LOUKAS 24
24
Ka jingmihpat
(Mat. 28:1-10; Mrk. 16:1-8; Ïoan. 20:1-10)
1Dang step phyrngab ha ka step Sngi U Trai, ki kynthei ki la leit sha ka jingtep ki da rah ïa ki musla kiba ki la pynkhreh. 2Ki la shem ba la pyntyllun noh ïa u maw na ka jaka rung sha ka jingtep, kumta ki la rung shapoh; 3hynrei kim shym shem ïa ka met jong U Trai Jisu. 4Ki la ïeng hangta, ki la shaïong shaphang kane, haba kynsan ar ngut ki rangbah ha ki jaiñ kiba phyrnai eh ki la ïeng hajan jong ki. 5Ha ka jingtieng bakhraw, kita ki kynthei ki la dem khrup ha khyndew, katba ki rangbah ki la ong ha ki, “Balei ba phi ïawad hapdeng kiba ïap ïa uta uba im? 6#Mat. 16:21; 17:22,23; 20:18,19; Mrk. 8:31; 9:31; 10:33,34; Luk. 9:22; 18:31-33Um don hangne; la pynmihpat ïa u. Kynmaw ïa kaei kaba u la ong ha phi mynba u dang don ha Galilaïa: 7‘Ïa U Khun U Briew dei ban aiti ha ki briew kiba pop, ba yn sahnarphna, bad hadien lai sngi un mihpat.’ ”
8Te kita ki kynthei ki la kynmaw ïa ki kyntien jong u, 9ki la leit phai noh na ka jingtep, bad ki la ïathuh ïa kine kiei kiei baroh ha ki khatwei ngut ki synran bad ha baroh kiwei pat. 10Kita ki kynthei ki la long ka Mari ka nong Magdala, ka Ïoanna, bad ka Mari ka kmie jong u Jakob; ma ki lem bad kiwei pat ki kynthei kiba bad ki, ki la ïathuh ïa kine kiei kiei baroh ha ki apostol. 11Hynrei ki apostol ki la pyrkhat ba kaei kaba kita ki kynthei ki la ong ka long ka bym don jingmut, bad kim shym la ngeit ïa ki. 12Hynrei u Petros u la ïeng joit bad u la mareh sha ka jingtep; u la dem shapoh bad u la ïohi ïa ki jingsop linen hynrei ym kano kano kawei pat. Nangta u la leit phai pat sha ïing da ka jinglyngngoh ïa kaei kaba la jia.
Ka jingïaid lynti sha Emmaus
(Mrk. 16:12-13)
13Ha kata kajuh ka sngi, ar ngut na ki nongbud jong U Jisu ki dang leit sha ka shnong kaba kyrteng ka Emmaus, kumba khatwei kilomitar na Jerusalem, 14bad ki dang ïakren para ma ki shaphang kiei kiei baroh kiba la jia. 15Katba ki dang ïakren bad ïasaidnia, U Jisu hi u la leit hajan bad u la ïaid lem bad ki; 16ki la ïohi ïa u, hynrei kumno re kumno kim shym ithuh ïa u. 17U Jisu u la ong ha ki, “Shaphang kaei ba phi ïakren para ma phi, katba phi nang ïa-ïaid?”
Ki la ïeng, lem bad ka durkhmat basngewsih. 18Uwei na ki, uba kyrteng u Kleopas, u la kylli ïa u, “Hato me long tang ma me uba wan sha Jerusalem u bymtip ïa kiei kiei kiba la lah jia hangta ha kine ki khyndiat sngi ba la leit?”
19“Kiei kita?” u la kylli.
“Kiei kiei kiba la jia ha U Jisu uba na Nasareth,” ki la jubab. “Une u briew u la long u nongïathuhlypa bad la ñiew da U Blei bad da ki briew baroh ba u long uba donbor ha kiei kiei baroh kiba u kren bad leh. 20Ki rangbah lyngdoh bad ki nongsynshar jong ngi ki la aiti noh ïa u ban rai pynïap, bad ïa u la sahnarphna. 21Bad ngi la kyrmen ba un dei ma u uta u ban sa wan ban pyllaitluid ïa ki Israel! Nalor kata baroh, kane mynta ka dei ka sngi kaba lai naduh ba ka la jia. 22Katto katne ngut ki kynthei jong ka kynhun jong ngi, ki la pynkyndit ïa ngi; ki la leit dang kynjat shai sha ka jingtep, hynrei kim shym la lah ban shem ïa ka met jong u. 23Ki la wan phai pat da kaba ong ba ki la ïohi ka jingïohipaw ïa ki angel kiba la ïathuh ha ki ba u im. 24Katto katne ngut na ka kynhun jong ngi ki la leit sha ka jingtep bad ki la shem thik kumba ki kynthei ki la ïathuh, hynrei kim shym la ïohi ïa u.”
25Nangta U Jisu u la ong ha ki, “Katno kiba bieit phi long, katno phi long kiba suki ban ngeit ïa kaei kaei baroh kaba ki nongïathuhlypa ki la ong! 26Hato kam long kaba donkam ïa U Messaïah ban shahshitom ïa kine kiei kiei baroh bad nangta ban rung sha ka burom jong u?” 27Bad U Jisu u la batai ha ki ïa kaei kaba la ong shaphang jong u hi ha baroh ki Jingthoh Bakhuid, da kaba sdang da ki kitab u Moses bad ki jingthoh jong ki nongïathuhlypa baroh.
28Haba ki la jan poi hajan ka nongrit sha kaba ki thmu ban leit, U Jisu u la leh kumba u nang leit kham jngai; 29hynrei ki la bat ïa u, ki da ong, “To sah bad ngi; ka sngi la jan kut bad ka la khreh dum.” Kumta u la leit ban sah bad ki. 30U la shong bam bad ki, u la shim ïa u kpu, bad u la duwai; nangta u la kdiah ïa u kpu bad u la ai ïa u ha ki. 31Te ïa ki khmat jong ki la plie bad ki la ithuh ïa u, hynrei u la jah noh na khmat jong ki. 32Ki la ong para ma ki, “Hato kam shym la long kum ka ding kaba klang hapoh jong ngi mynba u la kren ha ngi ha ka lynti bad batai ïa ki Jingthoh Bakhuid ha ngi?”
33Ki la ïeng joit shisyndon bad ki la leit phai pat sha Jerusalem, ha kaba ki la shem ïa ki khatwei ngut ki synran kiba la ïalumlang bad kiwei pat kiba ong, 34“U Trai u la mihpat da shisha! U la paw ha u Simon!”
35Ki ar ngut te ki la batai ha ki ïa kaei kaba la jia ha kata ka lynti, bad ba kumno ki la ithuh ïa U Trai mynba u la kdiah ïa u kpu.
U Jisu u mihpaw ha ki synran jong u
(Mat. 28:16-20; Mrk. 16:14-18; Ïoan. 20:19-23; Ki Kam. 1:6-8)
36Katba ki ar ngut ki dang ïathuh ha ki ïa kane, kynsan U Trai hi u la ïeng hapdeng jong ki bad u la ong ha ki, “Ka jingsuk lem bad phi.”
37Ki la sngewshyrkhei, da kaba pyrkhat ba ki ïohi ïa ka rngai. 38Hynrei, u la ong ha ki, “Balei ba phi ïasheptieng? Balei ba kine ki jingartatien ki wan ha ki jingpyrkhat jong phi? 39Khmih ïa ki kti jong nga bad ki kjat jong nga, bad peit ba dei ma nga hi. Tba ïa nga, bad phin tip, naba ka rngai kam don ka doh bad ki shyieng, kumba phi ïohi ba nga don.”
40U la ong ïa kane bad u la pyn-i ha ki ïa ki kti jong u bad ïa ki kjat jong u. 41Kim pat lah hi ban ngeit, ki la shlei da ka jingkmen bad ka jingphylla; kumta u la kylli ïa ki, “Phi don ei ei hangne ban bam?” 42Ki la ai ha u shi lyngkhot ka dohkha ba la shet, 43ïa kaba u la shim bad bam ha khmat jong ki.
44Nangta u la ong ha ki, “Kine ki long kita kiei kiei kiba nga la ïathuh ha phi mynba nga dang don lem bad phi: Kaei kaei baroh kaba la thoh shaphang jong nga ha ka Hukum u Moses, ha ki jingthoh jong ki nongïathuhlypa, bad ha Ki Salm ka dei ban urlong shisha.”
45Nangta u la plie ïa ki jingpyrkhat jong ki ban shemphang ïa ki Jingthoh Bakhuid, bad u la ong ha ki, 46“Kane ka long kaei kaba la thoh: U Messaïah u dei ban shahshitom bad u dei ban mihpat na ka jingïap hadien lai sngi, 47bad ha ka kyrteng jong u ïa ka khubor shaphang ka Jingkylla-kaba-mut bad ka jingmap ïa ki pop dei ban ïalap sha ki jaitbynriew baroh, da kaba sdang na Jerusalem. 48Phi long ki sakhi ïa kine kiei kiei. 49#Ki Kam. 1:4Bad nga hi ngan phah halor jong phi ïa kaei kaba U Kpa jong nga u la kular. Hynrei phi dei ban ap ha ka nongbah tad ynda ka bor ba najrong ka wan hiar halor jong phi.”
Ïa U Jisu la shim noh sha bneng
(Mrk. 16:19-20; Ki Kam. 1:9-11)
50 #
Ki Kam. 1:9-11
Nangta u la ïalam ïa ki shabar ka nongbah haduh ha Bethania, ha kaba u la rah ïa la ki kti bad u la kyrkhu ïa ki. 51Katba u dang kyrkhu ïa ki, u la leit noh na ki bad la shim noh ïa u sha bneng. 52Ki la mane ïa u bad ki la leit phai pat sha Jerusalem, kiba la pyndap da ka jingkmen bakhraw, 53bad ki la pynlut ïa ka por jong ki baroh hapoh ka Templ da kaba ainguh ïa U Blei.
Currently Selected:
LOUKAS 24: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.