Lúg 15
15
Ya̧g zílí yúú mbee dágá ka ti, ka duu nuguy má nɔ
1 Nán lámba su̵ggı̵́ vu̵, kan nán hȩn ɓı̵́d kɔ́lı̵́ vu̵ 'waapád vu̵ baa yaa Yesu woolı̵́, moo moo woo kilíi. 2Nán farísa vu̵ kan nán moo Tayɨɨ tú"í vu̵ ŋguu moo, vu̵ o̧: “Nán yȩ fȩȩ nán ɓı̵́d vu̵, lá hȩn kan vu̵ á̧ḿ.”
3Yesu ka ki máa, zíd vu̵ ya̧g yɛ o̧: 4“Nán tóó sa̧a̧m víílí a 'yɛ́ mbee tȩmɛre, dágá ka ti tée, wú̵ń kéé ı̵́ vo' kɛ́gdágá zu̵u̵ kɛ́gdágá vu̵ gbɔ hó̧gó̧, wú̵ń la soo ı̵́ dágá yȩ, há̧á̧ wú̵ń nuŋŋɔ. Ɨ́ yo̧go̧ náa? 5-6Ka nuŋŋɔ tée, gaŋŋɔ bəgəm laan ligí kan zó̧ó̧ dȩ"ȩ́. Wú̵ń béé daga gboo vu̵, kan daga dáŋ́ lig vu̵, wú̵ń o̧d vu̵: ‘I sú̵g dȩ' zó̧ó̧ kan mí la ú̵, moo mí nuŋ mbee míí ka ti pee sú̵'ú̵.’ Wú̵ń kɔ́n ı̵́ yo̧go̧ náa? 7Mí o̧d ví, nán hȩn ɓı̵́d kɔ́lı̵́ dágá ka tii zó̧ó̧ tée, zó̧ó̧ dȩ"ȩ́ dɨ be"ı̵́ ı̵́ yo̧go̧ á̧ḿ, mba sı̵́ zó̧ó̧ dȩ"ȩ́ yúú nán du̵u̵ vo' kɛ́gdágá zu̵u̵ kɛ́gdágá ku̵u̵ sɛ́n zó̧ó̧ voo tiiní ní yȩ ó̧.”
Sɨɨde yȩ́ń ti sú̵'ú̵, duu nuguy sú̵'ú̵
8Yesu duu zíd vu̵ ya̧g tóó o̧: “Tow wakȩ́ȩ́ tóó ka dɨ kan sɨɨde yȩ́ń wa̧nɓó', dágá ka tigi tée, sa vee lámmé, kəə lig woo, soo du̵u̵ na'a, há̧á̧ nuŋŋɔ náa? 9Ka nuŋŋɔ tée, béé daga gboo vu̵ su̵g, kan daga wakȩ́ȩ́ ka' kíi woo vu̵, o̧d vu̵: ‘I sú̵g dȩ' zó̧ó̧ kan mí la ú̵, moo mí nuŋ sɨɨde yȩ́ń míí ka tin pee sú̵'ú̵.’ Wú̵ń kɔ́n ı̵́ yo̧go̧ náa? 10Mí o̧d ví, nán hȩn ɓı̵́d kɔ́lı̵́ dágá ka tii zó̧ó̧ tée, maleeka Tayɨɨ woo vu̵ dȩ' zó̧ó̧ ı̵́ yo̧go̧ á̧ḿ.”
Waa ti sú̵'ú̵, duu nuguy sú̵'ú̵
11Yesu duu o̧d vu̵: “Nán tóó dɨ kan waa wayée vu̵ idú. 12Waa ı̵́ sá̧ŋ́ o̧d ba' woo: ‘Ba'á, i gbá̧' pú̵n hȩn naa ka' ı̵́ míí nu.’ Ma ba' voo yȩ'ȩn vu̵ hȩn naa woo kan daa nii. 13Bá' waaná' pig woolı̵́ máa, waa ı̵́ sá̧ŋ́ pee gí hȩn woo vu̵ 'waapád, ɓɛ sɨɨde woo daa kanna hág tóólı̵́ ɗiilí na'a. La lı̵́d hȩn naa woo vu̵ 'waapád yúú hȩn ya̧ŋ vu̵lı̵́.
14“Sey ka lı̵́d hȩn naa woo 'waa sı̵́ páddú̵ máa, go̧o̧m gbo̧o̧ kɔ́y hág peelı̵́. Gíḿ kɔ́gɔ. 15La dɔ́ ba'ad waa hág tóó woolı̵́. Nán pee ba"u̵ la woolı̵́ babbı̵́, moo a la tu̵d bi ŋgurya bii vu̵ yu̵. 16Hí̧í̧ bi ha̧' kan lən ŋgurya ku̵u̵ lá yȩ nɔ, a̧máa nán tóó pú̵nnɔ né. 17Aga ka taa túgu máa, o̧: ‘Nán ba'ad ba' míí woo vu̵ 'waapád vu̵ dɨ kan hȩn lálı̵́ ɓu̵u̵lı̵́ na'a há̧á̧ mba vu̵, a̧máa ı̵́ míí mí nɔɔ 'waa kan go̧o̧ma! 18Míń lúú laa ba'á woolı̵́, míń o̧ddu̵: Ba'á, mí kɔ́d Tayɨɨ hȩn ɓı̵́d, kan ví á̧ḿ. 19Mí maa vín duu been mí sı̵́ waa víí ní. A̧máa i 'yɛ́n kɔ́ ı̵́ nán ba'ad víí tóó wɔgɔ.’ 20Waa pee daa lúú laa ba' woo woolı̵́.
“Ka lúú laa máa, ba' woo ho̧go̧ la ya ɗiilí na'a, kɔ́gɔ la gíḿná, kɛ ɗug laa waa woolı̵́, kaga pi̧i̧ ya zó̧ó̧lȩ́. 21Waa o̧ddu̵: ‘Ba'á, mí kɔ́d Tayɨɨ hȩn ɓı̵́d, kan ví á̧ḿ. Maa ba vín been mí sı̵́ waa víí ní.’ 22A̧máa ba' woo o̧d nán ba'ad woo vu̵: ‘I la ɓɛ sa̧a̧m gbo̧o̧ du̵u̵lı̵́ na'a pa̧ŋ ya dɔ́ddu̵ la há̧ná. I dɔ́ddu̵ ka nag waa, kan tɛ́gɛ́ á̧ḿ. 23I ma' ndaa waa kíí gbá̧"o̧ du̵u̵ na'a yȩ, pa̧ŋ ya sə̧', ba lá ví ú! Ba dȩ' ví zó̧ó̧, 24moo waa míí yɛ ká mbaa kɔ́ ı̵́ nɔm wɔgɔ, ma duu níḿ. Ká ti, ma duu vúd.’ Ma vu̵ dəŋ zó̧ó̧ dȩ"ȩ́.
25“Sey woolı̵́ máa, waa ı̵́ nii dɨ woo babbı̵́. Ka fíí ya dáŋ́ ligí máa, ki hȩn wa̧a̧lȩ́ kan náb. 26Bee nán ba'ad tóó, vigi: ‘Ɓəə ȩn kɔ́y dɨ kíi baa vílílá?’ 27Ma o̧ddu̵: ‘Dam sá̧ŋ́ wu̵ fíí ya. Ba' móó sə̧' ndaa waa ku̵u̵ gbá̧"o̧ du̵u̵ na'a yȩ, moo ka duu nuŋ dam sá̧ŋ́ ka mbaa nánná má nɔ.’ 28Waa ı̵́ nii pee ka ki ná' máa, kɔ́ zó̧ó̧ yȩ́ȩ́, sɛ́n dɔ́lı̵́ kíilí ní. Ba' woo vúd ya, dȩnnɔ nag ba a dɔ́ ya ligí. 29A̧máa hí̧i̧d ba' woo: ‘A̧m ho̧ ó̧, mí kɔ́m ba'ad ve' ɓu̵u̵lı̵́ na'a, mí man mɔ́ ba'ad né sá̧ḿ. Kóó ı̵́ yo̧go̧ si̧', mɔ́ pú̵n mí ɓee waa aga, oo dȩ'ȩn zó̧ó̧ kan dan gboo vu̵ wu̵lı̵́ né sá̧ḿ. 30A̧máa waa móó yȩ ka lı̵́d hȩn naa móó 'waapád wakȩ́ȩ́ ka̧w voolı̵́, ka yaa máa, mɔ́ sə̧'ə̧du̵ ndaa waa ku̵u̵ gbá̧"o̧ du̵u̵ na'a yȩ.’ 31Ba' woo o̧ddu̵: ‘Waa míí, ba mbaa dɨ baa á̧ḿ náa! Hȩn míí 'waapád, móó nɔ. 32A̧máa ba dȩ' ví zó̧ó̧, ba fóó ví, moo dam sá̧ŋ́ yȩ ká mbaa kɔ́ ı̵́ nɔm wɔgɔ, ma duu níḿ; ká ti sú̵'ú̵ ma duu vúd yɔ.’ ”
Currently Selected:
Lúg 15: DIINT
Highlight
Share
Copy
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.