Lúg 23
23
Yesu dɨ tíŋ́ Pilád woolı̵́
(Matío 27:1-2,11-14; Márkus 15:1-5; Yoohá̧na 18:28-38)
1Nán sú̵ggı̵́ yȩ vu̵ 'waapád, vu̵ lúú dɔg yúba, vu̵ pa̧ŋ Yesu laan Pilád woolı̵́. 2Vu̵ dəŋ doowu̵, vu̵ o̧: “Vɔ́ nuŋ nán ka zo' zig vóó, ka há' vɔ́ oo sú̵ú̵ lámba pú̵ gbanii nán Róma voo sá máa wu̵ yɛ nɔ, o̧ ba binnɔ Krístu, binnɔ gbanii á̧ḿ.”
3 Pilád vi Yesu: “Mɔ́ gbanaa nán Yúúda voo naa?”
Ma Yesu hí̧i̧du̵ o̧: “Aga móo o̧!”
4 Pilád o̧d gbanaa hȩn ha"ı̵́ vu̵ kan dúú vu̵: “Mí nugun moo tóó ɓı̵́dná yúú nán yɛ woolı̵́ moo a̧n sə̧'ə̧nɔ moo né.”
5A̧máa vu̵ nda doo vu̵ o̧: “Nán yɛ baa dɔn nán vu̵ ba u̵u̵ duu ŋgó̧ḿna sá. Baa dəŋ moo woo tú"í hág Gáliléelı̵́, kan hág Yúúdalı̵́ 'waapád, há̧á̧ ya̧ yɛlı̵́ á̧ḿ.”
Yesu dɨ tíŋ́ Heeród woolı̵́
6Sey Pilád ka ki moo yȩ máa, vi: “Nán yɛ a dɨ nán Gálilée ló?”
7Sey ka gaa ba dɨ hág Heeród woolı̵́ máa, ba"u̵ laan woolı̵́, moo sey woo Heeród dɨ Yerúsalemmé á̧ḿ.
8Sey Heeród ka ho̧ Yesu máa, zó̧ó̧ woo dȩ' mbaa ná', moo hí̧í̧ Yesu ho̧lȩ́ ɗii sú̵'ú̵. Moo ka baa ki moo Yesu woo máa, hí̧í̧ a kɔ́d bi hȩn sa̧ga̧ á̧ḿ. 9Heeród vígi moo vu̵ ɓu̵u̵lı̵́ na'a, a̧máa Yesu hí̧i̧nɔ ya̧g né sá̧ḿ. 10A̧máa gbanaa hȩn ha"ı̵́ vu̵ kan nán moo Tayɨɨ tú"í vu̵ dii moo, vu̵ doowu̵ doolı̵́ gbo̧o̧ mɛ́ń. 11Heeród kan só̧ó̧ze woo vu̵ tii ho̧ Yesu hȩn leená, vu̵ kɔ́ddu̵ ba̧a̧m. Heeród dɔ́ddu̵ sa̧a̧m gbaŋ tóó, ma duu ba"u̵ laan Pilád woolı̵́. 12A̧máa zá̧ga̧ woolı̵́ Heeród vu̵ to̧n sı̵́ kan Pilád wu̵lı̵́, moo ká vu̵ to̧n tíŋ́ né.
Pilád sə̧' moo u̵u̵ nɔɔ Yesu ú̵
(Matío 27:15-26; Márkus 15:6-15; Yoohá̧na 18:39—19:16)
13 Pilád bee gbanaa hȩn ha"ı̵́ vu̵ kan ı̵́ nii Yúúda vu̵ kan dúú vu̵, 14o̧d vu̵: “Ví pa̧ŋ nán yɛ yaan míílí̧ kɔ́ ı̵́ nán tóó ka zo' nán vu̵ ba̧a̧ zu wɔgɔ. I ki ú, mí vigi zu̵u̵ moo nɔ́ɔ́ víílí, a̧máa moo kíí doowu̵ wu̵lı̵́ yȩ, mí ho̧n míí moo yȩ́ń tóó wu̵lı̵́ né. 15Heeród á̧ḿ, ho̧n né, ma duu ba"u̵ pú̵ ba ví ya yɔ. Nán yɛ kɔ́n hȩn tóó ka maan nɔm máa né. 16Moo woo nɔ, míń o̧d vu̵ u̵u̵ gbɔ́gɔ kan loo tée, míń kéé gbɔgɔ la.”
17-18Dúú ku̵u̵ ki la ná' máa, vu̵ sú̵g dɔ́b dɔg moo do' dágá, vu̵ o̧: “Nán yɛ a nɔɔ ó̧, i gbɔd vɔ́ Barábaddu̵.”
[Vu̵ o̧ ı̵́ yo̧go̧ moo mam vúnní páska 'waapád tée, Pilád baa vud nán si̧'i̧ní dágá gbɔd vu̵.] 19Barábas ká zo' daga vu̵, vu̵ lúú moo kaalı̵́, vu̵ nɔɔ nɔm, ma vu̵ ma"o̧ dɔd lig púúsinalȩ́.
20 Pilád duu faa moo o̧d vu̵ nag 'maŋná, moo ká hí̧í̧ bi kéé Yesu gbɔ ú̵. 21A̧máa vu̵ moo dɔg moo yúba, vu̵ o̧: “Ga"u̵ la ú̵, ga"u̵ la' vbagadı̵́.”
22 Pilád duu vi vu̵ moo do' ta̧a̧nɔ́ woo, o̧: “Kɔ́ hȩn ɓı̵́d woo ȩná? Mí ho̧n míí hȩn tóó woolı̵́ ka maanɔ nɔm né. Moo woo nɔ, míń o̧d vu̵ u̵u̵ gbɔ́gɔ tée, míń kéé gbɔgɔ la.”
23A̧máa vu̵ dii zu̵u̵ voo ya̧g dágá yȩlȩ́, vu̵ moo dɔg moo yúba, vu̵ o̧: “Ga"u̵ la' vbagadı̵́.”
Moo dámné voo ka mba kɛb máa, 24Pilád sə̧' moo kɔ́ ı̵́ ku̵u̵ hí̧í̧ wɔgɔ. 25Vud nán ı̵́ dúú vu̵n hí̧í̧wo̧ pee, ı̵́ ba lúú moo kaalı̵́, ku̵u̵ nɔɔ nɔm, ma ku̵u̵ ma"o̧ pee gbɔ daa. Ɓɛ Yesu pú̵ vu̵ kɔ́ ı̵́ ku̵u̵ hí̧í̧ wɔgɔ.
Vu̵ ga' Yesu la' vbagadı̵́
(Matío 27:32-44; Márkus 15:21-32; Yoohá̧na 19:17-27)
26Sey ku̵u̵ dɨ Yesu pa̧né laan máa, vu̵ kan kan nán hág Siirɛ́n tóó, yéé woo Simɔ́ŋ, ká yaa woo babbı̵́. Vu̵ ma"o̧, vu̵ ha'adu̵ la' vbagad Yesu woo, moo a gaŋ duunɔ pigim.
27Dúú ɓu̵u̵lı̵́ na'a vu̵ duu Yesu, kan wakȩ́ȩ́ tóó vu̵, vu̵ dȩ́ŋ́ zó̧ó̧, vu̵ ká̧ŋ́.
28A̧máa Yesu ka ho̧ máa, tii daa voolı̵́ o̧d vu̵: “Wakȩ́ȩ́ waa Yerúsalem vu̵, i ká̧ŋ́ míw sá. A̧máa i ká̧ŋ́ fó̧ó̧ víí kan waa víí vu̵ yu̵. 29Moo zá̧ga̧ tóó vú̵ń yaa dɨlı̵́. Sey woo tée nán vú̵ń o̧: ‘Du̵u̵d wakȩ́ȩ́ ı̵́ ku̵u̵ kan pa̧n waa pɛ́lı̵́, ku̵u̵ ha̧a̧n waa né, ı̵́ va̧a̧ voo ka a̧a̧n waa né máa vu̵ yu̵.’
30Tée nán vú̵ń dəŋ o̧d gu̵u̵ vu̵:
‘I túḿ pi̧i̧ vɔ́ ya ú̵.’
Vú̵ń o̧d gu̵u̵ waa vu̵:
‘I yu̵g vɔ́ ú̵.’
31“Vu̵n kɔ́ kan la' há̧a̧d ı̵́ yo̧go̧ ma dan tóó la' 'wɔ́gga?”
32Vu̵ pa̧ŋ nán hȩn ɓı̵́d kɔ́lı̵́ tóó vu̵ idú laan moo bi nɔɔ vu̵ kan Yesu á̧ḿ.
33Sey ku̵u̵ ya̧ gu̵u̵ waa ku̵u̵ beewu̵ “gu̵u̵ dag gbágadı̵́” máa, vu̵ ga' Yesu wu̵lı̵́ la' vbagadı̵́ kan nán hȩn ɓı̵́d kɔ́lı̵́ pee vu̵ á̧ḿ, dágá nag nánné, tóó nag kpáagı̵́.
34Pig woolı̵́ máa Yesu o̧: “Ba'á, a̧m kéé hȩn ɓı̵́d voo vu̵ gbɔ la ú̵, moo vu̵ gaan hȩn ku̵u̵ kɔ́n yɛ né.”
Só̧ó̧ze vu̵ yȩ'ȩn sa̧a̧m woo voolı̵́ sa̧a̧mé, vu̵ gbɔ sáásáá. 35Dúú vu̵ dii baa ho̧ vu̵. Ɨ́ nii Yúúda vu̵ kɔ́d Yesu ba̧a̧m, vu̵ o̧: “Baa səd nán tóó vu̵. Tow a wu̵ ı̵́ nán sənné Tayɨɨ ka yeewu̵ má nɔ tée, aga a səd sı̵́ fó̧ó̧ woo na!”
36Só̧ó̧ze vu̵ kɔ́ddu̵ ba̧a̧m á̧ḿ. Vu̵ séé ya, vu̵ yo̧o̧ doo vó̧o̧d pú̵gu̵, 37vu̵ o̧: “A̧m gbanaa nán Yúúda voo nɔ tée, a̧m səd fó̧ó̧ móó la ú̵.”
38Vu̵ bíńda moo tóó yúú la' vbagad woolı̵́ o̧: “Ɨ́ yɛ gbanaa nán Yúúda voo nɔ.”
39Nán hȩn ɓı̵́d kɔ́lı̵́ vu̵n ga' vu̵ dáŋ́ Yesu woolı̵́ pee, dágá kɔ́ddu̵ ba̧a̧m á̧ḿ o̧: “Móo ı̵́ nán sənné náa? A̧m səd sı̵́ fó̧ó̧ móó kan vɔ́ á̧ḿ ló!”
40Daga tóó ka ki máa, séewu̵ o̧: “Mɔ́ ndɔgɔn Tayɨɨ náa? Vu̵ ga'am kɔ́ ı̵́ ku̵u̵ ga"u̵ yȩ wɔgɔ á̧ḿ. 41Ɨ́ baa máa, yagalı̵́. Ba nuŋ hȩn ka maa ba nuní má nɔ. A̧máa ı̵́ woo máa, kɔ́ ȩná?”
42Ma o̧d Yesu: “Yesu, sey a̧m yaa gbaŋ waalı̵́ tée, a̧m taanɔ́.”
43Yesu ka ki máa, hí̧i̧du̵: “Mí o̧m moo yȩ́ńne, mɔ́ń dɨ laalı̵́ kan mí ɓəə lig zó̧ó̧ dȩ"ȩ́ Tayɨɨ woolı̵́ á̧ḿ.”
Nɔm Yesu woo nɔ
(Matío 27:45-56; Márkus 15:33-41; Yoohá̧na 19:28-30)
44-45Zá̧ga̧ sa̧a̧m ka dɨ ya̧lȩ́ máa, vid sa̧' hág 'waapád, há̧á̧ zá̧ga̧ 'yɨg wu̵lı̵́. Sa̧a̧m ku̵u̵ yȩȩ du̵n zu̵u̵ lig hȩn ha"ı̵́lı̵́ máa, dey zu̵u̵ sa̧a̧mé.
46Pig woolı̵́ máa, Yesu moo dɔg moo yúba o̧: “Ba'á, mí 'yɛ́ vágád míí móólȩ́ nagá.”
Sey ka moo moo yȩ 'waa máa, wə̧m woo sə̧'ə̧y.
47Ɨ́ nii só̧ó̧ze voo ka ho̧ hȩn yȩ máa, na' Tayɨɨ o̧: “Moo yȩ́ńne, nán yȩ kɔ́n hȩn ɓı̵́d né.”
48Dúú vu̵ sú̵g ya 'waapád moo u̵u̵ ga"u̵ tée bi ho̧ ó̧.
Sey ku̵u̵ ho̧ hȩn yȩ máa, vu̵ kágán nag zó̧ó̧lȩ́, vu̵ daa lúú vȩ́' la.
49Nán gaalı̵́ Yesu woo vu̵ 'waapád, vu̵ dii ɗiilí na'a, kan wakȩ́ȩ́ tóó ku̵u̵ dugu dɔg hág Gáliléelı̵́ máa vu̵ á̧ḿ. Vu̵ baa sú̵g ho̧ hȩn yȩ vu̵.
Vu̵ dɔd Yesu bɛ́ɛ́gı̵́
(Matío 27:57-61; Márkus 15:42-47; Yoohá̧na 19:38-42)
50 Ɨ́ nii moo sə̧"ȩ́ tóó ká du̵u̵lı̵́, yéé woo Yu̵u̵séfu, baa kɔ́ hȩn hí̧í̧lí̧ Tayɨɨ woo á̧ḿ. 51Ká nán Arimatéeɨ, kaa nán Yúúda voo tóó nɔ. Wu̵ laa gbaŋ waalı̵́ Tayɨɨ woo á̧ḿ. Yu̵u̵séfu sú̵u̵ ká nán sú̵ggı̵́ dágá ı̵́ nii moo sə̧"ȩ́ voolı̵́, a̧máa dɔn ya̧g woo ya̧g talı̵́ voo kan ba'ad voo yȩlȩ́ né. 52Ma laa Pilád woolı̵́, ɓá"u̵ fó̧ó̧ Yesu woo. 53Pig woolı̵́ máa, la sid fó̧ó̧ Yesu woo zu̵u̵ hágá, go̧o̧wo̧ kan sa̧a̧m tóó vu̵ tȩȩwo̧ mbaa mé'é'é, ma dɔddu̵ bɛ́ɛ́g tóó ká ku̵u̵ kɛ isȩȩmé máalȩ́. Vu̵ dɔn ná nɔm wu̵lı̵́ see né. 54Zaa asawə wú̵ń ya̧ sú̵'ú̵, zá̧ga̧ woo máa, ká zá̧ga̧ hȩn mbɔ́ggı̵́ɨ.
55Wakȩ́ȩ́ ı̵́ ku̵u̵ sú̵g yaa kan Yesu hág Gáliléelı̵́ á̧ḿ máa, vu̵ duu Yu̵u̵séfu, vu̵ ho̧ bɛ́ɛ́g kan ya ku̵u̵ 'yɛ́ fó̧ó̧ woo wu̵lı̵́ máa á̧ḿ. 56Vu̵ vȩ́' la, vu̵ mbɔ́g duusá̧n kan kúḿ sa̧g to̧o̧ vu̵. A̧máa zá̧ga̧ asawəlı̵́ máa, vu̵ nəə kɔ́ ı̵́ debtere Tayɨɨ woo ka o̧ wɔgɔ.
Currently Selected:
Lúg 23: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.