غُرْتَاکِ 21
21
عُمْرٛوجٜ دٛوْ جٛوندٜ جٜيَاࢡٜ
1جَوْمِرَاوٛ ࢡٜسْدِ وِعُغٛ: «ندَا کِيتَاجِ غٛطِّ طِ عَعَنْدِنْتَ إِسْرَاءِيلَعٜنْ: 2تٛ عٛنْ شٛودِ مَشُّطٛ عِبْرَنِنغْکٜىٰجٛ، عٛلَاتٛتٛ مَشُّطٛ دُوࢡِ جٛوٜىٰغٛ؞ ندٜرْ ندُوࢡُ نجٛوٜىٰطِطَࢡْرُ عٛوُرْتٛ عٛدِمٛ، وَلَا کٛ عٛيٛࢡَتَ؞ 3تٛ عٛوَرِ ڢٜىٰرٜ مَاکٛ، عٛوُرْتٛ بٛو ڢٜىٰرٜ مَاکٛ؞ تٛ عٛوَرْدِ بٜى دٜبّٛ، دٜبّٛ مَاکٛ وُرْتِدٛ بٜى مَاکٛ؞ 4تٛ جَوْمِيکٛ حٛکِّمٛ دٜبّٛ، دٜبّٛ بٛو دَࢩَنِمٛ ࢡِࢡّٜ وٛرْࢡٜ مَلَّ رٜوْࢡٜ، ندٜنْ کَمْ دٜبّٛ عٜ ࢡِکّٛيْ مُمْ لَاتَنٛ جَوْمُمْ، غٛطّٛ عٛو وُرْتٛ ڢٜىٰرٜ مُمْ؞ 5عَمَّا تٛ مَشُّطٛ عٛو وِعِ: مِيِطِ جَوْمَمْ عٜ دٜبّٛ عَمْ عٜ ࢡِکّٛيْ عَمْ، مِيِطَا رِمْطُغٛ، 6ندٜنْ کَمْ جَوْمِيکٛ يَحْرَ مٛ يٜىٰسٛ اَللَّه، عٛدَرْنَ مٛ حَا کٛسْطٜ ݠَرٜوَلْ دَمُّغَلْ مَلَّ حَا دَرْنُنغَلْ دَمُّغَلْ سَارٜ؞ جَوْمِيکٛ تُڢَ مٛ نٛڢْرُ بٜى تُڢِرْطُمْ، عٛلَاتٛ مَشُّطٛ مَاکٛ حَا ڢٛرٛيْ#ڢَرِلَّاجِ لٜوِعٜنْ 25:39-46؞؞
7«تٛ غٛطّٛ سٛورِّ ࢡِيُمْ دٜبّٛ عٛلَاتٛ کٛرْطٛ، تَا عٛوُرْتٛ بَنَ مَشُّࢡٜ نغُرْتٛرْتٛ؞ 8تٛ جَوْمِيکٛ سٛودِمٛ نغَمْ عٛتٜعَ مٛ، ندٜنْ عٛيِطَا مٛ، سٜيْ عٛعَشَّ غٛطّٛ سٛوتَّ مٛ؞ عٛوَلَا دُنغَيٜىٰرٜ سٛورُّغٛ مٛ حَا جَنَنْࢡٜ، نغَمْ عٛيٜوِ عَلْکَوَلْ نغَلْ ࢡٜکَࢡّٛتِرِنٛ؞ 9تٛ عٛسٛودِمٛ نغَمْ ࢡِيِيکٛ غٛرْکٛ، سٜيْ عٛوَطَنَ مٛ ڢٛدّٜ کٛ وٛونَنِ ࢡِࢡّٜ رٜوْࢡٜ؞ 10تٛ عٛتٜعِ دٜبّٛ ڢٜىٰرٜ، تَا عٛعُسْتَنَ عٛيَ ࢩَامْدُ عٜ کٛلْتٜ عٜ غٛنْدَلْ بٜى مَاکٛ؞ 11تٛ عٛوَطَنَايْ مٛ کُوجٜ تَتِ طٜعٜ، سٜيْ دٜبّٛ وُرْتٛ عٛدِمٛ، وَلَا کٛ عٛيٛࢡَتَ؞»
عَيْبٜىٰجِ جَحْرَنْطِ غٛطّٛ حَا مَايْدٜ
12«کٛو مٛيْ ڢِيِ غٛطّٛ حَا عٛمَايِ، عٛ مبَرٜتٜىٰطٛ#ڢَرِلَّاجِ لٜوِعٜنْ 24:17؞؞ 13عَمَّا تٛ عٛوَطَايْ عَنِّيَ مبَرُغٛ مٛ، تٛ اَللَّه ڢٛتِّنِ طُمْ بٜى جُنغٛ مَاکٛ، ندٜنْ کَمْ مِتَعَنَنْ عٛنْ نٛکُّورٜ ندٜ عٛدٛغَّتَ عٛحِسَ تٛنْ#لِمْلٜ 35:10-34؛ تٛوکْتَاکِ تَوْرٜىٰتَ 19:1-13؛ يٛسُوَ 20:1-9؞؞ 14عَمَّا تٛ غٛطّٛ حَࢡِّ دَبَرٜ دٛوْ کٜىٰدِّطُّمْ، عٛمبَرِمٛ بٜى عَنِّيَ، ندٜنْ کَمْ نَنغٜ مٛ، مبَرٜ مٛ کٛو تٛ عٛدٛغِّ حِسْنُغٛ حٛورٜ مَاکٛ حَا حِرْسِرْدٜ عَمْ؞
15«کٛو مٛيْ ڢِيِ بَابَ مُمْ مَلَّ دَادَ مُمْ، عٛ مبَرٜتٜىٰطٛ؞
16«کٛو مٛيْ وُجِّ غٛطّٛ، کٛو نغَمْ سٛورُّغٛ مٛ، کٛو نغَمْ جٛغَاغٛ مٛ، عٛ مبَرٜتٜىٰطٛ#تٛوکْتَاکِ تَوْرٜىٰتَ 24:7؞؞
17«کٛو مٛيْ نَالِ بَابَ مُمْ مَلَّ دَادَ مُمْ، عٛ مبَرٜتٜىٰطٛ؞ #ڢَرِلَّاجِ لٜوِعٜنْ 20:9؛ مَتَّ 15:4؛ مَرْکُسْ 7:10؞
18«تٛ يِمْࢡٜ طٛنْ نجٛکِّرَ، عٛو لُکِّ عٛيَ مَلَّ عٛڢِطِمٛ بٜى حَيْرٜ، عَمَّا نَاوْنَاطٛ عٛو مَايَايْ، سٜيْ عٛوَالِ حَا بٜعِّتّٜ، 19تٛ عٛوَاوَنْ عُمَّاغٛ، عٛوَانْشَ حَا يَاسِ بٜى تُغَّارُ، ݠِيْطٛ مٛ حِيتَتَاکٜ؞ عَمَّا سٜيْ عٛسُکْلٛ بٜى مَاکٛ حَا تٛ عٛيَمْطِتَکٜ، عٛيٛࢡَ مٛ بٛو وَکَّتِيجِ طِ عٛوَاوَايْ حُووُغٛ؞
20«تٛ غٛطّٛ ڢِيِ مَشُّطٛ مُمْ مَلَّ کٛرْطٛ مُمْ بٜى سَوْرُ حَا عٛمَايِ ندٜرْ جُنغٛ مُمْ، طُمْ وَاتٜ حَا مَاکٛ؞ 21عَمَّا تٛ مَشُّطٛ مَلَّ کٛرْطٛ عٛو يٜىٰطِ ڢَحِنْ ࢩَلَادٜ وٛورٜ مَلَّ ࢩَلْطٜ طِطِ، تَا طُمْ وَاتٜ حَا مَاکٛ، نغَمْ عٛجَوْدِ مَاکٛ؞
22«تٛ وٛرْࢡٜ طٛنْ نجٛکِّرَ، ندٛڢْلِ دٜبّٛ رٜىٰدُوجٛ حَا عٛرُڢِ رٜىٰدُ#21:22 ڢَسَّرُويٜ ڢٜىٰرٜ طٛنْ وِعَ: حَا عٛدَࢩِ ࢡِنغٜلْ نغٜلْ لٜبِّ مَاغٜلْ شِکَايْ؞ ، عَمَّا سَرُّ نغٛطْنغُ وَلَا، سٜيْ دٛڢْلُطٛ دٜبّٛ عٛو يٛࢡَ شٜىٰدٜ طٜ غٛرِيکٛ يٛوَنِمٛ؞ عٛيٛࢡَ طُمْ ڢٛدّٜ کٛ حِيتٛوࢡٜ تَعِ؞ 23عَمَّا تٛ وٛودِ کٛ حٜࢡِ دٜبّٛ عٛو دَلِيلَ سَرُّ نغُعُ، سٜيْ ࢡٜکِيتٛ نَاوْنُطٛ مٛ يٛنغْکِ بٜى يٛنغْکِ، 24يِيتٜرٜ بٜى يِيتٜرٜ، ࢩِينْدٜرٜ بٜى ࢩِينْدٜرٜ، جُنغٛ بٜى جُنغٛ، کٛسْنغَلْ بٜى کٛسْنغَلْ#ڢَرِلَّاجِ لٜوِعٜنْ 24:19-20؛ تٛوکْتَاکِ تَوْرٜىٰتَ 19:21؛ مَتَّ 5:38؞، 25وُلَنْدٜ بٜى وُلَنْدٜ، حُودُورٜ بٜى حُودُورٜ، طَالْنٜرٜ بٜى طَالْنٜرٜ؞
26«تٛ غٛطّٛ ڢِيِ مَشُّطٛ مَلَّ کٛرْطٛ مُمْ، ڢُسِمٛ يِيتٜرٜ، سٜيْ عٛيٛوڢْتَ مٛ عٛدِمٛ مبَتُّدِ يِيتٜرٜ مَاکٛ؞ 27تٛ عٛيٜوِمٛ ࢩِينْدٜرٜ، سٜيْ عٛيٛوڢْتَ مٛ عٛدِمٛ مبَتُّدِ ࢩِينْدٜرٜ مَاکٛ؞»
عُمْرٛوجٜ دٛوْ سَرُّ ڢٜىٰرٜ ڢٜىٰرٜ
28«تٛ نغَارِ حَوِ غٛرْکٛ مَلَّ دٜبّٛ حَا عٛمَايِ، نغَارِ مَنْ ڢِطٜ بٜى کَاعٜ، عَمَّا کُسٜلْ مَارِ ࢩَامَتَاکٜ؞ جَوْمُ نغَارِ وَلَا عَيْبٜ؞ 29عَمَّا تٛ ندِ کَوٛورِ دِغَ نَانٜ، ࢡٜ عَنْدِنْࢡٜ بٛو جَوْمِيرِ، عَمَّا عٛعَيْنَايْ ندِ، ندِ حَوِ غٛرْکٛ مَلَّ دٜبّٛ، ندٜنْ ندِ ڢِطٜ بٜى کَاعٜ، جَوْمِيرِ بٛو عٛ مبَرٜتٜىٰطٛ؞ 30تٛ ࢡٜ نجٛوَنِ مٛ شٛوتَّارِ، سٜيْ عٛسٛوتَّ يٛنغْکِ مَاکٛ ڢٛدّٜ کٛ ࢡٜ نجٛوَنِ مٛ ڢُو؞ 31تٛ نغَارِ حَوِ ࢡِطّٛ غٛرْکٛ مَلَّ ࢡِطّٛ دٜبّٛ، ࢡٜمبَطَ ندِ ڢٛدّٜ کِيتَ کَعَ؞ 32تٛ نغَارِ حَوِ مَشُّطٛ مَلَّ کٛرْطٛ، سٜيْ جَوْمِيرِ حٛکَّ جَوْمُ مَشُّطٛ مَلَّ کٛرْطٛ شٜىٰدٜ شَرْدِ شَݠَّنْطٜ تَتِ، نغَارِ بٛو ڢِطٜ بٜى کَاعٜ؞
33«تٛ غٛطّٛ مَࢡِّتِ ࢡُلْندُ مَلَّ وَسِ نغَسْکَ، عٛمَࢡَّايْ، تٛ نغَارِ مَلَّ وَمْندٜ دٛعَّکٜ تٛنْ، 34سٜيْ جَوْمُ ࢡُلْندُ يٛࢡَ جَوْمُ ندَبَّاوَ شٜىٰدٜ؞ عَمَّا کَنغْکٛ مَرِ بَاتْطُمْ؞
35«تٛ نغَارِ غٛطّٛ حَوِ نغَارِ کٜىٰدِّطِّرَاوٛ مُمْ حَا ندِ وَاتِ، سٜيْ ࢡٜشٛورَّ نغَارِ نغٜىٰرِ، ࢡٜشٜنْدَ شٜىٰدٜ مَنْ عٜ ࢡٜشٜنْدَ مبَاتْندِ بٛو؞ 36عَمَّا تٛ طُمْ عَنْدَامَ ندِ کَوٛورِ دِغَ نَانٜ، جَوْمِيرِ بٛو عَيْنَايْ ندِ، سٜيْ عٛحٛکَّ نغَارِ مبَتُّدِ حَوَاندِ، عَمَّا مبَاتْندِ، کَنغْکٛ مَرِ؞
37«تٛ غٛطّٛ وُجِّ نغَارِ مَلَّ ندَمّٛووَ، حِرْسِ طُمْ مَلَّ سٛورِّ طُمْ، سٜيْ عٛحٛکَّ غَعِ جٛوِ مبَتُّدِ نغَارِ نغٛورِ عٜ دَمّٛوجِ نَيِ مبَتُّدِ ندَمّٛووَ نغٛوتَ؞
Currently Selected:
غُرْتَاکِ 21: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.