João 6
6
5.000 hunibu Jesusũ pimanikiaki, na hãtxarã
(Mt 14.13-21; Mc 6.30-44; Lc 9.10-17)
1-4Hanua haskakaĩkĩ Páscoatiã judeubu besikĩ pishanaibu ma kemaya Galiléia Iãnẽwã, hawẽ kena betsa Tiberíades Iãnẽwã anu Jesus nũ hawẽ tsumabube pukeshũ hatu shushawakĩ Jesusũ hawẽ unãmati dami atimaska betsa betsapa wai uĩxĩshũ ana uĩkatsis iki maĩ bukĩ mirimabũ nuku txibaĩbũ mati mapebaĩ tsauwa nukube hãtxabaikĩ 5-6yurabu itxapabũ txibãbiranabu uĩkĩ hawara akatsi unãbiakĩ Filipe unãti wakĩ Jesusũ yukakĩ:
—Nabũ hau pinũbũ, hania nũ hatu misi bishũtirumẽ?— aka
7xinãma Filipẽ yuikĩ:
—Bestibu tibitũ hau misi eskarabe pinũbũ 200 dia nukũ daya peirã, damaki— aka
8haskai nĩkatã hawẽ tsuma betsa Andrẽ, Simão Pedrõ betsã, yuikĩ:
9—Cinco misi inũ dois bakaixta huni bakẽ nuku inãtirukiaki. Hakia hatibũ na misi eskarabes pikĩ hawa yani watirubumaki— aka
10Jesusũ hatu yuikĩ:
—Ha basiki hau tsuabaunũbũ hatu yunukãwẽ— nuku wa nũ hatu yunua basi mamaki tsaui 5.000 hunibu tsauwabũ 11ha huni bake anua Jesusũ misi bitã Deus kẽwãtã misi tũkepakekĩ nuku inã ha tsauwabu nũ hatu inãbaunaya habiaskari wakĩ ha baka bitã tekepakekĩ nuku inãriaya nũ hatu inã hati pikatsis ikĩ bitã 12pikĩ hanushũ yani wai pepeaibũ Jesusũ hawẽ tsumabu nuku yunukĩ:
—Ha piti teshe waibu hau txakawayamanũbũ itxawabaũkãwẽ— nuku wa 13itxawakĩ ha cinco misi pikĩ teshewabu 12 kuki nũ mata wakẽ 14hawẽ unãmati dami Jesusũ hatu ashũshuwẽ taea uĩ yuinamei:
—Txanima Deusũ hãtxa yuishunika kayabiki, haska Moisés yuinirã, ha hunirã, habiaki— ikubaũkĩ 15barikis shanẽ ibu warinũ, iwanã, atxishũ iyupanãbu unãtã hatu pashkabaini ana hawẽri mati keyatapa mapebaini ha mesti hari pashashũ xinãyui kaya
Jesus iãnẽwã bemaki bepaikainikiaki, na hãtxarã
(Mt 14.22-27; Mc 6.45-52)
16ma bari hikiaya nũ hawẽ tsumabu iãnẽwã kesha anu butukĩ Jesus nũ shunũbirana huriamakẽ 17shashũ inatã Cafarnaum anu nũ kai besusi pukẽnũ ika nũ kai taeaya mexuhairakẽ Jesus txĩtũriama 18niwẽwã bekĩ iã buspu tsaubirãbirãkĩ hatu teawa 19haimãwẽ tuẽxini ma txaiskabui cinco kasmai seis quilômetro nunushũ Jesus iã bepaikiranai uĩ nũ datehairaya
20nuku yuikĩ:
—Ẽ eaki. Ewẽ dateyamakãwẽ— nuku wa 21nĩkatã benimakĩ yuikĩ:
—Nukube shashũ inayuwe— nũ wa shashũ Jesus inaya niwẽwãnẽ shashu tsuma maiãyã hawaira kaĩ nũ keti iniki.
Yurabũ Jesus benanibukiaki, na hãtxarã
22Ushaxini penaya ha yurabu iã kesha betsauriabũ xinaĩ:
—Habia besti shashuwẽ hawẽ tsumabũ Jesus iyuama buxiãbuki, shashu betsa hayamabiakenã— ikaibũ 23-24ha haskaibũ mae ewapa betsa Tiberíades anua shashu betsawẽ bei hanushũ Jesusũ Deus kẽwãtã hatu pimaxina anu keti itã Jesus inũ hawẽ tsumabu hatu benakubirani hawa hatu betxiama ana hawẽri butubirani hatũ shashuki inatã: “Cafarnaum anu kaxiãmẽkaĩ. Hari benanũ bukãwẽ”, itã hauri bui
Jesusrã, hiwekuĩmati misi keskakiaki, na hãtxarã
25iãnẽwã pukebaini kesha betsauria hanu itxati hiwe anu hatube itxanua Jesus betxituxitã habũ yukakĩ:
—Yusĩnaã, hatiã mĩ nekeri pukexinamẽ? Ukeria nũ mia benabiranairã— akabu
26Jesusũ hatu yuikĩ:
—Mã unãti wakĩ kayatapĩnũ dami haskabiama wakĩ ẽ matu ashuaĩ uĩxina ha tapĩkĩ mã xinãmawẽ taea hakia misi pikĩ yani waxĩshũ haskas pinũ ishũ mã ea benai bei ikanaii. 27Haskai piti txapumiswẽ besti kemui mã mapua ikanai? Hakia ẽ Epa Deusũ ea kuxipa waniwẽ taeshũ hawẽ kuxipa ẽ matu inãshanai ha bestiwẽ kemui mapukãwẽ, hawẽ hiwekuĩ ikibi itirã. Haskawẽ taeshũ habia hawẽ unãmati wakĩ Epa Deusũ ea matũ Hutxi Kayabi Iuwa ea waniki, yunukinã— hatu wa
28habũ nĩka pewama Jesus yukakĩ:
—Deusũ yunua ashũkĩ txibãkinã, nũ haska wakĩ benimawakĩ taewatirumẽ?— akabu
29Jesusũ ana hatu yuikĩ:
—Deus benimawakinã, hatũ ea yununi besti ikũwãkãwẽ, ẽ eakirã— hatu wa
30-31betsabũ nĩkama ana yukakĩ:
—Mĩ Deus anuarã, nuku ikũwãmakatsirã, hawa hawẽ unãmati mĩ nuku ashũkĩ kayati wamatirumẽ, nũ mia hawẽ taeshũ ikũwanũbunã? Nukũ yusĩnã Moiséskiri mia yuinũ nĩkawe. Hanu tsua hiweabumanu nukũ shenipabu hatu iyuyama hari hiweabũ Deus anua maná duru butea pikubaunibuki. Haska wanibu kenekĩ: “Pimakĩ nai anua Moisés misi hatu pimakubaũpauniki”, inikẽ damiwakĩ Moisés mĩ binua ikai?— akabu
32—Txanima nai anua misi butunirã, ha Moiséskiri mã yuiairã, hatũ hatu pimama iniki. Hakia ẽ Epa Deusũ hatu pimakubaũpauniki. Hakia ikis nai anua habiaskari wakĩ misi kayabi ẽ Epa Deusũ matu inãkatsis iriaikiki. 33Ha misi Deusũ yurabu dasibi inãkatsi ikairã, ha nai anua butunitũ hatu dasibi hiwekuĩmatiruki— hatu wa
34hawẽ hãtxa nĩkabuma ana yukakĩ:
—Shanẽ ibuũ, haskakenã na misirã, hawẽtxaĩs nuku pimapakeshãwẽ— akabu
35Jesusũ ana hatu yuikĩ:
—Hiwekuĩmati misirã, habia ẽ eaki. Tsuabũra ea nĩkakĩ xinã betsa watã eki txiti ikaibu ẽ hatũ yushĩ kuxipa wa ana buniama keska ishãkanikiki. Ha inũ, tsuabũra ea ikũwãkĩ ẽ hãtxa nĩkakubainaibu ẽ hatu xinã txãkãwã ana ũpash manui tetsusinama keska ishãkanikiki. 36Haska ẽ matu yuiai keska ẽ akai uĩbiaxĩshũ mã ea ikũwãbumaki. 37-38Hakia ea yununitũ xinãnẽ aki ẽ huniki, emebi ẽ xinãnẽ aki huamarã. Haskakẽ tsuabura katushũ Epa Deusũ ea anu hatu peshukĩ ekiri yunua ikũwãkĩ ea haibuwakubaĩshãkanikiki. Ha inũ, ea ikũwaĩbu ẽ hatu danãtaskama ishanaii. 39Ea yununitũ xinãwẽ akinã, tsuabura ea anu yununi hawẽ heneai shabatiã hatu benuama hatu bestẽwãkĩ ẽ hatu tashnimashanaii. 40Dasibibũ Deusũ bake xinãkubaĩkĩ ikũwaĩ hiwekuĩa ma hayabuwẽ taeshũ hawẽ heneai shabatiã ẽ hatu bestẽwãshanaii, haska ẽ Epã xinaĩ yubakani keska meneshũkinã— hatu wakĩ
41“Deus anua misi butunirã, ẽ eaki”, iki daketapai itsakĩ hatu yuiaiwẽ taea judeu shanẽ ibubu hune Jesuski ha ikĩ yuaĩ 42yuinamei:
—Na hunirã, Josẽ bakeki, Jesusrã. Hawẽ ibu daberã, nukũ uĩbuki. Haskai: “Deus anua ẽ butuniki”, iki daketapaimẽkaĩ? —iake iakeaibũ
43hatũ xinã unãtã Jesusũ hatu yuikĩ:
—Matunã, hari hãtxakĩ ana ea yuãyamakãwẽ. 44-45Epa Deusũ ea yununitũ hatu kenamarã, ea haibuwatirubumaki. Hakia hatu kena ea ikũwaĩbu hawẽ heneai shabatiã ẽ hatu bestẽwãshanaii. Deusũ hãtxa Isaíasĩ keneni matu yuinũ nĩkakãwẽ: ‘Deusũ dasibi hatu yusĩkĩ meshtãmashanikiki’, aniki. Haskawẽ taeshũ tsuãra Deusũ hãtxa nĩkakĩ tapĩkubaĩmisshunã, ea haibuwakanikiki. 46Epa Deus tsuã mã uĩsmaki. Hakia Deus anua besti tashninitũ Epa Deus uĩniki.
47-48Hiwekuĩmati misirã, habia ẽ eaki. Txanima tsuabũra ea ikũwaĩ hiwekuĩkanikiki, ikibi ikirã. 49Ha inũ, hanu tsua hiweabumanushũ Deus anua misi matũ shenipabũ pibiakubaini atimas bika tenei mawanibuki. 50Hakia misi nai anua butunikiri ẽ hãtxaii. Na misi pikubaini ana mawatirubumaki. 51Nai anua butuni misi hiwearã, habia ẽ eaki. Tsuabũra na misi hiwea pikubaini hiwepakeshãkanikiki, ikibi ikirã. Na misi ẽ hatu inãshanairã, ẽ yura kayabiki. Haskawẽ taea na mai anu yurabu shukuabu tibi hawẽ hiwetirubuwẽ taeshũ ẽ yura kayabi ẽ hatu inãshanaii— akĩ hunea hãtxawẽ hatu yuiaya
52nĩkama e itã judeu shanẽ ibubu hãtxa tibiwẽ yuinamei ha ikaibũ:
—Haskakĩ nũ pinũ hawẽ nami nuku inãtirumẽ? Huni kuĩnẽ namirã, nũ pitaskatirumaki— ikaibũ
53habũ xinã unãkĩ Jesusũ ana hatu yuikĩ:
—Txanima matu yuinũ nĩkairakãwẽ. Matũ Hutxi Kayabi Iuwatũ nami piama inũ ẽ himi akamarã, mã hiwekuĩa hayatirumaki. 54Hakia tsuabũra ẽ nami pikĩ ẽ himi aki hiwekuĩshãkanikiki, ikibi ikirã. Ha inũ, hawẽ henea shabatiã ẽ hatu bestẽwãkĩ tashnimashanaii. 55Haska inũ, ẽ namirã, piti kayabiki. Ha inũ, ẽ himirã, nushuti kayabiki. 56Tsuabũra ẽ nami pi inũ ẽ himi akirã, ebe hiweaibũ eari hatube dasitã ẽ hiwekũkaĩshanaii. 57Haska inũ, Epa Deus hiwei ikibi ikatũ ea yununiwẽ taea hawẽ kuxipawẽ ẽ hiwekũkainaii. Habiaskariai tsuabũra ea pi ẽ kuxipawẽ hiwekubaĩshãkanikiki. 58Nai anua misi butunikiri ẽ hãtxaii. Matũ shenipabu hiwekĩ ha misi pikubauni mawanibu keskamaki, na misi ẽ matu yuiairã. Na misi pikubaini hiwekubaĩshãkanikiki, ikibi ikirã— hatu wakĩ 59Cafarnaum anu hanu itxati hiwe anushũ Jesusũ haska hatu yusĩayã
Jesus hamebi hiwea ikibi ini hayakiri hatu yusĩnikiaki, na hãtxarã
60hawẽ hãtxa nĩkatã Jesuski txiti ikabu itxapabu yuinamei:
—Na haska yuiairã, bikaki. Tsuã haska txibãkĩ ashũtirumaki— ikaibũ
61habu hakiri yuaĩbu unãkĩ Jesusũ hatu yukakĩ:
—Ẽ hãtxã matu dakewakĩ danãmaimẽkaĩ? 62Hanua ẽ huni anu hawẽri ẽ matũ Hutxi Kayabi Iuwa ẽ ana kai uĩkĩ mã xinã betsa washanaii. 63Shabakabi matu yusĩnũ nĩkakãwẽ. Ẽ yushinĩ hatu hiwemashanikiki. Hamẽ yurabũ hãtxawenã, hawa hatu hiwemakĩ kuxipa watirumahairaki. Ẽ hãtxa ẽ matu yuiairã, ẽ yushĩ keskaki. Mã ikũwãyã ẽ hãtxã matu hiwekuĩmaikiki— iwanã, 64-65yusĩkĩ taewabirãshuwẽ hawẽ hãtxa ikũwãbuma inũ tsuãra atximashanai unaĩwẽ taeshũ Jesusũ ana yuikĩ:
—Hamẽ matunã, betsa betsapabũ mã ea ikũwãbumaki. Haskakẽ: “Epa Deusũ matu kenama mã ea ikũwãtirubumaki”, akĩ ẽ matu yuishuki— ikaya
66haskawẽ taeshũ Jesuski txiti imisbu itxapabu niti iki baxikutã Jesusbe ana buama ikaibũ 67hakia nũ hawẽ 12 tsumabu nũ pashkabainabumakẽ Jesusũ nuku yuikĩ:
—Matũri mã ea henekatsi ikimẽkaĩ?— nuku wa 68-69Simão Pedrõ yuikĩ:
—Shanẽ Ibuũ, mia henebaĩ tsua mia keska nũ txibãtirumaki. Hiwekuĩmati hãtxa mĩ nuku yusĩmiski. Deusũ bake meribi peparã, habia mĩ mia nũ unaiĩ— aka
70Jesusũ nuku yuikĩ:
—Eãnã, ẽ matu katubiayama bestitxai yushĩ txakabu mã hayaki— nuku wa 71nũ hawẽ 12 tsumabu betsã Jesus hatu atximashanaiwẽ taea Simão Iscariotẽ bake Judaskiri xinãkĩ haska nukukiri hãtxaniki.
Currently Selected:
João 6: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.