لَاتَانٛوجِ 14
14
عَبْرَامَ حِسْنِ لُوطُ عٜ حٛکِّ مَلْکِسَدَکَ زَکَّ
1ندٜرْ زَمَنُ عَمْرَڢٜلْ، لَامِيطٛ سِنٜعَرْ عٜ عَرِيٛکْ، لَامِيطٛ عٜلَسَرْ عٜ کٜدٛرْلَيٛمٜرْ، لَامِيطٛ عٜلَمْ عٜ تِدَلْ، لَامِيطٛ غٛيِمْ، 2ࢡٜمبَطِ کٛنُ بٜى: بٜرَ لَامِيطٛ سٛدٛمَ عٜ بِرْسَ لَامِيطٛ غٛمٛرَّ عٜ سِنِيَبُ لَامِيطٛ عَدَمَ عٜ سٜمٜبٜرْ لَامِيطٛ شٜبٛيِمْ عٜ لَامِيطٛ بٜلَ، وَاتٛ شٛعَرْ؞ 3ࢡٜکَوْتِ، ࢡٜنغَرِ ندٜرْ وَادِوٛلْ سِدِمْ، طُمْ وٜىٰندُ مَنْدَ؞ 4دُوࢡِ سَݠّٛ عٜ طِطِ ࢡٜطٛوْتَنِنٛ کٜدٛرْلَيٛمٜرْ، عَمَّا ندٜرْ ندُوࢡُ سَݠّٛ عٜ تَتَࢡُ ࢡٜتُورْتَنِمٛ؞ 5ندٜرْ ندُوࢡُ سَݠّٛ عٜ نَيَࢡُ، کٜدٛرْلَيٛمٜرْ عٜ لَامِيࢡٜ وٛنْدُࢡٜ بٜى مُوطُمْ نغَرِ، نجَالِ رٜڢَعٜنْ حَا عَسْتٜرٛتْ-کَرْنَيِمْ عٜ سُسِعٜنْ حَا حَمَ عٜ عٜمِعٜنْ حَا يَيْرٜ کِرِيَتَيِمْ، 6حٛرِعٜنْ بٛو، ࢡٜکَࢡِ بٜى مُوطُمْعٜنْ دٛوْ حٛوسٜىٰرٜ مَࢡّٜ سٜعِرْ، حَا يٛتِّ عٜلْ-ݠَرَنْ بَنغٜ لَدّٜ؞ 7ندٜنْ ࢡٜلٛرِ، ࢡٜنغَرِ حَا عٜنْ-مِسْݠَتْ، طُمْ وٛنِ کَادٜسْ؞ ࢡٜنجَالِ عَمَلٜکِعٜنْ ندٜرْ لٜسْدِ مُوطُمْعٜنْ ڢُو، نٛنْ بٛو عَمٛورِعٜنْ وٛنْࢡٜ حَا حَسَسٛنْ-تَمَرْ؞ 8ندٜنْ لَامِيࢡٜ سٛدٛمَ عٜ غٛمٛرَّ عٜ عَدَمَ عٜ شٜبٛيِمْ عٜ بٜلَ، وَاتٛ شٛعَرْ، ࢡٜ ڢُو ࢡٜنغُرْتِ، ࢡٜتَاسْکَنِ کٛنُ ندٜرْ وَادِوٛلْ سِدِمْ؞ 9ࢡٜکَࢡِ بٜى کٜدٛرْلَيٛمٜرْ مٛ عٜلَمْ عٜ تِدَلْ مٛ غٛيِمْ عٜ عَمْرَڢٜلْ مٛ سِنٜعَرْ عٜ عَرِيٛکْ مٛ عٜلَسَرْ، وَاتٛ لَامِيࢡٜ نَيٛ کٛنَتَ نجٛوٛ؞ 10عَمَّا وَادِوٛلْ سِدِمْ حٜىٰوِ غَسَرْطٜ تَارِ لٜسْدِ؞ ندٜرْ دٛغُّدُ مَࢡّٜ، لَامِيࢡٜ سٛدٛمَ عٜ غٛمٛرَّ ندٛعِّ ندٜرْ تٛنْ؞ لُتُّࢡٜ ندٛغِّ، مبَعِّ کٛوسٜىٰجٜ؞ 11جَالِيࢡٜ کٛوشِ جَوْدِ سٛدٛمَ عٜ غٛمٛرَّ عٜ ࢩَامْدُ وٛنْدُ تٛنْ ڢُو، ندٜنْ ࢡٜندِلِّ؞ 12ࢡٜکٛوعِ بٛو لُوطُ، ࢡِي دٜىٰرْطِرَاوٛ عَبْرَامَ، بٜى کٛ عٛمَرِ ڢُو، ࢡٜندِلِّرِ؞ لُوطُ طٛنّٛ جٛوطِ حَا سٛدٛمَ؞
13غٛطّٛ دَطّٛ وَرِ، عَنْدِنِ عَبْرَامَ عِبْرَنِنغْکٜىٰجٛ حَبَرُ مَاجُمْ؞ عَبْرَامَ طٛنّٛ جٛوطِ لٜسْ لٜطّٜ مَوْطٜ طٜ مَمْرٜ عَمٛورِيجٛ، دٜىٰرْطِرَاوٛ عٜسْکٛلْ عٜ عَنٜرْ غٛ؞ کَمْࢡٜ کَࢡُّنٛ عَلْکَوَلْ بٜى عَبْرَامَ؞ 14ندٜ عَبْرَامَ نَنِ ࢡٜنجَحْرِ بَنْدِيکٛ کَࢡَّاطٛ، عٛمٛوࢡْتِ سُکَعٜنْ مَاکٛ وَاوْࢡٜ کٛنُ، دَࢩَاࢡٜ ندٜرْ سَارٜ مَاکٛ، وٛرْࢡٜ تٜىٰمٜطّٜ تَتٛ عٜ سَݠّٛ عٜ نجٛوٜىٰتَتٛ (318)؞ عٛتَاسْنِ کٛنّٜعٜنْ حَا يٛتِّ دَنْ؞ 15عٛسٜنْدِتِ يِمْࢡٜ مَاکٛ غٜࢡٜ غٜࢡٜ، نغَمْ ࢡٜعُکَّنٛ ࢡٜ جٜمَّ؞ عٛجَالِ ࢡٜ، عٛتَاسْنِ ࢡٜ حَا يٛتِّ حٛبَ، حَا وٛيْلَ دَمَسْ؞ 16عٛوَرْتِرِ مَرْدِ مَࢡّٜ ڢُو؞ نٛنْ عٛوَرْتِرِ بٛو لُوطُ، بَنْدِيکٛ عٜ مَرْدِ مَاکٛ ڢُو عٜ رٜوْࢡٜ عٜ يِمْࢡٜ وٛطْࢡٜ؞
17ندٜ عَبْرَامَ طٛنْ لٛرْتَ ࢡَاوٛ عٛجَالِ کٜدٛرْلَيٛمٜرْ عٜ لَامِيࢡٜ وٛنْدُࢡٜ بٜى مُوطُمْ، لَامِيطٛ سٛدٛمَ وُرْتِ ڢٛتِّ بٜى مَاکٛ ندٜرْ وَادِوٛلْ سَوٜ، وَاتٛ وَادِوٛلْ لَامِيطٛ؞ 18مَلْکِسَدَکَ، لَامِيطٛ سَلَامَ وَدِّ تَمْسٜىٰرٜ عٜ عِنَبٛوجَمْ؞ عٛلِمَنْجٛ اَللَّه ࢡَنغِيطٛ؞ 19عٛبَرْکِطِنِ عَبْرَامَ، عٛوِعِ: «بَرْکَ لَاتَنٛ عَبْرَامَ دِغَ اَللَّه ࢡَنغِيطٛ، مٛ تَغِ عَسَمَ عٜ لٜسْدِ؞ 20يٜتّٛورٜ لَاتَنٛ اَللَّه ࢡَنغِيطٛ بٛو، مٛ حٛکِّ مَ کٛنّٜعٜنْ مَاطَ حَا جُنغٛ مَ؞» عَبْرَامَ عِتَّنِمٛ زَکَّ#14:20 زَکَّ طُمْ يٜࢡْرٜ وٛورٜ ندٜرْ سَݠّٛ کٛ غٛطّٛ حٛکَّتَ اَللَّه؞ حَا کُوجٜ ڢُو#عِبْرَنِنغْکٜعٜنْ 7:1-10؞؞ 21لَامِيطٛ سٛدٛمَ وِعِ عَبْرَامَ: «حٛکَّمْ يِمْࢡٜ، جٛغِتَ جَوْدِ نغَمْ مَاطَ؞» 22عَبْرَامَ جَابِمٛ: «مِطٛنْ ࢡَنغْتَ جُنغٛ عَمْ حُنَاغٛ يٜىٰسٛ جَوْمِرَاوٛ، اَللَّه ࢡَنغِيطٛ، تَغْطٛ عَسَمَ عٜ لٜسْدِ: 23مِحٛوعَتَا کٛو طُمٜ حَا کٛ مَرْطَ، دِغَ غَارَوٛلْ حَا لٛکُّلٛلْ ݠَطٜ! نغَمْ تَا مبِعَ عَرِسْکِنِ عَبْرَامَ؞ 24مِحٛوعَتَا کٛو طُمٜ نغَمْ عَمْ! سٜيْ کٛ سُکَعٜنْ عَمْ ࢩَامِ عٜ غٜطَلْ وٛرْࢡٜ يَحْدُࢡٜ بٜى عَمْ، عَنٜرْ عٜ عٜسْکٛلْ عٜ مَمْرٜ، کَمْࢡٜ ࢡٜکٛوعَ غٜطَلْ مَࢡّٜ؞»
Currently Selected:
لَاتَانٛوجِ 14: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.