Márkus 8
8
Yesu pú̵ fó̧ó̧ uzinɛɛre ndaddú̵ vu̵ hȩn lálı̵́
(Matío 15:32-39)
1Sey woolı̵́ máa, nán tóó vu̵ duu sú̵g dúú ɓu̵u̵lı̵́ na'a, vu̵ kan hȩn lálı̵́ pɛ́lı̵́.
Yesu ka ho̧ máa, bee waa duulí woo vu̵, o̧d vu̵: 2“Mí ho̧ gíḿ gaad nán yɛ vu̵ ú̵, moo vu̵ mbaa míílí̧ yɛlı̵́ bá' ta̧a̧nɔ́ wu̵ yɛ nɔ, vu̵ kan hȩn lálı̵́ pɛ́lı̵́. 3A̧n ba' vu̵ la ligí go̧o̧mná ı̵́ yo̧go̧ tée, vú̵ń ta̧a̧ hi̧naalȩ́ ó̧, moo nán tóó vu̵ yaa ya ɗii ú.”
4 Waa duulí woo vu̵ hí̧i̧du̵: “Ba dəŋ née ku̵u̵ lá hȩn ha̧' hó̧g tíŋ́ yɛlı̵́lá?”
5Yesu vi vu̵: “Ví dɨ kan beréd kígi nɛ́nná?”
Vu̵ hí̧i̧du̵: “Gúndɛm.”
6Yesu o̧d dúú pee vu̵ u̵u̵ mbaa hágá. Ɓee dɔg beréd kígi gúndɛm pee vu̵, dȩn Tayɨɨ nag, yɨɨ zu̵u̵ pú̵ waa duulí woo vu̵ u̵u̵ yȩ' vu̵ ú̵, ma vu̵ yȩ'ȩ dúú pee vu̵. 7Ze' waa tóó vu̵ kéé dɨlı̵́ á̧ḿ; Yesu duu dȩn Tayɨɨ nag, ma o̧d vu̵ u̵u̵ duu yȩ'ȩ vu̵ la á̧ḿ. 8Dúú vu̵ lá, vu̵ ha̧', ma waa duulí woo vu̵ duu su̵g kéélı̵́ woo hi̧' ɓaa gbo̧o̧ gúndɛm. 9Nán ku̵u̵ lá hȩn yȩ, zaa ka vu̵n dɨ fó̧ó̧ uzinɛɛre ndaddú̵.
Yesu ka ba' dúú vu̵ 'waa máa, 10ɗáá dɔg nɛ́ŋ́ŋı̵́ kan waa duulí woo vu̵, vu̵ daa laa hág Dalmanútalı̵́.
Nán farísa vu̵ vi hȩn sa̧ga̧ȩ
(Matío 16:1-4)
11 Nán farísa vu̵ yaa, vu̵ bé' moo fanné kan Yesu, bi zo"u̵ ú̵, vu̵ vigi: “A̧m kɔ́d vɔ́ hȩn sa̧ga̧ káḿ yaan Tayɨɨ woolı̵́ má nɔ.”
12Yesu ka ki ná' máa, ndɛ gbɔ zu̵u̵ zó̧ó̧lȩ́ 'mm, o̧: “Moo ȩn nán 'ya̧'a̧ yɛ vu̵ vi hȩn sa̧ga̧lá? Mí o̧d ví moo yȩ́ńne, nán 'ya̧'a̧ yɛ vú̵ń ho̧n hȩn sa̧ga̧ tóó né sá̧ḿ.”
13Yesu daa lúú gbɔ vu̵ zu̵u̵ wu̵lı̵́, ɗáá nɛ́ŋ́ ka la mam dən.
Yesu gú̵gú̵n ya̧g nán farísa voo kan wággɨ
(Matío 16:5-12)
14Ku̵u̵ dɔ́ nɛ́ŋ́ŋı̵́ máa, waa duulí Yesu woo vu̵ záń beréd gbɔ, vu̵ pa̧ŋ beréd dágá aga nɔ. 15Yesu tiŋ vu̵ moo tóó, o̧: “I gág kan nán farísa vu̵, kan Heeród á̧ḿ, moo voolı̵́ ya̧gá̧ man kan wággɨ.”
16 Waa duulí woo vu̵ fan moo ya voolı̵́, vu̵ o̧: “Yesu o̧ ı̵́ yo̧go̧ moo kaa 'yɛ́n ví beréd né yɛ nɔ.”
17Ma Yesu vi vu̵: “Ví fan moo ȩn ya víílí, kíí o̧: ‘Moo kaa 'yɛ́n ví beréd né yɛ nɔ’ lá? Ví kin ná moo né yeý? Ví gaa ná hȩn né yeý? Ví ŋgó̧ó̧ tɔ́gga? 18Ví dɨ kan nɔ́ɔ́, ví ho̧n né. Ví dɨ kan tɔ́g, ví kin ní. Ví dȩ́'ȩ ná né á̧ḿma? 19Sey káń yɨɨ beréd kígi nɔ́nɔ́ pú̵ nán uzinɛɛre nɔ́nɔ́ vu̵ máa, ví duu su̵g púpúd woo hi̧' ɓaa nɛ́nná?”
Vu̵ hí̧i̧du̵: “Wa̧nɓó' zu̵u̵ idú.”
20Duu vi vu̵: “Sey káń yɨɨ beréd kígi gúndɛm, pú̵ nán uzinɛɛre ndaddú̵ vu̵ máa, ví duu su̵g kéélı̵́ woo hi̧' ɓaa gbo̧o̧ nɛ́nná?”
Vu̵ hí̧i̧du̵: “Gúndɛm.”
21Ma duu vi vu̵: “Ví kin ná né yaa?”
Yesu kɔ́ nán yə̧m tóó ho̧ nɔ́ɔ́ kaa Bɛdsáýdalı̵́
22Yesu daa laa kaa Bɛdsáýdalı̵́. Vu̵ pa̧nnɔ ya nán yə̧m tóó, vu̵ dȩnnɔ nag, moo a za"u̵ ú̵.
23Yesu ka ki máa, ka nán yə̧m pee nagá, tee laanɔ kaa pigim, tu̵'u̵d su̵d so̧'o̧du̵ nɔ́lȩ́, ha'adu̵ nag yúlí, vigi: “Mɔ́ ho̧ hȩn tóó sá'áa?”
24Nán yə̧m pee kuu nɔ́ɔ́, o̧: “Mí ho̧ nánán vu̵ mbaa kɔ́ ı̵́ la' wɔgɔ, a̧máa vu̵ 'yȩmmɔ́.”
25Pig woo máa Yesu duu ha'adu̵ nag nɔ́lȩ́, nán yə̧m pee ho̧ nɔ́ɔ́, nɔ́ɔ́ ka̧"o̧ sú̵'ú̵. Nɔ́ɔ́ woo tú la kə́lə́ŋ́. 26Yesu ba"u̵ a líí la woolı̵́ kíilí, o̧ddu̵: “A̧m dɔ́ la kaalı̵́ sá.”
Piɛ́r o̧ Yesu ba wu̵ ı̵́ nán sənné
(Matío 16:13-20; Lúg 9:18-21)
27Yesu daa laa kan waa duulí woo vu̵ kaa waa tóó vu̵lı̵́, hág Sezarée ı̵́ Filíb woolı̵́.
Ku̵u̵ dɨ lá hi̧naalȩ́ máa, vi vu̵: “Yee nán vu̵ o̧ ba mín nɔ́nná?”
28Vu̵ hí̧i̧du̵: “Tóó vu̵ o̧ ba mɔ́n Yoohá̧na ı̵́ mam Tayɨɨ wooné wu̵, tóó vu̵ o̧ ba mɔ́n Elía wu̵, tóó vu̵ o̧ ba mɔ́n anábi gbo̧o̧ tóó nɔ.”
29Ma Yesu duu vi vu̵: “Ví o̧ víí nɛ́nná?”
Piɛ́r hí̧i̧du̵, o̧: “Mɔ́ ı̵́ nán sənnée.”
30Yesu ka ki ná' máa, há' vu̵ u̵u̵ o̧d nán tóó moo yúú biilí sá.
Yesu o̧ moo nɔm woo, kan nímní woo nɔmmé
(Matío 16:21-28; Lúg 9:22-27)
31Pig woo máa, Yesu dəŋ tú'ud vu̵ moo o̧: “Ɨ́ míí Tayɨɨ ka ba'an ya yɛ, séý míń nuŋ hȩn ndɔ́gɔné gbo̧o̧ ba'a pȩ́ń. Ɨ́ nii Yúúda vu̵ kan gbanaa hȩn ha"ı̵́ vu̵, kan nán moo Tayɨɨ tú"í vú̵ń man, vú̵ń nɔɔn, a̧máa bá' idú, ta̧a̧nɔ́ woo tée míń níḿ nɔmmé.”
32Yesu o̧d vu̵ la ha̧d. A̧máa Piɛ́r pa̧ŋŋɔ laan ka'adı̵́ wu̵ dágá, séewu̵. 33Ma Yesu tii daa nɔ́ɔ́ waa duulí woo tóó voolı̵́, sée Piɛ́r, o̧ddu̵: “Seeɗán, a̧m lúú la zulí! Moo taalı̵́ móó yȩ, moo taalı̵́ Tayɨɨ woo nɔ pɛ́lı̵́, a̧máa moo taalı̵́ nánán voo nɔ.”
34Pig woo máa, Yesu bee dúú vu̵ kan waa duulí woo vu̵, o̧d vu̵: “Nán tóó a hí̧í̧ bi duunɔ́ tée, a gbɔ moo taalı̵́ fó̧ó̧ woolı̵́ pȩ́ń, a ndɔg nɔm sá, a duunɔ́. 35Nán tóó a hí̧í̧ bi səd fó̧ó̧ bii nu tée, wú̵ń tiddu̵ ú̵. A̧máa nán a tid fó̧ó̧ woo moo míílí̧ kan yúú moo to̧o̧ 'maŋŋı̵́ tée, wú̵ń sə́ddú̵. 36Nán tóó a nuŋ hȩn góó 'waapád pȩ́ń, a tid vágád woo tée, ȩn wú̵ń yagadu̵lá? 37Tóó tée nán vu̵ píń vágád kan ȩná? 38Nán 'ya̧'a̧ yɛ vu̵ kɔ́ hȩn ɓı̵́d, vu̵ duun Tayɨɨ dágá né. Ɨ́ míí Tayɨɨ ka ba'an ya yɛ, nán tóó a kɔ́ sȩ́ḿ yúú míílí̧, kan moo míí vu̵lı̵́, sa̧a̧m nán yɛ voolı̵́ tée, mí á̧ḿ, sey a̧n yaa yaalı̵́ gbo̧o̧ kan na"ȩ́ Ba' míí woo, kan maleeka woo vu̵ tée, sȩ́ḿ sı̵́ń kɔ́n kannɔ á̧ḿ.”
Currently Selected:
Márkus 8: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.