غُرْتَاکِ 29
29
سَرْطِيجِ نغَمْ لِيعٜىٰکِ لِمَنْعٜنْ
1«ندَا کٛ عَوَطَتَ نغَمْ عَسٜنَ لِمَنْعٜنْ حَا ࢡٜکُووَنَمِّ کُوغَلْ لِمَنْکُ: حٛوعُ نغَارِ کَلْحَلْدِ عٜ جَوْطِ بَالِ طِطِ طِ نغَلَا عَيْبٜ 2عٜ تَمْسٜىٰجٜ طٜ عُڢْنَاکَ عٜ تَمْسٜىٰجٜ طٜ عُڢْنَاکَ جِيࢡَاطٜ بٜى نٜبَّمْ عٜ تَمْسٜىٰجٜ بٜتّٜ طٜ عُڢْنَاکَ، غُجَاطٜ بٜى نٜبَّمْ؞ سٜيْ عَوَطَ طٜ ڢُو بٜى کُرٛورِ عَلْکَمَارِ طِغُّندِ؞ 3وَاتُ طٜ ندٜرْ سِلَاوٛ، لِيعَنَمْ طٜ ندٜرْ سِلَاوٛ حَوْتَادٜ بٜى کَلْحَلْدِ عٜ جَوْطِ بَالِ طِطِ غٛ؞ 4ࢡَدِتِنْ هَـٰرُونَ عٜ ࢡِکّٛيْ مُوطُمْ حَا دَمُّغَلْ لَيْمَارُ ڢٛتِّرْدٜ؞ ࢡٜلَࢡِّنَ کٛعٜ مَࢡّٜ بٜى ندِيَمْ؞ 5حٛوعُ لِمْشٜ غٛ، ࢡٛرْنُ هَـٰرُونَ تٛغّٛورٜ عٜ عَلْکِبَّارٜ عٜ طَنْشِکِيرٜ عٜ جِيبَ وِࢡّٜرٜ؞ حَࢡُّ طُمْ بٜى تَادٛرْغٛلْ طَنْشِکِيرٜ؞ 6مٜىٰتُ مٛ مٜىٰتَلٜىٰوٛلْ، وَطْ عَلَامَ سٜنَارٜ حَا مٜىٰتَلٜىٰوٛلْ؞ 7حٛوعُ نٜبَّمْ شٜنِرْطَمْ؞ رُڢْ طَمْ دٛوْ حٛورٜ مَاکٛ؞ 8ࢡَدِتِنْ ࢡِࢡّٜ مَاکٛ بٛو، ࢡٛرْنُ ࢡٜ تٛغّٛوجٜ؞ 9تَادُ ࢡٜ تَادٛرْغٛلْ، حُڢْنُ ࢡٜ کُڢْنٜىٰجٜ؞ ࢡٜلَاتٛ لِمَنْعٜنْ بٜى ڢَرِلَّ عَمْ ندُومِيکَ؞ بَنَ نٛنْ عَنَسْتِنِرْتَ هَـٰرُونَ عٜ ࢡِکّٛيْ مُمْ ندٜرْ کُوغَلْ مُوطُمْعٜنْ؞
10«وَدُّ کَلْحَلْدِ غٛ يٜىٰسٛ لَيْمَارُ ڢٛتِّرْدٜ؞ هَـٰرُونَ عٜ ࢡِکّٛيْ مُمْ نجٛوَ جُوطٜ دٛوْ حٛورٜ مَارِ؞ 11حِرْسُ ندِ يٜىٰسٛ جَوْمِرَاوٛ حَا دَمُّغَلْ لَيْمَارُ ڢٛتِّرْدٜ؞ 12حٛوعُ ࢨِيࢨَمْ کَلْحَلْدِ، وُجُ طَمْ بٜى حٛوندُ مَ حَا تَلْکُمٛوجٜ حِرْسِرْدٜ؞ رُڢْ ࢨِيࢨَمْ لُتُّطَمْ حَا لٜسْ حِرْسِرْدٜ؞ 13حٛوعُ ࢡٜلّٜرٜ سُدُّندٜ تٜتٜکِ عٜ ࢡٜلّٜرٜ دٛوْ حٜنغْرٜ عٜ ࢡٛوࢨٜ طِطِ ڢُو بٜى ࢡٜلّٜرٜ وٛنْدٜ دٛوْ مَاجٜ؞ عَوُلَ طُمْ ڢُو دٛوْ حِرْسِرْدٜ؞ 14کُسٜلْ کَلْحَلْدِ عٜ لَرَلْ مَارِ عٜ شٛووٛووٜ مَارِ، عَوُلَ طُمْ بٜى يِيتٜ يَاسِ سَنغٜىٰرٜ؞ کَنْجُمْ وٛنِ کِرْسٜتٜىٰنغَ نغَمْ عِتُّغٛ حَکّٜ؞
15«ندٜنْ حٛوعُ نغٛورِ جَوْطِ بَالِ؞ هَـٰرُونَ عٜ ࢡِکّٛيْ مُمْ نجٛوَ جُوطٜ دٛوْ حٛورٜ مَارِ؞ 16حِرْسُ ندِ، حٛوعُ ࢨِيࢨَمْ مَارِ، وِشُّ طَمْ حَا بُتُّلِ حِرْسِرْدٜ نَيِ ڢُو؞ 17تَعُ نجَوْدِرِ غٜࢡٜ غٜࢡٜ؞ لٛوتُ تٜتٜکِ مَارِ عٜ کٛلْشٜ مَارِ؞ وَلِّنْ طُمْ دٛوْ غٜࢡٜ مَارِ عٜ حٛورٜ مَارِ؞ 18عَوُلَ نجَوْدِرِ ڢُو دٛوْ حِرْسِرْدٜ؞ کَنْجُمْ وٛنِ نغُلٜتٜىٰنغَ نغَ يِيتٜ ࢩَامَتَ طُمْ نغَمْ جَوْمِرَاوٛ، عُورٜىٰنغٛلْ بٜلْنغٛلْ مَاغَ ڢٛتَّنَنْ جَوْمِرَاوٛ#عٜڢٜسُعٜنْ 5:2؛ ڢِلِݠِّعٜنْ 4:18؞؞
19«ندٜنْ حٛوعُ نجَوْدِرِ طِطَوْرِ؞ هَـٰرُونَ عٜ ࢡِکّٛيْ مُمْ نجٛوَ جُوطٜ دٛوْ حٛورٜ مَارِ؞ 20حِرْسُ ندِ، حٛوعُ ࢨِيࢨَمْ مَارِ، وَطْ طَمْ حَا دٜبْلٜکٜىٰرٜ نٛڢْرُ ࢩَامْرُ هَـٰرُونَ عٜ ࢡِࢡّٜ مُمْ ڢُو؞ نٛنْ بٛو حَا حٛوندُ وٛرْدُ جُنغٛ مَࢡّٜ ࢩَامٛ عٜ ندُ کٛسْنغَلْ مَࢡّٜ ࢩَامَلْ؞ وِشُّ ࢨِيࢨَمْ لُتُّطَمْ حَا بُتُّلِ حِرْسِرْدٜ ڢُو؞ 21حٛوعُ ࢨِيࢨَمْ نغٛنْطَمْ دٛوْ حِرْسِرْدٜ عٜ نٜبَّمْ شٜنِرْطَمْ، وِشُّ طَمْ دٛوْ هَـٰرُونَ عٜ لِمْشٜ مُوطُمْ، وِشُّ طَمْ بٛو دٛوْ ࢡِࢡّٜ مَاکٛ عٜ لِمْشٜ مَࢡّٜ؞ بَنَ نٛنْ عٛسٜنٛرْتٛ، کَنغْکٛ عٜ لِمْشٜ مَاکٛ، نٛنْ بٛو ࢡِࢡّٜ مَاکٛ عٜ لِمْشٜ مَࢡّٜ؞
22«حٛوعُ ࢡٜلّٜرٜ نجَوْدِرِ عٜ وِشّٛ عٜ ࢡٜلّٜرٜ سُدُّندٜ تٜتٜکِ عٜ ࢡٜلّٜرٜ دٛوْ حٜنغْرٜ عٜ ࢡٛوࢨٜ طِطِ ڢُو بٜى ࢡٜلّٜرٜ وٛنْدٜ دٛوْ مَاجٜ عٜ دَنغٛ ࢩَامٛ نغَمْ طُمْ نجَوْدِرِ نغَمْ کَلْڢِتِنْکِ کُوغَلْ؞ 23حٛوعُ بٛو تَمْسٜىٰرٜ وٛورٜ عٜ تَمْسٜىٰرٜ جِيࢡَاندٜ بٜى نٜبَّمْ وٛورٜ عٜ تَمْسٜىٰرٜ وٜتّٜرٜ وٛورٜ حَا سِلَاوٛ تَمْسٜىٰجٜ طٜ عُڢْنَاکَ، جٛعِّنَانغٛ يٜىٰسٛ جَوْمِرَاوٛ؞ 24وَلِّنْ طُمْ ڢُو دٛوْ جُوطٜ هَـٰرُونَ عٜ جُوطٜ ࢡِࢡّٜ مُمْ، ࢡٜࢡَنغْتَ طُمْ، ࢡٜلِيعٛ طُمْ يٜىٰسٛ جَوْمِرَاوٛ؞ 25ندٜنْ حٛوعُ طُمْ ڢَحِنْ حَا جُوطٜ مَࢡّٜ، عَوُلَ طُمْ دٛوْ حِرْسِرْدٜ، حَا دٛوْ نغُلٜتٜىٰنغَ؞ کَنْجُمْ وٛنِ نغُلٜتٜىٰنغَ نغَ يِيتٜ ࢩَامَتَ طُمْ نغَمْ جَوْمِرَاوٛ، عُورٜىٰنغٛلْ بٜلْنغٛلْ مَاغَ ڢٛتَّنَنْ جَوْمِرَاوٛ؞
26«حٛوعُ بِيوٛلْ نجَوْدِرِ ندِ کِرْسُطَ نغَمْ حَلْڢِنغٛ هَـٰرُونَ کُوغَلْ مُمْ؞ ࢡَنغْتُ نغٛلْ، لِيعَ نغٛلْ يٜىٰسٛ جَوْمِرَاوٛ؞ نغٛلْ لَاتٛ غٜطَلْ مَ؞ 27دِغَ نجَوْدِرِ نغَمْ کَلْڢِتِنْکِ کُوغَلْ حَا هَـٰرُونَ عٜ ࢡِࢡّٜ مُوطُمْ، سٜنْ بِيوٛلْ لِيعَانغٛ عٜ دَنغٛ عِتَّانغٛ نغَمْ جَوْمِرَاوٛ غٛ؞ 28طُمْ لَاتٛ غٜطَلْ هَـٰرُونَ عٜ ࢡِکّٛيْ مُمْ بٜى ڢَرِلَّ ندُومِيکَ حَا إِسْرَاءِيلَعٜنْ، نغَمْ طُمْ دٛکَّلْ عِتَّانغَلْ؞ دٛکَّلْ مَنْ، إِسْرَاءِيلَعٜنْ عِتَّ نغَلْ عٜ کِرْسٜتٜىٰطِ مُوطُمْعٜنْ نغَمْ کَوْتَلْ بٜى اَللَّه؞ طُمْ دٛکَّلْ مَࢡّٜ عِتَّانغَلْ نغَمْ جَوْمِرَاوٛ؞
29«لِمْشٜ هَـٰرُونَ شٜنِيطٜ لَاتَنٛ ࢡِکّٛيْ مُمْ ࢡَاوٛ مَاکٛ، وَکَّتِ سٜنُغٛ عٜ حَلْڢِتِنَنْغٛ ࢡٜ کُوغَلْ مَࢡّٜ؞ 30ࢡِطّٛ هَـٰرُونَ لَاتٛتٛوطٛ لِمَنْجٛ ࢡَاوٛ بَابَ مُمْ، ࢡٛرْنٛ طٜ ࢩَلْطٜ جٛوٜىٰطِطِ، ندٜنْ عٛنَسْتَ لَيْمَارُ ڢٛتِّرْدٜ نغَمْ کُوغَلْ مَاکٛ؞
31«حٛوعُ نجَوْدِرِ نغَمْ کَلْڢِتِنْکِ کُوغَلْ، عَدٜڢَ کُسٜلْ مَارِ حَا نٛکُّورٜ سٜنِيندٜ؞ 32هَـٰرُونَ عٜ ࢡِکّٛيْ مُمْ ࢩَامَ کُسٜلْ مَنْ عٜ تَمْسٜىٰجٜ غٛنْطٜ ندٜرْ سِلَاوٛ، ࢡٜࢩَامَ طُمْ حَا دَمُّغَلْ لَيْمَارُ ڢٛتِّرْدٜ؞ 33ࢡٜࢩَامَ کٛ حِرْسٜ نغَمْ يَاڢُيٜ حَکّٜىٰجِ مَࢡّٜ وَکَّتِ حَلْڢِتِنَنْغٛ ࢡٜ کُوغَلْ عٜ سٜنُغٛ ࢡٜ؞ جَنَنّٛ ࢩَامَتَا طُمْ، نغَمْ طُمْ شٜنَاطُمْ؞ 34تٛ وٛودِ کٛ لُتِّ عٜ کُسٜلْ نغَمْ کَلْڢِتِنْکِ کُوغَلْ عٜ تَمْسٜىٰجٜ مَنْ حَا ڢَجِرِ، سٜيْ عَوُلَ طُمْ بٜى يِيتٜ؞ طُمْ ࢩَامَتَاکٜ، نغَمْ طُمْ شٜنَاطُمْ؞
35«عَوَطَنَ هَـٰرُونَ عٜ ࢡِکّٛيْ مُمْ ڢٛدّٜ کٛ مِعُمْرِ مَ ڢُو؞ وَطْ جُولْدٜ کَلْڢِتِنْکِ کُوغَلْ مَࢡّٜ ࢩَلْطٜ جٛوٜىٰطِطِ؞ 36ࢩَلَادٜ ڢُو لِيعَنَمْ نغَارِ کَلْحَلْدِ کِرْسٜتٜىٰندِ نغَمْ عِتُّغٛ حَکّٜ؞ لَࢡِّنْ حِرْسِرْدٜ بٜى لِيعَاغٛ کِرْسٜتٜىٰنغَ مَنْ نغَمْ مَارٜ؞ وُجُ ندٜ بٜى نٜبَّمْ نغَمْ عَسٜنَ ندٜ؞ 37ࢩَلْطٜ جٛوٜىٰطِطِ لِيعَنَمْ کِرْسٜتٜىٰنغَ يَاڢُيٜ نغَمْ حِرْسِرْدٜ، عَسٜنَ ندٜ؞ بَنَ نٛنْ حِرْسِرْدٜ لَاتٛرْتٛ ࢡُرْندٜ سٜنَاغٛ؞ کٛ مٜىٰمَتَ حِرْسِرْدٜ ڢُو، سٜنٛتٛ؞»
کِرْسٜتٜىٰطِ ࢩَلَادٜ ࢩَلَادٜ
38«ندَا کٛ عَلِيعَنْتٛ يَمْ دٛوْ حِرْسِرْدٜ: ࢩَلَادٜ ڢُو نجَوْکٛيْ طِطٛيْ کٛيْ ندُوࢡُ؞ 39لِيعَنَمْ جَوْغٜلْ غٛوتٜلْ ڢَجِرِ، جَوْغٜلْ طِطَࢡٜلْ بٛو مَنغَرِبَ؞ 40ࢡٜسْدُ کُرٛورِ طِغُّندِ عَغٛدَ تَتِ، نجِيࢡَاندِ بٜى نٜبَّمْ جَيْتُنْجٜ عَرْࢡَاطٜ لِيتِرْ غٛوتٜلْ عٜ عِنَبٛوجَمْ لِيتِرْ غٛوتٜلْ نغَمْ دٛکَّلْ دُڢٜتٜىٰنغَلْ؞ طُمْ يَحْدَنْ بٜى جَوْغٜلْ عَرَنٜلْ؞ 41لِيعَنَمْ جَوْغٜلْ طِطَࢡٜلْ مَنغَرِبَ؞ ࢡٜسْدُ دٛوْ مَاغٜلْ دٛکَّلْ ࢩَامْدُ عٜ دٛکَّلْ دُڢٜتٜىٰنغَلْ بَنَ ڢَجِرِ؞ کَنْجُمْ وٛنِ کِرْسٜتٜىٰنغَ نغَ يِيتٜ ࢩَامَتَ طُمْ نغَمْ جَوْمِرَاوٛ، عُورٜىٰنغٛلْ بٜلْنغٛلْ مَاغَ ڢٛتَّنَنْ جَوْمِرَاوٛ؞ 42نغُلٜتٜىٰنغَ مَنْ تَبِتَ ڢٛرٛيْ ندٜرْ غِدٜ مٛوطٛنْ ڢُو، حَا دَمُّغَلْ لَيْمَارُ ڢٛتِّرْدٜ يٜىٰسٛ جَوْمِرَاوٛ، نٛکُّورٜ ندٜ مِڢٛتَّتَ بٜى مٛوطٛنْ، ندٜ مِوٛلْوَنْتٜ عٜ مُوطُمْ بٛو؞ 43تٛنْ ݠٛتَّنْمِ بٜى إِسْرَاءِيلَعٜنْ، تٜدُّنغَلْ عَمْ سٜنَنْ نٛکُّورٜ مَنْ؞ 44مِسٜنَنْ لَيْمَارُ ڢٛتِّرْدٜ عٜ حِرْسِرْدٜ، مِسٜنَنْ بٛو هَـٰرُونَ عٜ ࢡِࢡّٜ مُمْ، نغَمْ ࢡٜکُووَنَمِّ کُوغَلْ لِمَنْکُ؞ 45مِجٛوطٛتٛ شَکَ إِسْرَاءِيلَعٜنْ، مِلَاتٛتٛ اَللَّه مَࢡّٜ؞ 46ࢡٜعَنْدَنْ مِنْ وٛنِ جَوْمِرَاوٛ اَللَّه مَࢡّٜ، غُرْتِنْطٛ ࢡٜ لٜسْدِ مِصْرَ، حَا مِجٛوطٛ شَکَ مَࢡّٜ؞ مِنْ وٛنِ جَوْمِرَاوٛ اَللَّه مَࢡّٜ؞»
Currently Selected:
غُرْتَاکِ 29: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.