Márkus 12
12
Ya̧g zílí yúú nán disa̧n ku̵u̵ tu̵ bab máa voolı̵́
(Matío 21:33-46; Lúg 20:9-19)
1Yesu duu bé'ed nán vu̵ moo moolȩ́ kan ya̧g zílí, o̧: “Nán tóó baa bab la' lálı̵́ woo, hȩŋ hȩn daa kan, ləə 'wá' doo ka̧a̧lȩ́, ləə kó̧', vu̵ táń ya̧g kan ı̵́ tu̵lı̵́ woo vu̵, ma daa laa gáá. 2Sey la' líid to̧"ȩ́ ka ya̧ sú̵'ú̵ máa, ba' la nán ba'ad woo dágá nán bab tu̵lı̵́ pee voolı̵́, moo a la ɓɛd bi la' líid ka' ı̵́ bii voolı̵́ nagá. 3Ma nán bab tu̵lı̵́ pee vu̵ ma' gbɔ́gɔ, vu̵ nɛŋŋɔ gbɔ la nag leená. 4Nán pee duu ba' nán ba'ad ı̵́ tóó. Vu̵ du̵gu̵ ndɔ́g yúlí, vu̵ kɔ́ddu̵ hȩn sȩ́ḿ. 5Duu ba' nán ba'ad ı̵́ ta̧a̧nɔ́ woo, vu̵ nɔɔwo̧. Duu ba' ı̵́ tóó vu̵ ɓu̵u̵lı̵́ na'a, vu̵ gbɔ́ tóó vu̵, vu̵ nɔɔ tóó vu̵.
6“Sí̧'í̧d woo máa, waa hí̧í̧lí̧ woo dágá wu̵ kéé. Ba"u̵ la voolı̵́, o̧: ‘Vú̵ń gu̵g kiddu̵ tɔ́ggú̵.’ 7A̧máa nán bab tu̵lı̵́ pee ku̵u̵ kuu nɔ́ɔ́ ho̧go̧ la ná' máa, vu̵ ó̧ń ya voolı̵́: ‘Wu̵ ı̵́ hȩn gaga ɓɛlı̵́ sú̵u̵. Yaa ba nɔɔwo̧ ví tée, hȩn gaga woo wú̵ń tii baa ví.’ 8Vu̵ ma' nɔɔwo̧, vu̵ woowu̵ vud babbı̵́ gbɔ la. 9Yee tée, ı̵́ bab aga wú̵ń ya kɔ́ woo nɛ́nná? Wú̵ń yaa, wú̵ń tud nán bab tu̵lı̵́ yȩ vu̵, wú̵ń ɓɛ bab pú̵ nán tóó u̵u̵ tu̵d bi ú.”
10Yesu duu vi vu̵: “Ká ví záŋ́ga lá hȩn ku̵u̵ bíńda debterelı̵́ yȩ náa? O̧:
‘'Yɛgɛ nán hȩn yo̧o̧lȩ́ ku̵u̵ ma gbɔ máa,
wu̵ duu tii 'yɛgɛ ndam.
11Hȩn ı̵́ 'yɛ́lı̵́ Tayɨɨ ka kɔ́ máa, wu̵ yȩ nɔ.
A̧máa kaa ho̧ ví baa ví máa, hȩn sa̧ga̧ȩ.’ ”
12 Ɨ́ nii Yúúda ku̵u̵ ki moo yȩ máa, vu̵ soo hi̧naa moo bi ma"o̧ ó̧, moo vu̵ gaa ba zíd biw ya̧g yȩ nɔ. A̧máa vu̵ ndɔg dúú vu̵ yu̵. Ma vu̵ kéé Yesu gbɔ, vu̵ daa lúú ka la.
Lámba gbanii nán Róma voo nɔ
(Matío 22:15-22; Lúg 20:20-26)
13Vu̵ ba' nán farísa tóó vu̵ kan nán Heeród woo tóó vu̵, vu̵ laa Yesu woolı̵́ moo u̵u̵ kɔ́gɔ a sɔd ya̧ggɨ. 14Vu̵ ya vigi: “Akaw, vɔ́ gaa mɔ́ nán yȩ́ńne, mɔ́ səgən nán vu̵ né, moo mɔ́ kɔ́n hȩn moo nɔ́ɔ́ nánán voo nɔ né. A̧máa mɔ́ dɨ hi̧naa Tayɨɨ woo tú"í yȩ́ńná. Máa aa sú̵ú̵ ví lámba pú̵ gbanii nán Róma voo áa? Tée du̵u̵ áa, kóó du̵u̵ náa? Oo sú̵ú̵ áa? Kóó oo sú̵ú̵ sáa?”
15Yesu ka gaa zó̧ó̧ ví̧i̧g voo máa, hí̧i̧d vu̵, o̧: “Moo ȩn ví zo'oná? I pú̵n ya sɨɨde lámba sú̵ú̵lı̵́ sú̵u̵, mí ho̧ ó̧.”
16Ku̵u̵ pa̧nnɔ ya máa, Yesu vi vu̵: “Fóto yɛ, fóto nóo woolá? Nóo bíńda hȩn yɛlá?”
Vu̵ hí̧i̧du̵: “Gbanii woo nɔ.”
17Ma Yesu duu o̧d vu̵: “Ȩȩhȩ́ȩ. Hȩn ı̵́ ka gbanii woo tée, i vȩ' pú̵gu̵; a̧máa hȩn ı̵́ ka Tayɨɨ woo tée, i pú̵ sı̵́ Tayɨɨɨ née!”
Ma moo hí̧í̧lí̧ woo yȩ la' vu̵ la fid.
Moo vilí yúú nímní nɔmmélȩ́
(Matío 22:23-33; Lúg 20:27-40)
18 Nán sadukée vu̵ o̧ nímní nɔmmé ban pɛ́lı̵́, ma vu̵ yaa Yesu woolı̵́, vu̵ vigi moo yɛ, vu̵ o̧: 19“Akaw, Múúsa ká bíńda ba ví o̧: ‘Nán tóó ka nɔɔ, ka gbɔ kȩ́ȩ́, waa ka pɛ́lı̵́ tée, daa sá̧ŋ́ a éé kȩ́ȩ́ woo, moo a ha̧a̧d daa nii waaɨ.’ 20Ma waa tóó ká vu̵ dɨ gúndɛm, na' voo dágá. Ɨ́ nii voo éé kȩ́ȩ́, ha̧a̧ waa gbɔn né, nɔɔ. 21Ɨ́ ka dugu máa, duu éé kȩ́ȩ́ pee, ha̧a̧ waa gbɔn né, nɔɔ á̧ḿ. Ɨ́ ta̧a̧nɔ́ woo duu kɔ́ ı̵́ yo̧go̧. 22Ya voo 'waapád, vu̵ kɔ́ ı̵́ yo̧go̧, vu̵ nɔɔ 'waapád. Nán dágá aga ha̧a̧ waa gbɔn né. Pig voolı̵́ máa, wakȩ́ȩ́ pee nɔɔ á̧ḿ. 23Ma zá̧ga̧ nímní nɔmmélȩ́ tée, sa̧a̧m nán gúndɛm yȩ voolı̵́ máa, wakȩ́ȩ́ yȩ wú̵ń mbaa kȩ́ȩ́ nóo woo dágálá? Moo ya voo gúndɛm á̧ḿ, ká vu̵ ééwu̵ sú̵'ú̵.”
24Ma Yesu hí̧i̧d vu̵: “Ví bá̧a̧ ó̧, moo ví gaan moo Tayɨɨ né, kan néélȩ́ Tayɨɨ woo á̧ḿ. 25Sey nán u̵u̵ níḿ nɔmmé tée, wayée vú̵ń éen kȩ́ȩ́ né, wakȩ́ȩ́ vú̵ń éen wə̧ə̧ né á̧ḿ. A̧máa vú̵ń mbaa kɔ́ ı̵́ maleeka ı̵́ be"ı̵́ vu̵ wɔgɔ. 26Ká ví záŋ́ga lá moo debtere Múúsa woo ka o̧n yúú nán nɔm u̵u̵ níḿ nɔmmé máa voo náa? Tayɨɨ o̧ddu̵ dáŋ́ kúdugu waalı̵́: ‘Míi Tayɨɨ Ibrahí̧í̧ma woo, kan Iizág woo, kan Yaakúbu voo nɔ.’ ”
27Yesu duu o̧ tóó: “Tayɨɨ máa, Tayɨɨ ı̵́ nɔm voo nɔ pɛ́lı̵́, a̧máa ı̵́ nán zá̧a̧d voo nɔ. Bá̧a̧né víí yȩ, bá̧a̧né gbo̧o̧ȩ.”
Dooká Tayɨɨ woo ka mba hȩn má nɔ
(Matío 22:34-40; Lúg 10:25-28)
28 Nán moo Tayɨɨ tú"í tóó ka ki moo fanné voo yȩ, Yesu ka hí̧i̧d vu̵ moo du̵u̵ na'a máa, séé ya vi Yesu: “Dooká Tayɨɨ woo ı̵́ ka mba daga vu̵ máa, wu̵ ı̵́ tɛ́lá?”
29Yesu hí̧i̧du̵: “Ɨ́ ka mba daga vu̵ máa, wu̵ yɛ nɔ: ‘A̧m ki ú, Izraɛ́l, ı̵́ 'yɛ́lı̵́ Tayɨɨ baa ví wu̵ ı̵́ 'yɛ́lı̵́ dágá. 30A̧m hí̧í̧ ı̵́ 'yɛ́lı̵́ Tayɨɨ móó kan zó̧ó̧ móó, kan moo taalı̵́ móó, kan néélȩ́ móó 'waapád.’ 31Ɨ́ idú woo, wu̵ yɛ nɔ: ‘A̧m hí̧í̧ dam vu̵ kɔ́ ı̵́ káḿ hí̧í̧ fó̧ó̧ móó máa wɔgɔ.’ Dooká Tayɨɨ woo tóó mban ı̵́ yȩ vu̵ né.”
32Ma nán moo Tayɨɨ tú"í pee o̧ddu̵: “Akaw, ví tú' moo to̧o̧ ó̧. Moo yȩ́ńne, Tayɨɨ dɨ dágá, Tayɨɨ tóó pɛ́lı̵́, wu̵ yu̵ dágá kəd. 33Hí̧í̧lí̧ Tayɨɨ kan zó̧ó̧ baa 'waapád, kan néélȩ́ baa 'waapád, hí̧í̧lí̧ da ba ví nánán vu̵ kɔ́ ı̵́ fó̧ó̧ baa wɔgɔ máa, wu̵ mba hȩn ha"ı̵́ ku̵u̵ a̧n vɛlı̵́, kan ı̵́ ku̵u̵ sə̧' vu̵ máa vu̵ 'waapád.”
34Yesu ka ho̧ ka hí̧í̧ moo kɛbná máa, o̧ddu̵: “Mɔ́ ɗiin kan ya gbaŋ waalı̵́ Tayɨɨ woo né.”
Nán tóó duu zi̧i̧ zó̧ó̧ vinnɔ sı̵́ moo né.
Ɨ́ nán sənné wu̵ ı̵́ 'yɛ́lı̵́ Daavíd woo
(Matío 22:41-46; Lúg 20:41-44)
35Yesu ka moo tú'ud vu̵ na'am gbo̧o̧ lig hȩn ha"ı̵́lı̵́, o̧: “Dəŋ née nán moo Tayɨɨ tú"í ku̵u̵ o̧ ı̵́ nán sənné ba ag yée Daavíd woo nɔlá? 36Yigid Tayɨɨ woo 'yɛ́d Daavíd moo ya̧gá̧, ma Daavíd o̧:
‘Tayɨɨ ı̵́ 'yɛ́lı̵́ o̧d ı̵́ 'yɛ́lı̵́ míí:
A̧m mbaa nag nán míílí̧
há̧á̧ mí 'yɛ́ ı̵́ maag móó u̵u̵ mbaa hȩn doo 'ná'ané móó pȩ́ń.’
37“Daavíd aga ká beewu̵ ba ı̵́ 'yɛ́lı̵́ bii, ma duu dəŋ née ı̵́ nán sənné ka mbaa aa yéelá?”
Yesu o̧: “I gág kan nán moo Tayɨɨ tú"í vu̵ ú̵.”
(Matío 23:1-36; Lúg 20:45-47)
Dúú ɓu̵u̵lı̵́ na'a vu̵ baa ki moo Yesu woo kan zó̧ó̧ dȩ"ȩ́.
38Yesu ka dɨ moo tú"í máa, o̧: “I gág kan nán moo Tayɨɨ tú"í tóó vu̵ ú̵. Vu̵ hí̧í̧ 'yȩ́mné kan sa̧a̧m gbo̧o̧ voo. Vu̵ hí̧í̧ nán u̵u̵ baa vá' bi lummí du̵u̵lı̵́ na'a. 39Vu̵ hí̧í̧ ya mbaalı̵́ ı̵́ nii voo lig sú̵ggı̵́lı̵́, kan ya mbaalı̵́ ı̵́ nii voo ya hȩn lálı̵́lı̵́ á̧ḿ. 40Vu̵ vbid hȩn kíi wakȩ́ȩ́ yɛd voolı̵́ vu̵ 'waa. Vu̵ o̧d Tayɨɨ moo gən vaŋ né, moo nán u̵u̵ ho̧ bi ú. Vú̵ń nuŋ hȩn si̧'i̧ní gbo̧o̧ȩ.”
Hȩn ha"ı̵́ wakȩ́ȩ́ yɛd ı̵́ gíḿ tóó woo nɔ
(Lúg 21:1-4)
41Yesu mbaa dáŋ́ akɔti hȩn ha"ı̵́lı̵́ na'am gbo̧o̧ lig hȩn ha"ı̵́lı̵́, tə́g nán ku̵u̵ dɨ hȩn ha"ı̵́ wu̵lı̵́ máa, ho̧ nán naa vu̵ ɓu̵u̵lı̵́ na'a vu̵ pag sɨɨde ɓu̵u̵lı̵́ na'a wu̵lı̵́. 42Wakȩ́ȩ́ gíḿ tóó yaa á̧ḿ, ká wakȩ́ȩ́ yɛddɨ, pag woo sɨɨde 'mɛ́ŋ́ dála idú wu̵lı̵́. 43Ma Yesu bee waa duulí woo vu̵, o̧d vu̵: “Mí o̧d ví moo yȩ́ńne, wakȩ́ȩ́ gíḿ yȩ wu̵ ha' hȩn mba nán ı̵́ tóó ku̵u̵ pag sɨɨde akɔti yɛlı̵́ yɛ vu̵ 'waapád. 44Ɨ́ voo 'waapád vu̵ ha' voo hȩn, moo ku̵u̵ dɨ kan hȩn naa má nɔ. A̧máa wakȩ́ȩ́ yȩ a gíḿmi si̧', ɓɛ hȩn ka 'yɛ́ də́ń kəd máa, ha' wu̵ yu̵.”
Currently Selected:
Márkus 12: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.