ປະຖົມມະການ 8
8
ນໍ້າບົກລົງ
1ພຣະເຈົ້າບໍ່ໄດ້ລືມໂນອາພ້ອມທັງສັດຊະນິດຕ່າງໆທີ່ຢູ່ໃນເຮືອ; ພຣະອົງໄດ້ເຮັດໃຫ້ມີລົມພັດມາ ແລະນໍ້າກໍບົກລົງ. 2ຮູນໍ້າໃຕ້ພື້ນດິນ ແລະປ່ອງນໍ້າເທິງຟ້າສະຫວັນ ຖືກອັດໝົດ ຝົນເຊົາຕົກ 3ແລະນໍ້າກໍຄ່ອຍໆບົກລົງຕາມລຳດັບເປັນເວລາໜຶ່ງຮ້ອຍຫ້າສິບວັນ. 4ໃນວັນທີສິບເຈັດຂອງເດືອນທີເຈັດ ເຮືອຂອງໂນອາໄດ້ຄ້າງຄາຢູ່ທີ່ເທິງພູເຂົາອາຣາຣັດ. 5ນໍ້າໄດ້ບົກລົງເລື້ອຍໆ ຈົນຮອດວັນທີໜຶ່ງຂອງເດືອນທີສິບແລ້ວ ຈອມພູທັງຫລາຍກໍໄດ້ປາກົດຂຶ້ນ.
6ຕໍ່ມາອີກສີ່ສິບວັນ ໂນອາໄດ້ໄຂປ່ອງຢ້ຽມເຮືອອອກ 7ແລະປ່ອຍກາໂຕໜຶ່ງອອກໄປ ກາໂຕນີ້ບໍ່ໄດ້ບິນຄືນມາ ແຕ່ມັນໄດ້ບິນເວີ່ນຢູ່ຈົນນໍ້າໄດ້ແຫ້ງລົງ. 8ໃນເວລາດຽວກັນນັ້ນ ໂນອາໄດ້ປ່ອຍນົກເຂົາໂຕໜຶ່ງອອກໄປອີກ ເພື່ອຈະໄດ້ຮູ້ວ່ານໍ້າບົກແລ້ວຫລືຍັງ 9ແຕ່ນົກເຂົາໂຕນັ້ນບໍ່ມີບ່ອນຈັບ ຈຶ່ງໄດ້ກັບຄືນມາ ເພາະນໍ້າຍັງຖ້ວມພື້ນດິນຢູ່; ພໍເຫັນນົກກັບມາ ໂນອາກໍຟ້າວເດ່ມືອອກໄປຈັບເອົານົກໂຕນັ້ນມາໄວ້ໃນເຮືອນຳໝູ່. 10ເຈັດວັນຕໍ່ມາ ເພິ່ນໄດ້ປ່ອຍນົກເຂົາອອກໄປອີກ. 11ນົກເຂົາໂຕນັ້ນໄດ້ບິນກັບມາໃນຕອນແລງ ພ້ອມທັງຄາບເອົາໃບໝາກກອກເທດ. ສະນັ້ນ ເພິ່ນຈຶ່ງຮູ້ຈັກຄັກແນ່ວ່າ ນໍ້າໄດ້ບົກລົງແລ້ວ. 12ເຈັດວັນຕໍ່ມາ ເພິ່ນໄດ້ປ່ອຍນົກເຂົາອອກໄປອີກ, ແຕ່ໃນເທື່ອນີ້ມັນບໍ່ໄດ້ກັບຄືນມາ.
13ເມື່ອໂນອາອາຍຸໄດ້ 601 ປີ ຄືໃນວັນທີໜຶ່ງຂອງເດືອນທີໜຶ່ງຂອງປີນັ້ນ ນໍ້າກໍໄດ້ບົກ ແລະແຫ້ງລົງໝົດ ເພິ່ນເປີດຫລັງຄາເຮືອອອກເບິ່ງໄປລອບໆ ຈຶ່ງເຫັນວ່າໜ້າດິນແຫ້ງແລ້ວ. 14ໃນວັນທີຊາວເຈັດຂອງເດືອນທີສອງ ພື້ນດິນຈຶ່ງໄດ້ແຫ້ງໝົດ.
15ແລ້ວພຣະເຈົ້າກໍກ່າວແກ່ໂນອາວ່າ, 16“ເຈົ້າແລະເມຍພ້ອມດ້ວຍພວກລູກຊາຍກັບພວກລູກໃພ້ຂອງເຈົ້າ ຈົ່ງພາກັນອອກໄປຈາກເຮືອ. 17ຈົ່ງປ່ອຍນົກ ແລະສັດທັງຫລາຍທີ່ຢູ່ໃນເຮືອອອກໄປໝົດ ເພື່ອໃຫ້ອອກແມ່ແຜ່ລູກຫລາຍຂຶ້ນຢູ່ເທິງແຜ່ນດິນໂລກ.” 18ດັ່ງນັ້ນ ໂນອາ ແລະເມຍພ້ອມທັງພວກລູກຊາຍ ແລະພວກລູກໃພ້ຂອງຕົນ ຈຶ່ງພາກັນອອກໄປຈາກເຮືອ. 19ສັດແລະນົກທຸກຊະນິດຕ່າງກໍອອກມາຈາກເຮືອເປັນໝູ່ໆຕາມຊະນິດຂອງມັນ.
ໂນອາຖວາຍເຄື່ອງບູຊາ
20ແລ້ວໂນອາກໍໄດ້ສ້າງແທ່ນບູຊາແທ່ນໜຶ່ງ ຖວາຍແກ່ພຣະເຈົ້າຢາເວ; ເພິ່ນເອົາສັດແລະນົກແນວລະໂຕ ທີ່ບໍ່ເປັນມົນທິນ ຂ້າເຜົາຖວາຍທັງໂຕເທິງແທ່ນບູຊາ. 21ກິ່ນຫອມຫວນຂອງເຄື່ອງຖວາຍນີ້ເປັນທີ່ພໍໃຈພຣະເຈົ້າຢາເວ ແລະພຣະເຈົ້າຢາເວກໍຊົງກ່າວວ່າ, “ເຮົາຈະບໍ່ໃຫ້ແຜ່ນດິນໂລກຕົກຢູ່ໃຕ້ຄຳສາບແຊ່ງອີກຈັກເທື່ອ ຍ້ອນສິ່ງທີ່ມະນຸດກະທຳ; ເຮົາຮູ້ວ່າ ແຕ່ເວລາມະນຸດຍັງນ້ອຍ ຄວາມຄິດຂອງເຂົາກໍຊົ່ວຢູ່ແລ້ວ. ເຮົາຈະບໍ່ທຳລາຍສິ່ງທີ່ມີຊີວິດ ເໝືອນດັ່ງທີ່ເຮົາໄດ້ທຳລາຍໃນຄັ້ງນີ້ອີກຈັກເທື່ອ.
22ຕາບໃດທີ່ໂລກຍັງຄົງດຳລົງຢູ່
ລະດູຫວ່ານກັບລະດູເກັບກ່ຽວກໍຍັງມີຢູ່ຕໍ່ໄປ
ຈະມີໜາວມີຮ້ອນຮ່ວມກັນຢູ່ສະເໝີໄປ
ຍາມຮ້ອນແລະຍາມໜາວ ກາງເວັນແລະກາງຄືນດ້ວຍ.”
Currently Selected:
ປະຖົມມະການ 8: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.