لَاتَانٛوجِ 37
37
کٛيْطِ يُوسُڢُ
1يَعْقُوبُ جٛوطِ ندٜرْ لٜسْدِ کَنَانَ، حَا بَابَ مَاکٛ جٛوطِنٛ؞ 2ندَا حَبَرُ دَࢩْغٛلْ يَعْقُوبُ: يُوسُڢُ سُکَ، مَرِنٛ دُوࢡِ سَݠّٛ عٜ جٛوٜىٰطِطِ، عٛطٛنّٛ دُرْدَ بٜى دٜىٰرْطِيکٛعٜنْ، ࢡِࢡّٜ بِلْحَ عٜ ࢡِࢡّٜ زِلْݠَ، رٜوْࢡٜ بَابَ مَاکٛ؞ يُوسُڢُ يٜشِّ بَابَ مُوطُمْ کَلُّکَ کَ ࢡٜمبٛلْوَتَ؞ 3إِسْرَاءِيلَ ࢡُرِ يِطُغٛ يُوسُڢُ دٛوْ ࢡِࢡّٜ مُوطُمْ ڢُو، نغَمْ عٛدَࢩِمٛ ندٜرْ ندٛتَّاکُ مَاکٛ؞ عٛوَطَنِمٛ نغَݠَلٜىٰوٛلْ جَاغٜ؞ 4ندٜ دٜىٰرْطِرَاࢡٜ مَاکٛ نغِعِ بَابَ مَࢡّٜ ࢡُرِ يِطُغٛ مٛ دٛوْ دٜىٰرْطِرَاࢡٜ مَاکٛ ڢُو، ࢡٜنغَࢩِمٛ، ࢡٜمبٛلْوَنَايْ مٛ ندٜرْ نٜطَّاکُ سَمْ؞
5ࢩَلَادٜ وٛطْندٜ، يُوسُڢُ حٛيْطِ؞ عٛيٜشِّ طُمْ دٜىٰرْطِيکٛعٜنْ؞ ࢡٜࢡُرْتِ وَࢩُغٛ مٛ ڢَحِنْ؞ 6عٛوِعِ: «نَنٜ کٛيْطٛلْ نغٛلْ کٛيْطُمِ: 7عٜنْ طٛنّٛ کَࢡَّ ࢨٛمْبٜ حَا نغٜسَ؞ حَࢡّٜرٜ عَمْ عُمِّ، دَرِ شِرْ؞ کَࢡّٜ مٛوطٛنْ تَارِ ندٜ، شُجِدَنِ ندٜ؞» 8دٜىٰرْطِرَاࢡٜ مَاکٛ ࢨَمِمٛ: «عَيِطِ لَامَنَاغٛ مِنْ بَنَ لَامِيطٛ مَلَّ جَاغٛرْطٛ عَمِنْ کَدِ؟» ࢡٜࢡُرْتِ وَࢩُغٛ مٛ ڢَحِنْ نغَمْ کٛيْطِ مَاکٛ عٜ بٛلّٜ مَاکٛ؞
9عٛحٛيْطِ کٛيْطٛلْ غٛطْنغٛلْ ڢَحِنْ؞ عٛيٜشِّ نغٛلْ دٜىٰرْطِرَاࢡٜ مَاکٛ، عٛوِعِ: «ندَا کٛيْطٛلْ غٛطْنغٛلْ کٛيْطُمِ: نَانغٜ عٜ لٜوْرُ عٜ کٛودٜ سَݠّٛ عٜ غٛعٛ شُجِدَنِ يَمْ؞» 10عٛيٜشِّ طُمْ بَابَ مَاکٛ عٜ دٜىٰرْطِيکٛعٜنْ؞ بَابَ مَاکٛ تٜلْࢡَنِمٛ، وِعِ: «طُمٜ کٛيْطٛلْ نغٛلْ کٛيْطُطَ؟ کَدِ مِنْ نغَرَنْ، مِنْ عٜ دَادَ مَ عٜ دٜىٰرْطِرَاࢡٜ مَ، مِنْ شُجِدَ يٜىٰسٛ مَاطَ نَ؟» 11دٜىٰرْطِرَاࢡٜ مَاکٛ کَاجِمٛ، عَمَّا بَابَ مَاکٛ تٛکِّ نُمْتُغٛ طُمْ#کُوطٜ نٜلَاࢡٜ 7:9؞؞
يُوسُڢُ سٛورَّامَ حَا مِصْرَعٜنْ
12دٜىٰرْطِرَاࢡٜ يُوسُڢُ نجٜحِ حَا سِکٜمْ نغَمْ دُرُغٛ دَمّٛوجِ بَابَ مُوطُمْعٜنْ؞ 13إِسْرَاءِيلَ وِعِ يُوسُڢُ: «نَا دٜىٰرْطِرَاࢡٜ مَاطَ طٛنْ ندُرَ دَمّٛوجِ حَا سِکٜمْ؟ وَرْ، مِنٜلٜ حَا مَࢡّٜ؞» يُوسُڢُ جَابِ: «ندَا يَمْ؞» 14يَعْقُوبُ وِعِمٛ: «يَحْ، لَارْ نجَمُ دٜىٰرْطَعٜنْ عٜ نجَمُ دَمّٛوجِ، وَدَّنَمْ حَبَرُ؞» عٛنٜلِمٛ دِغَ وَادِوٛلْ حٜبُرُونْ؞ يُوسُڢُ يٜحِ سِکٜمْ؞ 15غٛطّٛ تَوِمٛ، عٛطٛنْ يِيلٛ ندٜرْ لَدّٜ؞ عٛࢨَمِمٛ: «کٛ طَࢡِّتِتَّ؟» 16عٛوِعِ: «مِطٛنْ طَࢡِّتَ دٜىٰرْطِرَاࢡٜ عَمْ؞ عُسٜنِ تِنْدِنَمْ تٛيْ ࢡٜندُرَتَ!» 17غٛطّٛ غٛ وِعِ: «ࢡٜعُمَّکٜ حَا طٛ؞ مِنَنِ ࢡٜطٛنّٛ مبِعَ: ندِلّٜنْ حَا دٛتَنْ؞» يُوسُڢُ تَاسْنِ دٜىٰرْطُمْعٜنْ، تَوِ ࢡٜ حَا دٛتَنْ؞ 18ࢡٜعٜىٰوِمٛ دِغَ دَايِيطُمْ؞ حِدّٜکٛ عٛࢡَدِتٛ ࢡٜ، ࢡٜکَࢡِّ دَبَرٜ مبَرُغٛ مٛ؞ 19ࢡٜمبِعْمبِعْتِرِ: «ندَا، کٛيْطٛووٛ طٛنْ وَرَ! 20جٛنْتَ کَمْ نغَرٜ، عٜنْ مبَرَ مٛ، شَکِّنٜنْ مٛ ندٜرْ ࢡُلْندُ؞ ندٜنْ عٜنْ مبِعَ حُوندٜ لَدّٜ ࢩَامِمٛ؞ عٜنْ نغِعَ طُمٜ کٛيْطِ مَاکٛ لَاتٛتٛ؞»
21رُبٜنْ نَنِ طُمْ؞ عٛطَࢡِّ حِسْنُغٛ مٛ جُوطٜ مَࢡّٜ، عٛوِعِ: «تَا مبَرٜنْ مٛ! 22ندٜنْ عٛࢡٜسْدِ وِعُغٛ: تَا ندُڢٜ ࢨِيࢨَمْ! ندِکَّ عٛنْ شَکِّنَ مٛ ندٜرْ ࢡُلْندُ حَا طٛ ندٜرْ لَدّٜ؞ عَمَّا تَا مٜىٰمٜ مٛ؞» طٛ نغَمْ حِسْنُغٛ مٛ دِغَ جُوطٜ مَࢡّٜ، عٛلٛرْنَ مٛ حَا بَابَ مَاکٛ؞ 23ندٜ يُوسُڢُ يٛتِّ دٜىٰرْطُمْعٜنْ، ࢡٜࢡٛرْتِمٛ نغَݠَلٜىٰوٛلْ جَاغٜ نغٛلْ عٛࢡٛرْنِنٛ؞ 24ࢡٜکٛوعِمٛ، ࢡٜشَکِّنِمٛ ندٜرْ ࢡُلْندُ؞ طُمْ ࢡُلْندُ يٛورْندُ، ندُ وَلَا ندِيَمْ؞
25ندٜنْ ࢡٜنجٛوطِ نغَمْ ࢩَامُغٛ؞ ࢡٜࢡَنغْتِ غِتٜ، ࢡٜنغِعِ يِمْࢡٜ ڢِلٛوࢡٜ ࢡٜ عَسْنغٛلْ إِسْمَـٰعِيلَ طٛنْ نغَرَ دِغَ غِلٜعَتْ؞ غٜىٰلٛوطِ مَࢡّٜ طٛنْ ندِمْندِ عُورْلٜ عٜ طَشّٜرٜ عُورْندٜ عٜ لٜطّٜ عُورْطٜ؞ ࢡٜطٛنْ نجَحْرَ طُمْ حَا مِصْرَ؞ 26يَحُودَ وِعِ دٜىٰرْطِرَاࢡٜ مُمْ: «رِبَ کَيٜ کٜࢡٜتٜنْ تٛ عٜنْ مبَرِ دٜىٰرْطِرَاوٛ مٜىٰطٜنْ، عٜنْ شُوطِ ࢨِيࢨَمْ مَاکٛ؟ 27نغَرٜ، شٛورّٜنْ مٛ حَا ڢِلٛوࢡٜ ࢡٜ عَسْنغٛلْ إِسْمَـٰعِيلَ، تَا عٜنْ مٜىٰمَ مٛ؞ نغَمْ عٛ دٜىٰرْطِرَاوٛ مٜىٰطٜنْ، عٛࢡَنْدُ مٜىٰطٜنْ؞» دٜىٰرْطِرَاࢡٜ مَاکٛ نَنَنِمٛ؞ 28ڢِلٛوࢡٜ مٜدِيَنْعٜنْ طٛنّٛ شَالٛ؞ دٜىٰرْطِرَاࢡٜ يُوسُڢُ نغُرْتِنِمٛ دِغَ ࢡُلْندُ؞ ࢡٜشٛورِّمٛ حَا ڢِلٛوࢡٜ ࢡٜ عَسْنغٛلْ إِسْمَـٰعِيلَ شٜىٰدٜ شَرْدِ نٛوغَسْ؞ کَمْࢡٜ بٛو ࢡٜنجَحْرِمٛ حَا مِصْرَ؞
29ندٜ رُبٜنْ لٛرْتِ حَا ࢡُلْندُ، عٛتَوَايْ يُوسُڢُ؞ عٛسٜىٰکِ لِمْشٜ مَاکٛ؞ 30عٛلٛرْتِ حَا دٜىٰرْطِرَاࢡٜ مَاکٛ عٛوِعِ: «دٜرْکٜىٰجٛ وَلَا تٛنْ؞ تٛيْ نجَحَنْمِ مِنْ؟»
31ࢡٜکِرْسِ نجَوْدِرِ مبٜىٰوَ، ࢡٜشُووِ نغَݠَلٜىٰوٛلْ يُوسُڢُ ندٜرْ ࢨِيࢨَمْ؞ 32ࢡٜنٜلْدِ نغٛلْ بَابَ مَࢡّٜ، بٜى وِعْغٛ: «طٛ کٛ مِنْ تَوِ؞ لَارْ، طُمْ نغَݠَلٜىٰوٛلْ ࢡِيَ مَلَّ نَا کَنغٛلْ؟» 33يَعْقُوبُ عَنْدِتِ نغٛلْ، وِعِ: «طُمْ نغَݠَلٜىٰوٛلْ ࢡِيَمْ! حُوندٜ لَدّٜ ࢩَامِمٛ! ڢَکَتْ يُوسُڢُ سٜىٰکَامَ؞» 34عٛسٜىٰکِ لِمْشٜ مَاکٛ، عٛتَادِ لِمْشٜ بُحُوجٜ؞ عٛوٛيِ ࢡِيِيکٛ ࢩَلْطٜ طُوطّٜ؞ 35ࢡِࢡّٜ مَاکٛ وٛرْࢡٜ عٜ رٜوْࢡٜ ڢُو نغَرِ نغَمْ دٜعِّتِنغٛ مٛ، عَمَّا عٛسَلِ دٜعِّتِنٜىٰغٛ؞ عٛوِعِ: «بٜى مٜتَّمْࢡٜرَمْ کَوْتٛيَنْمِ بٜى ࢡِيَمْ ندٜرْ جٛوندٜ مَايْࢡٜ؞» ندٜنْ عٛتٛکِّ وٛيُغٛ مٛ؞ 36مٜدِيَنْعٜنْ غٛ شٛورِّ يُوسُڢُ حَا مِصْرَ، حَا ݠٛتِڢَرْ، سَرَاکِيجٛ ڢِرْعَوْنَ؞ عٛ مَوْطٛ دٛوغَرِعٜنْ؞
Currently Selected:
لَاتَانٛوجِ 37: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.