Pédáesh 23
23
Sárahay mark
1Sárahá yakk sad o bist o hapt sál omr kort. Áiay zenday sál o róch haminkas atant. 2Sárah, Kanhánay sardhagárá, Keryah-Arbahá bérán but. Keryah-Arbahay domi nám Hebrun ent. Ebráhém shot ke porsá benendit o pa Sárahá begrét. 3Padá cha láshay kerrá pád átk o gón Hittián gwashti: 4“Man shomay nyámá darkawm o darámadé án. Maná pa kabrestánéá, zemini thokkoré bahá bedayét ke wati mordagá kabr kort bekanán.”
5Hittián passaw dát: 6“Oo mani wájah! May habarán gósh dár. Taw may nyámá porwákén shahzádagé ay. Wati mordagá may kabrestáná, gechéni jágahéá kabr kan. Cha má kass, tará cha tai mordagay kabr kanagá nadárit.”
7Ebráhém pád átk o á sardhagáray mardom, bezán Hittiáni démá pa adab sari jahl kort. 8Gón áyán gwashti: “Agan shomá rázig ét ke man wati mordagá kabr bekanán, gorhá mani habará gósh dárét o Sóharay chokk Eprunay kerrá mani sepáreshá bekanét, 9ke wati gárá mani kerrá bahá bekant, hamá gár ke Makpélahá áiay dhagáray goddhi bahrá ent. Jágahay purahén kimmatá cha man begipt ke maná shomay molká kabrestáné bebit.”
10Eprun Hitti hamódá mardománi nyámá neshtagat. Ebráhémay passawi anchosh dát ke áiay shahray darwázagay dapá átkagén sajjahén Hitti beshkonant: 11“Enna, wájah! Kimmatay habará makan. Mani gappá gósh dár. Man á gár o dhagár doén tará dátagant. Mani é sajjahén mardománi démá, á dhagár taig ent. Wati mordagá ódá kabr kan.”
12Ebráhémá padá á molkay mardománi démá sar jahl kort o 13gón Epruná anchó gwashti ke mardom beshkonant: “Agan mani habarán gósha dáray, man dhagáray kimmatá dayán. Eshiay zarrán cha man bezur ke man wati mordagá ódá kabr kort bekanán.” 14Epruná passaw dát: 15“Mani wájah! Mani habará gósh dár. Dhagáray kimmat nograhay chár sad shekel#23:15 Shekel Esráiliáni kerrá sang o wazné butag. Chár sad shekel kesás chár o ném kilu ent. ent. É manig o tai nyámá hecché naent. Wati mordagá kabr kan.” 16Ebráhémá Eprunay habar zort o hamá kimmati tór kort#23:16 Tór kanag, bezán wazn kanag. ke Epruná gwashtagat o Hittián eshkotagat, bezán nograhay chár sad shekel, sawdagaráni gisshetagén sang o tóray hesábá.
17-18Gorhá Eprunay dhagár ke Makpélahá, Mamrehay nazzikká at, sajjahén Hittiáni démá ke shahray darwázagá átkagatant, á dhagár o dhagáray tahay gár o sajjahén drachk, Ebráhémay melkat butant. 19Nun Ebráhémá wati lógi Sárah, Makpélahay dhagáray gárá, Kanhánay sarzeminá kabr kort. É gár Mamrehay nazzikká ent o Mamreh Hebruná ent. 20Hittián é dhagár gón gárá Ebráhémárá dát ke kabrestáné bekanti.
Currently Selected:
Pédáesh 23: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.