Luká 23
23
Issá Pilátusay démá
(Mattá 27:1–2, 11–14; Markás 15:1–5; Yuhanná 18:28–37)
1Randá diwánay sajjahén mardom pád átkant o Issáesh Pilátusay démá bort o 2áiay sará bohtám janagesh bendát kort. Gwashtesh: “Má distag ke é mard may kawmá gomráha kant, Rumay Kaysaray song o máliát dayagá manah o makana kant o gwashit: ‘Man Masih án, bádsháhé án.’” 3Pilátusá jost kort: “Taw Yahudiáni bádsháh ay?” Issáyá passaw dát: “Taw wat gwashagá ay.”
4Pilátusá gón mazanén dini péshwáyán o gón mardománi mocchiá gwasht: “Man pa é mardá hecch mayára nagendán.” 5Bale mardom wati habaray sará óshtátant o gwashtesh: “É mard gón wati tálimán Yahudiahay sajjahén damagay mardomána shórénit. Cha Jalilá bongéji kortag o annun edá rasetag.” 6Pilátusá ke eshkot, lótheti bezánt ke bárén á Jalilié yá na. 7Wahdé sahig but ke Issá Jalilié, gorhá Jalilay hákem Hirudisay némagá ráhi dát, chéá ke Hirudis á wahdá Urshalimá at.
Issá o Hirudis
8Hirudisá Issá ke dist, sakk gal but, chéá ke dér at ke áiay gendagay wáhagdár#23:8 Wáhagdár, bezán lóthók, delmánag, hodónák. at. Áiá Issáay kortagén káráni bárawá eshkotagat o ométwár at ke ajabbatén neshánié begendán. 9Gorhá cha Issáyá bázén jost o porsé korti, bale Issáyá hecch passaw nadát. 10Mazanén dini péshwá o Sharyatay zánóger ke hamódá óshtátagatant, Issáay sará bázén bohtámé janagá atant. 11Hirudisá ham gón wati sepáhigán Issá béezzat kort o kalág gept. Dhawldárén kabáhé gwará dátesh o padá Pilátusay kerrá rawánesh dát. 12Cha hamá róchá Hirudis o Pilátus sangat butant, pésará dozhmen atant.
Issáay markay hokm
(Mattá 27:15–26; Markás 15:6–15; Yuhanná 18:39—19:16)
13Pilátusá mazanén dini péshwá o Yahudiáni sarók o mahluk lótháéntant o 14gwashti: “Shomá é mard mani gwará áwortag o bohtám jatag ke mardomán gomráha kant, bale cha á jostán ke man shomay démá kortagant, áiay sará shomay jatagén bohtámán man hecch rástié nadist. 15Hirudisá ham mayáré nadistag, paméshká padá may gwará ráhi dátag. É mardá choshén káré nakortag ke sezái mark bebit. 16Gorhá man eshiá shallák o hayzarána janán o yalaha kanán.” 17#23:17 Lahtén daznebeshtá é band nést, bale lahténá chó átkag: Pilátusá har Sargwazay Aidá, cha wati bandigán yakké, allamá ázát kanagi at. 18Bale sajjahén mardomán kukkár kort o gwasht: “Issáyá bekosh! Barabbásá ázát kan o márá beday!” 19Barabbás Urshalimay shahrá áshóp o hónay bohtámá bandig kanag butagat.
20Pilátus Issáay yalah dayagá delmánag at, paméshká gón mardomán padá habari kort. 21Bale mardom sakk kukkár kanagá atant, gwashtesh: “Salibi kassh! Salibi kassh!”
22Pilátusá sayomi randá cha áyán jost kort: “Chéá bárén? É mardá che badén káré kortag? Man hecch bonyádé nagendán ke eshiay kóshay hokmá bedayán, paméshká shallák o hayzaránia janán o yalahia kanán.” 23Bale mardom kukkárá atant o wati habaray sará óshtátagatant. Gwashtesh: “Salibi kassh!” O áyáni kukkárán kár kort. 24Pilátusá áyáni wáhagay sará hokm dát. 25É dhawlá áiá hamá mard ke áshóp o hónay bohtámá bandig at o mardomán lóthet ke yalah dayag bebit, ázát kort o mardománi wáhagay sará Issá sepáhigáni dastá dát.
Issáyá saliba kasshant
(Mattá 27:32–44; Markás 15:21–32; Yuhanná 19:17–24)
26Wahdé Issáyá baragá atant, Shamun námén mardé distesh ke Keriniay shahray mardomé at o dém pa Urshalimá pédák at. Sepáhigán á mard gept, salib áiay baddhá dát o hojjesh kort ke Issáay randá berawt. 27Issáay randá bázén mardomé rawagá at o gón áyán rombé janén ham gón at ke pa Issáyá gréwag o záriá atant. 28Issáyá chakk jat o gón áyán gwasht: “Oo Urshalimay jenekkán! Pa man magréwét, pa wat o pa wati chokkán begréwét, 29parchá ke anchén wahdé kayt ke gwashant: ‘Bahtáwar ant á janén ke santh o bérand ant, hamá janén ke chokkesh nabutag o cha wati sénagán chokkesh naméchéntag.’ 30Hamá wahdá mardom kóhán tawára kanant ke may sará bekapét o jompána gwashant ke márá chér betarrénét. 31Agan gón sabzén drachká chosha kanant, gorhá gón hoshkéná ché ché nakanant?”
32Áyán do radkár áwort ke gón Issáyá hór koshagi atant. 33Wahdé hamá “Kámpól” námén jágahá rasetant, Issáesh salib kasshet. Áiay rástén kashá yakk radkáré salibesh kasshet o chappén kashá domi radkár. 34Issáyá gwasht: “Oo Pet! Áyán pahell kan, chéá ke nazánant ché kanagá ant.” Gorhá sepáhigán pa láthari o korakasshi#23:34 Láthari o korakasshi, bezán chek o posht, tar o hoshk. Issáay pocch o póshák watmánwatá bahr kortant.
35Mardom pa sayl o nedáragá#23:35 Nedárag, bezán sayl, tamáshah. óshtátagatant o sarók pa kalág o rishkand gwashagá atant: “Eshiá á dega rakkéntant, bale agan Masih, bezán Hodáay hamá gechén kortagén ent, gorhá watá berakkénit.”
36Sepáhig ham áiay nazzikká shotant o kalágesh gept, tropshén sharábesh cháshént o gwashtesh: 37“Agan taw Yahudiáni bádsháh ay, gorhá watá berakkén.” 38Issáay sarborá mayárnámagé#23:38 Mayárnámag, bezán nebeshtah kortagén mayár. dratkagatesh ke ódá nebeshtah at: “É Yahudiáni bádsháh ent.”
39Cha doén radkárán ke salib kasshag butagatant, yakkéá Issá kalág zort o gwasht: “Taw Masih naay? Gorhá, byá watá o márá berakkén!” 40Bale domi radkárá á hakkal kort o gwasht: “Záná tará Hodáay tors nést? Tai sezá ham hamesh ent. 41Má é sezáyá karzén ke may kortagén káráni ásar ent. Bale é mardá hecch radén káré nakortag.” 42Gorhá gwashti: “Oo Issá! Wahdé taw wati bádsháhiá sar butay, mani hayálá ham bekap.” 43Issáyá passaw dát: “Tará rásténa gwashán ke taw maróchi mani hamráhiá baheshtá raway.”
Issáay mark
(Mattá 27:45–56; Markás 15:33–41; Yuhanná 19:28–30)
44Némróchay wahdá#23:44 Asligén Yunáni nebeshtánka gwashit: “shashomi sáhat”. Yahudiáni róchay hesáb, sáhat sohbay shashá bongéja but. sajjahén molká taháriá mán shánt o é taháriá tán bégáhá dásht,#23:44 Asligén Yunáni nebeshtánka gwashit: “shashomi sáhatá beger tán nohomi sáhatá”, bezán maróchigén sáhatáni hesábá, dwázdahá beger tán sayá. 45chéá ke róchay rozhn shotagat. Mazanén parasteshgáhay pardah cha nyámá dert o do ném but. 46Issáyá kukkár kort o gwasht: “Oo Pet! Man wati arwáhá tai dastá dayán.”#23:46 Bechár: Zabur 31:5. Gón hamé habará, sáhi dát.
47Pawjiáni apsaréá é nedárag ke dist, Hodái satá kort o gwasht: “Béshakk é bégonáhé at.” 48Á dega sajjahén mardom ke pa saylá átkagatant, gón é nedáragay gendagá sar o sénagá janáná wati lógán per tarretant. 49Issáay sajjahén pajjárók o hamá janén ke cha Jalilá áiay hamráhiá átkagatant, dur óshtátag o cháragá atant.
Issáay kabr kanag
(Mattá 27:57–61; Markás 15:42–47; Yuhanná 19:38–42)
50Hamódá Issop námén mardé ham gón at ke tachkén o pahrézkárén mardé at. Sarókáni Diwánay báské#23:50 Básk, bezán ozw, membar. at, 51bale pa Issáay mayárig kanagá gón áyáni shawr o kárán razámand naat. Yahudiáni shahr Arimátiáay mardomé at o Hodáay bádsháhiay rahchár o wadárig#23:51 Wadárig, bezán rahchár, entezár kanók. at. 52Pilátusay kerrá shot o Issáay jónay baragay ejázati lóthet. 53Issáay jóni cha salibay sará ér gétk, lilomén#23:53 Lilom, goday tahré ke Engréziá “linen” gwashaga bit. godéay tahá patáti o sengén kóhéay tahá jatagén kabréay tóká éri kort ke pésará ódá hechkas kabr kanag nabutagat. 54Á róch tayáriay róch#23:54 Tayáriay róch, bezán pa Shabbatá tayári kanagay róch ke Jomah ent. at o Shabbat bongéj bayagi at.
55Hamá janén ke cha Jalilá Issáay hamráhiá átkagatant, Issopay randá rawán butant o hamá kabresh dist. Áyán é ham dist ke Issáay jón che paymá kabrá ér kanag but. 56Randá wati lógán shotant o washbóesh tayár kort. Shabbatay róchá anchó ke Sharyatay parmán ent, áyán árám kort.
Currently Selected:
Luká 23: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.