لَاتَانٛوجِ 47
47
1يُوسُڢُ يٜحِ، عَنْدِنِ ڢِرْعَوْنَ، وِعِمٛ: «بَابَ عَمْ عٜ دٜىٰرْطَمْعٜنْ بٜى دَمّٛوجِ مُوطُمْعٜنْ عٜ نَعِ مُوطُمْعٜنْ عٜ مَرْدِ مُوطُمْعٜنْ ڢُو نغَرِ دِغَ لٜسْدِ کَنَانَ؞ ندَا، ࢡٜطٛنْ ندٜرْ لٜسْدِ غٛوسَنْ؞» 2ندٜنْ عٛحٛوعِ نجٛوٛ شَکَ دٜىٰرْطِيکٛعٜنْ، عٛحٛلِّ ࢡٜ حَا ڢِرْعَوْنَ؞ 3ڢِرْعَوْنَ ࢨَمِ دٜىٰرْطِرَاࢡٜ يُوسُڢُ: «طُمٜ وٛنِ کُوغَلْ مٛوطٛنْ؟» ࢡٜنجَابَنِ ڢِرْعَوْنَ: «مَشُّࢡٜ مَ نغٛنِ وَيْنَاࢡٜ دَمّٛوجِ، بَنَ کَاکِرَاࢡٜ عَمِنْ؞» 4ࢡٜمبِعِ ڢِرْعَوْنَ ڢَحِنْ: «مِنْ نغَرِ حَا مِنْ کٛطَ ندٜرْ لٜسْدِ مَاطَ؞ دُرْدُطٜ نغٛودَا نغَمْ دَمّٛوجِ مَشُّࢡٜ مَ، نغَمْ وٜىٰلٛ سَاتِ ندٜرْ لٜسْدِ کَنَانَ؞ عَشُّ مَشُّࢡٜ مَ نجٛوطٛ جٛنْتَ ندٜرْ لٜسْدِ غٛوسَنْ؞» 5-6ڢِرْعَوْنَ وِعِ يُوسُڢُ: «بَابَ مَ عٜ دٜىٰرْطَعٜنْ نغَرِ حَا مَاطَ؞ لٜسْدِ مِصْرَ ڢُو طٛنْ يٜىٰسٛ مَ؞ جٛعِّنْ ࢡٜ حَا نٛکُّورٜ ࢡُرْندٜ وٛوطُغٛ؞ ࢡٜنجٛوطٛ ندٜرْ لٜسْدِ غٛوسَنْ؞ تٛ عَتَوِ شَکَ مَࢡّٜ وٛرْࢡٜ حَکِّلْࢡٜ، حَلْڢِنْ ࢡٜ دَبَّاجِ عَمْ؞»
7ندٜنْ يُوسُڢُ وَدِّ بَابَ مُوطُمْ يَعْقُوبُ، حٛلِّمٛ ڢِرْعَوْنَ؞ يَعْقُوبُ بَرْکِطِنِ ڢِرْعَوْنَ؞ 8ڢِرْعَوْنَ ࢨَمِ يَعْقُوبُ: «نٛيْ دُوࢡِ مَ؟» 9يَعْقُوبُ جَابِ: «دُوࢡِ نغٜىٰندَمْ کٛطَمْکُ عَمْ حَا دُنِيَارُ نغَطِ تٜىٰمٜرّٜ عٜ شَݠَّنْطٜ تَتِ (130)؞ دُوࢡِ نغٜىٰندَمْ عَمْ طِ شَطِّ، طِ طُوطَايْ؞ طِ نجٛتَّاکِ دُوࢡِ نغٜىٰندَمْ کَاکِرَاࢡٜ عَمْ ندٜرْ کٛطَمْکُ مَࢡّٜ؞» 10يَعْقُوبُ بَرْکِطِنِ ڢِرْعَوْنَ، ندٜنْ عٛوُرْتِ دِغَ لَامٛرْدٜ؞ 11يُوسُڢُ جٛعِّنِ بَابَ مُمْ عٜ دٜىٰرْطُمْعٜنْ حَا نٛکُّورٜ ࢡُرْندٜ وٛوطُغٛ حَا مِصْرَ، لٜسْدِ رَعْمٜسٜسْ، بَنَ ڢِرْعَوْنَ عُمْرُنٛ؞ 12يُوسُڢُ حٛکِّ بَابَ مُمْ عٜ دٜىٰرْطُمْعٜنْ عٜ سَارٜ بَابَ مُمْ ڢُو نغُورٜ ڢٛدّٜ لِمْغَلْ ࢡِکّٛيْ؞
يُوسُڢُ لَامَنِ لٜسْدِ مِصْرَ
13ࢩَامْدُ وٛودَا ندٜرْ دُنِيَارُ ڢُو، نغَمْ وٜىٰلٛ سَاتِ مَسِنْ؞ يِمْࢡٜ لٜسْدِ مِصْرَ عٜ لٜسْدِ کَنَانَ طٛنّٛ تَمْݠَ نغَمْ وٜىٰلٛ؞ 14يُوسُڢُ مٛوࢡْتِ شٜىٰدٜ غٛنْطٜ حَا مِصْرَ عٜ کَنَانَ ڢُو، نغَمْ عَلْکَمَارِ ندِ يِمْࢡٜ شٛودِ؞ عٛوَدِّ شٜىٰدٜ مَنْ ندٜرْ سَارٜ ڢِرْعَوْنَ؞ 15شٜىٰدٜ تِمِّ ندٜرْ لٜسْدِ مِصْرَ عٜ لٜسْدِ کَنَانَ؞ مِصْرَعٜنْ ڢُو نغَرِ حَا يُوسُڢُ، مبِعِ: «حٛکُّ مِنْ کٛ مِنْ ࢩَامَ؞ مِنْ مَايَ يٜىٰسٛ مَ نغَمْ شٜىٰدٜ تِمِّ نَ؟» 16يُوسُڢُ وِعِ ࢡٜ: «نغَدّٜ دَبَّاجِ مٛوطٛنْ؞ مِحٛکَّنْ عٛنْ ࢩَامْدُ مبَتُّدِ دَبَّاجِ مٛنْ، نغَمْ شٜىٰدٜ مٛوطٛنْ تِمِّ؞» 17ࢡٜنغَدَّنِ يُوسُڢُ دَبَّاجِ مَࢡّٜ؞ يُوسُڢُ حٛکِّ ࢡٜ ࢩَامْدُ مبَتُّدِ ݠُشِّ عٜ دَمّٛوجِ عٜ نَعِ عٜ بَمْطٜ مَࢡّٜ؞ ندٜرْ حِتَاندٜ ندٜعٜ عٛࢩَامْنِ ࢡٜ مبَتُّدِ دَبَّاجِ مَࢡّٜ ڢُو؞
18مَوْرِ مَاجُمْ ࢡٜنغَرِ ڢَحِنْ حَا مَاکٛ، ࢡٜمبِعِ: مِنْ مبَاوَتَا سُوطُغٛ طُمْ يٜىٰسٛ جَاغٛرْطٛ عَمِنْ؞ «شٜىٰدٜ نجِنِّ، مِنْ نغَدَّنِ مَ دَبَّاجِ عَمِنْ بٛو، وَلَا کٛ لُتَّنِ مِنْ سٜيْ ࢡَلِّ عَمِنْ عٜ غٜسٜ عَمِنْ؞ 19مِنْ مَايَ يٜىٰسٛ مَ کَدِ نَ؟ سٛودُ مِنْ عٜ غٜسٜ عَمِنْ مبَتُّدِ ࢩَامْدُ؞ مِنِنْ مِنْ لَاتٛ مَشُّࢡٜ ڢِرْعَوْنَ بٜى غٜسٜ عَمِنْ؞ حٛکُّ مِنْ عَاوْدِ، حَا مِنْ نغٜىٰطَ، تَا مِنْ مَايَ، تَا غٜسٜ عَمِنْ بٛو لَاتٛ دُومْتُطٜ!»
20يُوسُڢُ سٛودَنِ ڢِرْعَوْنَ لٜسْدِ مِصْرَ ڢُو؞ کٛو مٛيْ مِصْرَاجٛ سٛورِّ نغٜسَ مُمْ، نغَمْ وٜىٰلٛ ࢡِلِّ ࢡٜ؞ بَنَ نٛنْ لٜسْدِ ڢُو لَاتٛرَنِ ڢِرْعَوْنَ؞ 21يُوسُڢُ مَشِّطِنِ يِمْࢡٜ مِصْرَ، عٛدَحِ ࢡٜ دِغَ بٜرْنِيجِ، دِغَ کٜىٰرٛلْ غٛوتٛلْ حَا کٜىٰرٛلْ نغٛلَ؞ 22سٜيْ غٜسٜ لِمَنْعٜنْ تَنْ عٛسٛودَايْ، نغَمْ وٛودِنٛ عُمْرٛورٜ ڢِرْعَوْنَ مٛعَّنِ ࢡٜ؞ ࢡٜنغُورْدِ بٜى کٛ ڢِرْعَوْنَ حٛکَّتَ ࢡٜ؞ نغَمْ مَاجُمْ ࢡٜشٛورَّايْ غٜسٜ مَࢡّٜ؞ 23يُوسُڢُ وِعِ يِمْࢡٜ: «ندَا، جٛنْتَ کَمْ مِسٛودِ عٛنْ، عٛنٛنْ عٜ غٜسٜ مٛوطٛنْ نغَمْ ڢِرْعَوْنَ؞ ندَا عَاوْدِ مٛوطٛنْ، عَاوٜ غٜسٜ؞ 24وَکَّتِ شٛدٛلْ ڢُو، عٛنْ ندٛکَّنْ ڢِرْعَوْنَ يٜࢡْرٜ وٛورٜ ندٜرْ جٛوِ؞ غٜࢡٜ نَيِ لَاتَنْتٛ عٛنْ نغَمْ عَاوْدِ عٜ نغَمْ ࢩَامْدُ مٛوطٛنْ، عٛنٛنْ عٜ وٛنْࢡٜ ندٜرْ شِعٜ مٛوطٛنْ عٜ ࢡِکّٛيْ مٛوطٛنْ؞» 25ࢡٜنجَابِ: «عَحِسْنِ يٛنغْکِيجِ عَمِنْ! مِنْ کٜࢡِ مٛعّٜرٜ يٜىٰسٛ جَاغٛرْطٛ عَمِنْ، مِنْ لَاتٛتٛ مَشُّࢡٜ ڢِرْعَوْنَ؞» 26نٛنْ يُوسُڢُ وَارِ عُمْرٛورٜ ندٜرْ لٜسْدِ مِصْرَ حَا وَرْغٛ حَنْدٜ: يٜࢡْرٜ وٛورٜ ندٜرْ جٛوِ ڢِرْعَوْنَ جٜيِ؞ سٜيْ غٜسٜ لِمَنْعٜنْ تَنْ لَاتَنَاکِ ڢِرْعَوْنَ؞
عَلْکَوَلْ يَعْقُوبُ
27يِمْࢡٜ إِسْرَاءِيلَ نجٛوطِ ندٜرْ لٜسْدِ مِصْرَ، ندٜرْ لٜسْدِ غٛوسَنْ؞ ࢡٜکٜࢡِ مَرَلْ مَࢡّٜ، ࢡٜندَࢩْندَࢩْتِرِ، ࢡٜطُوطِ مَسِنْ؞ 28يَعْقُوبُ جٛوطِ ندٜرْ مِصْرَ دُوࢡِ سَݠّٛ عٜ جٛوٜىٰطِطِ (17)؞ دُوࢡِ يَعْقُوبُ نغَطِ تٜىٰمٜرّٜ عٜ شَݠَّنْطٜ نَيِ عٜ جٛوٜىٰطِطِ (147)؞ 29ندٜ سَاعِ مَايُغٛ إِسْرَاءِيلَ ࢡَدِتِ، عٛعٜوْنِ ࢡِيِيکٛ يُوسُڢُ، عٛوِعِمٛ: «تٛ عَيِطِ حِنُّغٛ يَمْ، عُسٜنِ وَلِّنْ جُنغٛ مَ شَکَ دَوْطٜ عَمْ، وَطَنَمْ مبٛوطٜىٰنغَ عٜ غٛونغَاکُ: تَا عُوَمْ حَا مِصْرَ! 30مِحَوْتٛيَنْ بٜى کَاکِرَاࢡٜ عَمْ؞ عَوُرْتِنْتَمْ مِصْرَ، عَعُوَمِّ ندٜرْ يٜنَاندٜ مَࢡّٜ؞#لَاتَانٛوجِ 49:29-32؛ 50:6؞» يُوسُڢُ جَابِ: «مِوَطَنْ ڢٛدّٜ کٛنغٛلْ مَ؞» 31يَعْقُوبُ وِعِ: «حُنَنَمْ!» يُوسُڢُ حُنَنِمٛ؞ ندٜنْ إِسْرَاءِيلَ تُرِ حَا حٛورٜ لٜىٰسٛ مُوطُمْ؞
Currently Selected:
لَاتَانٛوجِ 47: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.