Enzũko 2
2
Ekiro kyʼeriluhuka
1Olubula nʼekihugo mobyahwa, nʼebyosĩ ebirimo. 2Oko kiro kyʼebirinda Nyamuhanga mwabuga omũbĩrĩ wuwe gosĩ ogo akola, neryo mwaluhuka ekiro kyʼebirinda oko mũbĩrĩ wuwe gosĩ akola. 3Neryo Nyamuhanga mwatsumula ekiro kyʼebirinda, mwayirakyo mo kĩbũyĩrĩre; kusangwa mwaluhuka mukyo oko mĩbĩrĩ yiwe yosĩ eyo abya abirihangika nʼerikola.
4Esĩ ni ndengo syʼolubula nʼekihugo omugulu byahangikawa.
Ekiro Omwami Mukulu Nyamuhanga ahangika ekihugo nʼolubula. 5Neryo isihali mwaka wʼomwʼirima omo kihugo, nʼebiti byʼomolĩ isibiri byalasa. Kusangwa Omwami Mukulu Nyamuhanga isiali awĩsya embũla oko kitaka. Isihali mundu oyo wangalima ekitaka. 6Nĩkwa ekĩlũmbĩ mokyahetuka kĩkalũa oko kitaka erĩhĩra amagetsi oko bugali bosĩ bwʼekitaka. 7Neryo Omwami Mukulu Nyamuhanga mwabumba omundu omo lũtũtũ lwʼekitaka, neryo mwabuhira omo nĩndo yiwe mʼomuka wʼengebe. Omundu oyo mwabya omundu oyuliho. 8Nĩkwa Omwami Mukulu Nyamuhanga mwahera eririma oko luhande lwʼendata omo Edenĩ. Neryo mwahĩramo omundu oyo abumba. 9Neryo Omwami Mukulu Nyamuhanga mwalasya oko kitaka obuli muti owakowana omo meso, nʼogowene oko kalyo. Kandi mwalasya omuti wʼengebe omo katĩkatĩ kʼeririma, nʼomuti wʼeriminya ekibuya nʼekibi.
10Neryo olũsĩ molwalũa eEdenĩ erĩheherya eririma. Enyũma wʼaho molwagabana eribya mitahi ĩnĩ yʼolũsĩ. 11Erĩna lyʼolumbere nĩ Pĩhonĩ. Lũkatĩmba oko kihugo kyosĩ kyʼeHavĩla, ahali esyamagetsi. 12Esyamagetsi syʼekihugo ekyo ni mbuya. Hali nʼebedola nʼevĩto byʼeonĩkĩ. 13Erĩna lyʼolũsĩ lwʼakabiri nĩ Gĩhonĩ. Olũ lũkatĩmba oko kihugo kyosĩ kyʼeKũsĩ. 14Nʼerĩna lyʼolũsĩ lwʼakasatu nĩ Hĩdekelĩ. Olo lukalaba endata wʼeAsũrĩa. Olũsĩ lwʼakani nĩ Efũratĩ. 15Neryo Omwami Mukulu Nyamuhanga mwĩmya omundu oyo, mwamũhĩra omwʼirima lyʼeEdenĩ alimeryo, ategayeryo. 16Neryo Omwami Mukulu Nyamuhanga mwahana omundu oyo ati, Oko bĩgũma byosĩ byʼobuli muti omwʼirima wanganalya kubyo. 17Nĩkwa oko bĩgũma byʼomuti wʼeriminya ekibuya nʼekibi, susyerya kubyo. Kusangwa oko kiro wasyalya kubyo wasyahola kũndũ.
Erihangikwa lya Eva
18Neryo Omwami Mukulu Nyamuhanga mwabũga ati, Sĩryowene omundu eribya ĩyowene; ngandimukolera omũwatĩka oyumutolere. 19Neryo Omwami Mukulu Nyamuhanga mwabumba omo mutaka obuli nyama yʼomolĩ, nʼobuli nyonyũ syʼomo kyanya. Mwaletasyo oko mundu oyo ngʼakandiahulasyo omo mena wahi. Neryo obuli kindu kyahangikawa ekiriho, erĩna eryo alukakyo molyabya lĩna lyakyo. 20Omundu oyo mwaluka amena oko syonyama syosĩ syʼeka, nʼoko syonyonyũ syʼomo kyanya nʼoko buli nyama yʼomolĩ. Nĩkwa busana na Adamu mohatabanika omũwatĩkya oyumutolere. 21Neryo Omwami Mukulu Nyamuhanga mwayĩsya omundu oyo otũgotserĩ tunene, naye mwagotsera. Neryo mwĩmya olukanga luwe luguma, nĩkwa mwaswalĩba omũnyokũ goho. 22Olukanga olo alũsaya oko mundu oyo mwabumba mulo mʼomũkalĩ, mwamutwalira omundu oyo. 23Omundu oyo mwabũga ati, Erĩ nĩ ʼkũha lyʼamakũha wage, nʼomũnyokũ wʼomũnyokũ wage: asyahulwa mo Mũkalĩ, kusangwa alũsĩbawa omo Mulume. 24Busana nʼekyo, omundu asyasĩganĩa ĩse wuwe na nyĩnya, asyalanda oko mũkalĩ wuwe neryo basyabya muguma. 25Neryo omundu oyo nʼomũkalĩwe babya ndũmbũ, nʼaho isihali ĩsonĩ.
Currently Selected:
Enzũko 2: KB80
Highlight
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.