Yaolhaq 6
6
Yeiqsul tsaol-aq ngaq hinl gaq bhai bhi jaq-a nail ganl
1A bhai nee ngal-aq, Gaq liq lail ngaqkha a phao lel khel bha ceiv lai-a nail ngaol. Gaq liq lail ngaqkha bhai Deiqbheiqlil dai iqsanl, khul nail ngaol. 2Yu bhai bhi heeq bhi moel nail dai khi, Yeiqsul nal nail goel nail tsaol-aq bhai bhi meeq lai-u phao, ya moel-a nail tsaol-aq munl munl ma juq, Yeiqsul nail haoqnao tsao thel aivq-a nail ngaol. 3Yeiqsul gaoqjaoq bhai dav lai khi, aivq nail yaq laol juq nee mail jaol deel-a nail ngaol. 4Aq-u phao, Yuldav nail tsaol-aq nail Bhaqsaqkhaq aqbhee lav sav nail yanq aqjail jail lal-aoq nail ngaol.
5Yeiqsul hel daiq gai aivq-u phao, tsaol-aq munl munl ma juq, aivq jaol nail bha lal nail bhai ya moel-a nail ngaol. “Ngadao juq, tsaol-aq niil juq bhai bhi jaq nail khaqmul khaq bha ul ail heeq” dai, Yeiqsul Pillilpuv bhai nal daiq-a nail ngaol. 6Yeiqsul aivq khal hai ya khi nail-aiq dai, heeq nia khi ngaol-aoq, Pillilpuv bhai laonq daiq movq nail ngel-i mail, al hai nal daiq-a nail ngaol.
7Pillilpuv ge nail: “Tsaol-aq niil juq teevq gaq micil ya jaq dai, khaqmul nvq yal bavq nail aqphoiq ul ail khi ngaol-aoq, maq lovq lai ail” dai, Yeiqsul bhai ge kovq bhiq-a nail ngaol.
8-9Aivq nail yaq laol juq nail lavqkhoel, Sil moq Bheiqtuvluv nail jaqbheq Aq daiq laiq ge nail: “Niilniai jaol nail yaqyov teevq gaq, khaqmul ngaq heeq khi mail delgil nvq maol aol ail nial. Thail hai ngaol-aoq, tsaol-aq nii dai nail haqbhoil neq, khul maq niail lai ail jaol-aq” dai, Yeiqsul bhai ge bhiq-a nail ngaol.
10“Tsaol-aq niil juq bhai bhi jaol deel yaoq” dai, Yeiqsul aivq nail yaq laol juq bhai ge bhiq-a nail ngaol. A bhai neq, moeqgaq doevq nail dai khaoq aqsal ngaol. A bhai jaol deel-a nail tsaol-aq juq neq, yaqyov-aq taivq-ail, ngaq hinl gaq nii dai bhee nail ngaol. 11Aq-u phao, Yeiqsul khaqmul al oil khi, Miqyail bhai tsiq eeq-a nail ngaol. A bhai nee ngal-aq, jaol deel-nvq thaq nail tsaol-aq al juq bhai, bhi bhoil bhiq-a nail ngaol. Del gil al iqsanl, al hai bhi bhoil bhiq-a nail ngaol. Tsaol-aq iqsanl mail, teevq bov ya jaq-a nail ngaol.
12Tsaol-aq al juq jaq bov gaq-u phao, “Teevq peivq ail maq ya peivq ail dai, maq jaq gil ail jaiq lal-a nail juq iqsanl mail, gov kovq yaoq” dai, Yeiqsul aivq nail yaq laol juq bhai ge bhiq-a nail ngaol. 13Al heel ngel-i mail, aqyu juq gov kovq daiq-u phao neq, tsoelthoel-i mail lav sav-ai thaq nail khaqmul al ngaq heeq nail jaiq lal thaq nail juq, pheeq deel nee tsel-nvq deel bhee nail ngaol.
14Yeiqsul-i mail nl-a nail bhi heeq bhi moel nail phaq bhai tsaol-aq al juq ya moel-u phao, “Tsaol-aq niil gaq neq, miltsaq bhai lee naol dai, ge-ai thaq nail Miqyail nail haqbhoil ge dan nail al gaq mal dil nial” dai, ge nail ngaol. 15Tsaol-aq al juq, aivq bhai nieivq khi, heeqphaq bhi jiovq nail khi bhai, Yeiqsul heeq nia nail ngel-i mail, aivq teevq gaq taivq-ail gaoqjaoq bhai gaoq dav lai-a nail ngaol.
Yeiqsul ulcuvq kovtavq bhai gailkhaol tsao-a nail ganl
16-17Nqkivq kivq lee-u phao, Yeiqsul nail yaq laol juq ngaqkha jiav nail bha yavq kha-ail khi, laovq bhai aol ail-a nail ngaol. A bhai nee ngal-aq, aqyu juq ngaqkha a phao lel khel phao jiav nail Gaq bheiq neiq oq meenq bhai kovq ceiv lai-a nail ngaol. Aq-u phao, nqkivq kivq lee-aoq nail ngaol. Thail hai ngaol-aoq, Yeiqsul neq, aqyu juq nail haoqnao maq the kheel lee haq-al. 18Aq-u phao, lilmoel lil ma bhoe lal khi, eel khaol thaoq dee dee nail ngaol. 19Aqyu juq hail lail liq lail bhee dai, laovq e kel aivq-u phao, Yeiqsul ulcuvq kovtavq bhai tsao tsao ail, laovq nail aqjail-ai tsao kel leevq nail bhai aqyu juq ya moel khi, gee sil dee dee lal bhiq-a nail ngaol. 20“Nul juq thaq gee sil. Ngal ngaol” dai, Yeiqsul aqyu juq bhai ge bhiq-a nail ngaol. 21A bhai nee ngal-aq, aqyu juq lavqkhiq tsail nail lavqkhoel nee Yeiqsul bhai, laovq lavqkhoel bhai khul bhoel khi, aqyu juq-i mail ail nail dao bhai, teevq yanq lal yanq nee mail, ail kev-a nail ngaol.
Tsaol-aq munl munl ma Yeiqsul bhai hal pov nail ganl
22Nqbhaq bhaq lal-u phao, tsaol-aq munl munl ma al juq, ngaqkha a phao lel khel phao jaol aiq haq nail ngaol. Milgaol neq, niil niai laovq teevq laovq taivq-ail jiav nail ngaol dai, aqyu juq heeq nia nail ngaol. Yeiqsul laovq bhai maq aol lai dai, aivq nail yaq laol juq taivq-ail, laovq jeel aivq-a nail bhai, aqyu juq moel-a nail ngaol. 23Yeiqsul Miqyail bhai tsiq eeq khi aqyu juq-i mail khaqmul ya jaq-a nail al dao nail aqjail bhai, Deiqbheiqlil meenq nee mail laovq yaoq juq yaoq lal kev-a nail ngaol. 24Yeiqsul khi mail aivq nail yaq laol juq niil niai maq jaol-aoq thaq nail dai, tsaol-aq munl munl ma al juq, heeq nia lal-u phao, aqyu juq laovq jeeq khi, Yeiqsul bhai hal pov ail nail dai khi, Gaq bheiq neiq oq meenq bhai ail-a nail ngaol.
Yeiqsul neq, aqdoevq bhi doevq lal nail khaqmul ngaol
25Aqyu juq ngaqkha a phao lel khel-ai, Yeiqsul bhai hal pov moel-u phao, “Saq laq-ol, naol niil niai khaq mao lee kev-a nail-aiq” dai, Yeiqsul bhai nal daiq-a nail ngaol.
26Yeiqsul ge nail: “Ngal nul juq bhai mal dil dai, ge lavq bhel. Nul juq bhi heeq bhi moel phaq bhai ya moel-a nail ngel-i mail, ngaq bhai hal pov nail maq ngel-ail. Khaqmul teevq bov ya jaq nail ngel-i mail, ngaq bhai hal pov nail ngaol. 27Buvq ail tsiq ail nia nail jaqjaq daoldaol nail haqbhoil maq lai jai dai, nqmaq maqluv halyeel bhi doevq nail jaqjaq daoldaol nail haqbhoil, lai jai yaoq. Tsaol-aq nail Yaqyov pevq nail, ngal nul juq bhai jaqjaq daoldaol al phaq, bhi jaq naol. Khul khi mail dai ngal-aq neq, Aqbhu Miqyail ngaq bhai neema tsaq khi junq deeq-ai thaq nail ngaol” dai, ge bhiq-a nail ngaol.
28“Miqyail nail ganl nl kivq dai, nv juq khal hai ya khi nail-aiq” dai, aqyu juq Yeiqsul bhai nal daiq-a nail ngaol.
29“Miqyail-i mail khoel-ai leevq-a nail gaq bhai neema thaq tsaol nail phaq neq, Miqyail nail ganl nl nail phaq pevq nail ngaol” dai, Yeiqsul aqyu juq bhai ge kovq bhiq-a nail ngaol.
30Aqyu juq ge nail: “Thail hai phal-iq neq, nv juq ya moel khi, neema thaq tsaol lal dai, bhi heeq bhi moel nail khul phaq, naol nv juq bhai bhi moel lavq heeq. Naol khul phaq nl daiq lavq nail-aiq. 31Ngadao nail aqphiq aqbhal juq neq, haqtsoiq haqyal bhai jaol-u phao, Maqnav khaqmul ya jaq-a nail ngaol. Aqyu juq ya jaq dai, ‘Nq taq kovtavq khe khaqmul, Miqyail bivq-a nail ngaol’ dai, Jal liq lavqkhoel bhai gevq-ai thaq nail ngaol” dai, aqyu juq Yeiqsul bhai ge bhiq-a nail ngaol.
32Yeiqsul ge nail: “Ngal nul juq bhai mal dil dai, ge lavq bhel. Nul juq bhai nqtavq kovtavq khe khaqmul bivq lavq-a nail gaq, Maolseiq maq ngel-ail. Mal dil nqtavq khe khaqmul, ngaq nail Aqbhu nul juq bhai bivq-a nail ngaol. 33Miqyail nail khaqmul neq, nqtavq kovtavq nee lee khi, miltsaq yaq bhai aqdoevq bhi doevq lal nail khaqmul ngaol” dai, aqyu juq bhai ge bhiq-a nail ngaol.
34“Heeqphaq-ol, khaqmul al nv juq bhai khaq mao iqsanl bhi jaq lavq yaoq” dai, aqyu juq Yeiqsul bhai hal nail ngaol.
35Yeiqsul ge nail: “Ngal neq, aqdoevq bhi doevq lal nail khaqmul ngaol. Ngal jaol nail bha lal nail tsaol-aq, maq moevqlal yaoq-aol. Ngaq bhai neema thaq tsaol nail tsaol-aq ulcuvq iqsanl, maq moevqlal yaoq-aol. 36Nul juq ngaq bhai moel khi ngaol-aoq, ngaq bhai neema maq thaq tsaol-il dai, ngal nul juq bhai ge lavq bhel. 37Ngaq nail Aqbhu, ngaq bhai khal bivq lavq-a nail tsaol-aq iqsanl mail, ngal jaol nail bha lal naol. Ngal jaol nail bha khal lal nail tsaol-aq bhai, ngal mal dil maq khaonq ha-ail. 38Khul khi mail dai ngal-aq neq, ngal neema tsaq nail khe-ai nl nail dai khi, nqtavq kovtavq nee lee-a nail maq ngel. Ngaq bhai khoel-ai leevq lavq-a nail gaq, neema tsaq dai nl nail dai khi, ngal lee-a nail ngaol. 39Ngaq bhai khoel-ai leevq lavq-a nail gaq, neema tsaq nail neq, niil ngaol. Aivq ngaq bhai khal bivq lavq-a nail tsaol-aq juq nail lavqkhoel, ngal teevq gaq ail maq bhi peivq ail nail nee ovqtavq, daoq loi loi lai-u n-gaol, ngal aqyu juq iqsanl bhai gaoq bhi doevq kovq lal nail neq, aivq neema tsaq nail ngaol. 40Yaqyov bhai moel khi, aivq bhai neema thaq tsaol nail tsaol-aq yaoq gaq yaoq-ao nee mail, nqmaq maqluv halyeel ya doevq nail neq, ngaq nail Aqbhu neema tsaq nail ngaol. Daoq loi loi lai-u n-gaol ngal iqsanl, tsaol-aq al juq bhai gaoq bhi doevq kovq lal naol” dai, Yeiqsul ge bhiq-a nail ngaol.
41“Ngal neq, nqtavq kovtavq nee mail lee-a nail khaqmul ngaol” dai, aivq ge nail ngel-i mail, Yuldav nail tsaol-aq juq ge doil nail ngaol. 42“Aivq neq, Yaolsai nail yaqyov Yeiqsul maq ngel ail laiq. Aivq nail aqbhu aqma iqsanl ngadao juq heeq kivq nail ngaol. ‘Ngal nqtavq kovtavq nee mail lee-a nail ngaol’ dai, aivq khal hai ge nail meeq” dai, aqyu juq nail gaiqlaq bhai ge nail ngaol.
43Aq-u phao Yeiqsul ge nail: “Nul juq nail gaiqlaq bhai thaq ge doil. 44Ngaq bhai khoel-ai leevq lavq-a nail Aqbhu Miqyail-i mail, ngal jaol nail bha, maq hel lavq haq neq, tsaol-aq teevq gaq iqsanl, ngal jaol nail bha maq lal nia-ail. Aqbhu Miqyail-i mail ngal jaol nail bha bhi lal-a nail tsaol-aq bhai, daoq loi loi lai-u n-gaol, ngal gaoq bhi doevq kovq lal naol. 45Miqyail nail haqbhoil ge dan nail juq nail haoqgavq lavqkhoel, ‘Miqyail neq, aqyu juq iqsanl bhai cavq bhiq cov bhiq naol’ dai, gevq-ai thaq nail ngaol. Aqbhu Miqyail nail daoq gaiq khi, Aqbhu Miqyail-i mail cavq nail cov nail bhai nal daiq nail tsaol-aq yaoq gaq yaoq-ao nee mail, ngal jaol nail bha lal naol. 46Tsaol-aq teevq gaq ail, Aqbhu Miqyail bhai maq moel daiq haq-al. Miqyail jaol nail nee lee-a nail gaq taivq-ail, Aqbhu Miqyail bhai moel daiq-a nail ngaol. 47Ngal nul juq bhai mal dil dai, ge lavq bhel. Ngaq bhai neema thaq tsaol nail tsaol-aq, nqmaq maqluv halyeel doevq nail phaq ya nail ngaol. 48Ngal neq, aqdoevq bhi doevq lal nail khaqmul ngaol. 49Nul juq nail aqphiq aqbhal juq neq, haqtsoiq haqyal bhai jaol-u phao, Maqnav khaqmul ya jaq khi ngaol-aoq, aqyu juq sil gil-a nail ngaol. 50Ngal ge movq nail khaqmul neq, nqtavq kovtavq nee mail lee-a nail khaqmul ngaol. Khaqmul niil jaq nail tsaol-aq maq ya sil-ail. 51Ngal neq, nqtavq kovtavq nee mail lee-a nail khaqmul ngaol. Khaqmul niil neq, aqdoevq bhi doevq lal nail khaqmul ngaol. Khaqmul niil jaq nail tsaol-aq nqmaq maqluv halyeel ya doevq nail ngaol. Miltsaq yaq aqdoevq doevq nia dai, ngaq-i mail bivq-a nail khaqmul niil neq, ngaq nail haqjoil ngaol” dai, ge bhiq-a nail ngaol.
52Aq-u phao, Yuldav nail tsaol-aq al juq ge nail: “Tsaol-aq niil gaq, aivq nail haqjoil, ngadao juq bhai khal hai khi bhi jaq lavq nia nail-aiq” dai, aqyu juq nail gaiqlaq bhai jil pheel jaq nail ngaol.
53Yeiqsul ge nail: “Ngaq nul juq bhai mal dil dai, ge lavq bhel. Tsaol-aq nail Yaqyov nail haqjoil maq jaq ail, aivq nail aqsivq maq daol haq neq, nul juq nail lavqkhoel bhai aqdoevq doevq nail phaq maq aol-ail. 54Ngaq nail haqjoil jaq khi, ngaq nail aqsivq daol nail tsaol-aq, nqmaq maqluv halyeel doevq nail phaq ya nail ngaol. Daoq loi loi lai-u n-gaol, ngal aqyu juq bhai gaoq bhi doevq kovq lal naol. 55Khul khi mail dai ngal-aq, ngaq nail haqjoil neq, mal dil jaq nail phaq pevq khi, ngaq nail aqsivq iqsanl mal dil daol nail phaq pevq nail ngaol. 56Ngaq nail haqjoil jaq khi, ngaq nail aqsivq daol nail tsaol-aq, ngaq nail lavqkhoel bhai jaol nail ngaol. Ngal iqsanl, aivq nail lavqkhoel bhai jaol naol. 57Doevq nail Aqbhu Miqyail ngaq bhai khoel-ai leevq lavq khi, aivq bhaq da nee, ngal doevq nail ngaol. Al hai dul dai, ngaq bhai jaq nail tsaol-aq ngal bhaq da nee, aqdoevq ya doevq naol. 58Khaqmul niil neq, nul juq nail aqphiq aqbhal juq-i mail ya jaq-a nail khaqmul al khe-ai, maq dul-ail. Aqyu juq neq, khaqmul al ya jaq khi ngaol-aoq, sil gil-a nail ngaol. Thail hai ngaol-aoq, khaqmul niil neq, nqtavq kovtavq nee lee-a nail ngaol. Khaqmul niil jaq nail tsaol-aq, nqmaq maqluv halyeel ya doevq nail ngaol” dai, ge bhiq-a nail ngaol 59Gaq bheiq neiq oq meenq bhai jiav nail, uqhuq thaoq nail ilkhaol lavqkhoel bhai cavq bhiq cov bhiq-u phao, ganl niil juq, Yeiqsul ge-a nail ngaol.
Aq doevq bhi doevq nail daoq
60Aivq nail yaq laol juq daoq al daoq ya gaiq-u phao, “Daoq niil daoq neq, haq dee dee nail neq, khaq sil gaq hav bhoel tsaol nail-aiq” dai, mee nia gaq nail gaiqlaq bhai ge nail ngaol.
61Aivq nail yaq laol juq ganl al bhai al hai khoiq thail pheel jaq nail bhai, Yeiqsul aivq nail neema lavqkhoel bhai heeq nia khi ge nail: “Daoq niil daoq bhaq da nee, nul juq ngaq bhai khaonq movq nail laiq. 62Thail hai phal-iq neq, tsaol-aq nail Yaqyov aivq nail jaol duq bhai gaoq kovq dav lai nail bhai, nul juq ya moel haq neq, khal hai khi nail-aiq. 63Miqyail nail Aqhaqlal taivq-ail, aqdoevq bhi doevq lal nia nail ngaol. Aqsivq haqjoil neq, khul maq nl nia-ail. Ngaq-i mail nul juq bhai ge bhiq-a nail daoq juq neq, aqhaqlal pevq khi aqdoevq bhi doevq lal nail phaq pevq nail ngaol. 64Thail hai ngaol-aoq, nul juq teevq pav ga nav juq neq, neema maq thaq tsaol ail” dai, aqyu juq bhai ge bhiq-a nail ngaol. Khul khi mail dai ngal-aq neq, khul gaq aivq bhai neema maq thaq tsaol khi aivq bhai yu nail aqlavq lavqkhoel bhai av bhiq nail gaq bhai iqsanl, iqmoeq-u nee mail, Yeiqsul heeq nia nail ngaol. 65Aivq gaoq ge nail: “Al heel ngel-i mail, ngaq nail Aqbhu maq bhi lal haq neq, tsaol-aq teevq gaq iqsanl ngal jaol nail bha maq lal nia-ail dai, ngal nul juq bhai ge-a nail ngaol” dai, ge bhiq-a nail ngaol.
66A bhai nee daq-n khi, aivq nail yaq laol juq mee nia gaq, aivq nee mail pav ail khi, aivq nail haoqnao maq tsao thel aivq-al.
67“Nul juq iqsanl kovq-ail naol laiq” dai, Yeiqsul gaqkhoel tsel-nvq gaq bhai nal daiq-a nail ngaol.
68Sil moq Bheiqtuvluv ge nail: “Heeqphaq-ol, nv juq khaq sil gaq nail haoqnao gaoq tsao thel aivq nail-aiq. Nq maq maq luv hal yeel doevq nail daoq, naol jaol nail bhai jiav nail ngaol. 69Naol neq, Miqyail nail Tsaolmeeq Tsaolhaol gaq nial dai, nv juq heeq kivq lal khi neema thaq tsaol lal-aoq nail ngaol” dai, Yeiqsul bhai ge kovq bhiq-a nail ngaol.
70Yeiqsul ge nail: “Nul juq tsel-nvq gaq bhai ngaq-i mail tsel dov-ai thaq nail maq ngel ail laiq. Thail hai ngaol-aoq, nul juq nail lavqkhoel khe teevq gaq neq, neivq heeqphaq ngaol” dai, aqyu juq bhai ge bhiq-a nail ngaol. 71Aivq al hai ge nail neq, Sil moq Ilsaqgaq liqoq nail yaqyov Yuldav bhai ge movq nail ngaol. Khul khi mail dai ngal-aq neq, aivq neq, gaqkhoel tsel-nvq gaq nail lavqkhoel bhai aol khi ngaol-aoq, Yeiqsul bhai yu nail aqlavq lavqkhoel bhai av bhiq-a nail ngaol.
Currently Selected:
Yaolhaq 6: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.