João 10
10
Txashuwã mekemisbukiri miyuiwẽ Jesusũ hatu yusĩnikiaki, na hãtxarã
1ana Jesusũ hatu yuikĩ:
—Txanima ẽ matu yuiai nĩkakãwẽ. Tsuara txashuwã meketi shuiwẽ hikiama hamauri hawẽ keneki inakaĩ butumisrã, yumetsubuki. 2Hakia hanu hikiti shui kayabi bepẽshuni hikimisrã, txashuwã mekenika kayabiki. 3Hamẽ kene shui mekenikatũ txashuwã uĩkĩ bepẽshuna hawẽ ibuã txashuwã tibi hawẽ kenawẽ kenapakea hawẽ hui nĩkatã kaĩbiranaibũ 4hawenas kaĩmakĩ dasibi kenakĩ keyubaĩkĩ bepuaya hawẽ hui nĩkabaĩkĩ txibãmisbuki. 5Hanushũ huni betsã hatu iyunũ ishũ hatu kenariabaina hawẽ hui nĩkama txibãma pashai hamakiri bumisbuki— akĩ 6txashuwã miyuikiri hãtxa huneawẽ Jesusũ hatu yuikĩ hatu yusĩpaia tsuã nĩkabumahairawẽ taeshũ
Jesus txashuwã mekenika kayabi hakiri yusĩnikiaki, na hãtxarã
7judeu shanẽ ibubu Jesusũ ana hatu yuikĩ:
—Ikũkĩ ẽ matu yuiaii. Hanu txashuwã hikiti shuirã, habia ẽ eaki. 8Ẽ huriama habu dukũ bea dasibibu ẽ kenawẽ parananãkubaĩmisburã, yumetsu keskabukẽ txashuwã pepabũ hatũ hãtxa nĩkama ikubainibuki. 9Hakia hanu hikiti shuirã, ẽ eaki. Tsuara eanu hikiaibu ẽ hatu mekekubaĩshanaii, Deusunabu hatu wakinã. Txashuwã meke pehairawakĩ hatu bitxitã kaĩmakĩ basi pepa pimakĩ ẽ hatu ama keska wakubaĩshanaii. 10Huni itxakanikairã, yumetsukĩ detekĩ yamawai parananaĩ bemisbuki. Hakia hatu hiwekuĩmai ikibi imairã, ẽ ea huniki, unãnuma itxapa hatu inãkĩ yauxiama hatu kuxipa wairã. 11Earã, ẽ matũ mekenã pepaki. Mekenã pepatunã hawẽ txashuwã mekei yauxi mawashũtiruki. 12Hakia dayarũ pei binũ ika dayakĩ txashuwã mekeshunaya hanua kamã inu pubenẽ txashuwã pinũ ika huaya betxitã hawenamawẽ taea txashuwãki petxitã henebaini pashaya inawã bestibu atxikẽ hatiri pashai benumisbuki. 13Hanua dayaru txashuwãwẽ nuiama pei besti binũ ika mese huaya pashamisbuki. 14-15Haska inũ, Ẽ Epã ea unãnũ eãri ẽ Epa ẽ unaĩ keska wakĩ enabu txashuwã keskabu ẽ hatu unãyã habũri ea unãkanikiki. Haskakẽ ẽ mekenã pepawẽ taea enabu txashuwã keskabu ẽ hatu mawashũtiruki. 16Nenu besti enabumaki, na txashuwã kene anuarã. Hakia txashuwã betsaburi Deusũ ea ma yununiki. Israelbumabiakẽ haturi ẽ mekekubaĩshanaii. Ẽ hui nĩkaibu txashuwã shukua bestitxai mekenika bestitxaiya keska Israelbũ ea ikũwaĩbube Deusũ enabu dasibi ea iweshũshãkanikiki, hatuki dasi wakinã. 17Haska inũ, hawẽ mawati kuxipa inũ hawẽ bestẽti kuxipa ẽ Epã ea yununi ẽ hayaki. Ana bestẽkatsi ẽ hiwea yauxiama ẽ mawashanaiwẽ taea ẽ Epã ea abui ewẽ nuikiki. 18Haskakẽ tsuã ea debu watirumaki. Hakia ikatsis iki ibubis ẽ xinãnẽ ẽ debutiruki. Mawakĩ ẽ hiwea ẽ henexina ẽ ana bitiruki, ha kuxipa ẽ Epã ea yununiwẽ taearã— hatu waya
19Jesusũ hãtxa nĩkatã judeu shanẽ ibubũ xinã dabe wai pashkakĩ 20betsabũ yuikĩ:
—Yushĩ txakabu haya patapaki. Haskakĩ nũ nĩkakubaini ikanai?— hatu waibũ
21betsabũri yuikĩ:
—Yushĩ txakabu hayatũ pepa hãtxa yuitirumaki. Yushĩ txakabuyatunã, bekũ shushawatirumariki. Haskawẽ taea Jesus huni pepaki— ibaini buaibũ
Judeu shanẽ ibubũ Jesus danãnibukiaki, na hãtxarã
22-23hanua uitiã Jerusalém anu Deus kẽwãti Templo pewanibu xinaĩ besi nawaibutiã Templo hemaĩtĩ kesha anu hanu utai huĩrukuĩ tsauti txaipa hawẽ kena Salomão anu Jesus kai 24shanẽ ibubũ bebũteshũ yukakĩ:
—Hatishuĩra nũ ana hamẽ bika teneyamanũ menã hawa kuxi shabakabi nuku yuiriwe, habia mĩ nukũ Messias Cristomẽkainã— akabu
25Jesusũ hatu kemakĩ yuikĩ:
—Matunã, ẽ matu yuia mã ea ikũwãma ikimaki. Ẽ Epã kuxipawẽ hawara pepa shabakabi ẽ amiswẽ taeshũ ẽ tsuamẽkaĩ mã ea unãtiruki. 26Hakia mã ẽ txashuwãmawẽ taeshũ mã ea hawa ikũwaĩsmaki. 27Ẽ txashuwanẽ ea unãkĩ ẽ hui nĩkakĩ ea txibãbainaibu eãri ẽ hatu unaiĩ. 28Eki txiti ikabu benuama ẽ hatu hiwekuĩmakubaĩshanaii. Parãshũ tsuã hatu ea mebiãma ishanikiki. 29Ha inũ, tsuabura ẽ Epa kuxipa dasibi binuatũ habu ea yunua hatuwẽ nuikĩ ẽ hatu mekehairakubainai tsuã ea hatu mebĩtirubumaki. 30Ea inũ ẽ Epa Deus ha dabe nũ bestitxai keskaki, dapashkanaismarã— hatu wa 31mixki tũkuwẽ tsakanũ ishũ judeu shanẽ ibubũ bitanaibũ 32hatuki dateama Jesusũ ana hatu yuikĩ:
—Epa Deus anua dami mirima pepa ẽ matu uĩmamiski. Haratu damiwẽ taeshũ mã ea tsakanũ ika ikanai?— hatu wa
33—Pepawẽ taeshũ nũ mia tsakamaki. Hakia huni bestibia mimebi mĩ hãtxawẽ: “Ẽ Deuski”, ikĩ mĩ Deus itxaiwẽ taeshũ nũ mia aki ikaii— akabu
34ana hatu yuikĩ:
—Manakãwẽ. Ẽ Deus itxamaki. Deusũ hãtxa yuishunikatũ kenekĩ: “Ha irabeaibu pewanika hatu wakĩ Deusũ hawẽ hãtxa hatu yunukĩ yuikĩ: ‘Mã hatu merabewakubainairã, mã deusbuki’, ikĩ Deusũ hatu yuiniki”, akĩ hatu keneshuniki, na kenerã, nũ unãkanaii. 35Haskawẽ taeshũ mã danãtirubumaki. Haskakẽ hawẽ hãtxa hatu yunukĩ: “Mã deusbuki”, aki nishũ 36Deusũ ea meribi washũ yurabu anu ea yununirã, eã yuikĩ: “Ẽ Deusũ bakeki”, ẽ ikaiwẽ taeshũ: “Mĩ Deus itxaii”, ikĩ ea txitekĩ mã kaneaii. 37Hamẽ ẽ Epã pepawai keska ẽ akamakenã, ẽ hãtxa ikũwãyamakãwẽ. 38Hakia ẽ Epã pepawai keska ẽ akai ẽ hãtxa mã ikũwãma ibiakĩ ẽ Epã kuxipawẽ ẽ dami pepawai ikũwãkãwẽ. Ha dami ikũwãkĩ ẽ Epa ebe imis inũ ẽ haberi imis mã unãtirubuki— hatu waya
39ana atxipanãbũ Jesus pashai 40Jordão Hene pukei hanushũ Naximanika Joãonẽ hatu naximakĩ taewani anu nũ habe kakẽ 41ana mirima hari yurã kaiã haki shukuabu hatu yusĩa yuinamei:
—Joãonẽ damiwamabia dasibi Jesuskiri nuku yuixinarã, txanimaki— ikĩ 42harishũ itxapabũ Jesus ikũwãnibuki.
Currently Selected:
João 10: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.