi. 60Rebekah a vualzawl ua, a kiang ah,
“Ka sanggamnu uh aw, nang,
sing ngenta sang tampite nu
honghi in!
Na suante’n amau
hawte kulh kongkhak
neihsak uhen!” a chi uhi.
61Rebekah a thou a, a sikhanute toh sangawngsaute tung ah a tuang ua, huai mi a zuita uhi. Abraham sikha in Rebekah a pi a, a paita uhi.
62Huan Beer Lahai-roi dil lam a kipan Isak a hong a, sim gam a teng ahi. 63Isak nitaklam in pawn ah kingaihtuah ding in a pawtkhia hi. A dak a, a en a, ngai in, sangawngsau hongpaite a mu hi. 64Rebekah a dak a, Isak a muhtak in sangawngsau tung a kipan a kum hi. 65Abraham sikha kiang ah, “Pawn a hondawn dia hongpai kua ahia?” a chi a; sikha in, “Ka pu ahi” a chi hi. A kikhuhna puan a la a, a kikhuhta hi. 66Sikha in a thilhih tengteng Isak a hilh hi. 67Isak in Rebekah a nu Sarah puanin ah a pilut a, Rebekah a la a, a zi a hong hita hi. Amah a it a, a nu sihnungin Isak a hong lungmuangta hi.
Currently Selected:
GENESIS 24: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.